Mákà 5 - Ɓǎsɔ́ɔ̀ Báɓòɔ̀

¹ Jùɖúsɛ̀ɖɛ̀ìn-nyɔ̀ ɓě, ɓěà dyéìn ɓěà sójà ɓěɔ̀ ti, sepóɛɖé wa ɖǎ à wɔ̃ gbǎìn. Wa mu à wuɖuí-kɔ̃̀-nyɔ̀ɔ̀ ɓà-cù ga dyí nàmàìn.

Gèɖèpɔ́ɔ̀ ɖá Éézùɖùɛ̀-nyɔ̀ ɓěɔ̀ wuɖuí-kɔ̃̀-nyɔ̀ ɖò mu ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ mú sɔ̀ùn

² Bounɓoɔ̀ ɖá, “Bɛ́fèɖèhɛ̃́ɛ̀-hwɔ̀ɖɔ̀ wè, mɔ̀ nìà ɖé Ɛ́fàɖà Gbɛ̌ɛ̀ɔ̀ múɛɛ, m̀ mɔ̀ hwɔɖɔ-dyù wè ɖé Júɖà-ɓòɖòɔ̀ kɔ̃ dyɛo, kɛɛ ɖé m̀ mú, ɖéɛ̀ Éézùɖùɛ̀-nyɔ̀ ɓěɔ̀ wuɖuí-kɔ̃̀-nyɔ̀ ɖò mu sɔ̀ùn ɓó ḿ bìì. Ɔ mɔ̀ nyɔ kɔ̃̀ ta ɓá ɖé xwéɖé-dù deìn dúún ɓěɔ̀ gbo dyi ɓó ti sùà múɛ.”

³ Ɔ jèɛɛ, Bounɓoɔ̀ mu Éézùɖùɛ̀-nyɔ̀ ɓěɔ̀ dyi táàùn, ɓɛ́ màa kɔ̃̀ póó-xwìɖì nìà puàǔn wɛ̃ɛ ké pó hwɛ̀. Ɔ ɖǎ ná nìǐn, nìí, dyúɔ̀ ɖíí ɓě ɓɛ́ wa kpa to-xwàɖàǔn wɛ̃ɛ mu ɖé Éézùɖùɛ̀-ɓòɖòɔ̀ kɔ̃ ɖe dyiìn.

⁴ Ké dyúɔ̀ mu ɔ nyɔ ɓěɔ̀ nàìn kà ɓáɖáá-dyí-gmɔ̀-nyɔ̀ nyuà kɛ. Ɔ muɛ náa nyuùn ɖé Bounɓo mɔ̀à ɔ Gèɖèpɔ́ɔ̀ kɛɛ kpéɔ̀ kè ɔ dĩ́ín-dĩ̀ìnɔ̀ mú. Ké wa mu ɖé gìɖìǐ mú cĩ́ìn, sepóɛɖé ɔ nyɛ́nɛ́ mu muùn ɖé ɓóɖó-kpàà dà séín.

⁵ Ɔ mu wa gìɖìǐ dyàùn. Ti ɓɛ́ Àsíwíɖíà-nyɔ̀ ɓěɔ̀ mu à ɓóɖóɛ̀ to kɔ̃ poùn, ɓɛ́ wa ké à to-pèɖèìn-naín ɓěɔ̀ waa, nìí, à mu nàìn-nyɔ̀ pàɖǎ gãùn ɓó wa gbo vɔ̃ jè.

Gbǎà-gbǎà kè gǎ-kɔ̃-tò-tò

⁶ Wa mu Àsíwíɖíà-ɓòɖò mɔ̀à Níwɔ̀ɖɔ̀ɛ̀ ɓóɖóɔ̀ kɛɛ toún ɖuùn dyììn ɖé gàsíà mú. Ti Àsíwíɖíà-nyɔ̀ ɓěɔ̀ mu à ɓóɖóɛ̀ to kɔ̃ poùn wɛ̃ɛ, wa mu à póìn sɔ̀ìn ɖé wa xwaún.

