Máfíò 9 - Ɓǎsɔ́ɔ̀ Báɓòɔ̀

Jízɛ̀ kánáìn gàa ɖò kɔ̃̀ wáká mɛ́ɛ dyi

¹ Sɔ̀ìn ɓóɛ gboɛɛ, Jízɛ̀ dyá ma ɓáɖáàɔ̀ mú, ké ɔ péɖé ma dòùnɓìǎɔ̀ ɖe, ké ɔ mu ma ɖé ɔ mìɔùn ɓíɖí-hwɔɖɔún.

² Púɛɛ, nyɔ ɓě dyà ma gàa ɖò kɔ̃̀ wáká mɛ́ ma kɛɛ ɔ gbo. Gàaɔ̀ pɛ̃́ ma ɔ kɔ̃-pɛ̃́-ɖɛ̀ɔ̀ kɔ̃in, ké wa dyà ma ɔ. Ké Jízɛ̀ dyéɛ ma kà ɓɛ́ wa ɓéɖé ma hwìɖǐǐ-taɓa-taɓa kɛ, ké ɔ cɛ̃ɛ ma gàa wáká mɛ́-mɛ́ɔ̀ gbo, ké ɔ ɖá, “Ní dyú, m̀ mɛ ku hwòɖǒ. Ḿ ɖǎ nì nàmàǔn ɓěɔ̀ kɔ̃in zĩ̀ìn.”

³ Púɛɛ, Gèɖèpɔ́ɔ̀-cèè-ɖɛ̀ dyuò-nyɔ̀ ɖíɛ́ ɓě nì ma ɓóɛɛ cɛ̃ɛ ma ɖé wa hwòɖǒ bũ̌, ké wa ɖá, “Gàa nìà kɛ nì ɖɛ gbà Gèɖèpɔ́ɔ̀ kɔ̃ún cɛ̃iń.”

⁴ Kɛɛ Jízɛ̀ dyuò ɖɛ wa nì ma kà hwìɖǐi poɛ̌n nyɛɛ dyí, ké ɔ ɖá, “Ɖɛ́ kɔ̃̀ jè ɓě nìà ɖɛ gbà nì kà ɓěa hwìɖǐi poɛ̌n nyɛ́?

⁵ Ɖɛ ɓě nìà kɛɛ, ɔ nyɛ́ kàmà mú kɛ́? Ɓɛ́ ḿ kéɛ cɛ̃, ɓɛ́ ḿ ké níiń, ‘Ḿ ɖǎ nì nàmàǔn ɓěɔ̀ kɔ̃in zĩ̀ìn,’ mɔɔ ɓɛ́ ḿ ké níiń, ‘Sɔ̀ dyí, ɓɛ́ m̀ ké nàe?’

⁶ Ní muɛ ɓě dyí tɛ̀mɛ̀ìn kà ɓɛ́ mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ, ḿ ɓéɖé kpé nɔ̄ toɖo-kpàà kɔ̃, ɓɛ́ ḿ ké nàmàǔn kɔ̃in zĩ̀ìn nyɛ.” Ɔ jèɛɛ, ɔ cɛ̃ɛ ma gàa wáká mɛ́-mɛ́ɔ̀ gbo, ké ɔ ɖá, “Sɔ̀ dyí, ɖú nì kɔ̃-pɛ̃́-ɖɛ̀ɔ̀ dyí, ɓɛ́ m̀ ké m̀ ɓíɖí-taún mu.”

⁷ Púɛɛ, gàaɔ̀ sɔ̀ ma dyí, ké ɔ mu ma ɔ ɓíɖí-taún.

⁸ Ti ɓɛ́ nyɔ kúɖúú ɓěɔ̀ dyéɛ ma kɛɛ, wa fɛ̃̀ìn ma mìɔ, ké wa nyí ma Gèɖèpɔ́ɔ̀ mɔ̀ nyɔ nyíà kpé nì kàà nyɔǔn wɛ̃ɛ ɓàìn-ɓàìn.

Jízɛ̀ ɖá Máfíò

⁹ Ké Jízɛ̀ sɔ̀ ma ɓó dyí, ké ɔ mu ma dyúa, ké ɔ dyé ma gàa ɖò kɔ̃̀ nyɛ́nɛ́ mɔ̀ ma Máfíò kɛ. Gàaɔ̀ kò ma dɛ̀ wa kpɔ̃̀ìn ma tácì kɛɛ dyi. Ké Jízɛ̀ cɛ̃ɛ ma ɔ gbo, ké ɔ ɖá, “Sí ḿ kíɖíí.” Ké Máfíò sɔ̀ ma dyí, ké ɔ sí ma ɔ kíɖíí.

