Níòmádyà 13 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ po wa mìɔùn wáká

¹ Wé ɖòɛ̀ ɓaɖaa, nyɔ ɖò zà ma Mózèɛ̀ gma-cèè-ɖɛ̀ɔ̀ wuɖuún ɖé wuɖu zoo mú, ɖé Éézùɖùɛ̀-nyɔ̀ ɓěɔ̀ gbo. Gma-cèè-ɖɛ̀ɔ̀ cɛ̃ɛ ma, ké ɔ ɖá, “Ámànà-nyɔ̀ ɖò mɔɔ Móà-nyɔ̀ ɖò mɛ ɓɔ́ ɖé dɛ̀ Gèɖèpɔ́ɔ̀-nyɔ̀ ɓěɔ̀ poìn dyíɛɛ dyi síɛ fɔɔ cá,

² sepóɛɖé ti ɓɛ́ Éézùɖùɛ̀-nyɔ̀ ɓěɔ̀ nì ma ɖé gbǎùn-fúɖúáɔ̀ kɔ̃ɛɛ, Ámànà-nyɔ̀ ɓěɔ̀ kè Móà-nyɔ̀ ɓěɔ̀ se ma wa ɖii-ɖɛ̀ kè ní nyí, kɛɛ wa nyí ma Béɖàùn wíɖí, ɓɛ́ ɔ ké ma Éézùɖùɛ̀-nyɔ̀ ɓěɔ̀ gboò. Kɛɛ à Gèɖèpɔ́ɔ̀ zɛ̃̀ìn ma gboò-wùɖù ɓěɔ̀ mana mú.”

³ Ti ɓɛ́ nyɔ ɓěɔ̀ wɔ̃́ ma ɖɛ ɓɛ́ gma-cèè-ɖɛ̀ɔ̀ cɛ̃ ma kɛɛ, wa po ma ɖíà séín ɓěɔ̀ ɓɔ́í, ké wa se ma ɖé waà dyí-poìn-poìn ɓěɔ̀ hwìɛ̀ dyi sí ɖe.

Níòmádyà zĩàìn ɖɛ gbo

^4-5 Hwɛ̀ ɓɛ́ wa ké ma gma-cèè-ɖɛ̀ɔ̀ wuɖuún zàa, Ɛ̀ɖíàsì mɔ̀à sáa-zà-nyɔ̀ vɛ̀nɛ̀ɔ̀, ké ɔ nì ma Gèɖèpɔ́ɔ̀ gbǒɔ̀ ɖɛín-dyi-dèìn-naín ɓěɔ̀ kɔ̃in nyɛɛ nyí ma Tòbádyà mɔ̀à Ámànà-nyɔ̀ɔ̀ kɛɛ ɖɛín-dyi-dèìn-naín ɓěɔ̀ vɛ̀nɛ̀ dyúáɖò, ɓɛ́ ɔ kéɛ kũ̀à mú nyùìn. Ɛ̀ɖíàsì kè Tòbádyà xwɛ̃́ìn ma bũ̌in mìɔ. Ɖɛín-dyi-dèìn-naín ɓɛ́ Ɛ̀ɖíàsì nyí ma kà Tòbádyà kɛɛ, ɖéɛ̀ wa dèìn ma ɖɛ ɓě dyi kĩ́ín. Ɖɛ ɓě ɓɛ́ wa dèìn ma ɖé dyiɛɛ mɔ̀ ɖii-ɖɛ̀-sàǎ-zàìn-ɖɛ̀ ɓě kè nyɔ́ún-nɔ̀mɔ̀-ɖɛ̀ ɓě kè ɖɛ ɓě ɓɛ́ wa nyùìn kũ̀à mú ɖé Gèɖèpɔ́ɔ̀ gbǒɔ̀ múɛ kè ɓàɖàìn-bùè ɓě ɓɛ́ Éézùɖùɛ̀-nyɔ̀ ɓěɔ̀ tò ma ɓó ɓeɖe-nyɔ̀ ɓěɔ̀ kè Gèɖèpɔ́ɔ̀ gbǒɔ̀ dyí-gmɔ̀-nyɔ̀ ɓěɔ̀ ɔ kè Ɖíìváà-nyɔ̀ tɔ̀ɔ̀ ɓěɔ̀ bìì kà gma-cèè-ɖɛ̀ɔ̀ nyuà cɛ̃ɛ kɛ ɔ kè nyíí-ɖɛ̀ ɓě ɓɛ́ wa tò ma ɓó sáa-zà-nyɔ̀ ɓěɔ̀ bììɛ. Ɓàɖàìn-bùè ɓěɔ̀ mɔ̀ ɖii-ɖɛ̀ kè wã́ìn ɔ kè cáná.

