Jóɓò 9 - Ɓǎsɔ́ɔ̀ Báɓòɔ̀

Jóɓò jǔ Bíódà gɔ̃̌

¹ Ti ɓɛ́ Bíódà dè ma wuɖu dyiɛɛ, Jóɓò zà ma ɖé wuɖu ɖe, ké ɔ ɖá,

² “Ǹdye, ḿ dyuòɛ̀ dyí. Kɛɛ nì hwòɖǒ ɖá nyɔ ɖò ɓɛ́ìn Gèɖèpɔ́ɔ̀ zaa dúún wáɖáae?

³ Xwɛ̌ nyɔ ɖò kè Gèɖèpɔ́ɔ̀ ɓɛ́ìn zaa ziɛ kɛ́? Gèɖèpɔ́ɔ̀ ɓɛ́ìn dyi-diè-ɖɛ̀ táázĩ̀ìn ɖò dyi dièɛ̀, ké nyɔɔ̀ seɛ ɖò gɔ̃̌ jǔɛ ɓɛ́ìn.

⁴ Ɔ fɔ̀nɔ̀ hwòɖǒ mìɔ, ké ɔ ɓéɖé kpé. Nyɛ́ ɓɛ́ìn ɔ gbo vɔ̃ɔ, ɓɛ́ nyɔɔ̀ ké ɖuɛ́?

⁵ Ɔ zàìn toɖo vɛ̀nɛ̀ ɓě daí wàɖà. Ɔ cɛ́ɛ̀ toɖo ɓěɔ̀ xwa ɖé ɔ dyoɖoɔ̀ mú.

⁶ Ɔ mɔ̀ nyɔ túò ɓóɖó-kpàà dyi, ké ɓóɖóɔ̀ sɔ̀ìn daí. Ɔ cúè-ɓò ɓěɔ̀ túò dyi.

⁷ Ɔ mɔ̀ nyɔ ɓɛ́ìn dyóɖóɔ̀ kè dɛ̀nɛ̀ mɛ́nɛ́ɛ́ ɓěɔ̀ ɓɔ́í poɛ, ɓɛ́ wa ké se fã.

⁸ Ɔ ɖòùn mɔ̀ nyɔ pɛ́ɛ̀ dyɔɔ̀ kɔ̃in, ké ɔ nà dyóó-kpɛ̀ ɓěɔ̀ kɔ̃in.

⁹ Ɔ mɔ̀ nyɔ nyuɛ ké dɛ̀nɛ̀ mɛ́nɛ́ɛ́ ɓěɔ̀ beè ɖé dyɔɔ̀ dyíin. Ɔ hwɔìn kà dɛ̀nɛ̀ mɛ́nɛ́ɛ́ ɓě kɔ̃̀ nyɛ́nɛ́ mɔ̀à Kìɖìǒ vɛ̀nɛ̀ kè Kéɖémá-hwùɖù kè Dyùǐ-kúɖúú ɔ kè dyóó-zɔ̃̌in-dɛ̀nɛ̀ mɛ́nɛ́ɛ́ ɓěɔ̀ kɛ.

¹⁰ Ɔ nyu ɖɛ vɛ̀nɛ̀-vɛ̀nɛ̀ ɓě, ké wa jè se kɔ̃in zaìn ɓɛ́ìn. Dĩ́ín-dĩ̀ìn-ɖɛ̀ ɓě ɓɛ́ ɔ nyuɛɛ se zɛɖɛɛ ɓɛ́ìn.

¹¹ “Gèɖèpɔ́ɔ̀ zi ḿ dyíin, kɛɛ mɔ́ún dyé ɔ wà!

¹² Ɔ ɖú ɖɛ ɔ mɔ́ɛɛ dyí, ké nyɔ ɖò se ɔ ɓɔ́í poɛ ɓɛ́ìn. Nyɔ ɖò se ɔ dyi dièɛ̀ ɓɛ́ìn, ɓɛ́ ɔ ké níiń, ‘Ɖɛ́ m̀ nìà nyuɛń nyɛ́?’

