Wɛ́ɖɛ́ 12 - Ɓǎsɔ́ɔ̀ Báɓòɔ̀

Ɓaà-wùɖù ɓó gbo-kpá-kpá jè

Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo.

¹ Bounɓo, kpá à gbo, sepóɛɖé nyɔ ɓě ɓɛ́ wa taɓa m̀ hwìɖǐi kóɖó-kóɖóɛɛ gǎ nì kpáuń. Jǎà-nyɔ̀ ɖò se ɖé nyɔ ɓěɔ̀ hwìɛ̀ nì ɖe.

² Nyɔ séín nì se wĩin tɔ́mɔ́ìn tɔ̀mɔ̀ǐn. Wa cáìn càìn waà mǔè ɖò ɖé wuɖu fóɖóún mú.

³ Bounɓo, zà ɓó nyɔ-cá-mìɔ̀ séín kè nyɔ mìɔùn dyí-ɓɔ́ɖɔ́ìn-mìɔ̀ séín ɓěɔ̀ hwìǐ.

⁴ Wa mɔ̀ nyɔ ɓě cɛ̃à, ɓɛ́ wa dyi níiń, “À mu to ɖuùn dyììn ɖé à miɔɔ̀ mánáín. À mɔ̀ nyɔ kɔ̃̀ à miɔɔ̀ wuɖuí, ké nyɔ ɖò se à ɓɔ́í poɛ ɓɛ́ìn” nyɛ.

⁵ Ké Bounɓoɔ̀ ɖá, “Sepóɛɖé wa nì nyɔ ɓě hwɛ̀ kpéíɛ kè gǎ-dyé-nyɔ̀ ɓěɔ̀ dyi pĩ́àǔn, ké wa nì kpòɛ̌n jèɛɛ, ní mu dyí sɔ̀ùn, ɓɛ́ ḿ ké wa bìì vɔ̃. Ní mu wa póìn kà wa hwòɖǒ mɔ́à kɛ.”

⁶ Ɖɛ ɓě ɓɛ́ Bounɓoɔ̀ ɖáìn nyɔ nyɛ́nɛ́ín nyɛɛ, ɔ nyuɛ ní. Ɔ wuɖuɔ̀ hwɛ̀ mú kà séɓàɖà ɓɛ́ wa ɖǎ zɛ̀nɛ̌ǐn zàìn kpa mɛ̀nɛ̌ìn-sɔ̃́ɛɛ nyuà mú hwɛ̀ɛ̀ kɛ.

^7-8 Bounɓo, hwòɖǒ-kɔ̃in-nyìnììn-nyɔ̀ ɓěɔ̀ nì dyi gãuń, ké nyɔǔn ɓě nì ɖɛ fóɖóún ɓě ɓàǐn. Ɔ ná nì jèɛɛ, ɓɔ̌ɔ̀, gmɔ̀ à dyí kánáá pū sɔ̀ìn ɖé nyɔ nì ná ɓěɛ̀ xwaún.