Jóɓò 42 - Ɓǎsɔ́ɔ̀ Báɓòɔ̀

Jóɓò jǔ Bounɓoɔ̀ gɔ̃̌

¹ Hwɛ̀ ké Jóɓò jǔ ma Bounɓoɔ̀ gɔ̃̌, ké ɔ ɖá,

² “Ḿ dyuòɛ̀ dyí kà m̀ ɓɛ́ìn ɖɛ séín nyuɛ kɛ, ké kà nyɔ ɖò se ɖɛ m̀ ɖǎ dyí sɔ́ ɓɛ́ m̀ ké nyuɛɛ ɓɔ́í poɛ ɓɛ́ìn nyɛ.

³ M̀ diè ɖɛi ɖɛ kɔ̃̀ jè mɔ̄ se ɖɛ ɖò dyuò nìà kɛ kéà nì dyí-sɔ́-ɖɛ̀ɔ̀ kɛɛ mú dyéɛ. Ɓɔ̌ɔ̀, ḿ wùɖù ɖɛ ɓě ɓɛ́ ḿ se múin wɔ̃́ɛɛ wà! Wa mɔ̀ ɖɛ ɓě ɓɛ́ wa ɓúá dyai mìɔ ké ní fɔ̀nɔ̀-hwòɖǒ-dyùàɔ̀ se múin wɔ̃́ɔ ɓɛ́ìn nyɛ.

⁴ M̀ cɛ̃ɛ ḿ gbo ɓɛ́ ḿ ké ɖùǔ tò kà m̀ nì wùɖùɛ̌n nyɛ, nìí ɓɛ́ ḿ ké nì dyi-diè-ɖɛ̀ ɓěɔ̀ gɔ̃̌ jǔ.

⁵ Ḿ ɖúó m̀ jè wɔ̃́uń dyíɛ. Kɛɛ ɓó kàǔn wɛ̃ɛ, ḿ ɖǎ m̀ dyéɖéí dè.

⁶ Ɔ jèɛɛ, dɛ̃ ɖǎ ḿ nyu ɓó ɖɛ séín ɓě ɓɛ́ ḿ ɖǎ wùɖùɛɛ jè. Ké ḿ kpá wìǐn mìɔ jèɛɛ, ɔ nyuɛ ké ḿ poà púu-púu kè tĩ́ɔ-pɛ̀ɛ̀ dúiɛ̀.”

Ɖɛ séín ɓá Jóɓò jè dyíɛɛ dúí-jɛ̀ɖɛ̀ìn-naín

⁷ Ti ɓɛ́ Bounɓoɔ̀ ɖǎ ma Jóɓò gbo wùɖùɛ hwɔɛɛ, ɔ cɛ̃ɛ ma Ɛ̀ɖífà mɔ̀à Témàùn-nyɔ̀ɔ̀ kɛɛ gbo, ké ɔ ɖá, “Ḿ kpáìn m̀ kè nì ɓǎto sɔ̃́ ɓěɔ̀ dyoɖoún, sepóɛɖé ɓě se jǎà cɛ̃ ɓá ḿ dyí kà ní gbo-nì-nyɔ̀ Jóɓò nyuà kɛ.

⁸ Ɔ jèɛɛ, ɓó kàǔn wɛ̃ɛ, ɓě ɖú ɓìɖǐ ɓíɔ́ mɛ̀nɛ̌ìn-sɔ̃́ kè ɓáɖáá ɓíɔ́ mɛ̀nɛ̌ìn-sɔ̃́ dyí, ɓɛ́ ɓě ké ɖé ní gbo-nì-nyɔ̀ Jóɓò gbo mu, ɓɛ́ ɓě ké fɔ̃ɔ-sàǎ-zàìn-ɖɛ̀ nyu ɓó ɓě mìɔùn bìì. Ké ní gbo-nì-nyɔ̀ Jóɓò mu ɓě bìì ɓaàùn. Sepóɛɖé ɓě se jǎà cɛ̃ ɓá ḿ jè dyí kà ní gbo-nì-nyɔ̀ Jóɓò nyuà kɛ. Ɔ dyi ná nìǐn, ní mu Jóɓòɛ̀ ɓaà-wùɖùɔ̀ dyi kpɔ̃ùn, ké ḿ se gǎ ɓɛ́ ḿ ɓéɖé ḿ kéɔ́ ɓě kɔ̃ tòɛɛ, ɓě kɔ̃ tòɛ̌ mu.”

