Wɛ́ɖɛ́ 13 - Ɓǎsɔ́ɔ̀ Báɓòɔ̀

Ɓaà-wùɖù ɓó gbo-kpá-kpá jè

Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo.

¹ Bounɓo, tiɔ̀ nyɛ́ hwɛ̀ ɓɛ́ m̀ ké ḿ jè hwìɖǐi poìn nyɛ́? Tiɔ̀ nyɛ́ hwɛ̀ ɓɛ́ m̀ ké ḿ gbo gmɔ̀ìn nyɛ́? M̀ se ḿ jè hwìɖǐi poɛ̌n mu ɖe fɔɔ cáà?

² Ti jĩ̀ xwɛ̌ ní mu fũ̀à-fṹá-tì mú nììn keɛ́? Ti jĩ̀ xwɛ̌ wìì mu ḿ hwòɖǒ bũ̌ dyíìn kánáá pū kɛ́? Ti jĩ̀ xwɛ̌ ní mú-nyɛ́-nyɔ̀ ɓěɔ̀ sɔ̃ mu ɖé kɔ̃in nììn keɛ́?

³ Óó Bounɓo ní Gèɖèpɔ́ɔ̀, gmɔ̀ ḿ dya, ɓɛ́ m̀ ké ḿ gɔ̃̌ jǔ. Hwɔ ḿ nyíɔ dyéɖéín dyi, mɔ́ún kɔ̃̀ ɖà gĩɔ nììn nyíɔɔ̀ mú kpá.

⁴ Ɔ dyi ná nìǐn, ní mú-nyɛ́-nyɔ̀ ɓěɔ̀ muɛ cɛ̃ìn, ɓɛ́ wa ké níiń, “À ɖǎ ɔ toún ɖu.” Ké ní mú-nyɛ́-nyɔ̀ ɓěɔ̀ dyi ḿ dyi kpáa dyéín, wa mu múàǔn kpáùn.

⁵ Kɛɛ ḿ taɓa nì ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ hwìɖǐǐ. Ní hwòɖǒ kpá múàǔn ɓó ḿ póìn jè.

⁶ Bounɓo, ní mu m̀ gbo ɓèɖèìn, sepóɛɖé nì kpeɖe nɔ̀mɔ̀ dyíin mìɔ ɓó ḿ gbo.