Mákà 6 - Ɓǎsɔ́ɔ̀ Báɓòɔ̀

Bounɓoɔ̀ kè Éézùɖùɛ̀-nyɔ̀ ɓěɔ̀ ɓéɖé zaa

¹ Éézùɖùɛ̀-nyɔ̀ ɓě, ɓě tò ɖɛ Bounɓoɔ̀ nì cɛ̃iń nyɛɛ gbo ɖùǔ. Ɔ ɖá, “Ɓě sɔ̀ dyí, ɓɛ́ ɓě ké toɖo vɛ̀nɛ̀ kèɛ̀ mɛ́nɛ́ɛ́ ɓěɔ̀ zaa dyéɖéín zĩ̀ìn.

² “Ɓóɖó-kpàà hìɖì-kpà sè-kpá kè toɖo vɛ̀nɛ̀ ɓě, ɓě tò mɔ̄ Bounɓoɔ̀ zɔ̃́ínɔ̀ gbo ɖùǔ, sepóɛɖé ḿ kè ní nyɔ ɓěɔ̀ ɓéɖé zii-zàà. Ḿ kè Éézùɖùɛ̀-dyù ɓěɔ̀ muɛ ziìn.

³ “Óó ní nyɔ ɓě, ɖɛ́ ḿ nyu ɓě bũ̌ kɛ́? Xwɛ̌ ḿ nyu ɓě saà kɛ́? Ɓě jǔ wɛ́ɛ ḿ gɔ̃̌e.

⁴ Ḿ zà zɔ̃̌ɔ̀ ɓě ɖé Íjè-ɓòɖò kɔ̃̀ kɔ̃ ɓɛ́ ɓě mɔ̀ ma kà gǐìɛ, ké ḿ tò ma Mózè kè Eɖóún ɔ kè Méwìɖìàùn, ɓɛ́ wa ké ɓě nàìn.

⁵ Óó ní nyɔ ɓě, ɖɛ ɓɛ́ Béɖà mɔ̀à Móà-kã̀ǎɔ̀ kɛɛ hwòɖǒ po ma gbɔɛɛ mɛ nì ɓě hwìɖǐi, ké ɖɛ ɓɛ́ Béɖàùn mɔ̀à Bɛ́òɛ̀ dyú-gààɔ̀ kɛɛ jǔìn ma ɔ gɔ̃̌ɛɛ mɛ nì ɓě hwìɖǐi. Ké ɖɛ kpá ma ɓó hwìè sɔ̀à Sítììn Bɔɔ-kpàɔ̀ kɔ̃ muà ɖé Gíógàò-hwɔ̀ɖɔ̀ɔ̀ múɛ kɔ̃ɛɛ jè mɛ nì ɓě hwìɖǐi, nìí ɓɛ́ ɓě ké mɔ̄ Bounɓoɔ̀ nyɔ-póìn-kpèɔ̀ dyuò.”

Ɖɛ ɓɛ́ Bounɓoɔ̀ mɔ́ kɛ

⁶ Ɖɛ́ ḿ mɛ dyà ɓó Bounɓo mɔ̀à Gèɖèpɔ́ɔ̀ nìà ɖéé ɖé dyiíɛɛ dyúa, hwɛ̀ ɓɛ́ ḿ ké ɓó ɔ dyúa dú hwuɖu taɓa kɛ́? Ḿ mɛ dyà fɔ̃ɔ-sàǎ-zàìn-ɖɛ̀ ɓě ɓɛ́ wa mɔ̀ ɓìɖǐ-dyù ɓě nyuá zɔ̃ dyúáɖò kɛɛ̀?

⁷ Bounɓoɔ̀ hwòɖǒ mu ɓáɖáá ɓíɔ́ táázĩ̀ìn ɓě tò-tò múin dèìnǹ, mɔɔ ɔ hwòɖǒ mu cáná ɓɛ́ ɔ mɔ̀ zii-nì ké ɔ pɛ̃́ dyiɛɛ táázĩ̀ìn ɓaɖa-bùè múin dèìnǹ? Ḿ mɛ tò ní nyíɔ́-dyùɔ̀ ɓó ní gma-ɖuà-ɖuàɔ̀ jèè? Ḿ mɛ tò ní xwíníín-zà-dyùɔ̀ ɓó ní nàmàǔnɔ̀ jèè?

