Wɛ̀ɖɛ̀ɓèɖésĩ̀ɔ̀ 21 - Ɓǎsɔ́ɔ̀ Báɓòɔ̀

Dyɔún ɖìèɔ̀ ɔ kè ɓóɖó-kpà ɖìèɔ̀

¹ Ké ḿ dyé ma dyɔɔ̀ ɖìè ɖò kè ɓóɖó-kpà ɖìè ɖò, sepóɛɖé dyɔɔ̀ kĩ́ín-kĩ́ínɔ̀ kè ɓóɖó-kpà kĩ́ín-kĩ́ínɔ̀ ɖǎ ma dyi zi, ké dyóó ɖò se ma nì ɖe.

² Ké ḿ dyé ma hwɔɖɔ hwɛ̀ǐn-hwɛ̀ǐn ɓɛ́ ɔ mɔ̀ ma Jùɖúsɛ̀ɖɛ̀ìn ɖìèɔ̀ kɛ. Ɔ nì ma ɓíɖíi dyiɛń sɔ̀ìn ɖé dyɔún ɖé Gèɖèpɔ́ɔ̀ gbo. Wa ɖǎ ma ɔ ti dyéìn, ké ɔ nì ma kà nyɔ nìà dyú-ɓǎ dyi kpɔ̃uń muɛń, ké ɔ bɛ̃̀àìn nyɛɛ nìà kɛ.

³ Ké ḿ wɔ̃́ ma wuɖu vɛ̀nɛ̀ ɖò sɔ̀ìn ɖé zèèɔ̀ gbo, ké wuɖuɔ̀ ɖá, “Dyéɛ, Gèɖèpɔ́ɔ̀ cĩ́-naínɔ̀ ɖǎ nyɔǔn hwìɛ̀ nì. Ɔ mu wa gbo cĩ́ìn, ké wa mu ɔ nyɔ ɓě jǔùn. Ké Gèɖèpɔ́ɔ̀ mìɔùn mu wa gbo nììn.

⁴ Ɔ mu wa mícɛ̃̀ séín dyéɖéín dyi sámáùn. Mɛ́-mɛ́ ɖò se nìɛ̌ mu ɖe. Kpé-po-po ɖò se nìɛ̌ mu ɖe. Vĩ̌-vĩ̌ ɖò se nìɛ̌ mu ɖe. Nyɔ-ɖɛ-puà-puà ɖò se nìɛ̌ mu ɖe. Sepóɛɖé ɖɛ ɓě nì ma kĩ́ín nyɛɛ ɖǎ dyi zi.”

⁵ Ké nyɔ dèɖě ma kà zèèɔ̀ kɔ̃ dya kɛɛ ɖá, “Dyéɛ, ḿ nì ɖɛ séín nyuɛń, ɓɛ́ wa ké ɖɛ ɖìè jǔ.” Ɔ cɛ̃ɛ ɖe, ké ɔ ɖá, “Céè ɖɛ nìà kɛ, sepóɛɖé wuɖu ɓě nìà kɛ mɔ̀ jǎà, ké nyɔ ɓě ɓɛ́ìn wa hwòɖǒ kɔ̃ dèɛ̀.”

⁶ Ké ɔ cɛ̃ɛ ma ḿ gbo, ké ɔ ɖá, “Ɔ ɖǎ kpá. Ḿ mɔ̀ Áfàɔ̀ kè Òmégàɔ̀, ké ḿ mɔ̀ ɖɛ-gbɔ-dè-dè kè ɖɛɛ̀ mánáín-hwɛ̀-hwɛ̀. Nyɔ ɓɛ́ ní-ná-tò nyuɛɛ, ní mu ɔ ní nyíìn ɓó pídyi sɔ̀ìn ɖé fɛ̀ɛ̀-nì-dùɔ̀ mú.

⁷ Nyɔ ɓɛ́ ɔ ɖu toɛɛ, ɔ mu ɖɛ ɓě nìà kɛ kɔ̃̀ùn. Ní mu ɔ Gèɖèpɔ́ɔ̀ jǔùn, ké ɔ mu ní dyú jǔùn.

