Jóɓò 8 - Ɓǎsɔ́ɔ̀ Báɓòɔ̀

Ɖɛ Bíódà cɛ̃ ma kɛɛ kɛà kɛ̀

¹ Ti ɓɛ́ Jóɓò dè ma wuɖu dyiɛɛ, Bíódà mɔ̀à Súwà-nyɔ̀ɔ̀ kɛɛ zà ma ɖé wuɖu, ké ɔ ɖá,

² “Ti jĩ̀ xwɛ̌ nì mu wuɖu fóɖóún cɛ̃ìn ke kà pìɔ̌ dyià kɛɛ́?

³ Nì hwòɖǒ ɖá Gèɖèpɔ́ɔ̀ mɔ̀ dyí-sɛ́ɖɛ́ìn-ɖɛ̀-hwìǐ-zàìn-nyɔ̀e? Nì hwòɖǒ ɖá kpé-séín-ɓéɖé-Gèɖèpɔ́ɔ̀ ní nyu ɖɛ sɛ́ɖɛ́ìn dyíɛe?

⁴ Nì dyú ɓěɔ̀ ɖǎ Gèɖèpɔ́ɔ̀ nàmàǔn bũ̌ nyu. Ɔ jèɛɛ, ɔ dyà gǎ ɓá nàmàǔn wa ɖǎ nyuɛɛ jè dyíɛɛ wa kɔ̃.

⁵ Kɛɛ ɓó kàǔn wɛ̃ɛ, m̀ dyi ɖé Gèɖèpɔ́ɔ̀ mɔ̀à Kpé-séín-ɓéɖé-nyɔ̀ɔ̀ kɛɛ gbo gmɔ̀ìn, ké m̀ dyi ɔ ɓaà,

⁶ ké m̀ mìɔùn dyi mú hwɛ̀, ké m̀ dyi dyí sɛ́ɖɛ́ìn ní, nìí, Gèɖèpɔ́ɔ̀ mu dyí sɔ̀ùn ɓó m̀ bìì, ɓɛ́ ɔ ké nì taàɔ̀ po ɖe, ɓɛ́ ɔ ké nì pɛ́ɛ̀-ɖɛ̀ jǔ.

⁷ Ké nyɔ m̀ jǔ ma kĩ́ín nyɛɛ se nyɔ nì mu jǔùn ɖé dyúa kɛɛ ɓo kɔ̃ dyáa mu.

⁸ “Ní ɓaà m̀ ní, poìn ti sùà ɓě ɖǎ dyi ziɛɛ jè hwìɖǐi, ɓɛ́ m̀ ké fɔ̀nɔ̀-hwòɖǒ ɓɛ́ ɓɔ̌ɔ̀ ɓě dyéó zɔ̃̌ɔ̀ da kɛɛ dyé.

⁹ Sepóɛɖé à se ɖɛ ɖò dyuò, ké fɛ̀ɛ̀ ɓɛ́ à cĩ́ dà toɖo-kpàà kɔ̃ɛɛ xwã́ ɓoún mìɔ. Ɔ pa dyi kà gbǒ-dyéɖéín-zùù nìà kɛ.

¹⁰ Má, hwòɖǒ-fɔ̀nɔ̀-nyɔ̀ sùà ɓěɔ̀ mu m̀ ɖɛ tɛ̀mɛ̀ìne? Má, wa mu m̀ fɔ̀nɔ̀-hwòɖǒ-wùɖù ɓě gbo cɛ̃ìne?

¹¹ “Má, tòǒ se dɛ̀ ɓɛ́ bàɖà se nìɛɛ mɛɛ ɓɛ́ìne? Má, sɛ́-sɛ́-kpìì se dɛ̀ ɓɛ́ ní se nìɛɛ mɛɛ ɓɛ́ìne?

¹² Kɛɛ níɔ̀ ɓó dyi maa nyɛ̀nɛ̀ɛ̀ ní, wa mɔ̀ kĩ́ín-kĩ́ín-ɖɛ̀ se ku, ké wa mɛ́ ɓó dyi.

¹³ Kǎà ɔ nyu nìɛ̀ ɓá nyɔ ɓě ɓɛ́ wa seà Gèɖèpɔ́ɔ̀ ti ɓéɖéɛɛ jè dyí. Nyɔ ɓě ɓɛ́ wa nyɛ́à Gèɖèpɔ́ɔ̀ múɛɛ, waà hwòɖǒ-kɔ̃-dè-ɖɛ̀ɔ̀ mu mú gbɔɔ̀ùn.

¹⁴ Waà hwìɖǐǐ-taɓa-ɖɛ̀ɔ̀ se wa dyíi dyi kpɔ̃ɔ ɓɛ́ìn. Waà hwòɖǒ-kɔ̃-dè-ɖɛ̀ɔ̀ hwɔìn sãà-dɛ̃̀.

¹⁵ Wa dyi waà sãà-dɛ̃̀ɔ̀ mú tè ní, ɔ ɓɛ́ìn wa dyií dyi kpɔ̃ɔe? Wa dyi sãà-dɛ̃̀ɔ̀ ɖúú dyúáɖò xwaún ɓá ní, ɔ se cɛ̃̀ɛ̌ mue?

¹⁶ “Nyɔ ɓě ɓɛ́ wa seà Gèɖèpɔ́ɔ̀ dyí dyuòɛɛ nì kà pìǐ ɓɛ́ ɔ bũà dyiɛɛ nìà kɛ. Ɔ hwɔìn pìǐ nyìnììn dyíin ɓɛ́ ɔ bũ ɖé ɓáá-ɖɛ̀-gbǎ ɖò mú dyiɛ.

¹⁷ Ɔ gmɛ̀nɛ̀ɛ̀ ɓěɔ̀ bĩìn sɔ́ɔ́-kpò ɓěɔ̀ dyi, ké wa ku hwuɖui ɖé sɔ́ɔ́ ɓěɔ̀ hwìɛ̀.

¹⁸ Kɛɛ m̀ dyi ɔ hwuɖu zà ní, ɔ páɔ̀ kpá fóɖóún, ké nyɔ ɖò seɛ dyí dyuòɛ̌ mu kà ɔ nì ma ɓó kĩ́ín nyɛ.

¹⁹ Kǎà nyɔ ɓě ɓɛ́ wa seà Gèɖèpɔ́ɔ̀ dyí dyuòɛɛ nììn múàɔ̀ sèìn-naín nyu nìɛ̀. Sɔ̀ìn ɓóɛ gboɛɛ ní, nìí nyɔ kà kò ɖò dyi, ké ɔ ɖú wa nììn páɔ̀ dyí.

²⁰ “Gmɔ̀ nɔ̄, Gèɖèpɔ́ɔ̀ ní po nyɔ kɔ̃̀ cĩ́-cĩ́ se kɛɛ ɖò ɓéɖéɛɛ xwáɖáún, mɔɔ ké ɔ ní po ɖɛ-gbà-nyu-nyɔ̀ ɖò kpéí.

²¹ Ɔ muɛ nyuùn ɓɛ́ dyɔ́ ké m̀ wĩín nì ɖe, ɓɛ́ m̀ ké múà-kùɖǔ-kuɖu nyu.

²² Kɛɛ nyɔ ɓě ɓɛ́ wa nyɛ́à m̀ múɛɛ, dɛ̃ mu wa kɔ̃in ɓáìn. Ké hwòɖǒ-kɔ̃in-nyìnììn-nyɔ̀ ɓěɔ̀ se taún ɖò kɔ̃̀ɔ̌ mu ɖe.”