¹³ Gèɖèpɔ́ɔ̀ se ɔ dyoɖo-hwòɖòɔ̀ gbo zĩàǐn mu. Ɔ síìn nyɔ ɓě ɓɛ́ wa kpáà dyóún-ɖɛ̀ vɛ̀nɛ̀ mɔ̀à Wéɖéháà kɛ gboɛɛ kɔ̃in.

¹⁴ Kà ɔ nìà náa, nìí, dɛ̌ ḿ ɓɛ́ìn wuɖu ɓɛ́ ḿ ké Gèɖèpɔ́ɔ̀ gɔ̃̌ jǔìn, ɓɛ́ ḿ ké zaaɔ̀ ɖuɛɛ dyéɛ kɛ́?

¹⁵ Kɛbì ḿ mɛ se ɖɛ gbà ɖò nyuɛɛ, ḿ se ḿ mìɔùn jè kɔ̃in zaìn ɓɛ́ìn ɓó Gèɖèpɔ́ɔ̀ mɔ̀à ní zaa-wɔ̃-po-nyɔ̀ɔ̀ kɛɛ dyúa. Ḿ ɓéɖé ḿ ké ɔ ɓaà, ɓɛ́ ɔ ké ḿ wìǐn dyé.

¹⁶ Kɛbì ḿ mɛ ɖáɔ́ má Gèɖèpɔ́ɔ̀ ɓó tɔ̀ɔ̀-ɓìɔ̀ ɖò dyúa, ɓɛ́ ɔ kéɔ́ dyiɛɛ, ɔ seɔ́ má wɔ̃́ɔ mu, ɓɛ́ ḿ kè ɔ kéɔ́ má zaa zi.

¹⁷ Ɔ wàìn ḿ dyi dyììn ɖé dìì mú. Ɔ nyuɛ ké ní jě ɓěɔ̀ kpá kɔ̃ ɖe mìɔ, ké ɔ se xwíníín ɖò kɔ̃̀.

¹⁸ Ɔ ní wɔ̃́ ké ní fɛ̀ɛ̀ ní sí ḿ xwíɖí-zɔ̃̀ìn dyi. Ɔ nyuɛ ké wìì mɔ̀ nyɔ-hwòɖǒ-nɛɛ̀ìn-ɖɛ̀ ɓě kɛɛ dyíìn ní fɛ̀ɛ̀ɔ̀ múin.

¹⁹ Ɔ dyi kpé ɓéɖé jè jǔǐn, nyɔ ɖò se Gèɖèpɔ́ɔ̀ dyí ɓɛ́ìn. Ɔ dyi zaa-wɔ̃-po-nyɔ̀ ɖò dyúa mu jè jǔǐn, kɔ́sìɓòɖòɔ̀ nyɛ́ ḿ ɓɛ́ìn ɖoɓoɛ, ɓɛ́ ɔ ké Gèɖèpɔ́ɔ̀ kpɔ̃ɔ́ mu kɛ́?

²⁰ Ḿ se ɖɛ gbà ɖò nyu dyɛo, kɛɛ ḿ mìɔùn nììn wĩín-wùɖù muɔ́ má ḿ zaa dúún wáɖáùn. Ḿ se kɛɛ ɖò ɓéɖé dyɛo, kɛɛ ɔ muɔ́ má ḿ zaa kpɔ̃̀ìn.

²¹ Ní cĩ́-cĩ́ɔ̀ se kɛɛ ɖò ɓéɖé, kɛɛ wɛ̃́ɛ́ kɛɛ, ḿ se ní cĩ́-cĩ́ɔ̀ ɖɛ ɖá. Ḿ ɖǎ cĩ́-cĩ́ dyí sa.

²² Ḿ cɛ̃ ɖɛ séín ɓěɛ̀, sepóɛɖé zaìn gbo ɖò se nì. Gèɖèpɔ́ɔ̀ gbɔɔ̀ ɖɛ-gbà-nyu-nyɔ̀ ɓěɔ̀ kè nyɔ ɓě se kɛɛ ɖò ɓéɖéɛɛ mú.

²³ Nyɔ ɓě ɓɛ́ wa se ɖɛ gbà ɖò nyuɛɛ dyi mɛ́ wàɖà ní, Gèɖèpɔ́ɔ̀ ɓaɖa wa dyɔ́.

