Wɛ́ɖɛ́ 11 - Ɓǎsɔ́ɔ̀ Báɓòɔ̀

Bounɓoɔ̀ hwòɖǒ-kɔ̃-dè-dè

Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo.

¹ Ḿ pèɖèìn ɖé Bounɓoɔ̀ gbo. Kà ɓɛ́ ɔ nìà náa, nìí, ɓě ɓɔ́ɔ ḿ gbo cɛ̃ɛ, ɓɛ́ ɓě ké níiń, “Wã kà naà wãà kɛ, ɓɛ́ m̀ ké ɖé toɖo ɓěɔ̀ gbo muo.

² Dyéɛ, hwòɖǒ-kɔ̃in-nyìnììn-nyɔ̀ ɓěɔ̀ ɖǎ waà pɔnɔ ɓěɔ̀ kè waà sé-kpìì ɓěɔ̀ ti dyéìn, ɓɛ́ wa ké tíe-kpòǔn kò, nìí ɓɛ́ wa ké nyɔ ɓě kɔ̃̀ hwòɖǒ hwɛ̀ múɛɛ pòìn.

³ Ɔ jǔ ké ɖɛ séín ɖǎ dya gbɛ̀ ní, ɖɛ́ ɖò dyí-sɛ́ɖɛ́ìn-nyɔ̀ ɓěɔ̀ ɓɛ́ìn ɓó nyuɛ ɖe kɛ́?”

⁴ Bounɓoɔ̀ nì ɖé ɔ gbǒ hwɛ̀ǐn-hwɛ̀ǐnɔ̀ mú. Ɔ nì ɖé ɔ zèèɔ̀ kɔ̃ ɖé dyɔún, ké ɔ nì nyɔǔn-dyùɛ̀ nyuu-ɖɛ̀ séín ɓěɔ̀ múin ɖeɛń.

⁵ Bounɓoɔ̀ gmɔìn dyí-sɛ́ɖɛ́ìn-nyɔ̀ ɓěɔ̀ múin, kɛɛ ɔ nyɛ́ hwòɖǒ-kɔ̃in-nyìnììn-nyɔ̀ ɓěɔ̀ kè nyɔ-ɖɛ-gana-xwa-zàìn-nyɔ̀ ɓěɔ̀ mú.

⁶ Gǎ ɓɛ́ Bounɓoɔ̀ mu hwòɖǒ-kɔ̃in-nyìnììn-nyɔ̀ ɓěɔ̀ kɔ̃ tòùn wɛ̃ɛ mɔ̀ nyɛ-kɛ̀nɛ̀ kè sɔ́fà-sɔ̀ɔ̌ sùmù-sùmù ɔ kè pìɔ̌ sùmùù ɓɛ́ ɔ ɖáɓá ɓáá-ɖɛ̀ kɛ. Ɔ mu wa nyɛ-kɛ̀nɛ̀ɔ̀ kè sɔ́fà-sɔ̀ɔ̌ sùmù-sùmùɔ̀ kɔ̃ púèìn kà ní ɖaɓaà kɛ.

⁷ Bounɓoɔ̀ mɔ̀ dyí-sɛ́ɖɛ́ìn-nyɔ̀, ké ɔ ɖɛ̀ɓɛ̀ nyɔ ɓě ɓɛ́ wa nyu dyí-sɛ́ɖɛ́ìn-ɖɛ̀ kɛɛ mú. Nyɔ ɓě kɔ̃̀ hwòɖǒ hwɛ̀ múɛɛ mu dɛ̀ ɓɛ́ Bounɓoɔ̀ nìà kɛɛ cĩ́ìn.