Jóɓò 5 - Ɓǎsɔ́ɔ̀ Báɓòɔ̀

¹ “Jóɓò, ɖá ɓó kàǔn dɔ̃̌ùn, ɓɛ́ m̀ kéɛ dyé kɛbì nyɔ ɖò mu m̀ gɔ̃̌ jǔùn ní. Ínjà ɖò nìǐn ɓɛ́ m̀ ké gbo gmɔ̀ìne?

² Dyoɖoɛ̀ ɖáɓá zuɖuu-nyɔ̀, ké hwɛ̀nɛ̌ɛ̀ ɖáɓá nyɔ se hwòɖǒ fɔ̀nɔ̀ɛ.

³ Ḿ ɖǎa dyé ké zuɖuu-nyɔ̀ ɖǎ gmɛ̀nɛ̀ɛ̀ kpa. Kɛɛ wàɖà cá kɛɛ, gboò-wùɖù nì ma ɔ cĩ́-naínɔ̀ cá.

⁴ Pó-pó se ɔ dyú ɓěɔ̀ ɖò bìì nì. Nyɔ ké waà kɔ̃-zàà zi ɖé zaa-wɔ̃-pòìn-naínɔ̀ kɛɛ ɖò se nì.

⁵ Nyɔ ɓě ɓɛ́ mɔ́ nyuɛɛ ɖi ɖii-ɖɛ̀ ɓɛ́ zuɖuu-nyɔ̀ɔ̀ bã̀ìn nyɛ, hwɛ̀ ḿ po níiń, ɔ nyɔ ɓě ɓɛ́ wa nì ɖé wí-gbǎ múɛɛ ɖekè. Waà hwòɖǒ nì pá-pá nyuɛń ɓó zuɖuu-nyɔ̀ɔ̀ kɔ́mɔ́-ɖɛ̀ ɓěɔ̀ jè, kà ní-ná-tò dyià nyɔ ɖò nyu mìɔ ní ɔ hwòɖǒ nyuà pá-pá kɛ.

⁶ Gǎ-dyé-dyé ní sɔ̀ ɓóɖóún, mɔɔ ké fũ̀à-fṹá ní mɛ ɖé ɓóɖóún kà ɓáá-ɖɛ̀ mɛà kɛ.

⁷ Kɛɛ fũ̀à-fṹá-ɖɛ̀ dyi nyɔǔn-dyù kɔ̃ kánáá pū sɔ̀ìn ɖé ɔ wóɖó-tìǐn, kà nyɛɛ̀ ɖo-dyùà muà dyiíɛ.

⁸ “Kɛɛ ɔ dyiɔ́ mɔ́ún jǔǐn, ní muɔ́ má Gèɖèpɔ́ɔ̀ kpéi pòìn. Ní muɔ́ má ní zaaɔ̀ Gèɖèpɔ́ɔ̀ xwaún dyi poùn.

⁹ Ɔ nyu ɖɛ vɛ̀nɛ̀-vɛ̀nɛ̀, ké wa jè se kɔ̃in zaìn ɓɛ́ìn. Dĩ́ín-dĩ̀ìn-ɖɛ̀ ɓě ɓɛ́ ɔ nyuɛɛ se zɛɖɛɛ ɓɛ́ìn.

¹⁰ Ɔ nyuɛ ké ní ɖaɓa nɔ̄ ɓóɖó-kpàà kɔ̃. Ɔ nyuɛ ké ɓáá-ɖɛ̀ ɓě nì ɖé geɖe ɓěɔ̀ gboɛɛ dyé ní.

¹¹ Ɔ ɖú nyɔ ɓě ɓɛ́ wa nì ɓíɖíiɛɛ dyií, ké ɔ nyuɛ ké nyɔ ɓě ɓɛ́ wìì dyíìn múin nyɛɛ kpá múàǔn ɖe.

¹² Ɔ cá sɛ́ɖɛ́-kɔ̃̀-nyɔ̀ ɓěɔ̀ dyí-sɔ́-ɖɛ̀ ɓěɔ̀ kɔ̃in, ké waà sɔ̃ún-kpa-ɖɛ̀ ɓěɔ̀ se kpáná ɖò gbo wóɖó.

¹³ Ɔ kpɔ̃̀ìn hwòɖǒ-fɔ̀nɔ̀-nyɔ̀ ɓěɔ̀ ɖé wa mìɔùn nììn sɛ́ɖɛ́-po-poɔ̀ mú, ké waà dyí-sɔ́-ɖɛ̀ ɓěɔ̀ se kpáa mu.

¹⁴ Ɓó dyóɖóaún ní, tíe-kpò kpɛ̃̀ kpɔ̃ wa dyéɖé kɔ̃in, ké wa ɓɛɛ̀ dyi ɓó dyóɖóaún sá-sá kà nyɔ kéɔ́ kà dyi ɓɛɛ̀ ɓó máaún wɛ̃.