⁸ Kɛɛ nyɔ ɓě se hwòɖǒ kuɛ kè nyɔ ɓě se hwìɖǐǐ-taɓa-taɓa ɓéɖéɛ kè nyɔ ɓě nyàìn ḿ dyiɛ kè kú-ɖáɓá-nyɔ̀ ɓě kè nyɔ ɓě po gbàɖàùn wɛ̃ kè hwĩɔ̀ ɓě kè nyɔ ɓě ɓiè kũùn-kpò kɛ ɔ kè se-tɔ́mɔ́-nyɔ̀ séín ɓěɛɛ, wa nììn pá mu ɖé nyɛ-gbà-wɔ̃̀ kɔ̃̀ mú sɔ́fà-sɔ̀ɔ̌ nìà wãuń wɛ̃ɛ mú nììn. Gĩɔ sɔ̃́ nììnɔ̀ nìàǒ wɛ̀.”

Jùɖúsɛ̀ɖɛ̀ìn-hwɔ̀ɖɔ̀ ɖìèɔ̀

⁹ Ké ínjà mɛ̀nɛ̌ìn-sɔ̃́ ɓě ɓɛ́ wa ɓéɖé ma kà páni mɛ̀nɛ̌ìn-sɔ̃́ kɔ̃̀ mú nyɔǔn-gǎ-dyéìn-ɖɛ̀ mɛ̀nɛ̌ìn-sɔ̃́ hwɛ̀ìn-gbɔ ɓěɔ̀ dyí ma kà kɛɛ ɖò dyi ma ḿ gbo, ké ɔ ɖá, “Dyi. Ní mu m̀ nyɔ ɓɛ́ Ɓáɖáá-dyùɔ̀ ɖǎà dyi kpɔ̃ɛɛ da zàìn. Ní mu m̀ Ɓáɖáá-dyùɔ̀ gmààɔ̀ da zàìn.”

¹⁰ Ké Zùùɔ̀ dyi ma ḿ kɔ̃, ké ínjàɔ̀ kpa ma ḿ ɖé toɖo vɛ̀nɛ̀ tɔ̀mɔ̀ dya ɖò dya, ké ɔ zàìn ma ḿ Jùɖúsɛ̀ɖɛ̀ìn-hwɔ̀ɖɔ̀ hwɛ̀ǐn-hwɛ̀ǐnɔ̀ da. Ké ɔ nì ma ɓíɖíi dyiɛń. Ɔ sɔ̀ìn ma ɖé dyɔún ɖé Gèɖèpɔ́ɔ̀ gbo.

¹¹ Ɔ ɓéɖé ma Gèɖèpɔ́ɔ̀ dĩ́ín-dĩ̀ìnɔ̀, ké dĩ́ín-dĩ̀ìnɔ̀ nyuɛ ké ɔ fã ma. Ɔ fã ma cá kà sɔ́ɔ́ kpa ɖɛ fãà kɛ. Ɔ nì ma kà jásàpà-sɔ̀ɔ̌ nìà kɛ. Ké nyɔǔn dyéɛ̀n múin kà nyɔ dyéàìn sɔ̃̀ɔ̀-kpò múin nyɛ.

¹² Ɔ ɓéɖé ma gmɔ vɛ̀nɛ̀ tɔ̀mɔ̀ dya ɓɛ́ ɔ ɓéɖé ma wɔ̃ ɓaɖa-bùè sè sɔ̃́ɛ. Ínjà ɓaɖa-bùè sè sɔ̃́ nì ma ɔ wɔ̃ ɓěɔ̀ gbo. Éézùɖùɛ̀-nyɔ̀ ɓěɔ̀ xwéɖé-dù ɓaɖa-bùè sè sɔ̃́ ɓěɔ̀ nyɛ́nɛ́ céè ma gmɔ-wɔ̃̀ ɓěɔ̀ kĩ̀ǐn ɓěɔ̀ dyéɖéín dyi.