⁶ Ti ɓɛ́ Ɛ̀ɖíàsì nyí ma kà Tòbádyà ɖɛín-dyi-dèìn-naínɔ̀ kɛɛ, mɔ̄ mɔ̀à Níòmádyà kɛɛ se ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú nì. Sepóɛɖé ḿ mu ma ɖé Àtàzɛ́sì mɔ̀à Pɔ́sìà-ɓòɖòɔ̀ kè Báɓèɖɔ́ùn-ɓòɖòɔ̀ kã́áɔ̀ kɛɛ gbo ɖe ti ɓɛ́ ɔ mɔ̀ ma kã́á kɛɛ zɔ̃ kpáɖá-nyɔ ɓaɖa-bùè sè sɔ̃́ nììnɔ̀ xwíníín. Ḿ hwèɖèìn ma ɖé goun, hwɛ̀ ké ḿ diè ma kã́áɔ̀ dyi, ɓɛ́ ḿ ké ma ɖe kɔ́ìn.

⁷ Ké ḿ kɔ́ìn ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe, ké ḿ wɔ̃́ ma ɖɛ gbà ɓɛ́ Ɛ̀ɖíàsì nyu ma kɛɛ jè. Ḿ wɔ̃́ɔ kà ɓɛ́ ɔ nyí ma Tòbádyà ɖɛín-dyi-dèìn-naín ɓě nìà ɖé Gèɖèpɔ́ɔ̀ gbǒɔ̀ kɔ̃̀pã́ùnɔ̀ kɔ̃ɛɛ dyúáɖò kɛ.

⁸ Ké ḿ wáɖá ma Tòbádyàà kɔ̃̀ɔ̀-ɖɛ̀ séín píé, sepóɛɖé ní hwòɖǒ kpá ma ɖé ɖei mìɔ.

⁹ Ké ḿ cɛ̃ɛ ma, ɓɛ́ wa ké ma ɖɛín-dyi-dèìn-naínɔ̀ mú hwɔ, ké ti ɓɛ́ wa ɖǎa ma mú hwɔɛɛ, ḿ kpa ma ɖii-ɖɛ̀-sàǎ-zàìn-ɖɛ̀ ɓěɔ̀ kè nyɔ́ún-nɔ̀mɔ̀-ɖɛ̀ ɓěɔ̀ ɔ kè ɖɛ ɓě wa nyùìn kũ̀à mú ɖé Gèɖèpɔ́ɔ̀ gbǒɔ̀ múɛɛ ɖé ɖɛín-dyi-dèìn-naínɔ̀ ɖe.

¹⁰ Ɓó kɔ̃in ɖeɛɛ, ḿ wɔ̃́ɔ ma kà ɓɛ́ ɓeɖe-nyɔ̀ ɓěɔ̀ kè Ɖíìváà-nyɔ̀ tɔ̀ɔ̀ ɓěɔ̀ ɖǎ ma Gèɖèpɔ́ɔ̀ gbǒɔ̀ kũ̀à ɓěɔ̀ dyi táà, ké wa ɖǎ ma wa ɓíɖí-geɖeín ɖe muɛ. Wa nyuɛ náa, sepóɛɖé nyɔ ɓěɔ̀ se ma ɖɛ ɓě ɓɛ́ wa kɔ̃̀ ɓɛ́ wa ké ma ɓeɖe-nyɔ̀ ɓěɔ̀ kè Ɖíìváà-nyɔ̀ tɔ̀ɔ̀ ɓěɔ̀ nyíɛɛ nyíɛń nì ɖe jè.