¹⁵ Kɛɛ Gèɖèpɔ́ɔ̀ póìn gǎ-dyé-nyɔ̀ ɓěɔ̀ sɔ̀ìn ɖé nyɔ-ɖɛ-gbà-kɔ̃ún-cɛ̃-nyɔ̀ ɓěɔ̀ xwaún. Ɔ póìn wa sɔ̀ìn ɖé nyɔ-dyi-pĩ́à-nyɔ̀ ɓěɔ̀ xwaún.

¹⁶ Ɔ nyuɛ ké gǎ-dyé-nyɔ̀ ɓěɔ̀ ɖǎ hwòɖǒ-po-naín ɓéɖé, ké hwòɖǒ-kɔ̃in-nyìnììn-nyɔ̀ ɓěɔ̀ wɔ̃ ɖǎ kã̀.

¹⁷ “Gmɔ̀ nɔ̄, mana nì nyɔ ɓě ɓɛ́ Gèɖèpɔ́ɔ̀ zà kpeɖeɛɛ kɔ̃. Ɔ jèɛɛ, kpé-séín-ɓéɖé-Gèɖèpɔ́ɔ̀ dyi m̀ kpeɖe zàǔn nìǐn, mɔ̀ǔn ɖá ɓɛ́ m̀ kéɛ gbo nɔ́ɔ̀.

¹⁸ Bounɓoɔ̀ puà nyɔ dyɛo, kɛɛ wɛ̃́ɛ́ kɛɛ, ɔ po puà-bɛ̃̀ ɓěɔ̀ kũùn dyí. Ɔ sɔ̃ɔ̀ puà nyɔ bũ̌in dyɛo, kɛɛ ɔ sɔ̃ɔ̀ mɔ̀ nyɔ-dyi-kánáìn-nyɔ̀.

¹⁹ Ɔ mu m̀ fũ̀à-fṹá-ɖɛ̀ xwaún póìn ɓó ti kè ti mú. Ɔ se m̀ dyi táǎ mu, ɓɛ́ ɖɛ gbà ɖò ké m̀ gbo kpá fɔɔ cá.

²⁰ Mɔ́ dyi kpá ní, ɔ mu m̀ dyí gmɔ̀ùn, ɓɛ́ mɔ́ɔ̀ ké se m̀ ɖáɓá. Ké to dyi kpá ní, ɔ mu m̀ gàsíàɔ̀ xwaún póìn.

²¹ Ɔ mu m̀ póìn sɔ̀ìn ɖé nyɔ-ɖɛ-gbà-kɔ̃ún-cɛ̃-nyɔ̀ ɓěɔ̀ xwaún, ké ti ɓɛ́ mú-gbɔɔ̀-gbɔɔ̀ mu dyiìn nyɛɛ, m̀ se fɛ̃̀ǐn mú.

²² Mú-gbɔɔ̀-gbɔɔ̀ dyi dyi, ké mɔ́ dyi kpáín, nì mu kéɛ̀ìn ɓó tia ɓaɖa. Ké m̀ se fã̀à ɖò peɖeɛ́ mu ɓó xwáɖá-xwíɖíi-nìmìì ɓěɔ̀ jè.

²³ Sɔ́ɔ́ se ɖé nì geɖe ɓěɔ̀ gbo nìɛ̌ mu. Ké xwáɖá-xwíɖíi-nìmìì ɖò se m̀ gbo vɔ̃ɔ́ mu.

²⁴ Nìí, nì mu ɖé m̀ ɓíɖí-taún cĩ́ìn ɖé gìɖìǐ mú. Ké m̀ dyi nì nyúà-ɖɛ̀ ɓěɔ̀ zɛɖɛ ní, wa mu dyí gbɛ̌ìn nyɛ̀nɛ̀ɛ̀.

²⁵ Nì xwíníín-dyù ɓěɔ̀ mu dúún zaìn. Wa mu dyí vòùn kà pìǐ nìà ɖé gbǎùn-fúɖúá kɔ̃ɛɛ vòà dyíɛ.

²⁶ Nì mu nyɛìn, ɓɛ́ m̀ ké kùɛ̀ tĩ́ɔún po, hwɛ̀ ɓɛ́ gĩɔ ké m̀ kpa. Ɔ mu nììn pū kà hwítì ɓɛ́ ɔ kɔ́ nɔ̀mɔ̀ dyíin hwɛ̀ ɓɛ́ wa dyiɛ cɛ̃, ɓɛ́ wa dyiɛ dyí-sí-naín kpa kɛɛ nìà kɛ.

²⁷ Jóɓò, à ɖǎ ɖɛ nìà kɛ múin ɖeɛń hwèɖèìn, ké à ɖǎa dyé kà ɔ mɔ̀ jǎà kɛ. Ɔ jèɛɛ, wɔ̃́ɔ múin, ɓɛ́ m̀ kéɛ nì fɛ̀ɛ̀ɔ̀ gboi kpaìn.”