Wɛ́ɖɛ́ 146 - Ɓǎsɔ́ɔ̀ Báɓòɔ̀

Gèɖèpɔ́ɔ̀ ɓàìn-ɓàìn ɓá ɔ nyɔ póìn jè dyíɛ

¹ Ɓě ɓàìn Bounɓoɔ̀. Ní mu Bounɓoɔ̀ ɓàìn.

² Ní mu Bounɓoɔ̀ ɓàìn kà ní mu toɖo kɔ̃ cĩ́ìn keɛ. Ní mu ní Gèɖèpɔ́ɔ̀ ɓàìn-wɛ̀ɖɛ̀ gbo ɓèɖèìn kà ní fɛ̀ɛ̀ɔ̀ nì ḿ mú keɛ.

³ Ɓěǐn ɖá ɓɛ́ ɓě ké nàìn-nyɔ̀ ɓě mɔɔ nyɔ tɔ̀ɔ̀ ɓě hwìɖǐǐ taɓa. Wa mɔ̀ nyɔ ɓě seà ɓě póɛ̀n ɓɛ́ìn nyɛ.

⁴ Ti ɓɛ́ waà fɛ̀ɛ̀ɔ̀ mu wa mú sɔ̀ùn wɛ̃ɛ, wa mu ɖé ɓóɖó kɔ̃̀ hwuɖu wa sɔ̀ ma kɛɛ ɖe. Wa nììn dyí-sɔ́-ɖɛ̀ séín ɓěɔ̀ kpá ɓɔ́í ɓó wé déínɔ̀ ɓaɖa.

⁵ Mana nì nyɔ ɓɛ́ ɔ kɔ̃̀ gbo-kpá-kpá sɔ̀ìn ɖé Jékɔ̀ɛ̀ Gèɖèpɔ́ɔ̀ múɛɛ kɔ̃. Ɔ mɔ̀ nyɔ ɓɛ́ ɔ dè Bounɓo mɔ̀à ɔ Gèɖèpɔ́ɔ̀ kɛɛ hwòɖǒ kɔ̃ɛ.

⁶ Gèɖèpɔ́ɔ̀ mɔ̀ nyɔ mɛà dyɔɔ̀ kè ɓóɖó-kpàà kè dyóóɔ̀ kè ɖɛ séín nì ɖéɛ kɔ̃ɛ. Ɔ mɔ̀ nyɔ ɓɛ́ ɔ kpɔ̃à ɔ wuɖuɔ̀ kɔ̃in kánáá pū kɛ.

⁷ Ɔ mɔ̀ nyɔ ɓě ɓɛ́ wa pĩ́à dyiɛɛ bìì zaa-wɔ̃-po-nyɔ̀ dyí-sɛ́ɖɛ́ìn-kà. Ɔ mɔ̀ nyɔ ɓě ɓɛ́ mɔ́ nyuɛɛ ɖii-ɖɛ̀ nyí-nyɔ̀. Bounɓoɔ̀ mɔ̀ nyɔ ɓě nì kpɔɖɔ ɖeín nyɛɛ buɛ̀-nyɔ̀.

⁸ Ɔ mɔ̀ nyɔ ɓě ɓɛ́ wa kpè dyéɖéín dyiɛɛ dyéɖé-kaà-nyɔ̀. Ɔ mɔ̀ nyɔ ɓě ɓɛ́ wa kpá ɓíɖíi dyiɛɛ dyí-sɔ̀ìn-nyɔ̀. Ɔ mɔ̀ nyɔ ɖɛ̀ɓɛ̀ dyí-sɛ́ɖɛ́ìn-nyɔ̀ ɓěɔ̀ mú.

⁹ Bounɓoɔ̀ mɔ̀ ɖéè ɓěɔ̀ dyí-gmɔ̀-nyɔ̀. Ɔ mɔ̀ jɔ̌ɔ̀-nyɔ̀nɔ̀ ɓě kè xwíè-dyù ɓě dyií-dyi-kpɔ̃-nyɔ̀. Kɛɛ ɔ gbɔɔ̀ hwòɖǒ-kɔ̃in-nyìnììn-nyɔ̀ ɓěɔ̀ mú.

¹⁰ Bounɓoɔ̀ mu wuɖuí-kɔ̃̀-nyɔ̀ jǔùn kánáá pū. Zádyɔún-hwɔ̀ɖɔ̀ wè, nì Gèɖèpɔ́ɔ̀ mu xwéɖé-dù deìn dúún ɓě wuɖuí kɔ̃̀ùn. Ɓě ɓàìn Bounɓoɔ̀.