Mákà 7 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ kpeɖe zɔ̃̌ ní

¹ Gboò-wùɖù nì ḿ kɔ̃, sepóɛɖé ní jè nì pū kà nyɔ ɖò mɔ́à ɖii-cù ɖò ɓo dyai, ké nyɔɔ̀ seà dyéɛ ɓɛ́ìn nyɛɛ nìà kɛ. Ḿ nì pū kà nyɔ ɖò mɔ́à géɖéè-ɓò géɖéè-gbǎ múin, ké nyɔɔ̀ seà dyéɛ ɓɛ́ìn nyɛɛ nìà kɛ. Féè-ɓò kĩ́ín-kĩ́ín ɓɛ́ ní hwòɖǒ mɔ́ɛɛ se féè-cùɔ̀ dya nì ɖe.

² Nyɔ ɓě ɓɛ́ wa taɓa ma Gèɖèpɔ́ɔ̀ hwìɖǐǐ kóɖó-kóɖóɛɛ ɖǎ mú gbɔɔ̀ nɔ̄ ɓóɖó-kpàà kɔ̃. Dyí-sɛ́ɖɛ́ìn-nyɔ̀ ɖò se ɖé nyɔǔn-dyù hwìɛ̀ nì ɖe. Nyɔ séín nìǎ hwìè fòɛ̌n ɓó nyɔmɔɔ dyi wáɖáìn jè. Wa ɖò-ɖò nìǎ kpéɖé wáɖáuń ɓó ɔ mǔè ɖò kpɔ̃ jè.

³ Waà sɔ̃ fɛ̃́ìn xwa ɓó ɖɛ gbà nyu jè. Waà gɔ̌mànà-nyɔ̀ ɓěɔ̀ kè waà tɔ̀ɔ̀-ɓìɔ̀ ɓěɔ̀ mɔ́ nyɔ-gbo-pa-wìɖì, ké wa nyu ɖɛ ɓě ɓɛ́ nyɔ vɛ̀nɛ̀ ɓěɔ̀ hwòɖǒ mɔ́ɛ. Wa séín poìn dyí, ké wa sɔ́ɔ dyí.

⁴ Hwòɖǒ-kɔ̃in-nɔ̀mɔ̀-nyɔ̀ m̀ ɓɛ́ìn ɖé wa hwìɛ̀ dyéɛ kɛɛ nì kà wí nìà kɛ. Dyí-sɛ́ɖɛ́ìn-nyɔ̀ m̀ ɓɛ́ìn ɖé wa hwìɛ̀ dyéɛ kɛɛ nì kà wí-kpɔ̀ɔ̌ nìà kɛ. Júɖà-nyɔ̀ ɓě, wé kɔ̃̀ jè ɓěɛ̀ dyí-gmɔ̀-nyɔ̀ ɓě mɔ̀à kpáá-ɖɛ̀-cɛ̃-nyɔ̀ ɓěɔ̀ kɛɛ ɖúó ɓě gbo cɛ̃iń dyíɛɛ ɖǎ dyi. Ɓěɛ̀ gǎ-kɔ̃-tò-tìɔ̀ ɖǎ nyini. Ɓěɛ̀ fɔ̀nɔ̀-hwòɖǒ kɔ̃in-cá-tìɔ̀ ɖǎ dyi.

⁵ Nyɔ ɖò ní ɖá ɓɛ́ ɔ ké ɔ mǔè ɖò hwòɖǒ kɔ̃ dè. Nyɔ ɖò ní ɖá ɓɛ́ ɔ ké ɔ ɓǎto ɖò hwìɖǐǐ taɓa. M̀ mɛ gmɔ̀ nì wɔ̃ɔ̀ dyí, hwɛ̀ ḿ po níiń, ɓó màa ɓɛ́ m̀ kè ɔ pɛ̃́ da kɛɛ gbo.

⁶ Sepóɛɖé dyú-gààɔ̀ zàìn ɔ ɓǎ zùǔn, ké dyú-mààɔ̀ vɔ̃ ɔ ɖe gbo, ké dyúɛ̀ gmààɔ̀ vɔ̃ ɔ dà gbo. Nyɔ ɖòɛ̀ mú-nyɛ́-nyɔ̀ mɔ̀ ɔ mìɔùn nììn ɓíɖí-taún-nyɔ̀.

