Wɛ̀ɖɛ̀ɓèɖésĩ̀ɔ̀ 22 - Ɓǎsɔ́ɔ̀ Báɓòɔ̀

¹ Ké ínjàɔ̀ zàìn ma ḿ ní vɛ̀nɛ̀ mɔ̀à fɛ̀ɛ̀-nìɔ̀ kɛɛ da. Ɔ fã ma cá kà sɔ̃̀ɔ̀-kpò nìà kɛ. Ɔ sɔ̀ ɖé Gèɖèpɔ́ɔ̀ kè Ɓáɖáá-dyùɔ̀ zèèɔ̀ gbo.

² Ké níɔ̀ sí ma hwìè nì ma ɖé hwɔɖɔɔ̀ múɛɛ hwòɖǒǔn. Ké fɛ̀ɛ̀-cù nì ma níɔ̀ kpóó sɔ̃́ ɓěɔ̀ kɔ̃, ké ɔ tòɖòìn kpa ɓaɖa-bùè sè sɔ̃́ ɓó zɔ̃ xwíníín. Wa tòɖòìn ma kpa dyúáɖò ɓó dɛ̀nɛ̀ séín xwíníín. Ké waà mí ɓěɔ̀ mɔ̀ ɖɛ kánáìn ma ɓóɖó-dù ɓěɔ̀ dyiɛ.

³ Ɖɛ séín ɓě ɓɛ́ gboò-wùɖù nì kɔ̃ɛɛ, wa se ɖé nìɛ̌ mu ɖe. Gèɖèpɔ́ɔ̀ kè Ɓáɖáá-dyùɔ̀ zèèɔ̀ mu hwɔɖɔɔ̀ mú nììn, ké ɔ gbo-nì-nyɔ̀ ɓěɔ̀ mu ɔ ɓièìn.

⁴ Wa mu ɔ dyúa-kpàɔ̀ dyéìn, ké ɔ nyɛ́nɛ́ mu wa dyúa-kpà ɓěɔ̀ kɔ̃ nììn.

⁵ Máaún ɖò se ɖé nìɛ̌ mu ɖe. Wa se ɖáùnpò kè dyóɖóɛ̀ ce mɔ́ɔ mu ɖe, sepóɛɖé Bounɓo Gèɖèpɔ́ɔ̀ mu wa ce jǔùn. Ké wa mu nyɔǔn wuɖuí kɔ̃̀ùn kánáá pū.

Jízɛ̀ mu dyiìn kàǔn

⁶ Ké ínjàɔ̀ cɛ̃ɛ ma ḿ gbo, ké ɔ ɖá, “Wuɖu ɓě nìà kɛ mɔ̀ jǎà, ké nyɔǔn ɓɛ́ìn wa hwòɖǒ kɔ̃ dèɛ̀. Ké Bounɓo mɔ̀à Gèɖèpɔ́ɔ̀ ɓɛ́ ɔ nyíà ɔ Zùùɔ̀ ɔ kpáá-ɖɛ̀-cɛ̃-nyɔ̀ ɓěɔ̀ kɛɛ, ɔ ɖǎ ɔ ínjàɔ̀ tò, ɓɛ́ ɔ ké ɖɛ mu kpáùn wɛ̃ɛ ɔ gbo-nì-nyɔ̀ ɓěɔ̀ dyí tɛ̀mɛ̀ìn.”

⁷ Jízɛ̀ ɖá, “Tò ɖùǔ. Ní mu dyiɛń fṹàùn.” Nyɔ ɓě ɓɛ́ wa kpɔ̃ cuò-wùɖù ɓě sɔ̀ìn Gèɖèpɔ́ɔ̀ gbo, ké wa nìà nɔ̄ céè-ɖɛ̀ nìà kɛ múɛ dyiɛɛ, mana nì wa kɔ̃.

