Wɛ́ɖɛ́ 144 - Ɓǎsɔ́ɔ̀ Báɓòɔ̀

Kã́áɔ̀ po Gèɖèpɔ́ɔ̀ zùo ɓó to ɖu jè

Dèɓéɛ̀ wɛ́ɖɛ́

¹ Ɓàìn-ɓàìn mɛ nì Bounɓo mɔ̀à ní dyí-gmɔ̀ìn-sɔ̀ɔ̌-kpòɔ̀ kɛɛ kɔ̃. Ɔ tɛ̀mɛ̀ìn ḿ to-vɔ̃-vɔ̃.

² Ɔ mɔ̀ ní ɓǎto kánáá pū, ké ɖé ɔ gbo mɔ̀ ní to-pèɖèìn-naín. Ɔ mɔ̀ ní dyí-gmɔ̀ìn-pà kè ní póìn-nyɔ̀. Ɔ mɔ̀ dyí-zĩ̀ìn-ɖɛ̀ kɔ̃̀ ɖeín ɓɛ́ ḿ ké vǐè kɛ. Ɔ mɔ̀ nyɔ po ɓóɖó-dù ɓěɔ̀ ḿ xwíɖíi.

³ Bounɓo, ɖɛ́ nyɔǔn-dyù kpaá, ɓɛ́ m̀ dyià ɖé wa jè gbo kɔ̃̀ kɛ́? Ɖɛ́ nyɔǔn-dyù ɓě kpaá, ɓɛ́ m̀ dyià wa jè hwìɖǐi poìn nyɛ́?

⁴ Nyɔǔn-dyù nì kà fɛ̀ɛ̀ ɓɛ́ nyɔ zàà kɛɛ nìà kɛ. Ɔ fɛ̀ɛ̀-wè ɓěɔ̀ nì pū kà dyóɖó dyi fã ní, ɔ zùùɔ̀ nìà kɛ. Nìǒ kpã́ún ní, ɔ ɖǎ ɓó dyi pa.

⁵ Bounɓo, fá dyɔɔ̀ wɔ̃, ɓɛ́ m̀ ké ɓíɖíi sí. Tìnììn toɖo vɛ̀nɛ̀ ɓěɔ̀ dyi, ɓɛ́ wa ké ɓú.

⁶ Ɖoɓo nì wɛ́ɖɛ́-wɛ́ɖɛ́ɔ̀ kà sé-kpìì nìà kɛ, ɓɛ́ ɔ ké ní mú-nyɛ́-nyɔ̀ ɓěɔ̀ dyi gbɛ̀ìn.

⁷ Sɔ̀ ɖé dyɔún, ɓɛ́ m̀ ké ḿ níɔ zà. Póìn ḿ sɔ̀ìn ɖé ɓóɖó-dù kà kò ɖò ɓěɛ̀ nyɔ ɓěɔ̀ xwaún.

⁸ Wa mɔ̀ nyɔ ɓě kɔ̃̀ wɔ̃ mɔ̀à se-tɔ́mɔ́-nyɔ̀ kɛ, hwɛ̀ ḿ po níiń, ti wa mu wuɖu ɖiìn nyɛ.

⁹ Óó Gèɖèpɔ́ɔ̀, ní mu m̀ wɛ́ɖɛ́ ɖìè ɖò gbo ɓèɖèìn. Ní mu gbǎɖí ɓéɖé ɖúú ɓaɖa-bùèɔ̀ ɓaɖaùn ɓó m̀ bìì,

¹⁰ sepóɛɖé mɔ̀ mɔ̀ kã́á ɓě to-ɖu-ɖu nyí-nyɔ̀, ké mɔ̀ mɔ̀ nyɔ póìn mɔ̄ Dèɓé mɔ̀à nì gbo-nì-nyɔ̀ɔ̀ kɛ.

¹¹ Póìn ḿ sɔ̀ìn ɖé hwòɖǒ-kɔ̃in-nyìnììn-nyɔ̀ ɓěɔ̀ gàsíàɔ̀ xwaún, ɓɛ́ m̀ ké ḿ póìn sɔ̀ìn ɖé ɓóɖó-dù kà kò ɖò ɓěɛ̀ nyɔ ɓěɔ̀ xwaún. Wa mɔ̀ nyɔ ɓě kɔ̃̀ wɔ̃ mɔ̀à se-tɔ́mɔ́-nyɔ̀ kɛ, hwɛ̀ ḿ po níiń, ti wa mu wuɖu ɖiìn nyɛ.

¹² À dyú-gàà ɓěɔ̀ mɛ nì kà ɓáá-ɖɛ̀ wóɖóún-wóɖóún nìà kɛɛ ɖé waà nyɔ-gmɔ̀-tìɔ̀ mú. Ké à dyú-màà ɓěɔ̀ mɛ nì kà gãún-cùè-ɓò ɓɛ́ wa nɔ̀mɔ̀ìn xwa ɓó kã́á-gbò ɖò bììɛɛ nìà kɛ.

¹³ Ɖii-ɖɛ̀ kã̀ìn séín mɛ dyíìn à sáɖá ɓěɔ̀ múin. À ɓáɖáá ɓěɔ̀ mɛ wa dyú táázĩ̀ìn kúɖúú ɓě ɖé à geɖe ɓěɔ̀ gbo.

¹⁴ À ɓìɖǐ ɓěɔ̀ mɛ wa dyú kúɖúú. Xwíɖí mɛ ɓɔ́ ɖò wɔ̃ sɔ̀ɔ̀, mɔɔ ké ɖòɛ̀ dyú mɛ ɓɔ́ mɛ́ɛ. Wìì-kpě-po-wùɖù ɖò mɛ ɓɔ́ dyí sɔ̀ɔ̀ ɖé à hwɔɖɔ ɓěɔ̀ píé hwòɖǒǔn.

¹⁵ Mana nì nyɔ ɓě ɓɛ́ wa mu mana nì kà ɓěɛ̀ dyéìn nyɛɛ kɔ̃. Mana nì nyɔ ɓě ɓɛ́ Bounɓoɔ̀ mɔ̀ waà Gèɖèpɔ́ɔ̀ kɛɛ kɔ̃.