Máfíò 10 - Ɓǎsɔ́ɔ̀ Báɓòɔ̀

Àpɔ́sò ɓaɖa-bùè sè sɔ̃́ ɓěɔ̀

¹ Wé ɖòɛ̀ ɓaɖaa, Jízɛ̀ ɖá ma ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀ ɓó ɔ mìɔùn gbo, ké ɔ nyí ma wa kpé, ɓɛ́ wa ké ma zùù gbà nyɔǔn mú zà, ɔ kè ɓɛ́ wa ké ma nyɔǔn ɓě ɓéɖé wɛ́-dù kò-kò ɓěɛɛ dyi kánáìn.

² Ɔ ɖeín-nà-nyɔ̀ ɓaɖa-bùè sè sɔ̃́ ɓě mɔ̀à àpɔ́sò ɓěɔ̀ kɛɛ, waà nyɛ́nɛ́ kɛà kɛ̀. Nyɔ kĩ́ín-kĩ́ínɔ̀ mɔ̀ Sã́ɓò ɓɛ́ wa ɖáìn Píɖɛ̀ kɛ kè ɔ ɖíí-gàà Ã́dòɖò kè Jĩ́ìn mɔ̀à Zɛ́ɓìɖíìɛ̀ dyú-gààɔ̀ kɛ kè ɔ ɖíí-gàà Jɔ̃́ɔ́

³ kè Féɖò kè Bàtɔ́ɖɔ́mì kè Tɔ̀mɔ́sì kè Máfíò mɔ̀à tácì-kpɔ̃-nyɔ̀ɔ̀ kɛ kè Jĩ́ìn ɓɛ́ ɔ mɔ̀ ma Áfìàà dyú-gàà kɛ kè Táɖìà

⁴ kè Sã́ɓò ɓɛ́ ɔ vɔ̃ ma ɓó ɔ ɓóɖóɔ̀ nyɔ ɓěɔ̀ bììɛ ɔ kè Júdà Ɛ́sìkáɖìɔ̀ ɓɛ́ ɔ mɔ̀ nyɔ mu ma Jízɛ̀ ɔ mú-nyɛ́-nyɔ̀ ɓěɔ̀ xwáɖáún zàìn nyɛ.

Àpɔ́sò ɓaɖa-bùè sè sɔ̃́ ɓěɔ̀ kũ̀à

⁵ Ké Jízɛ̀ po ma gàa ɓaɖa-bùè sè sɔ̃́ ɓěɔ̀ náún, ké ɔ ɖoɓo ma wa. Ɔ ɖá, “Ɓěǐn ɖá ɓɛ́ ɓě ké ɓóɖó-dù kà kò ɖò ɓěɛ̀ nyɔ ɓěɔ̀ hwìɛ̀ mu fɔɔ, ké ɓě ní ɖá ɓɛ́ ɓě ké Sɛ̀mɛ́ɖìà-nyɔ̀ ɓěɔ̀ hwɔɖɔ ɓěɔ̀ ɖò mú mu.

⁶ Kɛɛ ɓě mu ɖé Éézùɖùɛ̀-dyù ɓě mɔ̀ ɓáɖáá sè xwáɖáún ɓěɔ̀ gbo.

⁷ Ɓě mu, ɓɛ́ ɓě ké nyɔ ɓěɔ̀ ɖɛ nìà kɛ gbo cɛ̃. Ɖɛɔ̀ mɔ̀, ‘Gèɖèpɔ́ɔ̀ kã́á-ɓòɖò nìà ɖé dyɔún wɛ̃ɛ ɖǎ dyi xwɛ̃́ìn.’

⁸ Ɓě kánáìn wɛ́-nyɔ̀ ɓěɔ̀ dyi. Ɓě zà nyɔ ɓě ɖǎ mɛ́ɛ gĩɔ. Ɓě kánáìn caà-nyɔ̀ ɓěɔ̀ dyi. Ɓě zà zùù gbà ɓě nyɔǔn mú. Ḿ nyí ɓě kpé, ɓɛ́ ɓě ké ɖɛ ɓěɛ̀ nyu. Ɔ jèɛɛ, ɓě mɛ nyuɛ pídyi, ɓɛ́ ɓě ké se pɛ́ɛ̀-ɖɛ̀ ɖò mɔ́.

