Wɛ́ɖɛ́ 142 - Ɓǎsɔ́ɔ̀ Báɓòɔ̀

Ɓaà-wùɖù ɓá gbo-kpá-kpá jè dyíɛ

Dèɓéɛ̀ wɛ́ɖɛ́ kpa ɖɛ kè ɔ ɓaà-wùɖù ti ɓɛ́ ɔ nì ma ɖé wɔ-ɓì ɖò múɛ

¹ Ḿ pòìn Bounɓoɔ̀ kpéi. Ḿ ɓaà ɔ kóɖó-kóɖó.

² Ḿ púè ní ka-ka ɓěɔ̀ ɓó ɔ dyúa. Ḿ cɛ̃ ní fũ̀à-fṹá-ɖɛ̀ ɓěɔ̀ ɔ gbo.

³ Ti ɓɛ́ ḿ se hwòɖǒ-po-naín ɖò ɓéɖé ɖeɛɛ, nìí, nì zàìn ḿ hwìè da. Wa ɖǎ xwáɖá gbǎ ɓó ḿ bìì, ɓó hwìè ɓɛ́ ní kpa kɛɛ dyí.

⁴ Ti ḿ gmɔ̀ ɓó ḿ ɖiaún wɛ̃ɛ, ḿ dyéɛ ní kà nyɔ ɖò se ɓó nì ɓɛ́ ɔ ké ɖé ḿ jè gbo kɔ̃̀ɛ. Ḿ se vǐè-naín ɖò kɔ̃̀. Nyɔ ɖò se nì ɓɛ́ ɔ ké ní fɛ̀ɛ̀ɔ̀ dyí gmɔ̀.

⁵ Bounɓo, ḿ pòìn m̀ kpéi. Ɖé m̀ gbo, ɖé mɔ̀ ní vǐè-naín. Mɔ̀ mɔ̀ ɖɛ séín ní mɔ́ nɔ̄ nyɔ ɓě nì cĩ́ɛń nyɛɛ hwìɛ̀ kɛ.

⁶ Wɔ̃́ ní kpé-po-wùɖùɔ̀, sepóɛɖé kpé ɖò se ḿ dyí nì ɖe. Póìn ḿ sɔ̀ìn ɖé ní gǎ-dyéìn-nyɔ̀ ɓěɔ̀ xwaún, sepóɛɖé wa ɓéɖé kpé ké wa zi ḿ dyí.

⁷ Zà ḿ kpɔɖɔ nìà kɛ ɖeín, ɓɛ́ ḿ ké m̀ zùo po. Ɔ dyi ná nìǐn, dyí-sɛ́ɖɛ́ìn-nyɔ̀ ɓěɔ̀ mu ḿ wɔ̃ gbǎìn, ɓó nɔ̀mɔ̀ dyíin jĩ̀ kà ɓɛ́ m̀ nyu ḿ dyíɛɛ jè.