Máfíò 3 - Ɓǎsɔ́ɔ̀ Báɓòɔ̀

Jɔ̃́ɔ́ nyɔ-níɔ-po-nyɔ̀ɔ̀ Gèɖèpɔ́ɔ̀-wùɖù wáɖá-wáɖá

¹ Ɓó tia ɓaɖaa, Jɔ̃́ɔ́ nyɔ-níɔ-po-nyɔ̀ɔ̀ dyi ma, ké ɔ po ma zio ɖé gbǎùn-fúɖúá nì ma ɖé Júɖìà-ɓòɖòɔ̀ kɔ̃ɛɛ kɔ̃.

² Ɔ ɖá, “Ɓě táà ɓěɛ̀ nàmàǔn-kpèɖèɔ̀ dyi, sepóɛɖé Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ ɖǎ dyi xwɛ̃́ìn.”

³ Jɔ̃́ɔ́ mɔ̀ nyɔ kɔ̃̀ jè kpáá-ɖɛ̀-cɛ̃-nyɔ̀ Àzédyà cɛ̃ zɔ̃̌ɔ̀, ti ɓɛ́ ɔ cɛ̃ɛ zɔ̃̌ɔ̀, ké ɔ dyi ma kà níiń, “À wɔ̃́ nyɔ ɖòɛ̀ wuɖu ɖé gbǎùn-fúɖúáɔ̀ kɔ̃, ké nyɔɔ̀ ɖá, ‘Ɓě nyu hwìè ɖò ɓó Bounɓoɔ̀ bìì. Ɓě nyu hwìè sɛ́ɖɛ́ìn dyí ɖò ɓó ɔ bìì.’ ”

⁴ Ɖɔ Jɔ̃́ɔ́ po ma múɛɛ mɔ̀ sǒ-nì-gbu-kɔ̃únɛ̀ mí ɓɛ́ wa ɖaɓa ma ɖɔ múɛ, ké ɖɛ ɔ jìnììn ma gboɛɛ mɔ̀ kúɖúù-kpã̀. Ké ɖɛ ɔ ɖi ma kɛɛ mɔ̀ ma kpã̌ùn kè ɖo.

⁵ Nyɔ ɓě mu ma ɔ gbo sɔ̀ìn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ kè ɖé Júɖìà-ɓòɖò gànáɔ̀ kɔ̃ ɔ kè sɔ̀ìn ɖé gbɛ̌ɛ̀ séín ɓě nì ma ɖé Jɔ́nì-nìɔ̀ ɖeiɛɛ mú tee.

⁶ Wa wɔ̃́ìn ma waà nàmàǔn ɓěɔ̀ mú, ké Jɔ̃́ɔ́ po ma wa níɔ ɖé Jɔ́nì-nìɔ̀ kɔ̃.

⁷ Ti ɓɛ́ Jɔ̃́ɔ́ dyéɛ ma, ké Fáɖòsíì-nyɔ̀ ɓěɔ̀ kè Sádyùsíì-nyɔ̀ ɓěɔ̀ pàɖǎ nì ma dyiɛń, ɓɛ́ wa ké ma níɔ kpáa, ɔ cɛ̃ɛ ma wa gbo, ké ɔ ɖá, “Ɓě mɔ̀ sɛɛ̀ dyú ɓě kɛɛ, nyɛ́ po ɓě náún, ɓɛ́ ɓě ké Gèɖèpɔ́ɔ̀ dyoɖo nìà dyiɛń nyɛɛ dyúa gbǔɛ́?

⁸ Ɓě mɛ nyu ɖɛ ɓě ɓɛ́ wa muɛ nyɔǔn dyí tɛ̀mɛ̀ìn kà ɓɛ́ ɓě ɖǎ ɓěɛ̀ nàmàǔn-kpèɖèɔ̀ dyi táà kɛ.

⁹ Ɓě mɛ ɓɔ́ɔ hwìɖǐi poɛ̀n ɖé ɓě mìɔùn mú, ɓɛ́ ɓě ké níiń, ‘À mɔ̀ Ééɓòɖòhɛ̃́ɛ̀ nyúà-dyú ɓě.’ Ḿ cɛ̃ɛ ɓě gbo kà ɓɛ́ Gèɖèpɔ́ɔ̀ ɓɛ́ìn sɔ́ɔ́-kpò ɓě nìà kɛ dyí ɖúɛ, ɓɛ́ ɔ ké wa Ééɓòɖòhɛ̃́ɛ̀ nyúà-dyú ɓě mú nyuɛ.

