Jóɓò 7 - Ɓǎsɔ́ɔ̀ Báɓòɔ̀

¹ “Nyɔǔn-dyùɛ̀ cĩ́ fɛ̀ɛ̀ ku wɔ̃ nɔ̄ toɖo-kpàà kɔ̃ pū, kà nyɔ ɖò nyuà gana-kũ̀à ɓó nyɔ ɖò bììɛ.

² Ɔ kè gǐì ɓɛ́ ɔ nyuà kũ̀à gana-kà ké ɔ nì fòèɛ̌n ɓɛ́ dyóɖó kéà zi, ɓɛ́ ɔ kéà zùzùɔ̀ mú sɔ̀ɛɛ hwɔìn ní. Ɔ nì kà pɛ́ɛ̀-kũ̀à-nyu-nyɔ̀ ɓɛ́ ɔ nì hwìo fòèɛ̌n ɓɛ́ ɔ kéà ɔ pɛ́ɛ̀-ɖɛ̀ɔ̀ dyéɛɛ nìà kɛ.

³ Kà dyúáɖòɔ̀ kǎà ní cĩ́-cĩ́ɔ̀ mɔ̀ ɖɛ fóɖóún ɓó dɛ̀nɛ̀ kè dɛ̀nɛ̀ xwíníín, ké máaún-hwùɖù séín dyà ḿ wìì kɔ̃ kánáá pū.

⁴ Hwuɖu dyi hwɔ, ké ḿ dyi dyi pɛ̃́ ní, mɔ́ún mɔ́. Ḿ ɖá, ‘Tiɔ̀ nyɛ́ zɔ̃ muá zɔ̃ùn, ɓɛ́ nyɔ ké dyí sɔ̀ɛ́?’ Kɛɛ dyéɛ, gǎ-dyé-hwùɖù tɔ̀mɔ̀ ɓoún mìɔ, ké ḿ gã̀ xwa cɛ́ɛ̀ǐn dyi tee ké zɔ̃ zɔ̃.

⁵ Ní kpóɖó-dyùàɔ̀ kpá nimiìn mú, ké ní dyɔɔ̀-kùɔ̀ kpá níín, ké zɛ̀nɛ̌ dyíɛ mú, ké ɔ gè, ké ní jě ɓěɔ̀ ɖú ní mú sɔ̀ kpàǐ.

⁶ Ní wé ɓěɔ̀ zi wàɖà-wàɖà mìɔ ké ɔ zi kà ɖɔ-ɖaɓa-nyɔ̀ɔ̀ ɖɔ-ɖàɓàìn-ɖɛ̀ɔ̀ zĩ̀àìn dyèě wàɖà-wàɖà kɛɛ dyí. Ní fɛ̀ɛ̀-wè ɓěɔ̀ nì ziɛń, ké ḿ se hwòɖǒ-po-naín kɔ̃̀.

⁷ “Óó Gèɖèpɔ́ɔ̀, ɔ mɛ nì m̀ hwìɖǐi kà ní fɛ̀ɛ̀ɔ̀ nì kà fɛ̀ɛ̀ ɓɛ́ nyɔ zàà kɛɛ nìà kɛ. Ḿ se múà-ɖɛ̀ ɖò dyéɖéí dèɛ̌ mu ɖe.

⁸ M̀ nì ḿ dyéɛń ɓó kàǔn, kɛɛ m̀ se ḿ dyéɛ mu ɖe. Nì mu ḿ dyi mɔ́ùn, kɛɛ nìí, ḿ ɖǎ mu.

⁹ Kà ɓɛ́ ní-kpòɔ̀ cɛ̃̀à ɖé dyií dyi ɓɛ́ ɔ dyià ɖé dyi pa kɛɛ, kǎà nyɔ ɓɛ́ ɔ mu ɖé xwɛ́-ɓìɔ̀ múɛɛ jè nyu nìɛ̀. Ɔ ní dyi ɖe.

¹⁰ Ɔ se ɔ ɓíɖí-taún ɖe dyiɛ́ mu ɖe, mɔɔ ké ɔ jè se nyɔ ɓě dyuò ma ɔ dyíɛɛ hwìɖǐi nìɛ̌ mu ɖe.