²⁴ Gèɖèpɔ́ɔ̀ nyí hwòɖǒ-kɔ̃in-nyìnììn-nyɔ̀ ɓěɔ̀ ɓóɖó-kpàà ní, ké ɔ kpèìn zaa-wɔ̃-po-nyɔ̀ ɓěɔ̀ dyéɖéín dyi. Ɔ jǔ ké Gèɖèpɔ́ɔ̀ mɔ̀ nyɔ seɛ náa nyu ní, nyɛ́ kà kò ɖò kéà náa nyuɛ́?

²⁵ “Ní fɛ̀ɛ̀-wè ɓěɔ̀ nì ziɛń wàɖà-wàɖà. Wa fṹà ziɛń ké wa zi nyɔ nì peɖeɛ kpauń wɛ̃ɛ dyí, ké ḿ se múà ɖò ɓéɖéɛń nì ɓó wé dyúáɖò xwíníín dyɛ mɔ̀ùn.

²⁶ Ní wé ɓěɔ̀ nì ziɛń kà hwɔ̌ fɛ̃́ìn xwai ɖò zià nyɔ dyíin ɖé ní kɔ̃ kɛ, mɔɔ kà ke ɖò dyià ɓíɖíi, ɓɛ́ ɔ kéà ɖɛ ɓó ɓíɖíi bǎ kɛ.

²⁷ Ḿ dyiɛ cɛ̃, ké ḿ dyi níiń, ‘Ḿ se Gèɖèpɔ́ɔ̀ kàǐn mu ɖe, ké ḿ se wìǐn kpáa mu ɖeo’ ní,

²⁸ nìí, fã̀à ɖú ḿ nyu kpàǐ ɓó ní gǎ-dyé-dyéɔ̀ jè, sepóɛɖé ḿ dyuòɛ̀ kà Gèɖèpɔ́ɔ̀ mu ḿ zaa kpɔ̃̀ìn nyɛ.

²⁹ Kà ɓɛ́ zaa muà ḿ dúún wáɖáùn wɛ̃ɛ ní, nìí, ɖɛ́ kɔ̃̀ jè ní vɔ̃à ḿ mìɔùn bìì pídyiɛ́?

³⁰ Kɛbì ḿ mɛ dèɖèìn sùǐ, ɓɛ́ ḿ kéɔ́ má xwai dèɖè nɔ̀mɔ̀ dyíin nyɛɛ,

³¹ Gèɖèpɔ́ɔ̀ muɔ́ má ḿ mɛ-ɓì ɖò mú poùn, ké dɛ̃ muɔ́ má ní mú-po-ɖɔ̀ ɓěɔ̀ nyuùn ɓó ní jè.

³² Gèɖèpɔ́ɔ̀ se nì kà nyɔǔn-dyù nìà kɛ, ɓɛ́ ḿ ké ɔ gɔ̃̌ jǔ, mɔɔ ɓɛ́ ḿ kè ɔ ké zaa zi ɖé zaa-wɔ̃-pòìn-naín.

³³ Nyɛ́ ɖá nyɔ ɖò nìɔ̌ má ɓɛ́ ɔ kéɔ́ má ɓó ḿ kè Gèɖèpɔ́ɔ̀ pṹa pa, ɓɛ́ ɔ kéɔ́ má à zaa wɔ̃ po kɛ́?

³⁴ Ɔ mɔ̀ nyɔ ɓɛ́ ɔ kéɔ́ má ḿ Gèɖèpɔ́ɔ̀ nyɔ-ɓàɖàìn-ɓà-cùɔ̀ ḿ kɔ̃ún zà, ɓɛ́ ɔ díɖíɔ̀ kéɔ́ ḿ taɓaa ɓɔ́ kɛ.

³⁵ Ɔ dyiɔ́ ná nìǐn, ní muɔ́ wùɖùùn, ké ḿ seɔ́ má fɛ̃̀ǐn mu. Kɛɛ ɓó kàǔn wɛ̃ɛ, ḿ seɛ nyuɛ ɓɛ́ìn.”