¹¹ Ɔ jèɛɛ, ḿ kpɔ̃̀ìn ma gɔ̌mànà-nyɔ̀ ɓěɔ̀ zaa, ké ḿ ɖá, “Ɖɛ́ kɔ̃̀ jè ɓě wãà Gèɖèpɔ́ɔ̀ gbǒɔ̀ kɔ̃ kɛ́?” Hwɛ̀ ké ḿ dyà ma ɓeɖe-nyɔ̀ ɓěɔ̀ kè Ɖíìváà-nyɔ̀ tɔ̀ɔ̀ ɓěɔ̀ ɖe, ké wa ɖú ma waà kũ̀à ɓěɔ̀ nyu kpàǐ ɖe.

¹² Ké Júɖà-nyɔ̀ séín ɓěɔ̀ dyà ma waà ɓàɖàìn-bùè ɓě mɔ̀à ɖii-ɖɛ̀ kè wã́ìn ɔ kè cáná kɛɛ ɖé Gèɖèpɔ́ɔ̀ gbǒɔ̀ ɖɛín-dyi-dèìn-naín ɓěɔ̀ mú.

¹³ Ké ḿ gã ma Sɛ́ɖɛ̀míà ɓɛ́ ɔ mɔ̀ ma sáa-zà-nyɔ̀ ɓěɔ̀ ɖò kɛ kè Záɖò ɓɛ́ ɔ mɔ̀ ma Gèɖèpɔ́ɔ̀-cèè-ɖɛ̀ɔ̀ dyuò-nyɔ̀ kɛ ɔ kè Pɛ̀dyáɖà ɓɛ́ ɔ mɔ̀ ma Ɖíìváà-nyɔ̀ ɓěɔ̀ ɖò kɛ, ɓɛ́ wa ké ma ɖɛín-dyi-dèìn-naín ɓěɔ̀ kɔ̃in-nyɔ̀ ɓě jǔ, ké ḿ gã ma Hánà ɓɛ́ ɔ mɔ̀ ma Màtánìàà nyúà-dyú, kɔ̃̀ ɓǎ mɔ̀ ma Zákù kɛ, ɓɛ́ ɔ ké ma wa gbo kpá. Ḿ gã ma gàa ɓě nìà kɛ, sepóɛɖé wa mɔ̀ ma jǎà-nyɔ̀ ɓě. Ɔ nì ma waà kpé mú, ɓɛ́ wa ké ɖɛ ɓě nì ɖé ɖɛín-dyi-dèìn-naín ɓěɔ̀ kɛɛ waà ɖíí ɓěɔ̀ múin geìn.

¹⁴ Ɓó tia ɓaɖaa, ḿ ɓaà ma Gèɖèpɔ́ɔ̀, ké ḿ ɖá, “Ní jè mɛ nì m̀ hwìɖǐi ɓó kũ̀à nɔ̀mɔ̀ dyíin ɓě ɓɛ́ ḿ ɖǎà nyu ɓó nì gbǒɔ̀ bììɛɛ jè.”