⁹ Ɔ jèɛɛ, Ɛ̀ɖífà mɔ̀à Témàùn-nyɔ̀ɔ̀ kɛ kè Bíódà mɔ̀à Súwà-nyɔ̀ɔ̀ kɛ ɔ kè Zófà mɔ̀à Náámà-nyɔ̀ɔ̀ kɛɛ mu, ké wa nyu ɖɛ ɓɛ́ Bounɓoɔ̀ cɛ̃ ma kà wa gboɛ. Ké Bounɓoɔ̀ kpɔ̃ ma Jóɓòɛ̀ ɓaà-wùɖùɔ̀ dyi.

¹⁰ Sɔ̀ìn ɓó ti ɓɛ́ Jóɓò ɖǎ ma ɔ ɓǎto ɓěɔ̀ bìì ɓaà kɛɛ, Bounɓoɔ̀ nyuɛ ké ɔ bã ma ɖe. Bounɓoɔ̀ nyí ma ɔ kɔ́mɔ́-ɖɛ̀ ɓě ɓɛ́ ɔ ɓéɖé ma kà kĩ́ín nyɛɛ dú sɔ̃́ ɖe.

¹¹ Ké Jóɓò ɖíí-gàà kè ɔ ɖíí-màà séín ɓěɔ̀ kè ɔ ɓǎto séín dyuò ma ɔ dyí kĩ́ín nyɛɛ dyi ma ɔ gboi téìn. Ké wa kè ɔ pa ma hwɔ ɖé ɔ gbǒɔ̀ mú. Wa dyi ma ɔ gɔ̃̌ nyíìn, ɓɛ́ wa ké ma ɔ hwòɖǒ dyi dè ɓó ɖɛ gbà jĩ̀ kà ɓɛ́ Bounɓoɔ̀ ɖǎ ma kà ɔ kɔ̃ dyà kɛɛ jè. Ké waà nyɔ ɖò-ɖò séín nyí ma ɔ séɓàɖà-pĩ̀à kè góò-ɖùǔn-po-ɖɛ̀.

¹² Bounɓoɔ̀ po ma Jóɓòɛ̀ cĩ́-cĩ́ɔ̀ wáká ɓɔ́ìn-ɖeɔ̀ mana kɔ̃ mìɔ ké ɔ ziɛ dè gbɔɔ̀ dyí. Ɔ ɓéɖé ma ɓáɖáá táázĩ̀ìn ɓaɖa-bùè sè hĩinyɛ kè sǒ-nì-gbu-kɔ̃ún táázĩ̀ìn mɛ̀nɛ̌ìn-ɖò kè ɓìɖǐ táázĩ̀ìn sɔ̃́ ɔ kè jǎkasì nyɔ́nɔ́ táázĩ̀ìn ɖò.

¹³ Ké ɔ wóɖóìn ma gàa-dyù mɛ̀nɛ̌ìn-sɔ̃́ kè màa-dyù tã ɖe.

¹⁴ Nyɛ́nɛ́ ɓě ɓɛ́ ɔ jǔìn ma ɔ dyú-màà ɓěɔ̀ kɛɛ, wa kɛà kɛ̀. Ɔ màa-dyù kĩ́ín-kĩ́ínɔ̀ nyɛ́nɛ́ mɔ̀ ma Jɛ̀mímà. Ɔ sɔ̃́ nììnɔ̀ nyɛ́nɛ́ mɔ̀ ma Kɛ̀zíà, ké ɔ tã nììnɔ̀ nyɛ́nɛ́ mɔ̀ Kɛ́wɛ̀nɛ̀-Hápù.

¹⁵ Màa ɖò se ma ɓóɖóɔ̀ kɔ̃ nì, ɓɛ́ ɔ ké dyíin nɔ̀mɔ̀, ɓɛ́ ɔ ké Jóɓòɛ̀ dyú-màà ɓěɔ̀ dyɛ̀ìn. Ké wa ɓǎ tò ma wa nììn dúí-sè-ɖɛ̀ ɖé waà ɖíí-gàà ɓěɔ̀ hwìɛ̀.

¹⁶ Sɔ̀ìn ɓó ɖɛ ɓěɛ̀ gboɛɛ, Jóɓò cĩ́ ma zɔ̃ hɔ̃dɛ̀ɖɛ̀ ɖò kè kpáɖá-nyɔ sɔ̃́, ké ɔ kpɔ̃ ma ɔ nyúà-dyú kè nyùà-dyù ɓě, ké ɔ dyɛ̀ìn xwéɖé-dù deìn dúún hĩinyɛ.

¹⁷ Ké Jóɓò mɛ́ ma. Ɔ nyɛ ma mìɔ hwɛ̀ ké ɔ mɛ́ ma.