Jónà 4 - Ɓǎsɔ́ɔ̀ Báɓòɔ̀

Jónà kpáìn Gèɖèpɔ́ɔ̀ dyoɖoún

¹ Kɛɛ Jónà hwòɖǒ kpá ma ɖé ɖei mìɔ cá, ké ɔ kpá ma dyoɖoún.

² Ké ɔ ɓaà ma Bounɓoɔ̀, ké ɔ ɖá, “Bounɓo, má, ti ḿ nì ma kà ɖé ḿ ɓíɖíɛɛ, ḿ cɛ̃ɛ ma kà nì mu ma ɖɛ nìà kɛ nyuùn wɛ̃e? Ɔ kɔ̃̀ jè ḿ fṹà ma kà, ké ḿ kpá ma kà xwáɖáún, ɓɛ́ ḿ ké ma kà ɖé Tásìà-hwɔ̀ɖɔ̀ɔ̀ mú muɛ̀. Ḿ dyuòɛ̀ ma kà nì mu ma ɖɛ nìà kɛ nyuùn wɛ̃, sepóɛɖé m̀ mɔ̀ jĩ́á-jè kè wìì Gèɖèpɔ́ɔ̀. Nì dyoɖo-hwòɖò mɛɛ̀ ní, ké ɖɛ̀ɓɛ̀ǐn-ɖɛ̀ɓɛ̀ǐn dyíìn ɖé m̀ múin, ké m̀ zàìn ɖɛ gbà ɓɛ́ m̀ kéɔ́ nyɔǔn kɔ̃ dyà kɛɛ dyí.

³ Ɓó kàǔn wɛ̃ɛ, Bounɓo, m̀ mɛ zà ɖé ní fɛ̀ɛ̀ɔ̀, sepóɛɖé ɔ nɔ̀mɔ̀ dyíin ɓɛ́ ḿ ké mɛ́ ké ɔ zi ɓɛ́ ḿ ké cĩ́ɛɛ dyí.”

⁴ Kɛɛ Bounɓoɔ̀ cɛ̃ɛ ma ɔ gbo, ké ɔ ɖá, “Nì hwòɖǒ ɖá ɔ sɛ́ɖɛ́ìn dyí ɓɛ́ m̀ ké dyoɖoún kpáe?”

⁵ Ti ɓɛ́ Bounɓoɔ̀ ɖǎ ma Jónà gbo wùɖùɛ̀ hwɔɛɛ, Jónà mu ma ɖé Nínívà-hwɔ̀ɖɔ̀ɔ̀ dyóɖó-xwáɖáún-wóɖóìn-naínɔ̀, ké ɔ kò ma ɖé dyi. Ɖéɛ̀ ɔ po ma ɓeè-dyù ɖò, ké ɔ kò ma ɓóɛ xwíɖíi dyi, ɓɛ́ ɔ ké ɖɛ mu ma hwɔɖɔɔ̀ gbo kpáùn wɛ̃ɛ dyé.

⁶ Hwɛ̀ ké Bounɓo Gèɖèpɔ́ɔ̀ nyuɛ ma ké ɖúú-cù ɖò mɛ ma, ké ɔ dyà ma pɛ̀ɛ̀ Jónà kɔ̃in, ɓɛ́ wo-wo ké se ma Jónà nyu ɖe. Ké Jónà kpá ma múàǔn mìɔ ɓó cuɔ̀ jè.

⁷ Kɛɛ wéɔ̀ nyɔ kɔ ma ɓó dyíɛɛ, zɔ̃ wĩín kà kɛɛ, Gèɖèpɔ́ɔ̀ nyuɛ ma ké sɔ̀mɔ̀ɔ̌ ɖò ɖi ma cuɔ̀, ké cuɔ̀ mɛ́ ma.

⁸ Ti ɓɛ́ dyóɖóɔ̀ wóɖó ma xwáɖáún wɛ̃ɛ, Gèɖèpɔ́ɔ̀ nyuɛ ma ké pìɔ̌ sùmùù ɖò ɓɛ́ ɔ sɔ̀ ma ɖé dyóɖó-xwáɖáún-wóɖóìn-naínɔ̀ kɛɛ dyi ma. Ké dyóɖóɔ̀ sí ma Jónà dúún mìɔ cá, ké ɔ táà ma kṹún kpáa. Púɛɛ, Jónà mɔ́ ɓɛ́ ɔ ké ma mɛ́, ké ɔ ɖá, “Ɔ nɔ̀mɔ̀ dyíin ɓɛ́ ḿ ké mɛ́ ké ɔ zi ɓɛ́ ḿ ké cĩ́ɛɛ dyí.”

⁹ Kɛɛ Gèɖèpɔ́ɔ̀ diè ma Jónà dyi, ké ɔ ɖá, “Nì hwòɖǒ ɖá ɔ sɛ́ɖɛ́ìn dyí ɓɛ́ m̀ ké dyoɖoún kpá ɓó cuɔ̀ jèè?” Ké Jónà ɖá, “Ǹdye, ḿ ɓéɖé ḿ ké dyoɖoún kpá, ké ḿ ɓɛ́ìn mɛ́ɛ ɓó ɔ jè.”

¹⁰ Hwɛ̀ ké Bounɓoɔ̀ ɖá, “Dyéɛ, m̀ kɔ̃̀ cu ɓɛ́ m̀ seà nyu ɓɛ́ ɔ kéà mɛɛ jè gbo. Ɔ wóɖó ɓóɖóún ɓó máaún-hwùɖù dyúáɖò mú, ké ɔ mɛ́ ɓó máaún-hwùɖùɔ̀ nyɔ kɔ ɓó dyíɛɛ mú.

¹¹ Nì hwòɖǒ ɖá ɔ se dyíin nɔ̀mɔ̀ ɓɛ́ ḿ ké Nínívà-hwɔ̀ɖɔ̀ɔ̀ jè gbo kɔ̃̀e? Hwɔɖɔɔ̀ ɓéɖé dyú mɛ́nɛ́ɛ́ ɓě ɓɛ́ wa zi táázĩ̀ìn hɔ̃dɛ̀ɖɛ̀ ɖò kè kpáɖá-nyɔ ɖò kɔ̃, ké wa se ɖɛín-ɖɛ̀ kè ɖɛ gbàà zaìn gboi dyí dyuòɛ ɔ kè nyúà-ɖɛ̀ kúɖúú ɓě.”