¹⁰ Ti ɓɛ́ Jízɛ̀ nì ma ɖɛ ɖiɛń ɖé Máfíò ɓíɖí-taún wɛ̃ɛ, púɛɛ, tácì-kpɔ̃-nyɔ̀ pàɖǎ kè nàmàǔn-nyɔ̀ ɓě dyi ma, ké wa kè Jízɛ̀ kè ɔ ɖeín-nà-nyɔ̀ ɓěɔ̀ kò ma téɓèɖèɔ̀ gbɔi.

¹¹ Ti ɓɛ́ Fáɖòsíì-nyɔ̀ ɓěɔ̀ dyé ma ɖɛ nìà kɛɛ, wa diè ma ɔ ɖeín-nà-nyɔ̀ ɓěɔ̀ dyi, ké wa ɖá, “Ɖɛ́ kɔ̃̀ jè ɓěɛ̀ ɖɛ-tɛ̀mɛ̀ìn-nyɔ̀ɔ̀ kè tácì-kpɔ̃-nyɔ̀ ɓěɔ̀ kè nàmàǔn-nyɔ̀ ɓěɔ̀ ɖià ɖɛ dà dyúáɖò kɛ́?”

¹² Ti ɓɛ́ Jízɛ̀ wɔ̃́ɔ ma kɛɛ, ɔ cɛ̃ɛ ma wa gbo, ké ɔ ɖá, “Nyɔ ɓě kɔ̃̀ dyɔɔ̀ wóɖó múɛɛ se hwǒò-nyɔ̀ mɔ́, kɛɛ nyɔ ɓě ɓɛ́ wa wɛ́ kɛɛ, wa mɔ̀ nyɔ mɔ́ hwǒò-nyɔ̀.

¹³ Ɓě mu, ɓɛ́ ɓě ké ɖɛ mɔ̀ Gèɖèpɔ́ɔ̀-wùɖù nìà kɛ xwíníín nyɛɛ múin wɔ̃́. Wuɖuɔ̀ mɔ̀, ‘Ɖɛ ní hwòɖǒ dèìn múin nyɛɛ mɔ̀ ɖɛ̀ɓɛ̀ǐn-ɖɛ̀ɓɛ̀ǐn ké ɔ zi sáa-zà-zà dyí.’ Sepóɛɖé ḿ se dyi, ɓɛ́ ḿ ké dyí-sɛ́ɖɛ́ìn-nyɔ̀ ɓěɔ̀ ɖá, kɛɛ ḿ dyi, ɓɛ́ ḿ ké nàmàǔn-nyɔ̀ ɓě ɖá.”

Dyi-diè-ɖɛ̀ ɓá wɔ̃ kɔ̃ hwèɖè jè dyíɛ

¹⁴ Púɛɛ, Jɔ̃́ɔ́ɛ̀ ɖeín-nà-nyɔ̀ ɓěɔ̀ dyi ma Jízɛ̀ gbo, ké wa diè ma ɔ dyi, ké wa ɖá, “Ɖɛ́ kɔ̃̀ jè à kè Fáɖòsíì-nyɔ̀ ɓěɔ̀ hwèɖèà wɔ̃ kɔ̃, ké nììn ɖeín-nà-nyɔ̀ ɓěɔ̀ ní hwèɖèà wɔ̃ kɔ̃ kɛ́?”

¹⁵ Ké Jízɛ̀ diè ma wa dyi, ké ɔ ɖá, “Má, nyɔ́nɔ́-ɓǎɔ̀ dyi ɓó nyɔ ɓě dyià nyɔ́nɔ́-dyi-kpɔ̃-hwɔ̀ɔ̀ kɔ̃ɛɛ gbo nì ní, nìí, wa se wìǐn kpáa ɓɛ́ìne? Kɛɛ ti ɖò mu dyiìn, ɓɛ́ nyɔ ɖò ké wa nyɔ́nɔ́-ɓǎɔ̀ hwìɛ̀ zà. Nìí, wa muá wɔ̃ kɔ̃ hwèɖèìn.

¹⁶ “Ɖɔ sùà dyi fá ní, nyɔ ɖò ní gmàìn ɓó ɖɔ-wɔ̃̀ ɖìè, sepóɛɖé ɖɔ-wɔ̃̀ ɖìèɔ̀ mu ɓó ɖɔ sùàɔ̀ ɖò cɛ̃ìn, ké ɖɔɔ̀ fá-fáɔ̀ mu gbà gbo kpáùn.

