Wɛ́ɖɛ́ 147 - Ɓǎsɔ́ɔ̀ Báɓòɔ̀

Kpé-séín-ɓéɖé-Gèɖèpɔ́ɔ̀ ɓàìn-ɓàìn

¹ Ɓě ɓàìn Bounɓoɔ̀. Ɔ kpa ɖɛ ɓɛ́ nyɔ ké à Gèɖèpɔ́ɔ̀ ɓàìn-wɛ̀ɖɛ̀ gbo ɓèɖèìn. Ɔ nɔ̀mɔ̀ dyíin, ké ɔ sɛ́ɖɛ́ìn dyí, ɓɛ́ nyɔ ké ɔ ɓàìn.

² Bounɓoɔ̀ mɔ̀ nyɔ po Jùɖúsɛ̀ɖɛ̀ìn-hwɔ̀ɖɔ̀ɔ̀ ɖe. Ɔ ɖǎ toɛ̀-kpɔ̃-nyɔ̀ ɓě mɔ̀à Éézùɖùɛ̀-nyɔ̀ ɓěɔ̀ kɛɛ dyí poìn ɖe.

³ Ɔ kánáìn nyɔ ɓě kɔ̃̀ hwòɖǒ kpá ɖé ɖeiɛɛ dyi, ké ɔ po waà puà-bɛ̃̀ ɓěɔ̀ kũùn dyí.

⁴ Ɔ dyuò dɛ̀nɛ̀ mɛ́nɛ́ɛ́ jĩ̀ kà ɔ mɔ́ ɖé dyɔɔ̀ dyíɛ, ké ɔ jǔìn wa ɖò-ɖò séín nyɛ́nɛ́.

⁵ À Ɖɛɓíɔ́ɔ̀ kpé ɓúá dyí mìɔ, ké ɔ hwòɖǒ-fɔ̀nɔ̀-fɔ̀nɔ̀ɔ̀ jè se kɔ̃in zaìn ɓɛ́ìn.

⁶ Bounɓoɔ̀ mɔ̀ gǎ-dyé-nyɔ̀ ɓě dyií-dyi-kpɔ̃-nyɔ̀, ké ɔ mɔ̀ hwòɖǒ-kɔ̃in-nyìnììn-nyɔ̀ ɓě ɓíɖíi-dyi-po-nyɔ̀.

⁷ Ɓě ɓèɖèìn Bounɓoɔ̀ gbo, ɓɛ́ ɓě ké ɔ zùo po. Ɓě ɓaɖa gbǎɖí, ɓɛ́ ɓě ké à Gèɖèpɔ́ɔ̀ gbo ɓèɖèìn.

⁸ Ɔ nyuɛ ké ní-kpò dyíìn ɖé dyɔɔ̀ dyíin. Ɔ nyuɛ ké ní ɖàɓàìn ɓóɖó-kpàà kɔ̃, ké ɔ nyuɛ ké pìǐ mɛ ɖé toɖo ɓěɔ̀ dya.

⁹ Ɔ mɔ̀ nyúà-ɖɛ̀ ɓěɔ̀ ɖii-ɖɛ̀ nyí-nyɔ̀, hwɛ̀ ḿ po níiń, hwĩ́ín-hwã-dyù ɓěɔ̀ ti wa nì ɖáuń wɛ̃.

¹⁰ Ɔ se sǒ nììn kpéɔ̀ hwòɖǒ múin dèìn, hwɛ̀ ḿ po níiń, nyɔǔn-dyùɛ̀ nà-ɓò.

¹¹ Kɛɛ ɖɛ ɔ hwòɖǒ dèìn múin nyɛɛ mɔ̀ nyɔ ɓě ɓɛ́ wa dyé ɔ kpéín, ɓɛ́ wa dè ɔ ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ hwòɖǒ kɔ̃ɛ.

¹² Ɓě mɔ̀ Jùɖúsɛ̀ɖɛ̀ìn-nyɔ̀ ɓě, mɔ̀à Zádyɔún-nyɔ̀ ɓěɛɛ, ɓě ɓàìn Bounɓoɔ̀. Ɓě ɓàìn ɓěɛ̀ Gèɖèpɔ́ɔ̀.

¹³ Bounɓoɔ̀ mɔ̀ ɓěɛ̀ gmɔ-wɔ̃̀ ɓěɔ̀ gbǎìn-ɖɛ̀ ɓěɔ̀ dyi-kùìn-nyɔ̀. Ɔ mɔ̀ ɓěɛ̀ dyú ɓě mana-kɔ̃-po-nyɔ̀.

¹⁴ Ɔ nyuɛ ké gìɖìǐ nì ɓě wáká séín kɔ̃, ké ɔ nyí ɓě ɖii-ɖɛ̀ɔ̀ nyɔ kpa ɖɛ kɛ.

¹⁵ Ɔ tò ɔ wuɖuɔ̀ ɖé ɓóɖó-kpàà kɔ̃, ké ɓóɖó-kpàà nyu ɔ wuɖuɔ̀ wàɖà.

¹⁶ Ɔ nyuɛ ké sɔ̃̀ɔ̀-kpò wáɖá ɓóɖó-kpàà kɔ̃, ké ɔ ɓáìn ɓóɖóɔ̀ kɔ̃in kà ɓáɖáá-mì púú nìà kɛ. Ɔ mɛ́nɛ́ìn dunu kuún-kuún dyi, ké ɔ nì kà tĩ́ɔ-pɛ̀ɛ̀ nìà kɛ.

¹⁷ Ɔ wáɖá sɔ̃̀ɔ̀-kpò ɓíɖíi kà sɔ́ɔ́-kpò nìà kɛ. Nyɛ́ ɓɛ́ìn ɔ sɔ̃̀ɔ̀ dyúa dyi nyànàà kɛ́?

¹⁸ Ɔ dyi wùɖù nyɛ̀nɛ̀ɛ̀ ní, sɔ̃̀ɔ̀-kpò ɓěɔ̀ ɖe ɓó ɓíɖíi dyi nyɛ̀nɛ̀ɛ̀. Ɔ nyuɛ ké pìɔ̌ ɓaɖa, ké ní ɓěɔ̀ ɖú zi kpàǐ.

¹⁹ Ɔ ɖǎ ɔ ná-wùɖù mɔ̀à ɔ gma ɓěɔ̀ kɛɛ Éézùɖùɛ̀-nyɔ̀ ɓě mɔ̀à Jékɔ̀ɛ̀ xwíníín-dyù ɓěɔ̀ kɛɛ nyí.

²⁰ Ɔ séèɛ̀ náa ɓóɖó-dù kà kò ɖòɛ̀ nyɔ ɓěɔ̀ bũ̌ nyu ɖò. Wa se ɔ gma ɓěɔ̀ dyuò. Ɓě ɓàìn Bounɓoɔ̀.