⁹ Ɓěǐn ɖá ɓɛ́ ɓě ké wíɖí ɖò kpa.

¹⁰ Ɓě ní kpa ɓɔ̀ɔ̌ mɔɔ wáɖá-ɖɔ̀ sɔ̃́ mɔɔ bǎ mɔɔ kùì-kpà. Sepóɛɖé wa ɓéɖé ɓɛ́ wa ké ɖɛ kũ̀à-nyu-nyɔ̀ kɔ̃̀ ɓɛ́ ɔ ké dyéɛɛ ɔ nyí.

¹¹ “Ɔ jǔ ké ɓě dyi hwɔɖɔ ɖò mɔɔ hwɔɖɔ-kpàǎ ɖò kɔ̃ mu ní, ɓě mɛ gmɔìn nyɔ mɔ̀ nyɔ mu wɔ̃́ùn ɓɛ́ ɔ ké ɓě jè dyi kpɔ̃ɛɛ jè dyi. Ké ɓě mɛ gã̀ ɓó ɔ gbo dyi tee, ɓɛ́ ɓě ké hwɔɖɔɔ̀ mú sɔ̀ hwɛ̀.

¹² Ɓě dyi gbǒ ɖò mú dyá ní, ɓě mɛ cɛ̃ɛ nyɔ ɓěɔ̀ gbo, ɓɛ́ ɓě ké níiń, ‘Gìɖìǐ mɛ nì ɓě kɔ̃.’

¹³ Nyɔ ɓě nì ɖé gbǒɔ̀ múɛɛ dyi ɓě jè dyi kpɔ̃ ní, nìí, gìɖìǐ mɛ sè ɓó wa gbo. Kɛɛ ɔ jǔ ké wa se ɓě jè dyi kpɔ̃ ní, nìí, gìɖìǐ mɛ ɓɔ́ ɓó wa gbo nìɛ̀.

¹⁴ Ɔ jǔ ké nyɔ ɓě nì gbǒ ɖò mɔɔ hwɔɖɔ ɖò múɛɛ se ɓě jè dyi kpɔ̃, ké wa se ɓěɛ̀ wuɖuɔ̀ ɖùǔ gbo tò ní, nìí, ɓě mɛ ɓaɖa ɓoún, ɓɛ́ ɓóɖó nì ɓě ɓo xwíɖíiɛɛ ké dyi wáɖáìn, ɓɛ́ ɓě ké ɖé hwɔɖɔɔ̀ mú sɔ̀.

¹⁵ Ḿ cɛ̃ ɓě jǎà gbo, ɔ mu póɖó zàùn ɓó Sáɖɔ̀ùn-nyɔ̀ ɓěɔ̀ kè Gòmɔ́ɖɔ̀-nyɔ̀ ɓěɔ̀ bìì ɓó zaa-wɔ̃-po-tìɔ̀ xwíníín, ɓɛ́ ɔ ké hwɔɖɔɔ̀ mɔ̀ùn jè dyí zi.

Gǎ-dyé-dyé ɓě mu dyiìn nyɛɛ jè

¹⁶ “Gmɔ̀ nɔ̄, ḿ nì ɓě ɖoɓoɛń kà nyɔ ɖoɓoà ɓáɖáá ɓě ji ɓě hwìɛ̀ kɛ. Ɓě mɛ fɔ̀nɔ̀ hwòɖǒ kà sɛ ɓě nìà kɛ, ké ɓě mɛ mɔ̀ gìɖìǐ-nyɔ̀ kà gbúɛ́ nìà kɛ.

¹⁷ Ɓě mɛ ma mú, sepóɛɖé wa mu ɓě zɔ̃́ín-wɔ̃-pòìn-naín ɓě kpaùn, ké wa mu ɓě gbàtò ɓàɖàìn ɖé Júù-nyɔ̀ ɓěɔ̀ cɔ́cì-gbò ɓěɔ̀ mú.

¹⁸ Wa mu ɓě gɔ̌mànà-nyɔ̀ ɓě kè kã́á ɓě dyúa kpaùn ɓó ní jè, ɓɛ́ dyììn ɖéɛ múɛɛ, ɓě ké bɔ̃̌ nɔ̀mɔ̀ dyíinɔ̀ wa kè ɓóɖó-dù kà kò ɖò ɓěɛ̀ nyɔ ɓěɔ̀ gbo cɛ̃.

