Jóɛ̀ 3 - Ɓǎsɔ́ɔ̀ Báɓòɔ̀

Gèɖèpɔ́ɔ̀ mu ɓóɖó-dù ɓěɔ̀ zaa wɔ̃ poùn

¹ Bounɓoɔ̀ cɛ̃ɛ ɖe, ké ɔ ɖá, “Ti kɔ̃̀ ɓaɖa ní mu Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ bã-bãɔ̀ ɖe tòùn ɖeɛɛ,

² gmɔ̀ nɔ̄, ní mu ɓóɖó-dù séín dyí poìn, ɓɛ́ ḿ ké wa ɖé Jɛ̀hósáfà Bɔɔ-kpàɔ̀ kɔ̃ kpa. Ɖéɛ̀ ní mu waà zaa wɔ̃ pòìn ɓá ní kɔ̃̀ɔ̀-ɖɛ̀ mɔ̀à Éézùɖùɛ̀-dyù ɓěɔ̀ kɛɛ jè dyí. Sepóɛɖé wa ɖǎ ní nyɔ ɓěɔ̀ ɖé ɓóɖó-dù ɓěɔ̀ hwìɛ̀ dyi gbɛ̀ìn, ké wa ɖǎ ní ɓóɖóɔ̀ geìn.

³ Wa vɔ̃ gáá ɓó ní nyɔ ɓěɔ̀ jè. Wa peɖe gàa-dyù ɓěɔ̀ ɓó gbàɖàùn-màà ɓě jè, ké wa peɖe màa-dyù ɓěɔ̀ ɓó wã́ìn ɓɛ́ wa ké náa jè.

⁴ “Ɓě mɔ̀à Táà-nyɔ̀ ɓě kè Zíɖɔ̀ùn-nyɔ̀ ɓě kè Féɖésìà-nyɔ̀ ɓěɛɛ, ɖɛ́ ḿ nyu ɓě bũ̌ kɛ́? Ɓě nì kpa zàǔn ɓó ɖɛ ɖò ḿ nyu ɓě bũ̌ɛɛ jèè? Ɔ jǔ ké ɓě dyi kpa zàǔn nì ɓó ɖɛ ɖò ḿ nyu ɓě bũ̌ɛɛ jè ní, nìí, ní mu ɖɛ ɓě nyuà kɛɛ ɓě mìɔùn kɔ̃ dyàùn ɖe wàɖà.

⁵ Sepóɛɖé ɓě ɖú ní séɓàɖà kè ní góò ɓě mɔ̀à ní dyi-dè-ɖɛ̀ kpa ɖɛ ɓěɔ̀ kɛɛ dyí, ké ɓě kpa wa ɖé ɓěɛ̀ gèɖèpɔ́ɔ̀ ɓěɔ̀ gbǒ ɓěɔ̀ mú.

⁶ Ké ɓě poìn Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓěɔ̀ dyí, ké ɓě pèɖèìn wa Gíɖíì-nyɔ̀ ɓěɔ̀ gbo, nìí ɓɛ́ ɓě ké wa ɓóɖó vɛ̃in ɖò kɔ̃ tò jè.

⁷ Ɓě gmɔ̀ nɔ̄, ní mu wa dyí poìn sɔ̀ìn ɖé pá ɓě kɔ̃̀ mú ɓě ɖǎà wa pèɖèìn nyɛ. Ké ní mu ɖɛ ɓě ɖǎà nyuɛɛ ɓě mìɔùn kɔ̃ dyàùn ɖe.

⁸ Ní mu ɓěɛ̀ dyú-gàà kè ɓěɛ̀ dyú-màà ɓěɔ̀ Júɖà-nyɔ̀ ɓěɔ̀ gbo pèɖèìn, ɓɛ́ wa mɔ̀ùn ké wa nyɔ ɓě nìà ɖé Síɓà-ɓòɖòɔ̀ kɔ̃ vɛ̃in nyɛɛ gbo pèɖèìn. Mɔ̄ mɔ̀ Bounɓoɔ̀, ḿ ɖǎa cɛ̃.

⁹ “Ɓě mɛ ɓeìn wuɖuɛ̀ dyi ɖé ɓóɖó-dù ɓěɔ̀ kɔ̃, ɓɛ́ ɓě ké níiń, ‘Ɓě mɛ dyé ti ɓó to jè. Ɓě mɛ po to-vɔ̃-nyɔ̀ ɓěɔ̀ vã kɔ̃. To-vɔ̃-nyɔ̀ séín ɓěɔ̀ mɛ xwɛ̃́ìn dyi, ɓɛ́ wa ké gbàà po.

¹⁰ Ɓě ɖú ɓěɛ̀ ɓóɖó-wàìn-ɖɛ̀ ɓěɔ̀ dyí, ɓɛ́ ɓě kéɛ gàsíà mú ɓaɖa, ɓɛ́ ɓě ké ɓěɛ̀ ɖɛ-kpã́ìn-gbǎ ɓěɔ̀ ɖí mú ɓaɖa. Kpéɛ̀-dyí-hwɛ̀-nyɔ̀ ɓěɔ̀ mɛ vɔ̃ ɖekè.

¹¹ Ɓě mɔ̀ ɓóɖó-dù séín nì wáká séín kɔ̃ɛɛ, ɓě mɛ poìn ɖé bɔɔ̀ kɔ̃ dyí wàɖà.’ ” Óó, Bounɓo, dyà ɖé nì to-vɔ̃-nyɔ̀ ɓěɔ̀.

