Máfíò 8 - Ɓǎsɔ́ɔ̀ Báɓòɔ̀

Jízɛ̀ kánáìn gàa ɖò dyi

¹ Ti ɓɛ́ Jízɛ̀ jaɖa ma wuɖuɛɛ, ɔ sɔ̀ ma ɖé toɖoɔ̀ dya, ké nyɔ kúɖúú sí ma ɔ kíɖíí.

² Púɛɛ, gàa ɓéɖé caà-wɛ̀ ɖò dyi ma, ké ɔ taɓa ma kɔ́-dù hwuɖu ɓó ɔ dyúa, ké ɔ ɖá, “Ɓɔ̌ɔ̀, m̀ dyi mɔ́ ɓɛ́ m̀ ké ḿ dyi kánáìn ní, ḿ dyuòɛ̀ kà m̀ ɓɛ́ìn nyuɛ kɛ.”

³ Ké Jízɛ̀ pɛ́ɛ̀ ma sɔ̃, ké ɔ tìnììn ma gàaɔ̀ dyi, ké ɔ ɖá, “Ḿ mɔ́ ɓɛ́ m̀ ké dyi káná. M̀ mɛ káná dyi, ɓɛ́ m̀ ké mú-hwɛ̀-nyɔ̀ jǔ ɖe.” Wàɖà cáa, gàaɔ̀ káná ma dyi.

⁴ Ké Jízɛ̀ cɛ̃ɛ ma ɔ gbo, ké ɔ ɖá, “Mɔ̀ǔn ɖá ɓɛ́ m̀ ké ɖɛ ɖò nyɔ ɖò gbo cɛ̃. Kɛɛ mu, ɓɛ́ m̀ ké m̀ mìɔùn sáa-zà-nyɔ̀ɔ̀ dyí tɛ̀mɛ̀ìn, ɓɛ́ m̀ ké nyíí-ɖɛ̀ kɔ̃̀ jè ɓɛ́ Mózè dèìn ma gmaún wɛ̃ɛ tò. Ɔ muɛ nyɔǔn dyí tɛ̀mɛ̀ìn kà ɓɛ́ m̀ ɖǎ dyi kánáa.”

Jízɛ̀ kánáìn sójà vɛ̀nɛ̀ ɖòɛ̀ gbo-nì-nyɔ̀ dyi

⁵ Sɔ̀ìn ɓóɛ gboɛɛ, Jízɛ̀ mu ma ɖé Kɔ̀pánìà-hwɔ̀ɖɔ̀ɔ̀ mú, ké gàa ɖò ɓɛ́ ɔ kɔ̃̀ sójà hɔ̃dɛ̀ɖɛ̀ ɖò wuɖuíɛɛ dyi ma ɔ gbo, ké ɔ ɓaà ma,

⁶ ké ɔ ɖá, “Ɓɔ̌ɔ̀, ní gbo-nì-nyɔ̀ɔ̀ nì ɖé ḿ ɓíɖí-taún, ké ɔ wáká mɛ́ín, ké ɔ pɛ̃́ dyi. Ɔ nì gǎ dyéɛń mìɔ.”

⁷ Hwɛ̀ ké Jízɛ̀ ɖá, “Ní mu dyiìn, ɓɛ́ ḿ ké ɔ dyi kánáìn.”

⁸ Kɛɛ sójà vɛ̀nɛ̀ɔ̀ zà ma ɖé wuɖu, ké ɔ ɖá, “Ɓɔ̌ɔ̀, ḿ se ɖɛ kpa, ɓɛ́ m̀ ké ɖé ḿ ɓíɖí-gbǒǔn dyá. Kɛɛ cɛ̃ wuɖuɔ̀ ɖòùn pū, ké ní gbo-nì-nyɔ̀ɔ̀ mu dyi kánáùn.