¹⁷ Ké nyɔ ɖò ní po wã́ìn ɖìè wã́ìn-tɛ̀ɓɛ̀ɛ̌ gbà mú. Ɔ dyiɛ náa nyu ní, nìí, tɛ̀ɓɛ̀ɛ̌ɔ̀ mu wɛ̀ìn, ké wã́ìnɔ̀ mu dyi wáɖáùn, ké tɛ̀ɓɛ̀ɛ̌ɔ̀ mu mú gbɔɔ̀ùn. Kɛɛ wa po wã́ìn ɖìè tɛ̀ɓɛ̀ɛ̌ ɖìè mú, ké wa sɔ̃́ɔ̀ mu dyi dèìn nɔ̀mɔ̀ dyíin.”

Gɔ̌mànà-gàà ɖòɛ̀ dyú-màà kè màa ɖò tìnììn ma Jízɛ̀ɛ̀ mú-po-ɖɔ̀ɔ̀ dyiɛɛ jè

¹⁸ Ti ɓɛ́ Jízɛ̀ nì ma wa ɖɛ nìà kɛ gbo cɛ̃iń keɛɛ, wàɖà cá kɛɛ, gɔ̌mànà-gàà ɖò dyi, ké ɔ taɓa ma kɔ́-dù hwuɖu ɓó Jízɛ̀ dyúa, ké ɔ ɖá, “Ní dyú-mààɔ̀ mɛ́ kàà-ɖɛ̀ǐn. Dyi, ɓɛ́ m̀ ké ɔ sɔ̃ kɔ̃ pɛ̃́ìn, ké ɔ mu cĩ́ìn ɖe.”

¹⁹ Ké Jízɛ̀ sɔ̀ ma dyí, ké ɔ sí ma gàaɔ̀ kíɖíí. Ké ɔ kè ɔ ɖeín-nà-nyɔ̀ ɓěɔ̀ mu ma.

²⁰ Púɛɛ, màa ɖò ɓɛ́ ɔ ɓéɖé ma nyɔmɔɔ-mú-sɔ̀-wɛ̀ ɖò ɓó zɔ̃ ɓaɖa-bùè sè sɔ̃́ xwíníín nyɛɛ dyììn ma Jízɛ̀ ɖeín, ké ɔ tìnììn ma Jízɛ̀ɛ̀ mú-po-ɖɔ̀ɔ̀ dyi.

²¹ Sepóɛɖé màaɔ̀ cɛ̃ɛ ma ɖé ɔ hwòɖǒ bũ̌, ké ɔ ɖá, “Ḿ dyi ɔ mú-po-ɖɔ̀ɔ̀ dyi tìnììn fóɖóún ní, nìí, ní mu dyi kánáùn.”

²² Ti ɓɛ́ màaɔ̀ tìnììn ma Jízɛ̀ dyiɛɛ, Jízɛ̀ cɛ́ɛ̀ ma xwa, ké ɔ dyé ma màaɔ̀, ké ɔ ɖá, “Ní dyú-màà, nì hwòɖǒ mɛ ɓɔ́ ɓaɖaa. Nì hwìɖǐǐ-taɓa-taɓaɔ̀ ɖǎ m̀ dyi kánáìn.” Wàɖà cá kɛɛ, màaɔ̀ káná ma dyi.

²³ Sɔ̀ìn ɓóɛ gboɛɛ, Jízɛ̀ mu ma ɖé gɔ̌mànà-gààɔ̀ ɓíɖí-taún, ké ɔ dyé ma ɖé hwǒ-kùǐ xwɛ́-gbòò-kà-ɓaɖa-nyɔ̀ ɓě kè nyɔ kúɖúú ɓě, ké wa nì ma kuɖu-kuɖu nyuɛń,

²⁴ ké ɔ ɖá, “Ɓě sí. Màa-dyùɔ̀ se mɛ́. Ɔ nì mɔ́uń.” Ké wa kéɛ̀ ma ɔ.

²⁵ Ti ɓɛ́ nyɔ kúɖúú ɓěɔ̀ ɖǎ ma síɛɛ, Jízɛ̀ mu ma dɛ̀ ɓɛ́ màa-dyùɔ̀ nì ma kɛ. Ké ɔ kpɔ̃ ma ɔ sɔ̃ɔ̀ dyi, ké màa-dyùɔ̀ sɔ̀ ma dyí.

²⁶ Ké ɖɛ nìà kɛ bɔ̃̌ ɓeìn ma ɖé gbɛ̌ɛ̀ séín ɓě nì ma ɖéɛɛ múin.

Jízɛ̀ kánáìn dyéɖéín-dyi-kpè-gàà sɔ̃́ dyi

²⁷ Ké Jízɛ̀ sɔ̀ ma ɓó, ké ɔ mu ma dyúa. Ké dyéɖéín-dyi-kpè-gàà sɔ̃́ sí ma ɔ kíɖíí, ké wa páná ma mú, ké wa ɖá, “Dèɓéɛ̀ Dyú-gàà, dyé à wìǐn.”

