Mákà 3 - Ɓǎsɔ́ɔ̀ Báɓòɔ̀

Mákà ɓàɖàìn Éézùɖùɛ̀-nyɔ̀ ɓěɔ̀ nàìn-nyɔ̀ ɓěɔ̀ wɔ̃

¹ Ɓě mɔ̀à Jékɔ̀ɛ̀ xwíníín-dyù ɓěɔ̀ nàìn-nyɔ̀ kɛɛ, má, ɓě ɓéɖé ɓě kéɔ́ má dyí-sɛ́ɖɛ́ìn-ɖɛ̀ dyuòe?

^2-3 Ɓě nyɛ́ ɖɛín-ɖɛ̀ mú, ké ɓě ɖɛ̀ɓɛ̀ ɖɛ gbà mú. Ɓě nyu ní nyɔ ɓěɔ̀ kà nyɔ nyuà suaɖɛ̀ ɓó cɔ́ɔ́ mú po jèɛ. Ɓě zà ní nyɔ ɓěɔ̀ kúɖúù, ké ɓě zà ní nyɔ ɓěɔ̀ kpá ɓěɔ̀ fɔ́ bũ̌in, ké ɓě cɛ̃ìn dyi, ké ɓě tàà, ké ɓě wàìn waà kpá ɓěɔ̀ dyi.

⁴ Kɛɛ wé ɖò nì dyiɛń, ké ɓě mu mú pánáùn ɖé Bounɓoɔ̀ gbo, kɛɛ ɔ se ɓě gɔ̃̌ jǔɛ mu. Ɔ mu ɓě dyúa xwáɖáún pòìn ɓó tia ɓaɖa, sepóɛɖé ɓěɛ̀ nyuu-ɖɛ̀ nyìnììn kɔ̃in.

⁵ Ɖɛ ɓɛ́ Bounɓoɔ̀ cɛ̃ ɓá kpáá-ɖɛ̀-cɛ̃-nyɔ̀ ɓě ɓɛ́ wa zàìn ɔ nyɔ ɓěɔ̀ hwìǐɛɛ jè dyíɛɛ kɛà kɛ̀. Ɔ ɖá, “Nyɔ ɖò dyi ɓě ɖii-ɖɛ̀ nyí ní, nìí, ɓě cɛ̃ kpáá-ɖɛ̀ ɓá gìɖìǐ jè dyíɛ. Kɛɛ nyɔɔ̀ se ɓě ɖii-ɖɛ̀ nyí ní, nìí, ɓě ɖá, ‘To nì m̀ kɔ̃ dyiɛńo.’

⁶ Ɔ ná nì jèɛɛ, hwuɖu mu ɓě hwɔ̀ìn, ké ɓě se dyí-tɛ̀mɛ̀ìn-ɖɛ̀ ɖò dyéɛ mu, ké ɓě se sɛ̀ɛ̀ poɛ ɓɛ́ǐn mu. Dyóɖóɔ̀ mu dyi kpáùn ɓó ɓě bìì, ké wéɔ̀ mu tíe-kpò mú zɛ̃̀ìn ɓó ɓě bìì.

⁷ Ɓě mɔ̀ kpáá-ɖɛ̀-dyé-nyɔ̀ ɓěɛɛ, ɓě mu zùǔn sɔ̀ìn, ké dɛ̃ mu ɓěɛ̀ sɛ̀ɛ̀-po-nyɔ̀ ɓěɔ̀ nyuùn. Ɓě séín mu dyúa ɓíɖíi dyàùn, sepóɛɖé gɔ̃̌-jǔ-wùɖù ɖò se ɖé ḿ gbo sɔ̀ǐn mu ɓó ɓě bìì.”

⁸ Kɛɛ ɓó mɔ́ún bììɛɛ, kpé kè Bounɓoɔ̀ Zùùɔ̀ kè dyí-sɛ́ɖɛ́ìn-sɛ́ɖɛ́ìn ɔ kè gana dyíìn ɖé ḿ múin, ɓɛ́ ḿ ké Jékɔ̀ɛ̀ xwíníín-dyù ɓěɔ̀ waà gma-ɖuà-ɖuàɔ̀ da zàìn, ɓɛ́ ḿ ké waà nàmàǔnɔ̀ wa dyí tɛ̀mɛ̀ìn.

⁹ Ɓě mɔ̀à Jékɔ̀ɛ̀ xwíníín-dyù ɓěɔ̀ nàìn-nyɔ̀ ɓěɛɛ, ɓě tò ɖɛ nìà kɛ gbo ɖùǔ. Ɓě nyɛ́ dyí-sɛ́ɖɛ́ìn-ɖɛ̀ mú, ké ɓě zàìn jǎà-ɖɛ̀ séín hwìǐ.

¹⁰ Ɓě po Zádyɔún-hwɔ̀ɖɔ̀ɔ̀ dyììn ɖé nyɔmɔɔ-dyi-wáɖáìn-wáɖáìn mú. Ɓě po Jùɖúsɛ̀ɖɛ̀ìn-hwɔ̀ɖɔ̀ɔ̀ dyììn ɖé se-dyí-sɛ́ɖɛ́ìn-ɖɛ̀ nyu-nyu mú.

¹¹ Ɓě po zaa wɔ̃ ɓó nyɔ-gbo-pa-wìɖì jè, ké ɓěɛ̀ sáa-zà-nyɔ̀ ɓěɔ̀ tɛ̀mɛ̀ìn nyɔ ɖɛ ɓó pɛ́ɛ̀-ɖɛ̀ dyé jè, ké ɓěɛ̀ kpáá-ɖɛ̀-cɛ̃-nyɔ̀ ɓěɔ̀ po sɛ̀ɛ̀ ɓó wíɖí jè. Kɛɛ ɓě dèɛ̀ Bounɓoɔ̀ dyí, ké ɓě ɖá, “Má, Bounɓoɔ̀ nì à hwìɛ̀e? Ɖɛ gbà ɖò se à nyuɛ́ mu.”

¹² Ɓó ɓěɛ̀ nyuu-ɖɛ̀ ɓěɔ̀ jèɛɛ, wa mu Zádyɔún-hwɔ̀ɖɔ̀ mɔ̀à Jùɖúsɛ̀ɖɛ̀ìn-hwɔ̀ɖɔ̀ɔ̀ kɛɛ waùn kà nyɔ waà pá ɖò ɓɛ́ nyɔ kéà ɓó ɖɛ ɓáa. Ɔ mu kúò jǔùn, ké toɖo kɔ̃̀ dya ɓɛ́ Gèɖèpɔ́ɔ̀ gbǒɔ̀ nìà kɛɛ mu xwáɖá-kpòò jǔùn.