Jónà 3 - Ɓǎsɔ́ɔ̀ Báɓòɔ̀

Jónà nyu Bounɓoɔ̀ wuɖu

¹ Hwɛ̀ ké Bounɓoɔ̀ wùɖù ma Jónà gbo ɖe,

² ké ɔ ɖá, “Mu ɖé hwɔɖɔ vɛ̀nɛ̀ mɔ̀à Nínívà kɛɛ mú, ɓɛ́ m̀ ké wuɖu ní muà m̀ mú cuòìn nyɛɛ zio mú pòìn.”

³ Ké Jónà wɔ̃́ìn ma Bounɓoɔ̀ wuɖuɔ̀ gbo, ké ɔ sɔ̀ ma dyí, ké ɔ mu ma ɖé Nínívà-hwɔ̀ɖɔ̀ɔ̀ mú. Ɓó tia ɓaɖaa, Nínívà mɔ̀ ma hwɔɖɔ vɛ̀nɛ̀ ɖò cá. Ɔ ɓɛ́ìn nyɔ ɖò wé tã dyí ɖúɛ, hwɛ̀ ɓɛ́ ɔ ké hwɔɖɔɔ̀ kpó cɛ̃.

⁴ Ti ɓɛ́ Jónà nyini ma ɖé Nínívà-hwɔ̀ɖɔ̀ɔ̀ múɛɛ, ɔ nà ma hwɔɖɔɔ̀ múin ɓó wé dyúáɖò, ké ɔ ɖú ma zio po kpàǐ, ké ɔ ɖá, “Wé kpáɖá-nyɔ sɔ̃́ nyɛ̀nɛ̀ɛ̀ sèǎ ɓó ɓɛ́ Nínívà-hwɔ̀ɖɔ̀ɛ̀ ké mú gbɔɔ̀.”

⁵ Ti ɓɛ́ Nínívà-nyɔ̀ ɓěɔ̀ wɔ̃́ ma Gèɖèpɔ́ɔ̀ wuɖuɔ̀ kɛɛ, wa poɛ ma jǎà, ké wa kpá ma wìǐn. Ɔ jèɛɛ, wa po ma wuɖui, ɓɛ́ nyɔǔn séín ké wɔ̃ kɔ̃ hwèɖè, ké waà nyɔ vɛ̀nɛ̀ séín ɓěɔ̀ kè dyú mɛ́nɛ́ɛ́ séín ɓěɔ̀ po ma ɖɔ-zɔ̃̀ mú.

⁶ Ti ɓɛ́ bɔ̃̌ɔ̀ dyɛ̀ìn ma Nínívà-hwɔ̀ɖɔ̀ɔ̀ kã́áɔ̀ kɛɛ, ɔ sɔ̀ ma ɔ kã́á-gmɛ̀ɛ̌ɔ̀ mú, ké ɔ zà ma ɔ kã́á-ɖɔ̀ɔ̀ mú, ké ɔ po ma ɖɔ-zɔ̃̀ mú, ké ɔ kò ma tĩ́ɔ-pɛ̀ɛ̀ múin.

^7-8 Ké kã́áɔ̀ po ma wuɖui ɖé Nínívà-hwɔ̀ɖɔ̀ɔ̀ mú, ké ɔ ɖá, “Nyɔ ɖò mɔɔ nyúà-ɖɛ̀ ɖò mɛ ɓɔ́ ɖɛ ɖò ɖiɛ, ké wa mɛ ɓɔ́ ní ɖò náa fɔɔ. Kɛɛ nyɔ séín mɛ po ɖɔ-zɔ̃̀ mú, ɓɛ́ wa ké nyúà-ɖɛ̀ séín ɖɔ-zɔ̃̀ kɔ̃in wáɖá. Ké nyɔ séín mɛ ɓaà Gèɖèpɔ́ɔ̀ hwòɖǒɛ̀-ɖé-hwɛ̀-kà, ké wa mɛ táà waà kpeɖe gbà ɓěɔ̀ kè waà nyɔ-ɖɛ-gana-xwa-zàìn-zàìnɔ̀ dyi. Wuɖu nìà kɛ mɔ̀ gma sɔ̀ìn ɖé ḿ kè ní gɔ̌mànà-nyɔ̀ vɛ̀nɛ̀ ɓěɔ̀ gboɛ.

⁹ Nyɛ́ dyuòɛ̀ kɛbì Gèɖèpɔ́ɔ̀ mu dyɛ̀ à wìǐn dyéìn, ɓɛ́ ɔ ké ɔ dyoɖo-hwòɖòɔ̀ gbo zĩàìn, ɓɛ́ ɔ ké se à mú gbɔɔ̀ ní kɛ́?”

¹⁰ Ti ɓɛ́ Gèɖèpɔ́ɔ̀ dyéɛ ma kà ɓɛ́ wa táà ma waà kpeɖe gbà ɓěɔ̀ dyiɛɛ, púɛɛ, ɔ dyé ma wa wìǐn, ké ɔ se ma wa mú gbɔɔ̀ kà ɔ nyuɛ ma kà cɛ̃ɛ kĩ́ín nyɛ.