Wɛ́ɖɛ́ 145 - Ɓǎsɔ́ɔ̀ Báɓòɔ̀

Gèɖèpɔ́ɔ̀ ɓàìn-wɛ̀ɖɛ̀

Dèɓéɛ̀ Gèɖèpɔ́ɔ̀ ɓàìn-wɛ̀ɖɛ̀

¹ Óó Gèɖèpɔ́ɔ̀, mɔ̀ mɔ̀à ní kã́á kɛɛ, ní mu m̀ dya dèìn, ké ní mu nì nyɛ́nɛ́ɔ̀ ɓàìn ɓó sè-ná-sèɛ̀ tiín.

² Ní mu m̀ ɓàìn ɓó wé séín. Ní mu nì nyɛ́nɛ́ɔ̀ ɓàìn ɓó sè-ná-sèɛ̀ tiín.

³ Bounɓo, nì kpé ɓúá dyí mìɔ, ké m̀ ɓɛ́ìn kpé ɓɛ́ m̀ ké ɓàìn-ɓàìn vɛ̀nɛ̀ dyé. Nyɔ ɖò se nì kpé vɛ̀nɛ̀ɔ̀ jè múin wɔ̃́ɔ ɓɛ́ìn.

⁴ Wa mu ɖɛ ɓě ɓɛ́ m̀ ɖǎà nyuɛɛ ɓàìn ɖé xwéɖé-dù deìn dúún ɓě mú. Wa mu nì ɖɛ dĩ́ín-dĩ̀ìn vɛ̀nɛ̀ɔ̀ jè cɛ̃ìn.

⁵ Ní mu nì dĩ́ín-dĩ̀ìn vɛ̀nɛ̀ɔ̀ kè nì dya dè jè hwìɖǐi nàìn.

⁶ Nyɔǔn-dyù mu kpé vɛ̀nɛ̀ nì ɖé ɖɛ ku kɔ̃in ɓě ɓɛ́ m̀ ɖǎà nyuɛ múɛɛ jè zio mú pòìn, ké mɔ́ún mu nì kpé vɛ̀nɛ̀ɔ̀ jè cɛ̃ìn.

⁷ Wa mu nì kpeɖeɛ̀-dyíin-nɔ̀mɔ̀-nɔ̀mɔ̀ ɓáún-ɓáúnɔ̀ bɔ̃̌ dyi poùn, ɓɛ́ wa ké ɓeɖe ɓá nì dyí-sɛ́ɖɛ́ìn-sɛ́ɖɛ́ìnɔ̀ jè dyí.

⁸ Bounɓo, mɔ̀ mɔ̀ jĩ́á-jè kè wìì Gèɖèpɔ́ɔ̀. Nì dyoɖo-hwòɖò mɛɛ̀ ní, ké ɖɛ̀ɓɛ̀ǐn-ɖɛ̀ɓɛ̀ǐn dyíìn ɖé m̀ múin.

⁹ Nì kpeɖe nɔ̀mɔ̀ dyíin ɓó nyɔ séín gbo, ké m̀ dyé nì mɛɛ-ɖɛ̀ séín ɓěɔ̀ wìǐn.

¹⁰ Bounɓo, ɖɛ séín ɓɛ́ m̀ mɛɛ mu m̀ zùo poùn, ké nì nyɔ séín ɓěɔ̀ mu m̀ ɓàìn.

¹¹ Wa mu nì kã́á-ɓòɖòɔ̀ dĩ́ín-dĩ̀ìnɔ̀ jè cɛ̃ìn, ké wa mu nì kpéɔ̀ bɔ̃̌ dyi poùn,

¹² ɓɛ́ nyɔ séín ké ɖɛ dĩ́ín-dĩ̀ìn ɓě ɓɛ́ m̀ ɖǎà nyuɛ kè nì kã́á-ɓòɖòɔ̀ dĩ́ín-dĩ̀ìn vɛ̀nɛ̀ɔ̀ jè dyí dyuò.

¹³ Nììn kã́á-ɓòɖòɔ̀ mu nììn kánáá pū, ké nì nyɔ-wuɖuí-kɔ̃̀-kpèɔ̀ mu nììn kánáá pū ɖé xwéɖé-dù deìn dúún ɓě mú. Bounɓoɔ̀ nyu ɖɛ séín ɔ ɖáìn nyɔ nyɛ́nɛ́ín nyɛɛ ní, ké ɔ kpeɖe nɔ̀mɔ̀ dyíin ɖé ɔ nyuu-ɖɛ̀ séín mú.

¹⁴ Bounɓoɔ̀ kpɔ̃ nyɔ séín ɓě ɓɛ́ wa nì dyi kpáuń wɛ̃ɛ dyií dyi, ké ɔ sɔ̀ìn nyɔ séín ɓě ɓɛ́ wa kpá dyiɛɛ dyí.

¹⁵ Bounɓo, ɖɛ séínɛ̀ dyéɖé nì m̀ dya, ké mɔ̀ mɔ̀ wa ɖii-ɖɛ̀ nyí-nyɔ̀ ɓó ti ɓɛ̀ɖɛ̀ìn dyíɔ̀ mú.

¹⁶ M̀ ɓáà nì xwaɔ̀ dyí ɖé wa gbo, ké m̀ dè fɔ̀ɔ̀-ɖɛ̀ séín hwòɖǒ dyi dyììn ɖé ɖɛ ɓě ɓɛ́ wa mɔ́ɛɛ tò-tò mú.

¹⁷ Bounɓoɔ̀ nyuu-ɖɛ̀ séín sɛ́ɖɛ́ìn dyí, ké ɔ kpeɖe nɔ̀mɔ̀ dyíin ɖé ɔ nyuu-ɖɛ̀ séín ɓěɔ̀ mú.

¹⁸ Bounɓoɔ̀ se nyɔ séín ɓě ɓɛ́ wa ɖá ɔ ɖé jǎà múɛɛ bũ̌in tɔmɔìn.

¹⁹ Nyɔ séín ɓě ɓɛ́ wa dyé ɔ kpéín nyɛɛ, ɔ nyí wa waà mɔ́ɔ́-ɖɛ̀ ɓěɔ̀ ní. Ɔ wɔ̃́ waà kpé-po-wùɖù, ké ɔ póìn wa.

²⁰ Bounɓoɔ̀ gmɔ̀ nyɔ séín ɓě ɓɛ́ wa ɖɛ̀ɓɛ̀ ɔ múɛɛ dyí, kɛɛ ɔ mu hwòɖǒ-kɔ̃in-nyìnììn-nyɔ̀ séín ɓěɔ̀ mú gbɔɔ̀ùn.

²¹ Bounɓoɔ̀ ɓàìn-ɓàìn mu ḿ wĩín nììn. Nyɔ séín mɛ ɓàìn ɔ nyɛ́nɛ́ hwɛ̀ǐn-hwɛ̀ǐnɔ̀ ɓó sè-ná-sèɛ̀ tiín.