Wɛ́ɖɛ́ 14 - Ɓǎsɔ́ɔ̀ Báɓòɔ̀

Nyɔǔn-dyùɛ̀ hwòɖǒ-kɔ̃in-nyìnììn-nyìnììn

Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo.

¹ Zuɖuu-nyɔ̀ ɓěɔ̀ cɛ̃ɛ ɖéɛ wa hwòɖǒ bũ̌, ké wa ɖá, “Gèɖèpɔ́ɔ̀ ɖò se nì.” Wa nyìnììn hwòɖǒ kɔ̃in. Waà nyuu-ɖɛ̀ nyìnììn kɔ̃in. Nyɔ ɖò se wa hwìɛ̀ nì, ɓɛ́ ɔ ké ɖɛín-ɖɛ̀ nyu.

² Bounɓoɔ̀ nì ɖé dyɔún, ké ɔ gmɔ̀ ɓíɖíi nɔ̄ nyɔǔn-dyù kɔ̃, ɓɛ́ ɔ kéɛ dyé kɛbì hwòɖǒ-fɔ̀nɔ̀-nyɔ̀ ɖò nì wa hwìɛ̀, ké ɔ hwòɖǒ mɔ́ Gèɖèpɔ́ɔ̀ gbo dyiɛ dyi ní.

³ Wa séín ɖǎ hwìǐ sɔ̀ìn. Wa séínɛ̀ nyuu-ɖɛ̀ mɔ̀ ɖɛ gbà saá-saá. Nyɔ ɖò se wa hwìɛ̀ nì, ɓɛ́ ɔ ké ɖɛín-ɖɛ̀ nyu. Nyɔ dyúáɖò dyɛ mɔ̀ùn se nì.

⁴ Ké Bounɓoɔ̀ ɖá, “Hwòɖǒ-kɔ̃in-nyìnììn-nyɔ̀ séín ɓěɔ̀ se fɔ̀nɔ̀-hwòɖǒ ɖò dyéɛ mu fɔɔ cáe? Wa nyɔ́ ní nyɔ ɓěɔ̀ mú. Wa ní ɓaà ḿ fɔɔ cá.”

⁵ Dyéɛ kà wa nì fɛ̃̀ǐn mìɔ cá kɛ, sepóɛɖé Gèɖèpɔ́ɔ̀ nì ɓó dyí-sɛ́ɖɛ́ìn-nyɔ̀ ɓěɔ̀ gbo.

⁶ Hwòɖǒ-kɔ̃in-nyìnììn-nyɔ̀ ɓěɔ̀ mɔ́ wa ké gǎ-dyé-nyɔ̀ ɓěɔ̀ hwòɖǒɛ̀-gbɔ-po-ɖɛ̀ ɓěɔ̀ kɔ̃in cá, kɛɛ gǎ-dyé-nyɔ̀ ɓěɔ̀ pèɖèìn ɖé Bounɓoɔ̀ gbo.

⁷ Ɖɛ kpɔ̃ ḿ hwòɖǒ ɓɛ́ ḿ nì Bounɓoɔ̀ zɔ̀ǔn wɛ̃ɛ mɔ̀ ɓɛ́ pó-pó ké ɖé Zádyɔún-hwɔ̀ɖɔ̀ɔ̀ mú sɔ̀ ɓó Éézùɖùɛ̀-nyɔ̀ ɓěɔ̀ bìì, ɓɛ́ Bounɓoɔ̀ kéɛ nyu ɓɛ́ wa ké dúún zaìn ɖe. Ɔ dyi ná nìǐn, Éézùɖùɛ̀-nyɔ̀ ɓěɔ̀ mu múàǔn kpáùn mìɔ.