¹⁹ Wa dyi ɓě nyɔǔn ɓě xwaún po ní, ɓěǐn ɖá ɓɛ́ ɓě ké ɖɛ ɓě ké cɛ̃ɛ kè kà ɓě ké ɖɛɔ̀ cɛ̃ɛ nyuɛɛ jè hwìɖǐi poìn, sepóɛɖé tiɔ̀ dyi ɓó nyini ní, Gèɖèpɔ́ɔ̀ mu ɖɛ ɓě ké cɛ̃ɛ ɓě wĩín poùn.

²⁰ Sepóɛɖé wuɖu ɓě muà cɛ̃ìn nyɛɛ se ɓě mìɔùn nììn wuɖu jǔɛ mu. Ɔ mu ɖé Zùù Hwɛ̀ǐn-hwɛ̀ǐn sɔ̀à ɖé ɓě Ɓǎ nìà ɖé dyɔún wɛ̃ gboɛɛ mú sɔ̀ùn.

²¹ “Nyɔǔn ɓě mu waà ɖíí-gàà ɓě nyɔǔn ɓě xwaún poùn, ɓɛ́ wa ké wa ɖáɓá. Ké gàa ɓě mu waà dyú ɓě nyɔǔn ɓě xwaún poùn, ɓɛ́ wa ké wa ɖáɓá. Ké dyú ɓě mu waà wóɖóìn-nyɔ̀ ɓě gbo hwɛ̀ìn, ké wa muɛ nyuùn ɓɛ́ nyɔǔn ké wa ɖáɓá.

²² Ké nyɔǔn séín mu ɓě mú nyɛ́ìn ɓó ní jè. Kɛɛ nyɔ mɔ̀ nyɔ mu hwòɖǒ kuùn tee, ɓɛ́ ɔ fɛ̀ɛ̀ ké mánáín hwɛ̀ kɛɛ, ɔ mu póùn.

²³ Ɔ jǔ ké wa dyi ɓě gǎ dyéìn ɖé hwɔɖɔ ɖò mú ní, nìí, ɓě mɛ gbǔ, ɓɛ́ ɓě ké hwɔɖɔ ɖò mú mu ɖe. Ḿ cɛ̃ ɓě jǎà gbo, ɓě se ɓěɛ̀ kũ̀à ɓěɔ̀ hwɔɔ́ mu ɖé hwɔɖɔ séín nì nɔ̄ Éézùɖùɛ̀-ɓòɖòɛ̀ kɔ̃ɛɛ mú dyɛ mɔ̀ùn, ké mɔ̄ mɔ̀à Nyɔǔn-dyùɛ̀ Dyú-gààɔ̀ kɛɛ dyi ɖe.

²⁴ “Ɖɛ-cɛ̃́-nyɔ̀ se ɖɛ kpa ɓɛ́ ɔ ké nyɔ tɛ̀mɛ̀ìn kà ɔ ɖɛ kɛɛ dyí zi. Ké gǐì se ɖɛ kpa ɓɛ́ ɔ ké nyɔ kɔ̃̀à ɔ kɛɛ dyí zi.

²⁵ Ɖɛ-cɛ̃́-nyɔ̀ ɖò dyi nì kà ɔ ɖɛ-tɛ̀mɛ̀ìn-nyɔ̀ɔ̀ nìà kɛɛ ní, nìí, ɔ hwòɖǒ mɛ dè dyi. Ké gǐì ɖò dyi nì kà ɔ gǐì-ɓǎɔ̀ nìà kɛɛ ní, nìí, ɔ hwòɖǒ mɛ dè dyi. Ɔ jǔ ké wa dyi gbǒ-ɓǎ ɖò Bíɔ̀zɛ́ɓà ɖáìn ní, nìí, nyɔ tɔ̀ɔ̀ ɓě mɔ̀ùn nìà gbǒɔ̀ múɛɛ, wa mu wa nyɛ́nɛ́ nyìnììn kɔ̃in mìɔ ɓě jǔìn ɖekè.

