Mákà 4 - Ɓǎsɔ́ɔ̀ Báɓòɔ̀

Bounɓoɔ̀ kɔ̃̀ ɓóɖó-kpà gànáà wuɖuí ɖé gìɖìǐ mú

¹ Ɓó wé hwɛ̀ìn-gbɔɔ̀ ɓaɖaa, toɖo kɔ̃̀ dya ɓɛ́ Bounɓoɔ̀ gbǒɔ̀ nìà kɛɛ mu toɖo ɓɛ́ ɔ tɔ̀mɔ̀ dya mìɔ ɖé toɖo ɓě hwìɛ̀ kɛɛ jǔùn. Ɔ mu ɖé toɖo tɔ̀ɔ̀ ɓě dú-hwìɛ̀ dyi pɛ̃́ìn, ké nyɔ kúɖúú muɛ gbo muùn.

² Ɓóɖó-dù ɓáún-ɓáún mu dyiìn, ɓɛ́ wa ké níiń, “Ɓě dyi, ɓɛ́ ɓěà ké ɖé Bounɓoɔ̀ toɖoɔ̀ dya mu. Ɓěà mu ɖé Jékɔ̀ɛ̀ Gèɖèpɔ́ɔ̀ gbǒɔ̀ gbo, ɓɛ́ ɔ ké ɔ kpeɖe ɓěɔ̀ à tɛ̀mɛ̀ìn, nìí ɓɛ́ à ké ɔ hwìèɔ̀ xwíníín nà.” Sepóɛɖé ɖé Zádyɔún-hwɔ̀ɖɔ̀ɔ̀ mú, ɖéɛ̀ Bounɓoɔ̀ gmaɔ̀ mu sɔ̀ìn. Ɔ wuɖuɔ̀ mu ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú sɔ̀ìn.

³ Bounɓoɔ̀ mu zɔ̃́ín nì nyɔ ɓáún-ɓáún pṹa kɛɛ wɔ̃ poùn. Ɔ mu ɓóɖó-dù ɓě nì ɖé nya vɛ̃in, ɓɛ́ wa ɓéɖé gana kɛɛ bìì ɖɛ wɔ̃ poùn ɖekè. Ké wa muá waà gàsíà ɓěɔ̀ ɓóɖó-wàìn-ɖɛ̀ ɓě mú ɓaɖaùn, ké wa mu waà ɖí ɓěɔ̀ ɖɛ-kpã́ìn-gbǎ ɓě mú ɓaɖaùn. Ɓóɖó-dù ɖò se ɔ mǔè-ɓòɖò-dù ɖò to kɔ̃ kpaá mu ɖe, mɔɔ ké wa se to-vɔ̃-nyɔ̀ ɖò ti dyéɛ̌n mu ɓó to jè ɖe.

⁴ Kɛɛ nyɔ ɖò-ɖò séín muá ɖé wa mìɔùn nììn géɖéè-gbǎ ɓě kè féè-cù ɓě xwíɖíi dyi kòùn ɖe, ké nyɔ ɖò se wa fã̀àǔn poɛ́ mu ɖe. Bounɓo mɔ̀ nyɔ nìà ɖɛ séín kɔ̃in nyɛɛ ɖǎa cɛ̃.

⁵ Ɓóɖó-dù kà kò ɖò ɓěɛ̀ nyɔ séín ɓěɔ̀ nàìn wa nììn gèɖèpɔ́ɔ̀ ɓěɔ̀ nyɛ́nɛ́ mú, kɛɛ à mɔ̀ùn mu Bounɓo mɔ̀à à nììn Gèɖèpɔ́ɔ̀ kɛɛ nyɛ́nɛ́ɔ̀ mú nàìn ɓó sè-ná-sèɛ̀ tiín.

Éézùɖùɛ̀-nyɔ̀ ɓěɔ̀ mu to-xwàɖàǔn sɔ̀ùn ɓɛ́ wa ké wa ɓíɖí ɖe dyi

⁶ Bounɓoɔ̀ ɖá, “Ti ɖò nì dyiɛń, ké ní mu nyɔ ɓě ɓɛ́ wa nàìn gbùàǔn wɛ̃ɛ dà ɖò dyí poìn. Ní mu nyɔ ɓě ɓɛ́ ḿ ɖǎ gǎ kɔ̃ tò, ké ḿ ɖǎ wa dyi gbɛ̀ìn nyɛɛ dyí poìn ɖe.