⁷ Ɓó tia ɓaɖaa, Jékɔ̀ɛ̀ xwíníín-dyù ɓěɔ̀ nyɔ xwéɖé wè sèà dyiɛɛ mu ɖé ɓóɖó-dù ɓěɔ̀ hwìɛ̀ nììn kà dunu ɓɛ́ ɔ sɔ̀ìn ɖé Bounɓoɔ̀ gboɛɛ nìà kɛ, mɔɔ kà ní fíɖí-fíɖí ɓɛ́ ɔ ɖàɓàìn pìǐ kɔ̃ɛɛ nìà kɛ. Ɔ ní fòìn nyɔǔn-dyù.

⁸ Ké Jékɔ̀ɛ̀ xwíníín-dyù ɓěɔ̀ nyɔ xwéɖé wè sèà dyiɛɛ mu ɖé ɓóɖó-dù ɓěɔ̀ hwìɛ̀ nììn kà ganìǎ ɖò ɓɛ́ ɔ nì ɖé xwáɖá-xwíɖíi-nìmìì ɓě mɔɔ nyúà-ɖɛ̀ ɓě hwìɛ̀ kɛɛ nìà kɛ. Ɔ dyi wa hwìɛ̀ mu ní, nìí, ɔ kpɔ̃ ɖɛ, ké ɔ fáìn dyi, ké nyɔ kéɛ ɔ xwaún zàa ɖò se nì.

⁹ Waà sɔ̃ mu ɖé waà gbo-vɔ̃-nyɔ̀ ɓěɔ̀ kɔ̃in nììn. Waà mú-nyɛ́-nyɔ̀ séín ɓěɔ̀ mu ɓó cɛ̃̀ìn.

¹⁰ Ké Bounɓoɔ̀ ɖá, “Kɛɛ ɓó wéa ɓaɖaa, ní mu ɓěɛ̀ sǒ ɓěɔ̀ ɖé ɓě hwìɛ̀ zàùn, ké ní mu ɓěɛ̀ hwíì-sǒ ɓěɔ̀ dyíin nyìnììn.

¹¹ Ké ní mu ɓěɛ̀ to-pèɖèìn-naín séín ɓěɔ̀ ɓíɖíi dyi poùn.

¹² Ké ní mu ɓě hwe-kpèɖè séín xwai zàùn, ké ɓě se sɛ̀ɛ̀-po-nyɔ̀ ɖò ɓéɖéɛ mu ɖe.

¹³ Ké ní mu ɓěɛ̀ kũùn-kpò ɓěɔ̀ ɓó hwìǐ zàùn. Ké ní mu ɓiè-sɔ̀ɔ̌-kpò ɓě ɓɛ́ ɓě nyànàìn dyiɛɛ ɖé ɓě hwìɛ̀ zàùn, ké ɓě se ɓě mìɔùn nììn sɔ̃ɔ̀ mɛɛ-ɖɛ̀ ɓěɔ̀ dyúa dú hwuɖu taɓaá mu ɖe.

¹⁴ Ké ní mu ɓěɛ̀ cu-kpóɖó ɓě mɔ̀à ɓěɛ̀ gèɖèpɔ́ɔ̀-màà kɔ̃̀ nyɛ́nɛ́ mɔ̀à Àséwàɖà kɛɛ hwɔìn-ɖɛ̀ ɓě ɓɛ́ ɓě nyànàìn dyiɛɛ hwuɖu zàùn ɖé ɓě hwìɛ̀, ɓɛ́ ḿ ké ɓěɛ̀ hwɔɖɔ ɓěɔ̀ wáɖá.

¹⁵ Ké ɓóɖó-dù ɓě ɓɛ́ wa seà ní wuɖuɔ̀ nyuɛɛ, ní mu wa kpa kɔ̃in zàìn ɖé ní dyoɖo-hwòɖò ku wɔ̃ɔ̀ mú.”