⁷ Kɛɛ ɓá mɔ́ún jè dyíɛɛ, ní dyéɖé mu Bounɓoɔ̀ dya nììn. Ní mu Gèɖèpɔ́ɔ̀ mɔ̀à ní póìn-nyɔ̀ɔ̀ kɛɛ hwòɖǒ kɔ̃ dèìn. Ní Gèɖèpɔ́ɔ̀ mu ní wuɖuɔ̀ wɔ̃́ùn.

Bounɓoɔ̀ dyà pó-pó

⁸ À mú-nyɛ́-nyɔ̀ ɓě, ɓěǐn ɖá ɓɛ́ ɓě ké à dyɔ́ ɓaɖa. À dyi ɓuɖu ní, à mu dyí sɔ̀ùn ɖe. À dyi ɖé tíe-kpò mú dyi kò ní, Bounɓoɔ̀ mu à ce jǔùn.

⁹ À mu Bounɓoɔ̀ dyoɖo ku wɔ̃ɔ̀ hwìɖǐi kùìn, sepóɛɖé à ɖǎ ɔ nàmàǔn bũ̌ nyu jè. À mu hwòɖǒ kuùn tee, ɓɛ́ ɔ ké à kɔ̃-zàà zi, nìí ɓɛ́ ɔ ké ɓě mɔ̀à à mú-nyɛ́-nyɔ̀ ɓěɔ̀ kɛɛ gǎ kɔ̃ tò hwɛ̀. Ɔ mu à ceɔ̀ dyí síìn. À mu ɔ nyɔ-póìn-póìnɔ̀ dyéìn.

¹⁰ Ɔ ɖǎ ná nìǐn, ɓě mɔ̀à à mú-nyɛ́-nyɔ̀ ɓěɔ̀ kɛɛ muɛ dyéìn, ké dɛ̃ mu ɓě nyuùn, sepóɛɖé ɓě cɛ̃ɛ ma à gbo, ké ɓě ɖá, “Dɛ̌ Bounɓo mɔ̀à ɓěɛ̀ Gèɖèpɔ́ɔ̀ kɛɛ ɖé?” À dyéɖé mu ɓě dyéìn, ké à mu ɓě dyɔ́ ɓaɖaùn. Wa mu ɓě kɔ̃in síìn kà nyɔ síìn kà bàɖà nì ɖé hwìè gba kɛɛ kɔ̃in nyɛ.

¹¹ Júɖà-nyɔ̀ ɓě, ɓě mu ɓěɛ̀ gmɔ ɓěɔ̀ poùn ɖe. Ɓó wéa ɓaɖaa, ɓěɛ̀ ɓóɖóɔ̀ mu kɔ̃ kpáùn.

¹² Ké nyɔ kúɖúú mu ɓě gbo dyiìn ɓó wéa ɓaɖa, sɔ̀ìn ɖé Àsíwíɖíà-ɓòɖòɔ̀ kɔ̃ nyinià ɖé Íjè-ɓòɖòɔ̀ kɔ̃ɛ, kè sɔ̀ìn ɖé Íjè-ɓòɖòɔ̀ kɔ̃ nyinià ɖé Dyùféɖétì-nìɔ̀ wĩín nyɛ, kè sɔ̀ìn ɖé dyóó ɖò wĩín ké ɖò dyɛ̀ìn nyɛ, ɔ kè sɔ̀ìn ɖé toɖo vɛ̀nɛ̀ ɖò gbo ké ɖò dyɛ̀ìn nyɛ.

¹³ Kɛɛ ɓóɖó-kpà gànáà mu fóɖóún kpáùn ɓó nyɔ ɓě ɓɛ́ wa cĩ́à ɓóɛ kɔ̃ɛɛ nyuu-ɖɛ̀ gbà ɓěɔ̀ gbo-wóɖó-ɖɛ̀ jè.