¹² “Ɓóɖó-dù ɓěɔ̀ mɛ kpá vã kɔ̃, ké wa mɛ mu dyúa ɖé Jɛ̀hósáfà Bɔɔ-kpàɔ̀ kɔ̃, sepóɛɖé ɖéɛ̀ ní mu dyi kòùn, ɓɛ́ ḿ ké ɓóɖó-dù séín nì wáká séín kɔ̃ɛɛ zaa wɔ̃ po.

¹³ Ɓóɖó-dù ɓěɔ̀ hwòɖǒ-kɔ̃in-nyìnììn-nyìnììnɔ̀ ɖǎ kpé wɔ̃ ɓúá mìɔ. Ɔ jèɛɛ, ɓě mɛ gbɔɔ̀ wa mú kà nyɔ cɛ̃à mɔɔ́-kɔ́-kɔ́ɛ. Ɓě wàìn wa dyi kà nyɔ wàìn kà géɖéè dyi ɖé géɖéè-mú-píníìn-naínɔ̀ kɛ.”

¹⁴ Nyɔ kúɖúú se zɛɖɛɛ ɓɛ́ìn nì ɖé Zaa-Wɔ̃-Pòìn Bɔɔ-kpàɔ̀ kɔ̃, sepóɛɖé ɔ sèǎ ɖɛ tííwè, ɓɛ́ Bounɓoɔ̀ kéá ɖé zaa wɔ̃ poɛń dyi.

¹⁵ Tíe mu dyóɖóɔ̀ kè dɛ̀nɛ̀ɔ̀ kɔ̃in kpɔ̃ùn, ké dɛ̀nɛ̀ mɛ́nɛ́ɛ́ ɓěɔ̀ se fãá mu ɖe.

¹⁶ Bounɓoɔ̀ mu kuɖuùn sɔ̀ìn ɖé Zádyɔún-tòɖòɔ̀ dya kà ganìǎ kuɖuà kɛ. Ɔ mu mú pánáùn sɔ̀ìn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Nìí, dyɔɔ̀ kè ɓóɖó-kpàɔ̀ mu tɛɖɛìn. Kɛɛ Bounɓoɔ̀ gbo mu pèɖèìn-naín jǔùn ɓó ɔ nyɔ ɓěɔ̀ bìì. Ɔ mu dyí-gmɔ̀ìn-pà jǔùn ɓó Éézùɖùɛ̀-nyɔ̀ ɓěɔ̀ bìì.

Gèɖèpɔ́ɔ̀ mu ɔ nyɔ ɓěɔ̀ mana kɔ̃ poùn

¹⁷ Bounɓoɔ̀ cɛ̃ɛ ɖe, ké ɔ ɖá, “Ɖɛ ɓěɛ̀ ɖǎ ná nìǐn, nìí, ɓě muɛ dyuòùn kà mɔ̄ mɔ̀ Bounɓo mɔ̀à ɓěɛ Gèɖèpɔ́ɔ̀ kɛɛ cĩ́ ɖé Zádyɔún mɔ̀à ní toɖo hwɛ̀ǐn-hwɛ̀ǐnɔ̀ kɛɛ dya kɛ. Jùɖúsɛ̀ɖɛ̀ìn-hwɔ̀ɖɔ̀ɔ̀ mu mú-hwɛ̀-pà jǔùn, ké ɓóɖó-dù kà kò ɖò ɓěɛ̀ nyɔ ɓě seɛ toún ɖuɛ́ mu ɖe.

¹⁸ “Ɓó tia ɓaɖaa, géɖéè ɓáún-ɓáún mu ɖé toɖo vɛ̀nɛ̀ ɓěɔ̀ dya bãùn, ké nyúà-ɖɛ̀ ɓáún-ɓáún mu ɖé toɖo-dyù ɓěɔ̀ dya dyíìn. Ké ní-dù séín nì ɖé Júɖà-ɓòɖòɔ̀ kɔ̃ɛɛ mu ní ɓéɖéìn. Ní-dyù ɖò mu ɖé Bounɓoɔ̀ gbǒɔ̀ mú sɔ̀ùn, ɓɛ́ ɔ ké Sítììn Bɔɔ-kpàɔ̀ ní nyí.

¹⁹ “Kɛɛ Íjè-ɓòɖòɔ̀ mu fóɖóún kpáùn, ɓɛ́ Íɖɔ̀ùn-ɓòɖòɔ̀ ké gbǎùn-fúɖúá fóɖóún jǔ, ɓó hwòɖǒ-kɔ̃in-nyìnììn-ɖɛ̀ ɓɛ́ wa nyu ma kà Júɖà-nyɔ̀ ɓěɔ̀ bũ̌ɛɛ jè. Sepóɛɖé Júɖà-nyɔ̀ ɓěɔ̀ se ma ɖɛ gbà ɖò nyu, ké wa ɖáɓá ma Júɖà-nyɔ̀ ɓěɔ̀ ɖé Júɖà-ɓòɖòɔ̀ kɔ̃.

²⁰ Nyɔǔn-dyùɛ̀ xwéɖé-dù deìn dúún mu ɖé Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ mú cĩ́ìn kánáá pū.

²¹ Júɖà-nyɔ̀ ɓěɔ̀ nyɔmɔɔ dyi wáɖáìn nàmàǔn ɓɛ́ ḿ séè ma kɔ̃in zĩ̀ìn keɛɛ, ní muɛ kɔ̃in zĩ̀ìn. Mɔ̄ Bounɓoɔ̀ mu ɖé Zádyɔún-tòɖòɔ̀ dya cĩ́ìn.”