Wɛ́ɖɛ́ 143 - Ɓǎsɔ́ɔ̀ Báɓòɔ̀

Ɓaà-wùɖù ɓá gbo-kpá-kpá jè dyíɛ

Dèɓéɛ̀ wɛ́ɖɛ́

¹ Óó Bounɓo, wɔ̃́ ní ɓaà-wùɖùɔ̀. Tò ní kpé-po-wùɖùɔ̀ ɖùǔ gbo. Jǔ ní ɓaà-wùɖùɔ̀ gɔ̃̌ dyììn ɖé nì jǎà-ɖɛ̀-nyu-nyuɔ̀ kè nì dyí-sɛ́ɖɛ́ìn-sɛ́ɖɛ́ìnɔ̀ mú.

² Mɔ̀ǔn ɖá m̀ ké mɔ̄ mɔ̀à nì gbo-nì-nyɔ̀ɔ̀ kɛɛ ɓó nì zaa-wɔ̃-po-poɔ̀ dyúa dyà, sepóɛɖé nyɔ ɓě nì cĩ́ɛń nyɛɛ ɖò se dyí sɛ́ɖɛ́ìn ɓó m̀ dyúa.

³ Ní mú-nyɛ́-nyɔ̀ ɓěɔ̀ kpá ḿ kíɖíí, ké wa wàìn ḿ ɓó ɓíɖíi dyi. Wa nyuɛ ké ḿ kò tíe-kpò mú dyi, kà nyɔ ɓě ɖǎǒ zɔ̃̌ɔ̀ kà mɛ́ɛ nìà kɛ.

⁴ Ɔ jèɛɛ, ḿ se hwòɖǒ-po-naín ɖò ɓéɖé ɖe. Ní hwòɖǒɔ̀ ɖǎ ɖé ɖei kpá.

⁵ Ti sùà ɓě nìǒ zɔ̃̌ɔ̀ kɛɛ jè dyi ḿ hwìɖǐi, ké ḿ nàìn ɖɛ séín ɓɛ́ m̀ ɖǎ nyuɛɛ jè hwìɖǐi. Ḿ poìn ɖɛ ɓě ɓɛ́ nì sɔ̃ɔ̀ ɖǎ nyuɛɛ jè hwìɖǐi.

⁶ Ḿ tò ní sɔ̃ɔ̀ dyií ɖé m̀ gbo. Nì tó nì ḿ nyuɛń mìɔ kà ɓóɖó dyɛ kɔ̃in mɔ́à níɛɛ nìà kɛ.

⁷ Bounɓo, jǔ ḿ gɔ̃̌ wàɖà. Ḿ se hwòɖǒ-po-naín ɖò ɓéɖé ɖe. Mɔ̀ǔn ɖá m̀ ké ḿ dyúa xwáɖáún pòìn, mɔ́ún kɔ̃̀ ɖà nì kà nyɔ ɓě ɓɛ́ wa poà ɖé xwɛ́-ɓìɔ̀ múɛɛ nìà kɛ.

⁸ Dyà nì ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ jè ḿ hwìɖǐi ɓó gànà-kṹún, sepóɛɖé mɔ̀ mɔ̀ nyɔ ḿ taɓa hwìɖǐǐ. Zàìn ḿ hwìè ḿ kɔ̃̀ ɓɛ́ ḿ ké kpa kɛɛ da, sepóɛɖé mɔ̀ mɔ̀ nyɔ ḿ nì ɓaàǔn.

⁹ Bounɓo, ɖé m̀ gbo mɔ̀ ní vǐè-naín. Póìn ḿ sɔ̀ìn ɖé ní mú-nyɛ́-nyɔ̀ ɓěɔ̀ xwaún.

¹⁰ Tɛ̀mɛ̀ìn ḿ kà ḿ ké nì mɔ́ɔ́-ɖɛ̀ nyuɛ, sepóɛɖé mɔ̀ mɔ̀ ní Gèɖèpɔ́ɔ̀. Nì jĩ́á-jè Zùùɔ̀ mɛ kpàìn ḿ hwìè ɓɛ́ ɔ se toɖo ɖò ɓéɖéɛɛ xwíníín.

¹¹ Bounɓo, póìn ní fɛ̀ɛ̀ɔ̀ ɓó nì nyɛ́nɛ́ɔ̀ jè. Zà ḿ fũ̀à-fṹá-tì mú dyììn ɖé nì kpeɖeɛ̀-dyíin-nɔ̀mɔ̀-nɔ̀mɔ̀ɔ̀ mú.

¹² Sámá ɓó ní mú-nyɛ́-nyɔ̀ ɓěɔ̀ dyi dyììn ɖé nì ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ mú. Gbɔɔ̀ ní gbo-vɔ̃-nyɔ̀ séín ɓěɔ̀ mú, sepóɛɖé ḿ mɔ̀ nì gbo-nì-nyɔ̀.