²⁸ Ti ɓɛ́ Jízɛ̀ dyá ma ɖé gbǒ ɖò múɛɛ, dyéɖéín-dyi-kpè-gàà sɔ̃́ ɓěɔ̀ dyi ma ɔ gbo. Ké Jízɛ̀ diè ma wa dyi, ké ɔ ɖá, “Ɓě poɛ jǎà kà ɓɛ́ ḿ ɓɛ́ìn ɓě dyi kánáìn nyɛɛ̀?” Ké wa ɖá, “Ǹdye, ɓɔ̌ɔ̀.”

²⁹ Ké Jízɛ̀ tìnììn ma waà dyéɖé ɓěɔ̀ dyi, ké ɔ ɖá, “Kà ɓɛ́ ɓě nyuà jǎà poɛ kɛɛ, kǎà ɔ mɛ nì ɓě bìì.”

³⁰ Ké wa dyé ma dyi ɖe. Kɛɛ Jízɛ̀ cɛ̃ɛ ma wa gbo kóɖó-kóɖó, ké ɔ ɖá, “Ɓěǐn cɛ̃ ɖɛ nìà kɛ jè nyɔ ɖò gboo.”

³¹ Kɛɛ wa mu, ké wa ɓeìn ma bɔ̃̌ ɓá Jízɛ̀ jè dyíɛɛ dyi, ɖé gbɛ̌ɛ̀ séín ɓě nì wa ɖéɛɛ múin.

Jízɛ̀ kánáìn ɓoo-ɓoo-gàà ɖò dyi

³² Ti ɓɛ́ gàa ɓěɔ̀ nì ma muɛń nyɛɛ, nyɔ ɓě ɖò dyà ma gàa ɖò Jízɛ̀ gbo. Gàaɔ̀ se ma wùɖùɛ̀ ɓɛ́ìn, sepóɛɖé zùù gbà ɖò nì ma ɔ mú.

³³ Ti ɓɛ́ Jízɛ̀ ɖǎ ma ɔ zùù gbàɔ̀ mú zà kɛɛ, gàaɔ̀ ɖú ma wùɖù kpàǐ. Ké nyɔǔn séín giniìn ma dyi mìɔ, ké wa ɖá, “À séè ɖɛ nì kàà dyé ɖò nɔ̄ Éézùɖùɛ̀-ɓòɖòɛ̀ kɔ̃.”

³⁴ Kɛɛ Fáɖòsíì-nyɔ̀ ɓěɔ̀ ɖá, “Zùù gbà ɓěɔ̀ ɓǎ vɛ̀nɛ̀ɔ̀ mɔ̀ nyɔ nyí ɔ kpé, ɓɛ́ ɔ ké zùù gbà nyɔǔn mú zà.”

Jízɛ̀ dyé nyɔ ɓěɔ̀ wìǐn

³⁵ Jízɛ̀ mu ma hwɔɖɔ ɓěɔ̀ kè hwɔɖɔ-kpàǎ ɓěɔ̀ kɔ̃in, ké ɔ tɛ̀mɛ̀ìn ma nyɔǔn ɖɛ ɖé Júù-nyɔ̀ ɓěɔ̀ cɔ́cì-gbò ɓěɔ̀ mú, ké ɔ cɛ̃ ma bɔ̃̌ nɔ̀mɔ̀ dyíin ɓá Gèɖèpɔ́ɔ̀ kã́á-ɓòɖòɔ̀ jè dyí, ké ɔ kánáìn ma nyɔ ɓě ɓéɖé ma wɛ́-dù kò-kò ɓěɛɛ dyi.

³⁶ Ti ɓɛ́ ɔ dyé ma nyɔ kúɖúú ɓěɔ̀ kɛɛ, wìì nyu ma ɔ ɓó wa jè, sepóɛɖé wa gbǎìn ma hwòɖǒ dyií, ké wa gbɛ̀ìn ma dyi kà ɓáɖáá ɓě ɓɛ́ wa se dyí-gmɔ̀-nyɔ̀ ɖò kɔ̃̀ kɛɛ nìà kɛ.

³⁷ Ké ɔ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Geɖe ɖǎ kɔ́ɛɛ ɓúá dyí, kɛɛ ɔ cɛ̃-nyɔ̀ ɓěɔ̀ se dyí vò.

³⁸ Ɓě mɛ ɓaà nyɔ kɔ̃̀à geɖeɔ̀ wuɖuíɛ, ɓɛ́ ɔ ké kũ̀à-nyɔ̀ ɓáún-ɓáún tò, ɓɛ́ wa ké ɔ geɖeɔ̀ cɛ̃.”