⁹ Ḿ mìɔùn nì sójà vɛ̀nɛ̀ ɓě xwíɖíi, ké mɔ́ún ɓéɖé sójà ɓě, ké wa nì mɔ́ún xwíɖíi. Ḿ dyiɛ ɖò mɔ̀ùn gbo cɛ̃, ké ḿ dyi níiń, ‘Mu’ ní, nìí, ɔ mu. Ké ḿ dyiɛ ɖò mɔ̀ùn gbo cɛ̃, ké ḿ dyi níiń, ‘Dyi’ ní, nìí, ɔ dyi. Ké ḿ dyiɛ ní gǐì ɓěɔ̀ ɖò gbo cɛ̃, ké ḿ dyi níiń, ‘Nyu ɖɛà kɛ’ ní, nìí, ɔ nyuɛ ní.”

¹⁰ Ti ɓɛ́ Jízɛ̀ wɔ̃́ ma ɖɛ nìà kɛɛ, ɔ giniìn ma dyi, ké ɔ cɛ̃ɛ ma nyɔ ɓě nì ma ɔ kíɖíí síɛń nyɛɛ gbo, ké ɔ ɖá, “Ḿ cɛ̃ ɓě jǎà gbo, ḿ séè hwìɖǐǐ-taɓa-taɓa ɓɛ́ kàà dyé ɖò, hwɛ̀ ḿ po níiń, nɔ̄ Éézùɖùɛ̀-dyù ɓěɛ̀ hwìɛ̀.

¹¹ Ḿ cɛ̃ɛ ɓě gbo, nyɔ pàɖǎ mu ɖé dyóɖó-xwáɖáún-wóɖóìn-naínɔ̀ kè dyóɖó-dyi-kpáìn-naínɔ̀ sɔ̀ìn, ké wa kè Ééɓòɖòhɛ̃́ɛ̀ kè Áázè ɔ kè Jékɔ̀ mu téɓèɖè gbɔi kòìn ɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ kɔ̃.

¹² Kɛɛ nyɔ ɓě ɓɛ́ wa ɓéɖé ɓɛ́ wa kéɔ́ kà ɖé Gèɖèpɔ́ɔ̀ kã́á-ɓòɖòɔ̀ kɔ̃ nìɛɛ, wa mu wa píé poùn ɖé tíe-kpò mú. Ɖéɛ̀ wa mu kpé poùn, ké wa mu nyɛ́nɛ́ tàùn.”

¹³ Ké Jízɛ̀ cɛ̃ɛ ma sójà vɛ̀nɛ̀ɔ̀ gbo, ké ɔ ɖá, “Mu m̀ ɖɛ, ké ɖɛ kɔ̃̀ jè m̀ ɓéɖéà hwìɖǐǐ-taɓa-taɓa kɛɛ mu ná m̀ bìì nììn.” Ké sójà vɛ̀nɛ̀ɔ̀ gbo-nì-nyɔ̀ɔ̀ káná ma dyi ɓó ti déínɔ̀ xwíníín.

Jízɛ̀ kánáìn nyɔ pàɖǎ dyi

¹⁴ Sɔ̀ìn ɓóɛ gboɛɛ, Jízɛ̀ mu ma Píɖɛ̀ ɓíɖí-taún, ké ɔ dyɛ̀ìn ma ɖé Píɖɛ̀ɛ̀ gmààɔ̀ ɖe dyi. Màaɔ̀ dyɔɔ̀ sùmù ma, ké ɔ pɛ̃́ ma dyi.

¹⁵ Jízɛ̀ tìnììn ma màaɔ̀ sɔ̃ɔ̀ dyi. Púɛɛ, ɔ dyɔɔ̀ ɓɔ́ ma sùmùɛ̀, ké ɔ sɔ̀ ma dyí, ké ɔ nyí ma wa ɖii-ɖɛ̀.

¹⁶ Ti ɓɛ́ hwìo ɖǎ ma jǔɛɛ, nyɔ ɓěɔ̀ dyà ma nyɔ pàɖǎ ɓɛ́ wa ɓéɖé ma zùù gbà kɛɛ Jízɛ̀ gbo. Ké Jízɛ̀ wùɖù ma zùù gbà ɓěɔ̀ gbo, ké wa sɔ̀ ma nyɔ ɓěɔ̀ mú. Ké ɔ kánáìn ma nyɔ séín ɓě wɛ́ ma kɛɛ dyi.