¹³ Wɔ̃ tã-tã kpa ma ɔ wáká hĩinyɛ ɓěɔ̀ kɔ̃ nìɛ̀. Tã nì ma dɛ̀ dyóɖóɔ̀ wóɖóàìn xwáɖáún wɛ̃, ké tã nì ma dɛ̀ dyóɖóɔ̀ kpáìn dyiɛ, ké wáká sɔ̃́ tɔ̀ɔ̀ ɓéɖé ma wɔ̃ tã-tã ɖekè.

¹⁴ Hwɔɖɔɔ̀ gmɔ gànáɔ̀ ɓéɖé ma hìɖì-kpà ɓaɖa-bùè sè sɔ̃́, ké Ɓáɖáá-dyùɔ̀ àpɔ́sò ɓaɖa-bùè sè sɔ̃́ ɓěɔ̀ nyɛ́nɛ́ céè ma wa kɔ̃.

¹⁵ Ké ínjà wùɖù ma kà ḿ gboɛɛ ɓéɖé ma ɖɛ-gbo-ɖàɓàìn-ɖɛ̀ ɓɛ́ wa nyùìn ma góò múɛɛ ɖò, ɓɛ́ ɔ ké ma hwɔɖɔɔ̀ kè ɔ gmɔɔ̀ ɔ kè ɔ gmɔ-wɔ̃̀ ɓěɔ̀ ɖàɓàìn.

¹⁶ Hwɔɖɔɔ̀ ɓéɖé ma gã ɓɛ́ìn wɔ̃ hĩinyɛ, ké wa tɔ̀mɔ̀-tɔ̀mɔ̀ɔ̀ cɛ̃ìn ma ní. Ínjàɔ̀ ɖàɓàìn ma ɔ ɖàɓàìn-ɖɛ̀ɔ̀ hwɔɖɔɔ̀. Ɔ tɔ̀mɔ̀-tɔ̀mɔ̀ɔ̀ mɔ̀ ma máa hɔ̃dɛ̀ɖɛ̀ ɓaɖa-bùè sè hm̀m̌. Ɔ tɔ̀mɔ̀-tɔ̀mɔ̀ɔ̀ kè ɔ dya-tɔ̀mɔ̀-tɔ̀mɔ̀ɔ̀ ɓɛ́ìn wɔ̃.

¹⁷ Ínjàɔ̀ ɖàɓàìn ma gmɔɔ̀, ɓɛ́ ɔ kéɛ ma dyé kà ɔ nyu ma dya cɛ̃̀ɛ̀ kɛ. Ɔ mɔ̀ ma ɓáɖáa kpáɖá-nyɔ ɓaɖa-bùè sè mɛ̀nɛ̌ìn-ɖò ɓá nyɔǔn-dyùɛ̀ ɖɛ-ɖàɓàìn-ɖàɓàìn ɓɛ́ ínjàɔ̀ nì ma nyuɛń nyɛɛ dyí.

¹⁸ Wa nyùìn ma gmɔɔ̀ jásàpà-sɔ̀ɔ̌ mú, ké hwɔɖɔɔ̀ mɔ̀ ma góò saá-saá. Nyɔǔn ɓɛ́ìn ma múin dyéɛ̀n kà nyɔ dyéàìn sɛ́ɓɛ́ɛ̀-vìɖì múin nyɛ.

¹⁹ Wa bɛ̃̀ìn ma hwɔɖɔɔ̀ gmɔɔ̀ hìɖì-kpà ɓěɔ̀ ɖé sɔ́ɔ́ kpa ɖɛ kò-kò ɓě mú. Ɔ kĩ́ín-kĩ́ínɔ̀ mɔ̀ ma jásàpà. Ɔ sɔ̃́ nììnɔ̀ mɔ̀ ma sááfɔ̀. Ɔ tã nììnɔ̀ mɔ̀ ma ágè. Ɔ hĩinyɛ nììnɔ̀ mɔ̀ ma ɛ́mɛ́wòɖò.

