Jónà 2 - Ɓǎsɔ́ɔ̀ Báɓòɔ̀

Jónàà ɓaà-wùɖù

¹ Ti ɓɛ́ Jónà nì ma ɖé zimiiɔ̀ xwíníín nyɛɛ, ɔ ɓaà ma Bounɓo mɔ̀à ɔ Gèɖèpɔ́ɔ̀ kɛ,

² ké ɔ ɖá, “Bounɓo, ti ɓɛ́ fũ̀à-fṹá nì ma ḿ nyuɛń nyɛɛ, ḿ ɓaà ma m̀ ní, ké m̀ kpá ma ḿ gbo. Ti ḿ nì ma ɖé gĩɔ kɛɛ, ḿ pòìn ma m̀ kpéi, ɓɛ́ m̀ ké ma ḿ gbo kpá, ké m̀ wɔ̃́ ma ní kpé-po-wùɖùɔ̀.

³ M̀ po ma ḿ ɖéé ɖé dyóóɔ̀ hwuɖu, ké m̀ nyuɛ ké dyóóɔ̀ kè dyóó-kpɛ̀ ɓěɔ̀ zi ma ḿ kɔ̃in.

⁴ Ké ḿ poɛ̀n ma hwìɖǐi kà ɓɛ́ m̀ ɖǎ ma ḿ kúmú fɔɔ kɛ. Kɛɛ wɛ̃́ɛ́ kɛɛ, ní mu ɖé nì gbǒ hwɛ̀ǐn-hwɛ̀ǐnɔ̀ gbo gmɔ̀ìn ɖe.

⁵ Dyóóɔ̀ mana ma ḿ, ké ɔ nyuɛ ké fɛ̀ɛ̀ dè ma ḿ dyí. Ḿ dèìn ma dyóóɔ̀ hwuɖui, ké dyóún-pìǐ ɓěɔ̀ bĩìn ma ḿ dúi.

⁶ Ḿ mu ma ɓíɖíi ɖé toɖo vɛ̀nɛ̀ ɓě nì ma ɖé dyóóɔ̀ múɛɛ hwuɖu, ké ḿ nì ma ɖé ɓóɖó kɔ̃̀ kɔ̃ nyɔ dyià muín, nyɔ ní dyià ɖeɛ. Kɛɛ Bounɓo, mɔ̀ mɔ̀à ní Gèɖèpɔ́ɔ̀ kɛɛ, m̀ zà ma ḿ gĩɔ.

⁷ Ti ɓɛ́ ní fɛ̀ɛ̀ɔ̀ nìǎ ma ɖé hwɛ̀ǐn nyɛɛ, púɛɛ, nì jè dyi ma ḿ hwìɖǐi, ké ḿ ɓaà ma. Ké m̀ wɔ̃́ ma ní ɓaà-wùɖùɔ̀ sɔ̀ìn ɖé nì gbǒ hwɛ̀ǐn-hwɛ̀ǐnɔ̀ mú.

⁸ Nyɔ ɓě ɓɛ́ wa kpɔ̃à ɓó kũùn-kpò se ɖɛ kpa ɓě gbo dyiɛɛ, wa se m̀ hwòɖǒ kɔ̃ dè ɖe.

⁹ Kɛɛ mɔ́ún mu sáa zàùn ɖé m̀ gbo, ɓɛ́ ḿ ké zùo-po-wɛ̀ɖɛ̀ ɓeɖe, ké ní mu wuɖu ḿ ɖǎ ɖiɛɛ nyuùn, sepóɛɖé pó-pó sɔ̀ìn ɖé m̀ gbo.”

¹⁰ Ti ɓɛ́ Jónà ɖǎ ma wé tã ɖé zimiiɔ̀ xwíníín nyuɛɛ, Bounɓoɔ̀ wùɖù ma zimiiɔ̀ gbo, ké ɔ hwaɖa ma Jónà ɖé pĩ́ɔɔ̀ kɔ̃.