Nyɔ ɓɛ́ nyɔǔn ɓéɖé wa ké dyi fɛ̃̀ìn nyɛ

²⁶ “Ɔ jèɛɛ, ɓěǐn ɖá ɓɛ́ ɓě ké nyɔǔn-dyù dyi fɛ̃̀ìn. Ɖɛ séín ɓě ɓɛ́ wa ɓáìn ɖɛ kɔ̃in nyɛɛ, wa mu ɖɛ kɔ̃in sɔ̀ùn, ké vǐè-ɖɛ̀ séín ɓěɔ̀ mu píé wóɖóùn.

²⁷ Ɖɛ ɓɛ́ ḿ nìà ɓě gbo cɛ̃iń ɖé tíe-kpò múɛɛ, ɓě mɛ cɛ̃ɛ nyɔǔn ɓě gbo ɓó zɔ̃-zɔ̃-ɓàɖà. Ɖɛ ɓě wɔ̃́ ɖé gã gboɛɛ, ɓě mɛ pòɛ̀n zio mú ɖé gbǒ dúún.

²⁸ Ɓěǐn ɖá ɓɛ́ ɓě ké nyɔ ɓě ɓɛ́ wa ɓɛ́ìn ɓěɛ̀ kpóɖó-dyùàɔ̀ ɖáɓáa, kɛɛ wa seà ɓěɛ̀ zùùɔ̀ ɖáɓáa ɓɛ́ìn nyɛɛ dyi fɛ̃̀ìn. Kɛɛ ɓě mɛ fɛ̃̀ìn Gèɖèpɔ́ɔ̀ mɔ̀ nyɔ ɓɛ́ìn kà nyɔǔn-dyùɛ̀ kpóɖó-dyùàɔ̀ kè ɔ zùùɔ̀ mú gbɔɔ̀ ɖé hɛ́ɛ̀ kɛɛ dyi.

²⁹ Má, wa pèɖèìn dyùǐ-dyù sɔ̃́ wíɖí tííwèe? Ɔ nì ná dyɛo, kɛɛ ɓě Ɓǎɔ̀ se wɔ̃́ ní, wa dyúáɖò se ɓíɖíi dyi kpáa ɓɛ́ìn.

³⁰ Ɔ dyi ɓě mɔ̀ùn jè jǔ ní, Gèɖèpɔ́ɔ̀ ɖǎ mí-wɔ́ɖɔ́ séín nì ɓě dúɛɛ zɛɖɛ nyɛ̀nɛ̀ɛ̀.

³¹ Ɔ jèɛɛ, ɓěǐn ɖá ɓɛ́ ɓě ké fɛ̃̀ìn. Ɓě kpa ɖɛ mìɔ ké ɓě zi dyùǐ kúɖúú dyí.

Jízɛ̀ jè mú-wɔ̃́ìn-wɔ̃́ìn kè ɔ ɓɔ́-ɓɔ́

³² “Nyɔǔn séín ɓě ɓɛ́ wa wɔ̃́ìn ní jè mú ɖé nyɔǔn ɓě gboɛɛ, mɔ́ún mu wa mɔ̀ùn jè mú wɔ̃́ìn ɖekè ɖé ḿ Ɓǎ nìà ɖé dyɔún wɛ̃ɛ dyúa.

³³ Kɛɛ nyɔǔn séín ɓě ɓɛ́ wa doìn ní jè mú ɖé nyɔǔn ɓě gboɛɛ, mɔ́ún mu wa mɔ̀ùn jè mú doìn ɖekè ɖé ḿ Ɓǎ nìà ɖé dyɔún wɛ̃ɛ dyúa.

Jízɛ̀ se gìɖìǐ dyà kɛɛ ɔ dyà gàsíà

³⁴ “Ɓě ní poɛ̀n hwìɖǐi kà ɓɛ́ ḿ dyi ma ɓóɖó-kpàà kɔ̃, ɓɛ́ ḿ ké ma gìɖìǐ dyà kɛ. Ḿ se gìɖìǐ dyàǔn dyi, kɛɛ ḿ dyi, ɓɛ́ ḿ ké gàsíà dyà.

³⁵ Ḿ dyi, ɓɛ́ ḿ kéɛ nyu ɓɛ́ dyú-gàà ké ɔ ɓǎ gbo vɔ̃, ɓɛ́ dyú-màà ké ɔ ɖe gbo vɔ̃, ɔ kè ɓɛ́ dyúɛ̀ gmàà ké ɔ dà gbo vɔ̃.

