Wɛ́ɖɛ́ 10 - Ɓǎsɔ́ɔ̀ Báɓòɔ̀

Ɓaà-wùɖù ɓó dyí-sɛ́ɖɛ́ìn-ɖɛ̀ jè

¹ Óó Bounɓo, ɖɛ́ kɔ̃̀ jè m̀ tɔmɔìn kà à bũ̌in nyɛ́? Ɖɛ́ kɔ̃̀ jè m̀ vǐè kà à dyí ɓó à fũ̀à-fṹá-tìɔ̀ ɓaɖa kɛ́?

² Hwòɖǒ-kɔ̃in-nyìnììn-nyɔ̀ɔ̀ ɓúáìn ɔ mìɔùn dyí, ké ɔ dyéìn gǎ-dyé-nyɔ̀ ɓěɔ̀ gǎ. M̀ mɛ nyuɛ ɓɛ́ xwáɖá ɓě ɓɛ́ ɔ gbǎà kɛɛ ké ɔ mìɔùn kpɔ̃.

³ Hwòɖǒ-kɔ̃in-nyìnììn-nyɔ̀ɔ̀ ɓɔ́ɖɔ́ ɓó ɔ hwòɖǒɛ̀-mɔ́ɔ́-ɖɛ̀ ɓěɔ̀ jè. Ké nyɔ ɓɛ́ ɔ po ɔ mǔè ɖò kpáná kɔ̃ún wɛ̃ɛ ɓɔ́ Bounɓoɔ̀ ní, ké ɔ cɛ̃ Bounɓoɔ̀ ɖɛ gbà kɔ̃ún.

⁴ Hwòɖǒ-kɔ̃in-nyìnììn-nyɔ̀ɔ̀ ɓúáìn ɔ mìɔùn dyí mìɔ jèɛɛ, ɔ se Gèɖèpɔ́ɔ̀ ti ɓéɖé. Ɖé ɔ hwòɖǒɛ̀-gbɔ-po-ɖɛ̀ séín ɓěɔ̀ múɛɛ, Gèɖèpɔ́ɔ̀ jè se ɔ hwìɖǐi nì fɔɔ cá.

⁵ Hwòɖǒ-kɔ̃in-nyìnììn-nyɔ̀ɔ̀ nyuu-ɖɛ̀ séín wóɖó mú kánáá pū. Ɔ se kà Gèɖèpɔ́ɔ̀ nyu zaa wɔ̃ poɛ kɛɛ jè múin wɔ̃́ɔ ɓɛ́ìn. Ɔ dyéɖé zàìn nyɔ ɓě ɓɛ́ ɔ nyɛ́ múɛɛ zùǔn.

⁶ Ɔ hwòɖǒ ɖá ɖɛ ɖò se ɔ daí zàǐn mu fɔɔ, ké fũ̀à-fṹá-ɖɛ̀ ɖò se ɔ gbo kpáa mu sɔ̃̀ɔ̀.

⁷ Gboò-wùɖù kè nyɔ-cá-wùɖù ɔ kè nyɔ-fã̀àǔn-po-wùɖù ɓě dyí ɔ wĩín. Ɔ wɔ̃ fɛ̃́ìn xwa ɓó nyɔ-mú-nyɛ́-wùɖù gbà ɓě po jè.

⁸ Ɔ vǐè ɖé hwɔɖɔ-dyù ɓěɔ̀ mú, ké ɔ nì fòɛ̌n ɓɛ́ ɔ ké nyɔ ɓě se ɖɛ gbà ɖò nyuɛɛ ɖáɓá. Ɔ nì ɖé dà gbǎà dyí ɓě vǐèɛ̌n ɓó nyɔ ɓě se kpé ɖò ɓéɖéɛɛ jè.

⁹ Ɔ kò pìǐn kà ganìǎ nyuà kɛ, ké ɔ fò gǎ-dyé-nyɔ̀ ɓěɔ̀ hwìè. Ɔ dyi gǎ-dyé-nyɔ̀ ɓěɔ̀ dyiɛ dyéín, ɔ kpɔ̃̀ìn wa ɔ kpàǎɔ̀ mú, ké ɔ kpa wa dyi káɖáa.