¹⁷ Ɔ nyu ma ɖɛa, ɓɛ́ ɖɛ ɓɛ́ kpáá-ɖɛ̀-cɛ̃-nyɔ̀ Àzédyà cɛ̃ zɔ̃̌ɔ̀ kɛɛ ké jǎà kpá. Ɖɛ ɔ cɛ̃ zɔ̃̌ɔ̀ kɛɛ, ɔ kɛà kɛ̀. Ɔ ɖá, “Ɔ mɔ̀ nyɔ ɖú ma gǎ ɓě kɔ̃̀ wa kéɔ́ ma à kɔ̃ dyiɛɛ dyí, ké ɔ kpa ma à wɛ́-dù kò-kò ɓěɔ̀.”

Nyɔ ɓě mɔ́ Jízɛ̀ ɖeín nàà dyiɛ

¹⁸ Ti ɓɛ́ Jízɛ̀ dyé ma nyɔ kúɖúú ɓěɔ̀ ɖé ɔ ɖeiɛɛ, ɔ cɛ̃ɛ ma, ɓɛ́ ɔ kè ɔ ɖeín-nà-nyɔ̀ ɓěɔ̀ ké ma ɖé dòùnɓìǎɔ̀ wáká tɔ̀ɔ̀ kɔ̃ mu.

¹⁹ Ké Gèɖèpɔ́ɔ̀-cèè-ɖɛ̀ dyuò-nyɔ̀ ɖò dyi ma ɔ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, ḿ kè mɔ̀ mu dɛ̀ kã̀ìn séín nì mu muùn wɛ̃ɛ muùn.”

²⁰ Ké Jízɛ̀ cɛ̃ɛ ma ɔ gbo, ké ɔ ɖá, “Tĩ̌ɔ̀-wè ɓě ɓéɖé wa mìɔùn nììn ɓí, ké naà ɓě ɓéɖé waà téɖé ɓě, kɛɛ mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ, ḿ se dɛ̀ ḿ ké ní dú dyi dèɛɛ ɓéɖé fóɖóún.”

²¹ Ké gàa ɖò ɓɛ́ ɔ mɔ̀ ma ɖeín-nà-nyɔ̀ ɓěɔ̀ ɖòɛɛ cɛ̃ɛ ma Jízɛ̀ gbo, ké ɔ ɖá, “Ɓɔ̌ɔ̀, tòɛ̀, ɓɛ́ ḿ ké mu, ɓɛ́ ḿ ké ḿ ɓǎ dyóɖóún zà hwɛ̀.”

²² Kɛɛ Jízɛ̀ ɖá, “Sí ḿ kíɖíí. Nyɔ ɓě seà fɛ̀ɛ̀ ɓéɖéɛɛ mɛ zà wa nììn nyɔ ɓě ɖǎà mɛ́ɛ dyóɖóún.”

Jízɛ̀ po dìì ɖò ɓɔ́í

²³ Sɔ̀ìn ɓóɛ gboɛɛ, Jízɛ̀ dyá ma ɓáɖáàɔ̀ mú, ké ɔ kè ɔ ɖeín-nà-nyɔ̀ ɓěɔ̀ mu ma.

²⁴ Wàɖà cá kɛɛ, dìì vɛ̀nɛ̀ ɖò dyi ma ɖé níɔ̀ kɔ̃. Ké ɔ nyu ké dyóó-kpɛ̀ wáɖá ma ɖé ɓáɖáàɔ̀ mú, kɛɛ Jízɛ̀ nì ma mɔ́uń.

²⁵ Ké ɔ ɖeín-nà-nyɔ̀ ɓěɔ̀ mu ma, ké wa túò ma ɔ, ké wa ɖá, “Bounɓo, póìn à. À nìǎ mú gbɔɔ̀ǔn.”

²⁶ Ké Jízɛ̀ diè ma wa dyi, ké ɔ ɖá, “Ɖɛ́ kɔ̃̀ jè ɓě fɛ̃̀ìn kà kɛ́? Ɓěɛ̀ hwìɖǐǐ-taɓa-taɓaɔ̀ ɓíè dyí mìɔ cá wà!” Ké ɔ sɔ̀ ma dyí, ké ɔ po ma dììɔ̀ ɔ kè dyóó-kpɛ̀ɔ̀ ɓɔ́í. Ké dììɔ̀ ɓɔ́, ké níɔ̀ dè ma dyi dɔ̃̀ùn-dɔ̃̀ùn.