¹⁰ Gèɖèpɔ́ɔ̀ ɖǎ jùɛ̀ɔ̀ ti dyéìn, ɓɛ́ ɔ ké cu ɓěɔ̀ ɖéé ɖé waà gmɛ̀nɛ̀ɛ̀ ɓěɔ̀ gbo ɖàɓàìn. Ɔ mu cu séín ɓě ɓɛ́ wa se ɓo nɔ̀mɔ̀ dyíin tòɖòɛɛ ɖaɓaùn, ké ɔ mu wa dyéɖé poùn.

¹¹ Ḿ po ɓě níɔ, ɓɛ́ ɔ kéɛ nyɔǔn dyí tɛ̀mɛ̀ìn kà ɓɛ́ ɓě ɖǎ ɓěɛ̀ nàmàǔn-kpèɖèɔ̀ dyi táà kɛ. Kɛɛ nyɔ mɔ̀ nyɔ ɓɛ́ ɔ muà ɓó ḿ ɖeín dyí kɔùn wɛ̃ɛ, ɔ kpé ɓúá dyí ké ɔ zi níǐn kpéɔ̀ dyí. Ḿ se ɖɛ kpa ɓɛ́ ḿ ké ɔ bìì ɔ bǎ ɓéɖé dyɛ mɔ̀ùn. Ɔ mu ɓě níɔ poùn ɖé Zùù Hwɛ̀ǐn-hwɛ̀ǐnɔ̀ ɔ kè nyɛ mú.

¹² Ɔ ɓéɖé ɔ dùǎɔ̀ xwa, ké ɔ mu ɔ hwítìɔ̀ mú vũùn, ké ɔ mu ɔ hwítìɔ̀ ɖé sáɖáún dyí poìn. Kɛɛ ɔ mu hwítì-fèɖèɔ̀ fɔ̃ùn, ké ɔ nyɛɔ̀ se mɔ́ɔ mu fɔɔ.”

Jízɛ̀ níɔ-po-po

¹³ Púɛɛ, Jízɛ̀ sɔ̀ ma ɖé Gáɖàɖíì-ɓòɖòɔ̀ kɔ̃, ké ɔ mu ma ɖé Jɔ́nì-nìɔ̀ wĩín. Ké ɔ mu ma ɖé Jɔ̃́ɔ́ gbo, ɓɛ́ Jɔ̃́ɔ́ ké ma ɔ níɔ po.

¹⁴ Jɔ̃́ɔ́ vɔ̃ ɓɛ́ ɔ ké ma ɔ ɓɔ́í po, ké ɔ ɖá, “Mɔ̀ ɓéɖé ɓɛ́ m̀ kéɔ́ ḿ níɔ poɛɛ, m̀ dyi ḿ gboò?”

¹⁵ Kɛɛ Jízɛ̀ ɖá, “M̀ mɛ wɔ̃́ ɓɛ́ ɔ ké ná nì ɓó kàǔn, sepóɛɖé à dyiɛ kàa náa nyuín, nìí, ɔ sɛ́ɖɛ́ìn dyí, ké à mu ɖɛ séín ɓɛ́ Gèɖèpɔ́ɔ̀ mɔ́ à ké nyuɛɛ nyuùn.” Púɛɛ, Jɔ̃́ɔ́ wɔ̃́ ma.

¹⁶ Ti ɓɛ́ Jízɛ̀ kpá ma níɔ nyɛ̀nɛ̀ɛ̀ kɛɛ, ɔ sɔ̀ ma níɔ̀ gbo. Wàɖà cá kɛɛ, dyɔɔ̀ kaà ma wɔ̃, ké ɔ dyé ma Gèɖèpɔ́ɔ̀ Zùùɔ̀ ɓíɖíi dyiɛ kà gbúɛ́ nìà kɛ. Ké Zùùɔ̀ dyi ma ɔ kɔ̃.

¹⁷ Púɛɛ, wuɖu ɖò sɔ̀ìn ma ɖé dyɔún, ké wuɖuɔ̀ ɖá, “Nyɔ nìà kɛ mɔ̀ ní hwòɖǒ-kɔ̃-dè-dyùɔ̀. Ní hwòɖǒ dèìn ɔ múin.”