⁷ Ké ní mu nyɔ ɓě ɓɛ́ wa nàìn kà gbùàǔn wɛ̃ɛ nyɔ xwéɖé wè sè ɓíɖíiɛɛ mú nyuùn. Ní mu nyɔ ɓě ɓɛ́ wa gbɛ̀ìn kà dyiɛɛ ɓóɖó-dù kui-kui ɖò mú nyuùn. Ké mɔ̄ Bounɓoɔ̀ mɔ̀ nyɔ mu wa wuɖuí kɔ̃̀ùn ɖé Zádyɔún-tòɖòɔ̀ dya, sɔ̀ìn ɓó tia gbo ké dyúa muɛ.

⁸ “Jùɖúsɛ̀ɖɛ̀ìn-hwɔ̀ɖɔ̀ wè, mɔ̀ mɔ̀à ní nyɔ ɓěɔ̀ dyí-gmɔ̀-nyɔ̀ kɛɛ, nì mu nì wuɖuí-kɔ̃̀-kpèɔ̀ dyéìn ɖe.

⁹ Ɖɛ́ kɔ̃̀ kpé nì poà ɖé wuɖu zoo múɛ́? Kã́á ɖò se ɖé m̀ mú nì ɖeè? Nì náún-po-nyɔ̀ ɓěɔ̀ ɖǎ mú gbɔɔ̀ hwɛ̀ ké ɔ nyuɛ ké bũ̌in-puà-puà nìà ɖé m̀ mú kà màa ɖòɛ̀ póó-xwìɖì kéɔ́ kà ɔ puà kɛɛ̀?

¹⁰ Zádyɔún-nyɔ̀ ɓě, ɓě gɛ̀nɛ̌ dyi, ɓɛ́ ɓě ké kpò kà màa ɓɛ́ ɔ nì póó-gbò ɖeín nyɛɛ nyuà kɛ, sepóɛɖé ɓě muá ɓěɛ̀ páɔ̀ kɔ̃ wãùn ɖé hwɔɖɔɔ̀ mú, ɓɛ́ ɓě kéá xwíɖíi pa. Kɛɛ wa mu ɓě kpɔ̃ùn, ɓɛ́ wa ké ɓě ɖé Báɓèɖɔ́ùn-ɓòɖòɔ̀ kɔ̃ kpa wɛ̃́ɛ́. Ké ɖéɛ̀ ɓě mu pó-pó dyéìn. Ɖéɛ̀ mɔ̄ Bounɓoɔ̀ mu ɓě gbǎàùn sɔ̀ìn ɖé ɓěɛ̀ mú-nyɛ́-nyɔ̀ ɓěɔ̀ xwaún.

¹¹ Ɓó kàǔn wɛ̃ɛ, ɓóɖó-dù ɓáún-ɓáún ɖǎ dyí poìn, ɓɛ́ wa ké ɓě to kɔ̃ dyà. Wa cɛ̃ɛ, ké wa ɖá, ‘Ɓěà nyuɛ ɓɛ́ Zádyɔún-hwɔ̀ɖɔ̀ɔ̀ ké se mú hwɛ̀ ɖe, nìí ɓɛ́ ɓěà ké ɔ dyi dyé.’

¹² Kɛɛ wa se ní hwòɖǒɛ̀-gbɔ-po-ɖɛ̀ dyuò. Wa se ní dyí-sɔ́-ɖɛ̀ múin wɔ̃́. Wa seɛ dyuò kà ḿ ɖǎ wa dyí poìn kà nyɔ poìn kà mɔɔ́-jũ̌ ɓě dyí ɖé mɔɔ́-dyí-síìn-naínɔ̀ kɛ.

¹³ “Zádyɔún-hwɔ̀ɖɔ̀ wè, sɔ̀ dyí, ɓɛ́ m̀ ké ɓóɖó-dù ɓěɔ̀ dyi wàìn, sepóɛɖé ní mu m̀ nɛɛ̀-kpà-gmɛ̌ kè bàɖàsǐ-zùǎ nyíìn. Nì mu ɓóɖó-dù ɓěɔ̀ dyi wàìn, ké nì mu waà kpáná-ɖɛ̀ ɓěɔ̀ ḿ xwáɖáún zàìn. Nì mu waà kɔ́mɔ́-ɖɛ̀ ɓěɔ̀ mɔ̄ Ɖɛɓíɔ́ kɔ̃̀à ɓóɖó-kpà gànáà wuɖuíɛɛ nyíìn.”