¹⁵ Ɓó wé ɓěa ɓaɖaa, ḿ dyéɛ ma ké Júɖà-nyɔ̀ ɓěɔ̀ nì ma géɖéè-ɓò ɓě mú píníɛń ɓó Gèɖèpɔ́ɔ̀ fɔ̀-wèɔ̀ ɓaɖa, ké wa nì ma waà wã́ìn kè géɖéè-ɓò ɓě kè féè-ɓò ɓě ɔ kè ɖii-ɖɛ̀ tɔ̀ɔ̀ ɓě gbɛ̌ǐn poɛń, ké wa nì ma gbɛ̌ ɓěɔ̀ jǎkasì ɓě kɔ̃ún poɛń, ké wa nìɛ̀ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyàǔn ɓó Gèɖèpɔ́ɔ̀ fɔ̀-wèɔ̀ ɓaɖa. Kɛɛ ḿ po ma wa náún kóɖó-kóɖó, ɓɛ́ wa ké se ma ɖɛ peɖe ɓó Gèɖèpɔ́ɔ̀ fɔ̀-wèɔ̀ ɓaɖa ɖe.

¹⁶ Ké gàa ɓě ɓɛ́ wa sɔ̀ ma ɖé Táà-hwɔ̀ɖɔ̀ɔ̀ mú, ké wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ dyà ma zimii kè peɖee-ɖɛ̀ kã̀ìn-kã̀ìn ɓě ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa nìɛ̀ ma Júɖà-nyɔ̀ ɓěɔ̀ gbo pèɖèɛ̌n ɓó Gèɖèpɔ́ɔ̀ fɔ̀-wèɔ̀ ɓaɖa.

¹⁷ Ɔ jèɛɛ, ḿ kpɔ̃̀ìn ma Júɖà-ɓòɖòɔ̀ cu-kpà ɓěɔ̀ zaa, ké ḿ ɖá, “Ɖɛ́ kɔ̃̀ jè ɓě nìà ɖɛ gbà nyuɛń nyɛ́? Ɖɛ́ kɔ̃̀ jè ɓě seà Gèɖèpɔ́ɔ̀ fɔ̀-wèɔ̀ kpéín dyéɛ́?

¹⁸ Má, ɓě ɓǎ nììn ɓǎ ɓěɔ̀ nyuó zɔ̃̌ɔ̀ ɖɛ dyúáɖò nìà kɛ, ké Gèɖèpɔ́ɔ̀ dyàà à kè à hwɔɖɔɔ̀ gǎ kɔ̃e? Gmɔ̀ nɔ̄, ɓě nìà Gèɖèpɔ́ɔ̀ fɔ̀-wèɔ̀ dyéɖé kɔ̃in wã̀ǐn ɖe, ɓɛ́ ɔ kéá ɓěà dyoɖoún kpáìn ɖe.”

¹⁹ Ɔ jèɛɛ, ḿ cɛ̃ɛ ma ní gbo-nì-nyɔ̀ ɓěɔ̀ ɖíɛ́ ɓě gbo, ɓɛ́ wa ké ma Jùɖúsɛ̀ɖɛ̀ìn-hwɔ̀ɖɔ̀ɔ̀ gmɔ-wɔ̃̀ séín ɓěɔ̀ gbǎ hwìo-kà hwɛ̀ ɓɛ́ Gèɖèpɔ́ɔ̀ fɔ̀-wèɔ̀ ké gbɔ dè, ké ḿ cɛ̃ɛ ma wa gbo, ɓɛ́ wa ké se ma gmɔ-wɔ̃̀ ɓěɔ̀ kaà ɓɛ́ fɔ̀-wèɔ̀ ké ma dyi zi hwɛ̀. Ḿ po ma gàa ɓě nìà kɛ ɖé gmɔ-wɔ̃̀ ɓěɔ̀ gbo, ɓɛ́ wa ké ma gmɔ-wɔ̃̀ ɓěɔ̀ dyí gmɔ̀, ɓɛ́ nyɔ ɖò ní kɔ̃̀ ɖà gbɛ̌ ɖò ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyà ɓó fɔ̀-wèɔ̀ ɓaɖa.

