Wɛ́ɖɛ́ 141 - Ɓǎsɔ́ɔ̀ Báɓòɔ̀

Hwìo-ɓàà-wùɖù

Dèɓéɛ̀ wɛ́ɖɛ́

¹ Óó Bounɓo, ḿ nì m̀ ɖáuń. Dyi ḿ gbo wàɖà. Ḿ dyi m̀ ɖá ní, tò ní wuɖuɔ̀ ɖùǔ gbo.

² Ní ɓaà-wùɖùɔ̀ mɛ hwɔìn nyɔ́ún-nɔ̀mɔ̀-ɖɛ̀ ɖé m̀ gbo, ɓɛ́ ní sɔ̃-dyií-tò-tòɔ̀ ké hwìo-sàǎ-zàìn-ɖɛ̀ hwɔìn.

³ Bounɓo, gmɔ̀ ní wɔ̃ɔ̀ dyí. Gmɔ̀ ḿ dyí, mɔ́ún kɔ̃̀ ɖà ɖɛ gbà ɖò wùɖù.

⁴ Mɔ̀ǔn wɔ̃́ ké ní hwòɖǒ-dyùàɔ̀ ní gmɔ̀ìn ɖɛ gbà ɖò gbo. Mɔ̀ǔn wɔ̃́ ké ḿ kè ɖɛ-gbà-nyu-nyɔ̀ ɓě ní poìn sɔ̃ gbo ɓó ɖɛ gbà ɖò nyu jè, ké mɔ̀ǔn wɔ̃́ ké mɔ́ún kpá waà hwɔ ɓěɔ̀ ɖò hwìɛ̀.

⁵ Dyí-sɛ́ɖɛ́ìn-nyɔ̀ ɖò mɔ̀ nyɔ mɛ zà ḿ kpeɖe, ké ɔ mɔ̀ nyɔ mɛ ɓàɖàìn ḿ dyí ɖé ɖɛ̀ɓɛ̀ǐn-ɖɛ̀ɓɛ̀ǐn mú. Kɛɛ mɔ̀ǔn wɔ̃́ ké hwòɖǒ-kɔ̃in-nyìnììn-nyɔ̀ ɖò ní po ḿ cáná dúún sɔ̃̀-sɔ̃̀, sepóɛɖé ḿ nì ɓaàǔn, ɓɛ́ m̀ ké wa gǎ kɔ̃ tò ɓó waà ɖɛ gbà ɓěɔ̀ jè.

⁶ Ti ɓɛ́ wa mu waà wuɖuí-kɔ̃̀-nyɔ̀ ɓěɔ̀ ɓíɖíi poùn ɖé toɖo-ɓì ɓě múɛɛ, nìí, wa muɛ dyuòùn kà ní wuɖuɔ̀ mɔ̀ jǎà kɛ.

⁷ Kà nyɔ dyià nyɛ fá ní, ɔ xwɛ̃́ mɛ́nɛ́ɛ́ sèà ɓó ɓóɖó-kpàɔ̀ kɔ̃ɛɛ, kà dyúáɖòɔ̀ kǎà waà kpá ɓěɔ̀ mu dyi gbɛ̀ìn ɓó xwɛ́-ɓìɔ̀ wĩín.

⁸ Kɛɛ Bounɓo Ɖɛɓíɔ́, ní dyéɖé nì m̀ dya. Ɖé m̀ gbo, ɖé mɔ̀ ní pèɖèìn-naín. Mɔ̀ǔn wɔ̃́ ké mɔ́ún mɛ́.

⁹ M̀ mɛ nyuɛ ɓɛ́ ḿ ké xwáɖá séín ɓɛ́ ɖɛ-gbà-nyu-nyɔ̀ ɓěɔ̀ ɖǎ gbǎ ɓó ḿ bììɛɛ xwaún pó.

¹⁰ M̀ mɛ nyuɛ ɓɛ́ hwòɖǒ-kɔ̃in-nyìnììn-nyɔ̀ ɓěɔ̀ xwáɖá ɓěɔ̀ ké wa mìɔùn kpɔ̃, ɓɛ́ mɔ́ún ké ɓó zi, ɓɛ́ ɖɛ gbà ɖò ké se ḿ nyu.