⁸ Ḿ mɔ̀ Jɔ̃́ɔ́. Ḿ mɔ̀ nyɔ wɔ̃́ ma ɖɛ ɓě nìà kɛ, ké ḿ dyé ma wa. Ké ti ḿ wɔ̃́ ma wa, ké ḿ dyé ma wa kɛɛ, ḿ ɓùɖùìn ma ɓó ínjà ɓɛ́ ɔ tɛ̀mɛ̀ìn ma kà wa ḿ dyíɛɛ ɓo zɔ̃̌, ɓɛ́ ḿ ké ma ɔ ɓiè.

⁹ Kɛɛ ɔ cɛ̃ɛ ma ḿ gbo, ké ɔ ɖá, “Mɔ̀ǔn nyuɛ náao! Mɔ́ún mɔ̀ gbo-nì-nyɔ̀ ɖekè kà m̀ kè nì ɖíí ɓě mɔ̀à kpáá-ɖɛ̀-cɛ̃-nyɔ̀ ɓěɔ̀ kɛ ɔ kè kà nyɔ ɓě kpɔ̃ wuɖu ɓě céèà nɔ̄ céè-ɖɛ̀ nìà kɛ múɛ dyiɛɛ mɔ̀à gbo-nì-nyɔ̀ ɓěɛ. M̀ mɛ ɓiè Gèɖèpɔ́ɔ̀.”

¹⁰ Ké ɔ cɛ̃ɛ ma ḿ gbo ɖe, ké ɔ ɖá, “Mɔ̀ǔn ɖá ɓɛ́ m̀ ké cuò-wùɖù sɔ̀ìn ɖé Gèɖèpɔ́ɔ̀ gbo, ɓɛ́ wa céèà nɔ̄ kɛɛ gàìn, sepóɛɖé ti ɖɛ ɓě nìà kɛ mu kpáùn wɛ̃ɛ ɖǎ dyi xwɛ̃́ìn.

¹¹ Ɖɛ-gbà-nyu-nyɔ̀ ɓěɔ̀ mɛ kpa waà ɖɛ-gbà-nyu-nyuɔ̀ dyúa pū, ké nyɔ ɓě ɓɛ́ wa kɔ̃̀ kpeɖe nyìnììn dyíin nyɛɛ, kǎà waà kpeɖeɔ̀ mɛ nìǎ kánáá pū. Ké dyí-sɛ́ɖɛ́ìn-nyɔ̀ ɓěɔ̀ mɛ nyu dyí-sɛ́ɖɛ́ìn-ɖɛ̀ kánáá pū, ké nyɔ ɓě ɓɛ́ wa ɖǎà wa mìɔùn Gèɖèpɔ́ɔ̀ xwáɖáún zàìn nyɛɛ, wa mɛ nyuɛ náa tee pū.”

¹² Jízɛ̀ ɖá, “Tò ɖùǔ. Ní mu dyiɛń fṹàùn. Ní mu pɛ́ɛ̀-ɖɛ̀ ɓɛ́ ḿ ké nyɔǔn ɓě pɛ́ɛ̀ìn nyɛɛ dyàùn, ɓɛ́ ḿ ké nyɔǔn séín pɛ́ɛ̀ kà wa nyuu-ɖɛ̀ nyu nìɛ̀ kɛ.

¹³ Ḿ mɔ̀ Áfàɔ̀ kè Òmégàɔ̀. Ḿ mɔ̀ nyɔ kĩ́ín-kĩ́ínɔ̀ kè nyɔ hwɛ̀ìn-gbɔɔ̀. Ḿ mɔ̀ ɖɛ-gbɔ-dè-dè kè ɖɛɛ̀ mánáín-hwɛ̀-hwɛ̀.”

¹⁴ Nyɔ ɓě ɓɛ́ wa wɔɔ̀ wa ɖɔ ɓěɔ̀ kɛɛ, mana nì wa kɔ̃. Wa mu kpé ɓéɖéìn, ɓɛ́ wa ké fɛ̀ɛ̀-cùɔ̀ ɓo ɖi, ké wa mu gmɔ-wɔ̃̀ɔ̀ mú mùìn, ɓɛ́ wa ké ɖé hwɔɖɔɔ̀ mú dyá.