Bounɓoɔ̀ dyé Éézùɖùɛ̀-nyɔ̀ ɓěɔ̀ wìǐn

¹⁴ Bounɓo, gmɔ̀ à mɔ̀à nì nyɔ ɓěɔ̀ kɛɛ dyí dyììn ɖé nì ɓáɖáá-dyí-gmɔ̀ìn-kùì-kpàɔ̀ mú. À hwɔìn ɓáɖáá ɓě mɔ̀ nì kɔ̃̀ɔ̀-ɖɛ̀ kɛɛ kánáá pū. À ɖòùn cĩ́ ɖé xwáɖá-kpòò ɖò hwìɛ̀, ɖé ɓóɖó bùɛ̀-bùɛ̀ ɖò kɔ̃, kɛɛ ɖii-pìǐ ɖò se ɖé nì. Nyuɛ ɓɛ́ à ké dyi ɖi ɖé Básàùn-ɓòɖòɔ̀ kè Gíɖèà-ɓòɖòɔ̀ kɔ̃ kà ɔ nyuó zɔ̃̌ɔ̀ kà nìɛ̀ kĩ́ín nyɛ.

¹⁵ Bounɓo, tɛ̀mɛ̀ìn nì dĩ́ín-dĩ̀ìn-ɖɛ̀ ɓěɔ̀ à dyí ɖe kà m̀ nyuó zɔ̃̌ɔ̀ kà ti ɓɛ́ m̀ zà zɔ̃̌ɔ̀ kà à ɓǎ nììn ɓǎ ɓěɔ̀ ɖé Íjè-ɓòɖòɔ̀ kɔ̃ɛ.

¹⁶ Ɓóɖó-dù kà kò ɖò ɓěɛ̀ nyɔ ɓěɔ̀ dyiɛ dyéín, dɛ̃ mu wa nyuùn, sepóɛɖé wa hwòɖǒ ɖá wa ɖòùn ɓéɖé ma kpé. Wa mu xwa wĩín dèìn, ɓɛ́ wa ké jìì ɖùǔn sṹ.

¹⁷ Wa mu ɓóɖó ɖiìn kà sɛ kè ɓíɖíi-dyi-nà-ɖɛ̀ tɔ̀ɔ̀ ɓě nyuà kɛ. Wa mu waà vǐè-naín ɓěɔ̀ sɔ̀ùn, ɓɛ́ wa ké tɛɖɛɛ dyà. Fã̀à muɛ nyuùn ɓɛ́ wa ké mɔ̀ Bounɓo mɔ̀à à Gèɖèpɔ́ɔ̀ kɛɛ gbo dyi, ké wa mu waà fɛ̀ɛ̀ɔ̀ jè fã̀à peɖeìn.

¹⁸ Gèɖèpɔ́ɔ̀ ɖò se nì kà m̀ nìà kɛ, ɓɛ́ ɔ ké nàmàǔn kè gma-ɖuà-ɖuà ɓɛ́ nì nyɔ xwéɖé wèɔ̀ ɖǎ nyuɛɛ kɔ̃in zĩ̀ìn. Nì dyoɖo-hwòɖòɔ̀ ní sè ná, sepóɛɖé ɖɛ nì hwòɖǒ dèìn múin nyɛɛ mɔ̀ ɖɛ̀ɓɛ̀ǐn-ɖɛ̀ɓɛ̀ǐn se sèìn-naín kɔ̃̀ɛ.

¹⁹ Nì mu à wìǐn dyéìn ɖe. Nì mu à ɖɛ gbà ɓěɔ̀ kɔ̃in síìn. Nì mu à nàmàǔn séín ɓěɔ̀ ɖéé ɖé dyóóɔ̀ hwuɖu poùn.

²⁰ Bounɓo, nì mu à mɔ̀à Jékɔ̀ kè Ééɓòɖòhɛ̃́ɛ̀ xwíníín-dyù ɓěɔ̀ kɛɛ jǎà gbo nyuùn, ɓɛ́ nì ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ ké à kɔ̃ nì kà m̀ nyuɛ zɔ̃̌ɔ̀ kà à ɓǎ nììn ɓǎ ɓěɔ̀ nyɛ́nɛ́ín ɖáìn nyɛ.