Jóɓò 41 - Ɓǎsɔ́ɔ̀ Báɓòɔ̀

Bounɓoɔ̀ nì wuɖu kpauń ke

¹ Ké Bounɓoɔ̀ wùɖù ma Jóɓò gbo ɖe, ké ɔ ɖá, “M̀ ɓɛ́ìn dyóún-ɖɛ̀ vɛ̀nɛ̀ mɔ̀à Ɖìváítàùn kɛɛ xwɛ̃ɛ́ dyí zààe? M̀ ɓɛ́ìn ɔ kpã́ wĩín poɛe?

² M̀ ɓɛ́ìn ɔ ɖúú mánáín ɓáa, mɔɔ m̀ ɓɛ́ìn ɔ xwɛ̃ɛ́ ga ɓáae?

³ Ɔ mu m̀ ɓaàùn ɓɛ́ ɔ ké m̀ wuɖu ɓɛ̀ɖɛ̀ɛ̀-ɓɛ̀ɖɛ̀ɛ̀ gbo cɛ̃, ɓɛ́ m̀ ké ɔ wìǐn dyé jèe?

⁴ M̀ kè ɔ ɓɛ́ìn wuɖu ɓíín poɛ, nìí ɓɛ́ ɔ ké nì gǐì jǔ kánáá pūe?

⁵ M̀ ɓɛ́ìn ɔ ɖúú ɓo poɛ, ɓɛ́ ɔ ké nì gbo-nì-màà ɓěɔ̀ pééín-nyùìn-ɖɛ̀ jǔ kà nyɔ nyùìn kà naà-dyù pééín nyɛe?

⁶ Nì hwòɖǒ ɖá zimii-ɖáɓá-nyɔ̀ ɓě ɓɛ́ìn ɔ píɔ́ poɛɛ̀, mɔɔ ɖɛ-peɖe-nyɔ̀ ɓěɔ̀ ɓɛ́ìn ɔ dyi cɛ̃ìn, ɓɛ́ wa ké ɔ peɖeè?

⁷ M̀ ɓɛ́ìn ɔ zimii-ɖáɓáìn-ɖì dú kò-kò ɓěɔ̀ múin taɓaìn mɔɔ ɔ dú fíèɛ̀n ɓɛ́ ɔ ké mɛ́e?

⁸ M̀ dyi ɔ sɔ̃ dya po ní, gbàà ɓɛ́ ɓě mu mú kpáìn nyɛɛ jè se náá m̀ hwìɖǐi sɔ̀ɔ̌ mu, ké m̀ seɛ náa nyuɛ mɔ́ɔ mu ɖe sɔ̃̀ùn-sɔ̃̀ùn.

⁹ “Nyɔ ɖò dyi níiń ɔ ké Ɖìváítàùn toún ɖu ní, ɔ tɔ́mɔ́ se. Nyɔɔ̀ dyi ɔ dyéɖé dya wáɖá nyɛ̀nɛ̀ɛ̀ ní, ɔ mu fɛ̃̀ìn mìɔ.

¹⁰ Kà ɓɛ́ nyɔ ɖò seà gana kè hwòɖǒ-ku-ku nì náa ɓéɖéɛ ɓɛ́ìn ɓɛ́ ɔ kéà Ɖìváítàùn sɔ̃ dya poɛɛ, nìí, nyɛ́ ɓɛ́ìn ɓó ɔ dyúa dyi nyànàà kɛ́?

¹¹ Nyɛ́ ɓɛ́ìn ɔ gbààǔn poɛ, ɓɛ́ ɔ kéɛ xwaún pó kɛ́? Nyɔ ɖò se toɖo-kpàà kɔ̃ nì, ɓɛ́ ɔ kéɛ nyuɛ ɓɛ́ìn.

¹² “Ní mu m̀ Ɖìváítàùn ɓo ɓěɔ̀ jè gbo cɛ̃ìn, ɔ kè kà ɔ nyu kpé ɓéɖéɛ kè kà ɔ nyu ɓɛ́ɛ kɛ.

¹³ Nyɛ́ ɓɛ́ìn ɔ xwɛ̃́ hwɔìn nɛɛ̀-kpà-ɖɔ̀ ɓɛ́ ɔ poà múɛɛ ɔ mú zàà kɛ́? Nyɛ́ ɓɛ́ìn ɔ nɛɛ̀-kpà-ɖɔ̀ deìn mú nìà ɖé gbɔɛɛ fíèɛ̀ kɛ́?

¹⁴ Nyɛ́ ɓɛ́ìn ɔ wɔ̃ ɓɛ́ nyɛ́nɛ́ nì fã̀à ɓě dyíà múɛɛ kaà kɛ́?

¹⁵ Ɖɛ nì ɔ kɔ̃ún wɛ̃ɛ hwɔìn dyí-zĩ̀ìn-ɖɛ̀ ɓɛ́ wa nì dɔ̃̀ǐn múɛ. Wa gmaìn dyí, ké wa kùmù kà sɔ́ɔ́ nìà kɛ.