⁸ Gbào, ḿ ɖíí ɓě, Bounɓoɔ̀ ɖǎ à ɖɛ nɔ̀mɔ̀ dyíin nyɛɛ dyí tɛ̀mɛ̀ìn. Ɖɛ́ Bounɓoɔ̀ mɔ́ à ké nyuɛ́? Ɔ mɔ̀, ɓɛ́ à ké ɖɛ mɔ̀ dyí-sɛ́ɖɛ́ìn-ɖɛ̀ kɛɛ nyu, ɓɛ́ à hwòɖǒ ké kpeɖeɛ̀ dyíin nɔ̀mɔ̀ jè múin dèìn, ɔ kè ɓɛ́ à ké à mìɔùn ɓíɖíi dyà ɓó à Gèɖèpɔ́ɔ̀ dyúa.

⁹ Bounɓoɔ̀ dyi-fɛ̃̀ìn-fɛ̃̀ìn mɔ̀ hwòɖǒ-fɔ̀nɔ̀-fɔ̀nɔ̀. Bounɓoɔ̀ cɛ̃ɛ Jùɖúsɛ̀ɖɛ̀ìn-nyɔ̀ ɓěɔ̀ gbo, ké ɔ ɖá, “Ɓě mɔ̀ nyɔ ɓě poìn kà dyí ɖé hwɔɖɔɔ̀ múɛɛ, ɓě wɔ̃́ ɖɛ nìà kɛ múin.

¹⁰ Ɓěɛ̀ hwòɖǒ ɖá ḿ ɓɛ́ìn ɖɛ jĩ̀ kà ɓɛ́ hwòɖǒ-kɔ̃in-nyìnììn-nyɔ̀ ɓěɔ̀ ɖǎà kɔ̃in poìn ɖé waà gbǒ ɓěɔ̀ múɛɛ dyéɖé kɔ̃in wã̀ìn pūe? Ḿ mɛ táà ɖɛ-mú-ɖàɓàìn-ɖɛ̀ se wɔ̃ ɓɛ́ìn ɓɛ́ wa ɓéɖéà, ɓɛ́ ḿ nyɛ́à múɛɛ jè dyi pūe?

¹¹ Ḿ mɛ zĩ̀ìn nyɔ ɓɛ́ ɔ ɓéɖéà pṹá-dyèɖè se wɔ̃ ɓɛ́ìn nyɛ ɓɔ̀ɔ̌-wèɛɛ kɔ̃in pūe?

¹² Nyɔ-ɖɛ-gana-xwa-zàìn-zàìn dyíìn ɖé ɓěɛ̀ bã-nyɔ̀ ɓěɔ̀ múin. Ké ɓě mɔ̀ se-tɔ́mɔ́-nyɔ̀, ké nyɔ-cá-wùɖù dyí ɖé ɓě wĩín.

¹³ Ɔ jèɛɛ, ḿ dèà ɓě mú gbɔɔ̀ gbɔ kɛ̀. Ní mu ɓě mú gbɔɔ̀ hwɔùn ɓó ɓěɛ̀ nàmàǔnɔ̀ jè.

¹⁴ Ɓě mu ɖɛ ɖiìn, kɛɛ ɓě se ɖoɓoɛ́ mu. Mɔ́ mu ɓě xwíníín nììn kánáá pū. Ɓě mu ɖɛ dyi dèìn, kɛɛ ɔ se ɓě xwai kòɛ̌ mu, sepóɛɖé ɖɛ mu ɓě xwa sèìn nyɛɛ, ní muɛ gàsíà-tò xwáɖáún zàìn.

¹⁵ Ɓě mu ɖɛ ɓáùn, kɛɛ ɓě seɛ ɓo dya kpã́a mu. Ɓě mu ɔ́ɖè cáná mú zàùn, kɛɛ ɓě se cánáɔ̀ ɖò fièɛ̌ mu dyɛ mɔ̀ùn. Ɓě mu géɖéè mú píníìn, kɛɛ ɓě se wã́ìn sɔ̀ɔ̀ múɛɛ ɖò náa mu.

¹⁶ Ɓě mu ɖɛ ɓěa dyí dyéìn, sepóɛɖé ɓě sí Kã́á Ɔ̃́wìɖì nììn kpeɖe gbàɔ̀ kíɖíí, ké ɓě nyu ɖɛ gbà séín ɓě ɓɛ́ Kã́á Éhà nììn gbǒ-xwíníín-nyɔ̀ ɓěɔ̀ nyu ma kà kɛ. Ɓě sí kpeɖe dyúáɖò wa sí ma kà kíɖííɛɛ kíɖíí. Ɔ jèɛɛ, ní mu ɓěɛ̀ hwɔɖɔɔ̀ hwùɖùǎ mú nyuùn, ɓɛ́ nyɔǔn-dyù ké ɓě pĩ́ɔ dyi ɓàɖàìn, ɓɛ́ ɓě ké zùǔn sɔ̀ìn ɖé ɓóɖó-dù ɓěɔ̀ dyéɖéín.”