Jóɓò 6 - Ɓǎsɔ́ɔ̀ Báɓòɔ̀

Jóɓò zà ɖé wuɖu

¹ Hwɛ̀ ké Jóɓò zà ma ɖé wuɖu, ké ɔ ɖá,

² “Nyɛ́ ɖá wa poɔ́ má ní wìì-ɖɛ̀ ɓěɔ̀ pṹá kɔ̃ kɛ́? Nyɛ́ ɖá wa dɔ̃̌ɔ̌ má ní fũ̀à-fṹá-ɖɛ̀ ɓěɔ̀ xwa kɛ́?

³ Wa muɔ́ má xwa kuùn, ɓɛ́ wa kéɔ́ má pĩ́ɔ nìà dyóóɔ̀ wĩin nyɛɛ dyí zi. Ɔ kɔ̃̀ jè ḿ zàà ɖé gana-wùɖù kɛ̀.

⁴ Kpé-séín-ɓéɖé-Gèɖèpɔ́ɔ̀ ɖǎ ɔ sé-kpìì ɓěɔ̀ ḿ mú po, ké waà cɛ̃́ɔ̀ ɖǎ ḿ dyɔún dyi gbɛ̀ìn. Gèɖèpɔ́ɔ̀ ɖǎa nyu ké díɖí ɖǎ ḿ kɔ̃ kpɔ̃ mìɔ.

⁵ “Má, jǎkasì nì ɖé xwáɖá xwíɖíiɛɛ dyi ɖii-pìǐ dyé ní, ɔ ní wùɖùe? Má, ɓìɖǐ dyi ɖii-ɖɛ̀ ɓéɖé ní, ɔ ní wùɖùe?

⁶ Nyɔ ɖò se ɖii-ɖɛ̀ ɓɛ́ ɔ se těè-těè nìɛɛ tɔ̃́ gbo po ní, ɔ ɓɛ́ìn nyɔɔ̀ wĩin ɖéèɛ̀e? Sòò-gɛ̃̀ɔ̀ wáká púúɔ̀ ɖòùn ɖéè níe?

⁷ Ɖii-ɖɛ̀ nì ná ɓěɔ̀ kɛɛ ɖi-tò se ḿ nyu, ké ɖii-ɖɛ̀ ɓě nìà kɛ nyuɛ ké ḿ wɛ́.

⁸ “Nyɛ́ ɖá Gèɖèpɔ́ɔ̀ jǔɔ́ má ní ɓaà-wùɖùɔ̀ gɔ̃̌ kɛ́? Nyɛ́ ɖá ɔ nyíɔ́ má ḿ ní hwòɖǒ-kpɔ̃-ɖɛ̀ɔ̀ kɛ́?

⁹ Ní hwòɖǒ-kpɔ̃-ɖɛ̀ɔ̀ mɔ̀, ɓɛ́ Gèɖèpɔ́ɔ̀ ké wɔ̃́ ɓɛ́ ɔ ké ḿ dyi wàìn. Ɔ mɛ pɛ́ɛ̀ ɔ sɔ̃ɔ̀, ɓɛ́ ɔ ké ɓó ḿ hwìǐ zà.

¹⁰ Ɔ dyiɔ́ wɔ̃́ ɓɛ́ ɔ kéɔ́ máa nyu ní, ní muɔ́ múàǔn kpáùn, ɓɛ́ ḿ kéɔ́ dyií dyi wãìn. Ḿ seɔ́ má ɖé kɔ̃̀ bũ̌in-puà-puà jĩ̀ kà nìɔ̌ má ɖé ní kpóɖó-dyùàɔ̀ múɛ. Sepóɛɖé ḿ se ɖɛ ɓě ɓɛ́ Mú-hwɛ̀-nyɔ̀ɔ̀ cɛ̃ kɛɛ ɖò gbo nɔ́ɔ̀.

¹¹ Kpéɔ̀ nyɛ́ nì ḿ dyí ke, ɓɛ́ ḿ kéà cĩ́ɛń nì keɛ́? Ɔ jǔ ké ḿ se hwòɖǒ-po-naín ɖò ɓéɖé ní, ɖɛ́ kɔ̃̀ jè ḿ kéà toɖo kɔ̃ nì keɛ́?

¹² Ḿ kùmù kà sɔ́ɔ́ nìà kɛe? Ní fɔ́ɔ̀ kùmù kà bàɖàsǐ nìà kɛɛ̀?

¹³ Kpé ɖò se ḿ mú nì, ɓɛ́ ḿ ké ḿ mìɔùn gbo kpáa ɓɛ́ìn. Dà ɖò se nì ɓɛ́ ḿ ké gmɔ̀ìn ɓó gbo-kpá-kpá jè.

¹⁴ “Kɛbì ḿ mɛ seɔ́ má kpé-séín-ɓéɖé-Gèɖèpɔ́ɔ̀ dyi fɛ̃̀ìn nyɛɛ, ti ɓɛ́ ḿ nìà fũ̀à-fṹá-tìɛ̀ múɛɛ, ní mɔ́ ɓǎto ɓě ɓɛ́ wa ɖɛ̀ɓɛ̀ ḿ mú kánáá pūɛ.

