Mákà 2 - Ɓǎsɔ́ɔ̀ Báɓòɔ̀

Gǎ mu nyɔ ɓě ɓɛ́ wa pĩ́à gǎ-dyé-nyɔ̀ ɓěɔ̀ dyiɛɛ kɔ̃ dyiìn nyɛ

¹ Gboò-wùɖù nì nyɔ ɓě ɓɛ́ wa pɛ̃́ ɓó waà kɔ̃-pɛ̃́-ɖɛ̀ɔ̀ kɔ̃ dyi ké wa sɔ́ ɖɛ gbà dyíɛɛ kɔ̃. Ti ɓɛ́ zɔ̃ zɔ̃ nyɛ̀nɛ̀ɛ̀ kɛɛ ní, wa nyuɛ cá, sepóɛɖé ɔ nì ɖé waà kpé mú, ɓɛ́ wa kéɛ nyu.

² Waà hwòɖǒ mɔ́ nyɔ ɓěɛ̀ geɖe ɓě, ké wa zàìn wa gana xwa. Wa mɔ́ nyɔǔn ɓěɛ̀ gbǒ ɓě, ké wa zàà wa xwa. Wa pĩ́à nyɔǔn dyi, ké wa ɖú waà taà ɓě kè dúí-sè-ɖɛ̀ ɓě dyí.

³ Ɔ ná nì jèɛɛ, ɖɛ Bounɓoɔ̀ cɛ̃ɛ kɛà kɛ̀. Ɔ ɖá, “Gmɔ̀ nɔ̄, ḿ ɖǎ ɖɛ gbà dyí sɔ́ ɓá ɓě mɔ̀ gbǒ-xwíníín nìà kɛɛ jè dyí, ké ɓě se ɓě mìɔùn ɖɛ gbàɔ̀ xwaún póɛ̌n mu. Ké ɓě se nàǎ mu ɓɔ́ɖɔ́-kà ɖe, sepóɛɖé ɔ mu ti nyìnììn dyíin mìɔ jǔùn.

⁴ Ké nyɔǔn ɓě mu ɓě dyɔ́ ɓaɖaùn ɖé vĩ̌-wùɖù mú, ɓó wéa ɓaɖa. Waà vĩ̌-wùɖùɔ̀ ɖá, “ ‘Wa ɖǎ mú gbɔɔ̀ hwɛ̀. Bounɓoɔ̀ ɖǎ ɔ nyɔ ɓěɔ̀ pá ɓěɔ̀ wa xwa zà. Dyéɛ kà ɔ nyuɛ wa xwa zàà, ké ɔ nyu waà pá ɓěɔ̀ nyɔ ɓě ɓɛ́ wa nyu wa toɛ̀-kpɔ̃-nyɔ̀ múɛɛ nyíɛ kɛ.’ ”

⁵ Ɓě se nyɔ ɖò ɓéɖéɛ mu ɖé Bounɓoɔ̀ nyɔ ɓěɔ̀ hwìɛ̀, ɓɛ́ ɔ ké páɔ̀ ɖò dyé ti wa muɛ geìn dyììn ɖé gbo-ɖàɓàìn-ɖɛ̀ múɛ.

⁶ Júɖà-nyɔ̀ ɓěɔ̀ kpáá-ɖɛ̀-cɛ̃-nyɔ̀ ɓěɔ̀ cɛ̃ɛ ḿ gbo, ké wa ɖá, “Ɓɔ́ kpáá-ɖɛ̀ cɛ̃ɛ. Nyɔ ɖò mɛ ɓɔ́ ɖɛ nì kà ɓěɛ̀ cɛ̃ɛ. Nyɔ-zùǔn-zàìn-ɖɛ̀ ɖò se à kɔ̃ dyiɛ́ mu.”

⁷ Jékɔ̀ɛ̀ xwíníín-dyù ɓě, ɓěɛ̀ hwòɖǒ ɖá ɔ nɔ̀mɔ̀ dyíin ɓɛ́ ɓě kéɛ cɛ̃, ɓɛ́ ɓě ké níiń, “Gèɖèpɔ́ɔ̀ Zùùɔ̀ mu hwòɖǒ kuùn kánáá pū. Ɔ se ɖɛ nì kà ɓěɛ̀ nyuɛ ɓɛ́ìne?” Má, ní wuɖuɔ̀ nyu nyɔ ɓě mɔ̀ dyí-sɛ́ɖɛ́ìn-nyɔ̀ kɛɛ nɔ̀mɔ̀ dyíin dyíe?

⁸ Bounɓoɔ̀ ɖá, “Ɓě nì ní nyɔ ɓěɔ̀ gbo vɔ̃uń kà nyɔ-mú-nyɛ́-nyɔ̀ nyuà kɛ. Ɓě zà nyɔ ɓě ɓɛ́ wa mɔ̀ gìɖìǐ-nyɔ̀ kɛɛ ɖɔún dyi. Wa mɔ̀ nyɔ ɓě ɓɛ́ wa nì ziɛń gìɖìǐ-kà ké wa se ɓě gbo-vɔ̃-hwòɖò ɖò ɓéɖé dyɛ mɔ̀ùn wɛ̃.

⁹ Ɓě kúmú ní nyɔ ɓěɔ̀ màa ɓěɔ̀ waà gbǒ nɔ̀mɔ̀ kɔ̃in ɓěɔ̀ mú dyi, ké ɓě zà ní nyɔ-mana-kɔ̃-po-poɔ̀ waà dyú ɓěɔ̀ xwa kánáá pū.

¹⁰ Ɓě sɔ̀ dyí, ɓɛ́ ɓě ké mu, sepóɛɖé dà ɓó se ɓóɖó kɔ̃̀ kɔ̃ ɓě ké gìɖìǐ mú cĩ́ɛ. Ɓě nyuɛ ké ɓó se mú hwɛ̀ ɖe, ké ɔ mu mú gbɔɔ̀ùn gàná cá.

¹¹ “Kpáá-ɖɛ̀-cɛ̃-nyɔ̀ ɖò dyiɔ́ dyi, ké ɔ dyiɔ́ wuɖu fóɖóún mɔ̀ se saá-saá kɛɛ cɛ̃, ké ɔ dyiɔ́ níiń, ‘Ɓě mu wã́ìn kè nɔmɔɔ ɓáún-ɓáún ɓéɖéo’ ní, nìí, ɔ mɔ̀ kpáá-ɖɛ̀-cɛ̃-nyɔ̀ ɓɛ́ ɓě hwòɖǒ dèìn múin nyɛ.

¹² “Ɓě mɔ̀à Jékɔ̀ɛ̀ xwíníín-dyù xwéɖé wè sèà ɓíɖíiɛɛ, ní mu ɓě séín dyí poìn. Ní mu ɓě dà dyúáɖò dyí poìn kà ɓáɖáá ɓě nìà ɖé kòò mú, mɔɔ ɖé dyi-ɖi-naín nyɛ. Nyɔ kúɖúú mu ɖé dyi dyíìn.”

¹³ Bounɓoɔ̀ mɔ̀ nyɔ mu hwìèɔ̀ kaàùn, ɓɛ́ ɔ ké ɓě dyúa zi, ɓɛ́ ɔ ké ɓě to-xwàɖàǔn zà. Ɓě mu gmɔ-wɔ̃̀ ɓěɔ̀ mú zĩ̀ìn, ɓɛ́ ɓě ké sí. Ɓěɛ̀ kã́á mɔ̀à Bounɓoɔ̀ kɛɛ mìɔùn mɔ̀ nyɔ mu ɓě nàìn.