Máɖékà 4 - Ɓǎsɔ́ɔ̀ Báɓòɔ̀

Bounɓoɔ̀ zaa-wɔ̃-po-wèɔ̀ nì dyiɛń

¹ Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ɖe, ké ɔ ɖá, “Gmɔ̀ nɔ̄, wé ɖò nì dyiɛń, ké ɔ mu nììn kà nyɛ-ɓɔ́ɔ́ nìà kɛ. Ɔ mɔ̀ wé kɔ̃̀ ɓaɖa ɓɛ́ nyɔ ɓě ɓɛ́ wa ɓúáìn wa mìɔùn dyíɛ kè hwòɖǒ-kɔ̃in-nyìnììn-nyɔ̀ ɓěɔ̀ mu sĩìn kà mɔɔ́-fèɖè sĩà kɛ. Wa mu ɓó dyi sĩɛ hwɛ̀ìn ɓó wéa ɓaɖa.

² Kɛɛ ɓá ɓě mɔ̀ nyɔ ɓě dyéà ḿ kpéín nyɛɛ jè dyíɛɛ, ní nyɔ-póìn-kpèɔ̀ mu ɓě kɔ̃ dyiìn kà dyóɖó dyià xwáɖáún wóɖó ní, ɔ nyuà nyɔ kɔ̃ fã̀ìn nyɛ. Ɔ mu dyi-káná-káná dyàùn kà dyóɖóɔ̀ ceɔ̀ nìà kɛ. Ɓě mu buɛ̀ìn, ké ɓě mu dyií dyi wãìn kpaùn kà ɓìɖǐ-dyù ɓě ɓɛ́ wa buɛ̀ dyi sɔ̀ìn ɖé gbǒ kɔ̃̀ mú wa wã̀ìn ma kà wa dyiɛɛ nìà kɛ.

³ Wé kɔ̃̀ ɓaɖa ní muà ɖɛ ɓěa nyuùn wɛ̃ɛ, ɓě mu hwòɖǒ-kɔ̃in-nyìnììn-nyɔ̀ ɓěɔ̀ ɓíɖíi dyi poùn, ɓɛ́ ɓě ké wa kɔ̃in nà. Wa mu nììn kà púu-púu nìà kɛ, ɖé ɓě ɓo xwíɖíi. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.

⁴ “Gma ɓě ɓɛ́ ḿ nyí ma kà ní gbo-nì-nyɔ̀ Mózè ɖé Sányà-tòɖòɔ̀ dya, ɓó ɓě mɔ̀ Éézùɖùɛ̀-dyù séín ɓěɔ̀ bììɛɛ mɛ nì ɓě hwìɖǐi.

⁵ “Hwɛ̀ ɓɛ́ mɔ̄ Bounɓoɔ̀ ní wé vɛ̀nɛ̀ ku wɔ̃ɔ̀ ké ɓó nyiniɛɛ, gmɔ̀ nɔ̄, ní mu ní kpáá-ɖɛ̀-cɛ̃-nyɔ̀ mɔ̀à Ìɖáájɔ̀ kɛɛ ɓě gbo ɖoɓoùn.

⁶ Ké ɔ muɛ nyuùn ɓɛ́ ɓǎ ɓěɛ̀ hwòɖǒ ké waà dyú ɓě gbo gmɔ̀ìn ɖe, ɓɛ́ dyú ɓěɛ̀ hwòɖǒ ké waà ɓǎ ɓě gbo gmɔ̀ìn ɖe. Ɔ se ná nìǐn, nìí, ní mu dyiìn, ɓɛ́ ḿ ké ɓěɛ̀ ɓóɖó gànáɔ̀ mu gbɔɔ̀.”