²⁷ Púɛɛ, gàa ɓěɔ̀ giniìn ma dyi, ké wa ɖá, “Gàa nyɛ́ nìà kà kɛ́? Dìì kè dyóó-kpɛ̀ ɓěɔ̀ mɔ̀ùn nyu ɔ wuɖu wà!”

Jízɛ̀ zà gàa sɔ̃́ zùù gbà mú

²⁸ Ti ɓɛ́ Jízɛ̀ dyá ma toɖoíɛɛ, ɔ dyi ma ɖé Gádàwíɖíìn-nyɔ̀ ɓěɔ̀ ɓíɖí-ɓòɖò ɓɛ́ ɔ nì ma dòùnɓìǎɔ̀ wáká tɔ̀ɔ̀ kɔ̃ɛɛ kɔ̃. Ké ɔ kè gàa sɔ̃́ ɓɛ́ wa sɔ̀ìn ma ɖé kú-toɖo ɖò múɛɛ gmɔ̌ìn ma. Zùù gbà nì ma wa mú, ké zùù gbà ɓěɔ̀ ɓéɖé ma dyoɖo mìɔ, ké ɔ nyuɛ ké nyɔ ɖò se ma hwìèɔ̀ kpaa ɓɛ́ìn.

²⁹ Ké wa páná ma mú wàɖà, ké wa ɖá, “Mɔ̀ mɔ̀à Gèɖèpɔ́ɔ̀ Dyú-gààɔ̀ kɛɛ, ɖɛ́ kɔ̃̀ jè m̀ nì à fũ̀à-fṹá nyùɛ̌n nyɛ́? M̀ ɖǎ nɔ̄ dyi, ɓɛ́ m̀ ké à gǎ dyéìn, hwɛ̀ ɓɛ́ à ti jɛ́ɛ́ɔ̀ ké ɓó nyiniì?”

³⁰ Ɔ nì ná kɛɛ, ɓeé kúɖúú ɓě nì ma dyi ɖiɛń. Dɛ̀ ɓɛ́ ɓeé ɓěɔ̀ nì ma kà dyi ɖiɛń nyɛɛ xwɛ̃́ìn ma dɛ̀ Jízɛ̀ dyɛ̀ìn ma kà gàa sɔ̃́ɔ̀ dyiɛɛ dyi.

³¹ Ké zùù gbà ɓěɔ̀ ɓaà ma Jízɛ̀, ké wa ɖá, “À dyuòɛ̀ kà nì mu à gàa ɓěɛ̀ mú zàùn wɛ̃, kɛɛ à ɓaà m̀ ní, tò à ɖé ɓeé ɓěɔ̀ mú.”

³² Ké Jízɛ̀ cɛ̃ɛ ma wa gbo, ké ɔ ɖá, “Ɓě mu.” Ké wa mu, ké wa kpá ma ɓeé ɓěɔ̀ mú. Púɛɛ, ɓeé kúɖúú ɓěɔ̀ kpa ma peɖeɛ ɖé dòùnɓìǎɔ̀ kpóóɔ̀ kɔ̃, ké wa wáɖá ɖé níɔ̀ kɔ̃, ké wa sè ma ɓó nyɛ̀nɛ̀ɛ̀.

³³ Hwɛ̀ ké ɓeé ɓěɔ̀ dyí-gmɔ̀-nyɔ̀ ɓěɔ̀ gbǔ ma, ké wa mu ma ɖé hwɔɖɔɔ̀ mú, ké wa cɛ̃ ma ɖɛ séín kpá ma gàa ɓě ɓéɖé ma kà zùù gbà ɓěɔ̀ kɛ kè ɓeé ɓěɔ̀ gboɛ.

³⁴ Púɛɛ, hwɔɖɔɔ̀ nyɔ séín ɓěɔ̀ mu, ɓɛ́ wa ké Jízɛ̀ dyé. Ti ɓɛ́ wa dyé ma ɔ kɛɛ, wa ɓaà ma ɔ, ɓɛ́ ɔ ké ma ɖé waà páɔ̀ mú sɔ̀.