¹⁵ Kɛɛ ɓě mɔ̀ɔ̌ má kà ní ɓǎto ɓěɛɛ, ɓě se hwòɖǒ-kɔ̃-dè-nyɔ̀. Ɓě nì kà ní-dyù ɓɛ́ ní seà ɖaɓauń nì ɖe nyɛ̀nɛ̀ɛ̀ ní ɔ maà ɓó dyiɛɛ nìà kɛ.

¹⁶ Ní-tìɔ̀ ɓaɖa ní, ní-dyùɔ̀ dyí ní.

¹⁷ Kɛɛ dyóɖó-bà-ɓàɖà ní, ní-dyùɔ̀ ma ɓó dyi, ké ní-dù fóɖóúnɔ̀ sè ɓó.

¹⁸ Sǒ-nì-gbu-kɔ̃ún ɓě kè waà kɔ̃ún-kò-nyɔ̀ ɓěɔ̀ pàìn ɓó ní-dyùɔ̀ gbo ɖé gbǎùn-fúɖúáɔ̀ kɔ̃, kɛɛ wa se ɓó ní ɖò dyi dyɛ̀ìn. Wa gã̀ náá-nì dyi mɔ́uń dyi tee ɖé gbǎùn-fúɖúáɔ̀ kɔ̃, ké wa sè xwáɖáún, ké wa mɛ́ìn ɖé.

¹⁹ Sǒ-nì-gbu-kɔ̃ún kɔ̃ún-kò-nyɔ̀ kúɖúú ɓě sɔ̀à ɖé Témà kè Síɓà-hwɔ̀ɖɔ̀ ɓěɔ̀ mú, ɓɛ́ wa dyuòà gbǎùn-fúɖúáɔ̀ jèɛɛ mu ma ɖé ní-dyùɔ̀ gbo ɖekè.

²⁰ Kɛɛ ti wa nyini ma ɖéɛɛ, waà hwòɖǒ kpá ma ɖé ɖei, sepóɛɖé wa dèɔ̌ máa hwòɖǒ kɔ̃ kà wa muɔ́ má ɖé ní dyi dyɛ̀ìn nyɛ.

²¹ Kǎà ɓě nyu nìɛ̀ ɓá ní jè dyí. Ɓě dyé ní gǎ-dyé-dyé vɛ̀nɛ̀ɔ̀, ké ɓě jiɖi ɖe.

²² Ḿ cɛ̃ɛ ɓě gbo, ɓɛ́ ɓě ké ḿ nyíí-ɖɛ̀ ɖò dyàà, mɔɔ ɓɛ́ ɓě ké nyɔ ɖò nyɔ-gbo-pa-wìɖì nyí ɓá ní jè dyíì?

²³ Ḿ cɛ̃ɛ ɓě gbo, ɓɛ́ ɓě ké ḿ póìn sɔ̀ìn ɖé ní gbo-vɔ̃-nyɔ̀ ɓě xwaúne, mɔɔ ɓɛ́ ɓě ké wíɖí-kpò ɖò nyɔ-dyi-pĩ́à-nyɔ̀ ɓě dyéɖéín pɛ́ɛ̀ ɓó ní gbǎà jèe?”

²⁴ “Ɓó kàǔn wɛ̃ɛ, ɓě tɛ̀mɛ̀ìn ḿ ɖɛ, ké ní mu gìɖìǐ nììn. Ɓě zàìn ḿ dɛ̀ ɓɛ́ ḿ bĩ̀àìn ɖɛ xwa kɛɛ da.

²⁵ Jǎà-wùɖù ɓě puà nyɔ, kɛɛ ɓěɛ̀ ɖɛín-zà-zà ɓěɔ̀ se xwíníín ɖò kɔ̃̀.

²⁶ Ɓěɛ̀ hwòɖǒ ɖá ɖɛ ɓě ɓɛ́ mɔ̄ kɔ̃̀ hwòɖǒ kpáà ɖé ɖeiɛɛ nìà wùɖùɛ̌n nyɛɛ se fɔ̀nɔ̀-hwòɖǒ ɖò mú nì. Kà ɔ nìà náa, nìí, xwɛ̌ ɓě ɓɛ́ìn ḿ ná sɛ́ɖɛ́ìn dyí mú poɛ kɛ́?

²⁷ Ɓě ɓɛ́ìn xwíè-dyù gǐì mú kɔ̃̀ jè gáá mú vɔ̃ɔ, ké ɓě ɓɛ́ìn ɓě ɓǎto kpáná kɔ̃ún poɛ, ɓɛ́ ɔ ké ɓě bã̀ìn.

²⁸ Ɓó kàǔn wɛ̃ɛ, ɓɔ̌ɔ̀ ɓě, ní ɓaà ɓě ní, ɓě gmɔ̀ ḿ dya, ɓɛ́ ɓě ké ḿ dyé. Ɓěɛ̀ hwòɖǒ ɖá ḿ nì ɓě se wĩin tɔ́mɔ́ǐn cáe?

²⁹ Ɓě ɓɔ́ ḿ zaa kpɔ̃̀ìn ɖe, sepóɛɖé ɖé ḿ ɓíɖí ɓɛ̀ɖɛ̀ìn dyí.

³⁰ Ɖɛ gbà ɖò nì ḿ wĩíne? Ɓěɛ̀ hwòɖǒ ɖá ḿ se ɖɛín-ɖɛ̀ ɔ kè ɖɛ gbà zaìn gboi dyí dyuòe?