¹⁵ Kɛɛ nyɔ ɓě ɓɛ́ wa nyu ɖɛ nyìnììn dyíin nyɛ kè hwĩɔ̀ ɓě kè nyɔ ɓě po gbàɖàùn wɛ̃ kè kú-ɖáɓá-nyɔ̀ ɓě kè nyɔ ɓě ɓiè kũùn-kpò kɛ ɔ kè nyɔ séín ɓě ɖɛ̀ɓɛ̀ se mú, ké wa tɔ́mɔ́ seɛɛ, wa nì ɖé hwɔɖɔɔ̀ píé.

¹⁶ Jízɛ̀ ɖá, “Ḿ mɔ̀ Jízɛ̀. Ḿ ɖǎ ní ínjàɔ̀ ɖé ɓě gbo tò, ɓɛ́ ɔ ké ɓě nìà ɖé cɔ́cì ɓěɔ̀ múɛɛ ɖɛ ɓě nìà kɛ gbo cɛ̃. Ḿ mɔ̀ Dèɓéɛ̀ nyúà-dyú. Ḿ mɔ̀ zɔ̃-wĩín-dɛ̀nɛ̀-dyù fã-fãɔ̀.”

¹⁷ Zùùɔ̀ kè nyɔ ɓɛ́ Ɓáɖáá-dyùɔ̀ muà dyi kpɔ̃ùn wɛ̃ɛ ɖá, “Dyi.” Ké nyɔ ɓɛ́ ɔ wɔ̃́ ɖɛa kɛɛ mɛ ɖá, “Dyi.” Ké nyɔ ɓě ɓɛ́ ní-ná-tò nyuɛɛ mɛ dyi, ké nyɔ ɓɛ́ ɔ mɔ́ fɛ̀ɛ̀-nìɔ̀ kɛɛ, ɔ mɛ náa pídyi.

¹⁸ Ḿ nì nyɔ séín ɓě ɓɛ́ wa wɔ̃́ wuɖu ɓě ɓɛ́ Gèɖèpɔ́ɔ̀ dèàìn ḿ wĩín, ɓɛ́ wa nìà nɔ̄ céè-ɖɛ̀ nìà kɛ múɛɛ náún poɛń. Nyɔ ɖò dyi wuɖu ɓě nìà kɛ kɔ̃ po ní, Gèɖèpɔ́ɔ̀ mu ɔ nyɔ-gǎ-dyéìn-ɖɛ̀ ɓě kɔ̃̀ jè céè-ɖɛ̀ nìà kɛ cɛ̃à kɛɛ kɔ̃ poùn.

¹⁹ Ké nyɔ ɖò dyi wuɖu ɓě ɓɛ́ Gèɖèpɔ́ɔ̀ dèàìn ḿ wĩín, ké wa nìà nɔ̄ céè-ɖɛ̀ nìà kɛ múɛɛ kɔ̃ zà ní, Gèɖèpɔ́ɔ̀ mu ɔ nììn fɛ̀ɛ̀-cù-ɓò ɓɛ́ ɔ kéɔ́ dyéɛ ɔ kè ɔ nììn hwɔɖɔ hwɛ̀ǐn-hwɛ̀ǐnɔ̀ mú-nì-nì kɔ̃̀ jè céè-ɖɛ̀ɛ̀ cɛ̃à kɛɛ ɔ xwa zàùn.

²⁰ Nyɔ mɔ̀ nyɔ nyu ɖɛ ɓě nìà kɛ zàseɔ̀ kɛɛ ɖá, “Jǎà, ní mu dyiɛń fṹàùn.” Kǎà ɔ mɛ nì. Bounɓo Jízɛ̀, dyiáo!

²¹ Bounɓo Jízɛ̀ mana mɛ nì nyɔ séín kɔ̃.