²⁰ Ɔ jèɛɛ, ti gbɛ̀ǐ-gbɛ̀ǐ múɛɛ, ɖɛ-peɖe-nyɔ̀ ɓě ɓɛ́ wa dyà ma ɖɛ kã̀ìn-kã̀ìn ɓě, ɓɛ́ wa kéɛ peɖe ɓó Gèɖèpɔ́ɔ̀ fɔ̀-wèɔ̀ ɓaɖaa pɛ̃́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ gmɔɔ̀ ɖeín.

²¹ Kɛɛ ḿ po ma ɖɛ-peɖe-nyɔ̀ ɓěɔ̀ náún kóɖó-kóɖó, ké ḿ ɖá, “Ɖɛ́ kɔ̃̀ jè ɓě pɛ̃́à ɖé gmɔɔ̀ ɖeín nyɛ́? Ɔ jǔ ké ɓě dyiɛ náa nyu ɖe ní, nìí, ní mu ɓě sɔ̃ kɔ̃ pɛ̃́ìn.” Ɔ jèɛɛ, sɔ̀ìn ɓóɛ gboɛɛ, ɖɛ-peɖe-nyɔ̀ ɓěɔ̀ ɖò se ma peɖee-ɖɛ̀ dyà ɖe ɓó Gèɖèpɔ́ɔ̀ fɔ̀-wèɔ̀ ɓaɖa.

²² Ké ḿ cɛ̃ɛ ma Ɖíìváà-nyɔ̀ ɓěɔ̀ gbo, ɓɛ́ wa ké ma wa mìɔùn mú hwɔ, ɓɛ́ wa ké ma gmɔ-wɔ̃̀ ɓěɔ̀ dyí gmɔ̀, ɓɛ́ wa ké Gèɖèpɔ́ɔ̀ fɔ̀-wèɔ̀ wáká po. Ɓó tia ɓaɖaa, ḿ ɓaà ma Gèɖèpɔ́ɔ̀, ké ḿ ɖá, “Ní jè mɛ nì m̀ hwìɖǐi ɓó ɖɛ ḿ ɖǎà nyuɛɛ jè, ké m̀ mɛ ɓéɖé ḿ wìì kɔ̃ dyììn ɖé nì ɖɛ̀ɓɛ̀ǐn-ɖɛ̀ɓɛ̀ǐn vɛ̀nɛ̀ɔ̀ mú.”

²³ Ɓó wé ɓěa ɓaɖaa, ḿ dyéɛ ma ɖekè kà Júɖà-nyɔ̀ ɓěɔ̀ ɖíɛ́ ɓě kpɔ̃ ma màa ɓě sɔ̀ ma ɖé Áɖò-ɓòɖòɔ̀ kè Ámànà-ɓòɖòɔ̀ ɔ kè Móà-ɓòɖòɔ̀ kɔ̃ɛɛ dyiɛ.

²⁴ Ké waà dyú ɓěɔ̀ fáún-fáún po ma Áɖò-wùɖù mɔɔ ɖíà-wùɖù kà kò ɖò ɓěɔ̀ ɖò, kɛɛ wa se ma Híìbúɖúù-wùɖù poɛ dyuò.

²⁵ Ɔ jèɛɛ, ḿ kpɔ̃̀ìn ma gàa ɓě ɓɛ́ wa kpɔ̃ ma kà ɖíà-màà ɓěɔ̀ dyiɛɛ zaa, ké ḿ po ma wa hwòɛ̌-wùɖù kɔ̃, ké ḿ ɓaɖa ma wa ɖíɛ́ ɓě, ké ḿ kpã́ ma ɖíɛ́ ɓě mí dúi. Hwɛ̀ ké ḿ nyuɛ ké wa ɖi ma wuɖu ɓó Gèɖèpɔ́ɔ̀ dyúa, ké wa ɖá, “À se à dyú-màà ɓě ɖíà ɓěɔ̀ dyú-gàà ɓě nyíɛ mu, ɓɛ́ wa ké waà gmàà ɓě jǔ, ké à kè à dyú-gàà ɓě se ɖíà ɓěɔ̀ dyú-màà ɓě dyi kpɔ̃ɔ́ mu ɖe.”