³⁶ Nyɔ ɖòɛ̀ mú-nyɛ́-nyɔ̀ mu ɔ mìɔùn nììn ɓíɖí-taún-nyɔ̀ jǔùn.

³⁷ “Nyɔ mɔ̀ nyɔ ɓɛ́ ɔ mu ɔ ɖe mɔɔ ɔ ɓǎ mú ɖɛ̀ɓɛ̀ìn mìɔ ɓɛ́ ɔ ké kà ɔ nyu ḿ mú ɖɛ̀ɓɛ̀ kɛɛ dyí ziɛɛ, ɔ se ní ɖeín-nà-nyɔ̀ jǔɛ ɓɛ́ìn. Ké nyɔ mɔ̀ nyɔ ɓɛ́ ɔ mu ɔ dyú-gàà mɔɔ ɔ dyú-màà mú ɖɛ̀ɓɛ̀ìn mìɔ ɓɛ́ ɔ ké kà ɔ nyu ḿ mú ɖɛ̀ɓɛ̀ kɛɛ dyí ziɛɛ, ɔ se ní ɖeín-nà-nyɔ̀ jǔɛ ɓɛ́ìn.

³⁸ Ké nyɔ mɔ̀ nyɔ ɓɛ́ ɔ se ɔ kɔ́ɖɔ́sìɔ̀ dyí ɖú, ɓɛ́ ɔ ké ḿ kíɖíí síɛɛ, ɔ se ní ɖeín-nà-nyɔ̀ jǔɛ ɓɛ́ìn.

³⁹ Nyɔ mɔ̀ nyɔ ɓɛ́ ɔ mɔ́ ɓɛ́ ɔ ké ɔ fɛ̀ɛ̀ɔ̀ póìn nyɛɛ, ɔ fɛ̀ɛ̀ɔ̀ mu ɔ xwa sɔ̀ùn. Ké nyɔ mɔ̀ nyɔ kɔ̃̀ fɛ̀ɛ̀ mu ɔ xwa sɔ̀ùn ɓó ní jè kɛɛ, ɔ muɛ dyéìn ɖe.

Pɛ́ɛ̀-ɖɛ̀ ɓě

⁴⁰ “Nyɔ mɔ̀ nyɔ ɓɛ́ ɔ kpɔ̃ ɓě jè dyiɛɛ, ɔ kpɔ̃ ḿ jè dyi ɖekè. Ké nyɔ mɔ̀ nyɔ ɓɛ́ ɔ kpɔ̃ ḿ jè dyiɛɛ, ɔ kpɔ̃ nyɔ mɔ̀ nyɔ ɖoɓoà ḿ wɛ̃ɛ jè dyi ɖekè.

⁴¹ Nyɔ mɔ̀ nyɔ ɓɛ́ ɔ kpɔ̃ kpáá-ɖɛ̀-cɛ̃-nyɔ̀ jè dyi, sepóɛɖé ɔ mɔ̀ kpáá-ɖɛ̀-cɛ̃-nyɔ̀ jèɛɛ, ɔ kèɔ̀ kè mu ɔ pɛ́ɛ̀-ɖɛ̀ɔ̀ mú peɖeìn. Ké nyɔ mɔ̀ nyɔ ɓɛ́ ɔ kpɔ̃ dyí-sɛ́ɖɛ́ìn-nyɔ̀ jè dyi, sepóɛɖé ɔ mɔ̀ dyí-sɛ́ɖɛ́ìn-nyɔ̀ jèɛɛ, ɔ kèɔ̀ kè mu ɔ pɛ́ɛ̀-ɖɛ̀ɔ̀ mú peɖeìn.

⁴² Ḿ cɛ̃ ɓě jǎà gbo, nyɔ mɔ̀ nyɔ ɓɛ́ ɔ mu ní ɖeín-nà-nyɔ̀ ɓěɔ̀ nyɔ mɔ̀ nyɔ ɓɛ́ ɔ se ɖɛ kpa ɖé wa hwìɛ̀ kɛɛ ní pɛ̀ɛ̀ wè nyíìn dyɛ mɔ̀ùn, ɓɛ́ ɔ kéɛ ná, sepóɛɖé ɔ mɔ̀ ní ɖeín-nà-nyɔ̀ jèɛɛ, Gèɖèpɔ́ɔ̀ mu ɔ pɛ́ɛ̀ìn wɛ̃́ɛ́.”