²⁰ Ɔ hm̀m̌ nììnɔ̀ mɔ̀ ma ɔ́nɛ̀. Ɔ mɛ̀nɛ̌ìn-ɖò nììnɔ̀ mɔ̀ ma kàníɖìà. Ɔ mɛ̀nɛ̌ìn-sɔ̃́ nììnɔ̀ mɔ̀ ma kɛ́ɖɛ́sòɖàì. Ɔ mɛ̀nɛ̌ìn-tã nììnɔ̀ mɔ̀ ma bɛ́wòɖò. Ɔ mɛ̀nɛ̌ìn-hĩinyɛ nììnɔ̀ mɔ̀ ma tópà. Ɔ ɓaɖa-bùè nììnɔ̀ mɔ̀ ma kíɖísòpáɖásì. Ɔ ɓaɖa-bùè sè dyúáɖò nììnɔ̀ mɔ̀ ma jásɛ̃̀, ké ɔ ɓaɖa-bùè sè sɔ̃́ nììnɔ̀ mɔ̀ ma ámɛ́tèɖè.

²¹ Ké gmɔɔ̀ wɔ̃ ɓaɖa-bùè sè sɔ̃́ ɓěɔ̀ mɔ̀ ma ɖɛ hwɔ sɔ́ɔ́ púú kpa ɖɛ ɖòɛɛ ɓaɖa-bùè sè sɔ̃́. Wa nyuɛ ma ɔ wɔ̃ ɓěɔ̀ mú ɖò-ɖò. Ké hwìè nì ma hwɔɖɔɔ̀ múɛɛ mɔ̀ ma góò saá-saá, ké nyɔǔn ɓɛ́ìn ma múin dyéɛ̀n kà nyɔ dyéàìn sɛ́ɓɛ́ɛ̀-vìɖì múin nyɛ.

²² Ké ḿ se ma Gèɖèpɔ́ɔ̀ gbǒ ɖò ɖé hwɔɖɔɔ̀ mú dyé, sepóɛɖé Bounɓo Gèɖèpɔ́ɔ̀ mɔ̀à Kpé-séín-ɓéɖé-nyɔ̀ɔ̀ kɛ kè Ɓáɖáá-dyùɔ̀ mɔ̀ gbǒɔ̀.

²³ Ké hwɔɖɔɔ̀ se dyóɖó kè dɛ̀nɛ̀ ɖò mɔ́, ɓɛ́ wa ké ɖé fã, sepóɛɖé Gèɖèpɔ́ɔ̀ dĩ́ín-dĩ̀ìnɔ̀ mɔ̀ ɔ ceɔ̀, ké Ɓáɖáá-dyùɔ̀ mɔ̀ ɔ ɖáùnpòɔ̀.

²⁴ Ɓóɖó-dù ɓěɔ̀ mu ɔ ceɔ̀ nàìn. Ké ɓóɖó-kpàà kã́á ɓěɔ̀ mu waà bã-ɖɛ̀ ɓěɔ̀ ɖé ɔ mú dyàùn.

²⁵ Wa se ɔ gmɔ-wɔ̃̀ ɓěɔ̀ kãá mu dyóɖóaún-kà, ké máaún ɖò se ɖé nìɛ̌ mu.

²⁶ Ké wa mu ɓóɖó-dù ɓěɔ̀ dyíin-nɔ̀mɔ̀-nɔ̀mɔ̀ɔ̀ kè waà bã-ɖɛ̀ ɓěɔ̀ hwɔɖɔɔ̀ mú dyàùn.

²⁷ Kɛɛ ɖɛ nyìnììn dyíin ɖò se hwɔɖɔɔ̀ mú muɛ́ mu, hwɛ̀ ḿ po níiń, nyɔ ɓě mɔ̀ dyi-nyàìn-ɖɛ̀ ɓě nyu-nyɔ̀ɛ kè se-tɔ́mɔ́-nyɔ̀ ɓě. Nyɔ ɓě kɔ̃̀ nyɛ́nɛ́ céèà ɖé Ɓáɖáá-dyùɔ̀ fɛ̀ɛ̀-cèè-ɖɛ̀ɔ̀ múɛɛ ɖòùn mu ɖé muùn.