¹⁰ Ɔ ɓéɖé kpé ké ɔ zi nyɔ ɓě ɓɛ́ ɔ kpɔ̃à kɛɛ dyí jèɛɛ, wa kpá dyi ɖé ɔ kpéɔ̀ xwíɖíi.

¹¹ Ɔ hwòɖǒ ɖá Gèɖèpɔ́ɔ̀ mɔ́ìn dyéɖé, ké ɔ ní dyé ɖɛ ɓě ɔ nìà nyuɛń nyɛɛ ɖò fɔɔ.

¹² Óó Bounɓo Gèɖèpɔ́ɔ̀, tò hwòɖǒ-kɔ̃in-nyìnììn-nyɔ̀ɔ̀ gǎ kɔ̃. Gǎ-dyé-nyɔ̀ ɓěɔ̀ jè mɛ nì m̀ hwìɖǐi.

¹³ Ɖɛ́ kɔ̃̀ jè hwòɖǒ-kɔ̃in-nyìnììn-nyɔ̀ɔ̀ cɛ̃à m̀ ɖɛ gbà kɔ̃ún wɛ̃́? Ɖɛ́ kɔ̃̀ jè ɔ hwòɖǒ poɛ̀n hwìɖǐi kà m̀ se ɔ gǎ kɔ̃ tòɛ̌ mu kɛ́?

¹⁴ Kɛɛ mɔ̀ Gèɖèpɔ́ɔ̀ m̀ dyé fũ̀à-fṹá-ɖɛ̀ kè wìì-ɖɛ̀ ɓěɔ̀ ní. M̀ ɖǎa hwìɖǐi poìn, ɓɛ́ m̀ ké ɖɛ ɖò nyu ɓáa jè dyí. Nyɔ ɓě ɓɛ́ wa dyéà ɖɛ séín ɓěa dyíɛɛ po waà zaaɔ̀ m̀ xwaún dyi, sepóɛɖé mɔ̀ mɔ̀ xwíè-dyù gbo-kpá-nyɔ̀.

¹⁵ M̀ mɛ wàìn hwòɖǒ-kɔ̃in-nyìnììn-nyɔ̀ɔ̀ kpéɔ̀ dyi. Tò ɔ gǎ kɔ̃ ɓó ɔ hwòɖǒ-kɔ̃in-nyìnììn-nyìnììnɔ̀ jè. M̀ mɛ nyuɛ náa ɓɛ́ ɔ ké mú gbɔɔ̀.

¹⁶ Bounɓoɔ̀ mɔ̀ kã́á ɓó sè-ná-sèɛ̀ tiín. Gèɖèpɔ́ɔ̀ kà kò ɖò ɓiè-nyɔ̀ ɓě nì ɖé ɔ ɓóɖóɔ̀ kɔ̃ɛɛ séín mu mú gbɔɔ̀ùn nyɛ̀nɛ̀ɛ̀.

¹⁷ Óó Bounɓo, m̀ dyuò gǎ-dyé-nyɔ̀ ɓěɔ̀ hwòɖǒ-kpɔ̃-ɖɛ̀ ɓě dyí. Mɔ̀ mɔ̀ waà kpé-po-wùɖù ɓěɔ̀ wɔ̃́-nyɔ̀, ké mɔ̀ mɔ̀ wa kpéí-po-nyɔ̀.

¹⁸ Mɔ̀ mɔ̀ gǎ-dyé-nyɔ̀ ɓěɔ̀ kè xwíè-dyù ɓěɔ̀ bìì vɔ̃-nyɔ̀. M̀ nyuɛ náa ɓɛ́ nyɔǔn-dyù mɔ̀à fɔ́, ké wa muà mɛ́ìn wɛ̃́ɛ́ pūɛɛ ké se wa fã̀àǔn po ɖe.