²⁶ Ké ḿ cɛ̃ɛ ma wa gbo, ké ḿ ɖá, “Ɓě seɛ dyí dyuò kà ɖíà-màà ɓě dyi-kpɔ̃-kpɔ̃ nyuɛ ké Sã́ɖómà ɓɛ́ ɔ mɔ̀ ma kà Éézùɖùɛ̀-ɓòɖòɔ̀ kã́áɔ̀ kɛɛ nyu ma nàmàǔn wɛ̃ɛ̀? Sã́ɖómàà kã́á-kpèɔ̀ zi ma kã́á séín kɔ̃. Gèɖèpɔ́ɔ̀ ɖɛ̀ɓɛ̀ ɔ mú, ké ɔ nyu ma ɔ kã́á mú Éézùɖùɛ̀-ɓòɖò gànáɔ̀ kɔ̃in. Kɛɛ ɔ kpá ma nàmàǔn mú dyììn ɖé ɔ ɖíà-màà ɓě dyi-kpɔ̃-kpɔ̃ mú.

²⁷ Ɓě dyuò ɖɛ ɓě nìà kɛ dyí jɛ́ɛ́o. Nìí, ɖɛ́ kɔ̃̀ jè ɓě kpɔ̃à ɖíà-màà ɓě dyi, ɓɛ́ ɓě dyià Gèɖèpɔ́ɔ̀ ɖɛ gbà vɛ̀nɛ̀ nìà kɛ bũ̌ nyuɛ́?”

²⁸ Ɓó tia ɓaɖaa, Jòdyáɖàà dyú-gàà ɓěɔ̀ ɖò mɔ̀ ma Sã̀báɖà mɔ̀à Hówɔ̀nɔ̀-nyɔ̀ɔ̀ kɛɛ bùǐ-gàà. Jòdyáɖà mɔ̀ ma Ɛ̀ɖíàsì mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gàà. Ɔ jèɛɛ, ḿ cɛ̃ ma Jòdyáɖàà dyú-gààɔ̀ woɖo gbo.

²⁹ Hwɛ̀ ké ḿ ɓaà ma Gèɖèpɔ́ɔ̀, ké ḿ ɖá, “Ɖɛ ɓɛ́ sáa-zà-nyɔ̀ ɓě nìà kɛ ɖǎà nyuɛɛ jè mɛ nì m̀ hwìɖǐi, sepóɛɖé wa ɖǎ sáa-zà-kũ̀àɔ̀ dɛ̃ kɔ̃ dyà, ké wa ɖǎ wuɖu ɓě ɓɛ́ wa kè Ɖíìváà-nyɔ̀ ɓěɔ̀ ɖi ma kɛɛ mú jaɖa.”

³⁰ Kǎà ḿ nyuɛ ma ké nyɔ ɓěɔ̀ táà ma ɖíà-kpèɖè ɓěɔ̀ dyi. Ké ḿ nyí ma sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɖò-ɖò séín kũ̀à ɓě ɓɛ́ wa ké nyuɛ.

³¹ Ké ḿ po ma nyɔ ɓě ké nyɛ dyà ɓó sáa-zàìn-ɖɛ̀ ɓěɔ̀ fɔ̃-tìǐn nyɛɛ páún, ké ḿ nyuɛ ké nyɔ ɓěɔ̀ dyà ma ɖii-ɖɛ̀ kĩ́ín-kĩ́ín sɔ̀ ma ɖé waà geɖe ɓěɔ̀ gboɛ. Ɓó tia ɓaɖaa, ḿ ɓaà ma Gèɖèpɔ́ɔ̀, ké ḿ ɖá, “Ní jè mɛ nì m̀ hwìɖǐi ɓó kũ̀à nɔ̀mɔ̀ dyíin ɓě ɓɛ́ ḿ ɖǎà nyuɛɛ jè.”