¹⁶ Wa gmaìn dyí mìɔ cá, ké pìɔ̌ seɛ pṹa dyi ziɛ ɓɛ́ìn.

¹⁷ Wa séínɔ̀ deìn dyí, ké nyɔ ɖò se wa dyí zaìn ɓɛ́ìn.

¹⁸ Ɔ dyi sã́ ní, ce nyu wànà. Ké ɔ dyéɖéɔ̀ fã kà dyóɖó dyi xwáɖáún wóɖó ɓó gànà-kṹún ní ɔ nìà kɛ.

¹⁹ Nyɛ-mìɔ̀ kè ɔ ɖo-dyùà sɔ̀ ɖé ɔ wɔ̃ɔ̀ mú.

²⁰ Nyànà-sò sɔ̀ ɔ máná-ɓìɔ̀ mú tùù, kà nyɔ dyià nyɛ jìà xwíɖíi dyíìn ní, ɔ nyuà ɓúɛ kɛ.

²¹ Ɔ dyi fɛ̀ɛ̀ zà ní, nyɛ kpɔ̃ dyí, ké nyɛ-mìɔ̀ sɔ̀ ɖé ɔ wɔ̃ɔ̀ mú.

²² Ɔ bùnùɔ̀ ɓéɖé gana mìɔ, ké nyɔ kã̀ìn séín ɓɛ́ ɔ kè wa gmɔ̌ìn nyɛɛ, fã̀à dyíìn wa múin.

²³ Ɔ kuɔ̀ dà séín nì kóɖó-kóɖó kà nɛɛ̀-kpà nìà kɛ.

²⁴ Ɔ hwòɖǒ-dyùàɔ̀ kùmù kà sɔ́ɔ́-kpò nìà kɛ. Ɔ kùmù kà ɖɛ-kɔ̃-sũ̀ìn-sɔ̀ɔ̌ nìà kɛ.

²⁵ Ɔ dyi dyí sɔ̀ ní, kpé-ɓéɖé-nyɔ̀ ɓě kpá fã̀àǔn nyɛ̀nɛ̀ɛ̀. Fã̀àɔ̀ nyuɛ ké wa se ɖɛ ɖò nyuɛ ɓɛ́ìn.

²⁶ Kɛbì wa mɛ pòìn ɔ gàsíà kɛɛ, gàsíàɔ̀ se ɔ ɖɛ ɖò bũ̌ nyuɛ ɓɛ́ìn, hwɛ̀ ḿ po níiń, ɖí-dù kò-kò ɓě mɔɔ sé-kpìì ké ɔ ɖɛ ɖò bũ̌ nyuɛ.

²⁷ Nɛɛ̀-kpà hwɔìn mɔɔ́-kpìì ɖé ɔ gbo, ké bàɖàsǐ hwɔìn cu-zɔ̃̀ ɖé ɔ gbo.

²⁸ Ɔ se sé-kpìì ɖò dyúa gbǔɛ ɓɛ́ìn. Wa dyi ɔ bǒ-ɖɛ̀-kpò taɓa ní, ɔ nì pū kà nyɔ wáɖáɔ́ kà nyɔ mɔɔ́-fèɖè dya kɛ.

²⁹ Wa dyi ɔ kpó-kpó-ɓà-cù nàmàìn ní, ɔ nì pū kà nyɔ nàmàìnɔ̌ má kà nyɔ mɔɔ́-kpììɛ. Ké ɔ kéɛ̀ nyɔ ɓě ɓɛ́ wa pòìn ɔ ɖíɛɛ ní.

³⁰ Xwɛ̃́ ɓě nì ɔ xwíɖí kɔ̃ɛɛ námá kà mɛ-dyàà xwɛ̃́ nìà kɛ. Ɔ dyi ɓíɖíi dyi nà ní, wa fá ɓóɖóɔ̀ wɔ̃ kà mɔɔ́-dyí-síìn-ɖɛ̀ nìà kɛ.

³¹ Ɔ nyuɛ ké dyóóɔ̀ púɖú kà jìà dè dyéɖé púɖúà kɛ. Ké ɔ nyuɛ ké dyóóɔ̀ ɖu vúú kà cáná-dyàà ɖuà vúúɛ.

³² Ɔ nyuɛ ké ní-kpóɖó sè ɔ ɖeín, ké vúú nì níɔ̀ kɔ̃ɛɛ nì kà dyùì-dù nìɔ̌ kà kɛ.

³³ Ɖɛ ɖò se toɖo-kpàɔ̀ kɔ̃ nì kà ɔ nìà kɛ. Ɔ se ɖɛ ɖò dyi fɛ̃̀ìn.

³⁴ Nimii séín ɓě ɓɛ́ wa ɓúáìn wa mìɔùn dyíɛɛ ɖò se ɖɛ kpa ɖé ɔ dyéɖéín. Ɔ mɔ̀ xwáɖá-xwíɖíi-nìmìì séín ɓěɔ̀ nììn kã́á.”