¹¹ Ɔ jèɛɛ, ḿ se ní wɔ̃ɔ̀ kãá mu. Ní mu wùɖùùn kà ní hwòɖǒɔ̀ nɛɛ̀ kà kɛ. Ní mu ní ka-ka séínɔ̀ púèìn.

¹² “Óó Gèɖèpɔ́ɔ̀, mɔ̄ mɔ̀ dyóóɔ̀ mɔɔ dyóún-ɖɛ̀ vɛ̀nɛ̀ nyìnììn kpeɖeín, ɓɛ́ m̀ kéà ḿ dyéɖé gbo dè, mɔ́ún kɔ̃̀ ɖà ɖɛ gbà ɖò nyu jèɛɛ̀?

¹³ Ḿ dyiɛ cɛ̃, ké ḿ dyi níiń, ‘Ní gbɛɔ̀ muɛ nyuùn ɓɛ́ ní bũ̌in-puà-puàɔ̀ ké kɔ̃ sɔ̀, ɓɛ́ ḿ ké fɔ̀o’ ní,

¹⁴ m̀ po ḿ fã̀àǔn dyììn ɖé dya-dya ɓě mú. M̀ nyuɛ ké dyí-tɛ̀mɛ̀ìn-ɖɛ̀ ɓě tàɓàìn ḿ díɖí.

¹⁵ Ɔ muɔ́ má dyíin nɔ̀mɔ̀ùn ɓɛ́ m̀ kéɔ́ má ḿ bùnù dyi pàɖàìn, ɓɛ́ ḿ kéɔ́ má mɛ́, ké ɔ zi ɓɛ́ ḿ ké kpá záɖáá jǔɛɛ dyí.

¹⁶ Ḿ ɖǎ cĩ́-cĩ́ dyí sa. Ḿ se toɖo-kpàà kɔ̃ sèɛ̌n dyi. Táà ḿ dyi. Ní cĩ́-cĩ́ɔ̀ se xwíníín ɖò kɔ̃̀.

¹⁷ “Gèɖèpɔ́ɔ̀, m̀ kàmà nyɔǔn-dyù jè cá wà! Nyɔǔn-dyù jè kpɔ̃ m̀ hwòɖǒ mìɔ cá wà!

¹⁸ M̀ gmɔìn wa jè múin ɓó gànà-kṹún ti séín, ké m̀ dɔ̃̌ wa jè mú ɓó ti séín.

¹⁹ M̀ se wɛ́ɛ ḿ dyéɖé bũ̌ zàǎ mu, mɔɔ ké m̀ se wɛ́ɛ ḿ dyi táǎ mu, ɓɛ́ ḿ ké tɔ̃ɔ mana ɖɛ wèè?

²⁰ Mɔ̀ mɔ̀à nyɔǔn-dyù dyéɖé-gbo-dè-nyɔ̀ kɛɛ, ḿ dyiɔ́ nàmàǔn nyu ní, ɖɛ́ ɔ nyu m̀ bũ̌ kɛ́? Ɖɛ́ kɔ̃̀ jè m̀ nyuà ḿ nì zò múɛ́? Ɖɛ́ kɔ̃̀ jè ḿ mɔ̀à kà gbɛ̌ ɓɛ́ ḿ dyià m̀ ma kɛ́?

²¹ Ɖɛ́ kɔ̃̀ jè mɔ̀ǔn zĩ̀ìn ní nàmàǔn ɓěɔ̀ kɔ̃in nyɛ́? Ɖɛ́ kɔ̃̀ jè mɔ̀ǔn zĩ̀ìn ní ɖɛ-xwa-bĩ-bĩ ɓěɔ̀ kɔ̃in nyɛ́? Sepóɛɖé ɔ nìǒ kpã́ún ní, ní mu ɖé xwɛ́-ɓìɔ̀ mú dyi pɛ̃́ìn. M̀ dyi ɓó ní páɔ̀ mú gmɔ̀ ní, m̀ se ɓó ḿ dyéɛ mu ɖe.”