Jóɓò 40 - Ɓǎsɔ́ɔ̀ Báɓòɔ̀

Bounɓoɔ̀ nì wuɖu kpauń ke

¹ Ké Bounɓoɔ̀ diè ma Jóɓò dyi ɖe, ké ɔ ɖá,

² “Tiɔ̀ nyɛ́ nì mu mɔ̄ mɔ̀à kpé-séín-ɓéɖé-Gèɖèpɔ́ɔ̀ kɛɛ gbo ɖɛín zàà ɓɔ́ùn wɛ̃́? Ɔ jǔ ké m̀ dyi ḿ ɖɛ dyéɖéín dyi mɔ́ɔ mu ní, jǔ ɖɛ ɓě ɓɛ́ ḿ diè kà m̀ dyiɛɛ gɔ̃̌.”

Jóɓò zà ɖé wuɖu

³ Hwɛ̀ ké Jóɓò jǔ ma Bounɓoɔ̀ gɔ̃̌, ké ɔ ɖá,

⁴ “Ɓɔ̌ɔ̀, ḿ se ɖɛ ɖò kpa. Ɖɛ́ ḿ ɓéɖé ḿ ké m̀ gɔ̃̌ jǔìn nyɛ́? Ní mu ní wɔ̃ɔ̀ kãùn.

⁵ Ḿ ɖǎ ɖɛ kúɖúú cɛ̃, ké ɔ zi ɖɛ ḿ ɓéɖé ḿ kéɔ́ cɛ̃ɛ dyí.”

Bounɓoɔ̀ jǔ Jóɓò gɔ̃̌

⁶ Hwɛ̀ ké Bounɓoɔ̀ jǔ ma Jóɓò gɔ̃̌ sɔ̀ìn ɖé dìì vɛ̀nɛ̀ɔ̀ mú ɖe, ké ɔ ɖá,

⁷ “Nyànà dyi kóɖó-kóɖó, ɓɛ́ m̀ ké ɖɛ ní muà m̀ dyi dièìn nyɛɛ gɔ̃̌ jǔ.

⁸ Nì mɔ́ ḿ se-dyí-sɛ́ɖɛ́ìn-nyɔ̀ mú nyuɛ dyi cáe, nìí ɓɛ́ mɔ̄ ké ɖɛ-gbà-nyu-nyɔ̀ jǔ, ɓɛ́ mɔ̀ mɔ̀ nyɔ ké dyí-sɛ́ɖɛ́ìn-nyɔ̀ jǔe?

⁹ M̀ ɓéɖé gana kà ḿ nìà kɛɛ̀? Nì wuɖuɔ̀ ɓɛ́ìn kpé ɓéɖéɛ kà ní wuɖu nìà kɛɛ̀, nìí ɓɛ́ m̀ dyi wùɖù ní, ɔ ké nì kà dyɔɔ̀ pánáà kɛɛ̀?

¹⁰ Nyuá m̀ mìɔùn nyɔ ɓéɖé dĩ́ín-dĩ̀ìn kè dya-dè-dèɛɛ mú dɔ̃̌ùn, nìí ɓɛ́ nyɔǔn-dyù ké m̀ ɓàìn ɓó nì kã́á-kpèɔ̀ jè.

¹¹ Gmɔ̀ nyɔ ɓě ɓɛ́ wa ɓúáìn wa mìɔùn dyíɛɛ dya, ɓɛ́ m̀ ké nì dyoɖoɔ̀ wa kɔ̃ púè, ɓɛ́ m̀ ké wa ɓíɖíi dyà.

¹² Dyà wa ɓíɖíi, ɓɛ́ m̀ ké hwòɖǒ-kɔ̃in-nyìnììn-nyɔ̀ ɓěɔ̀ dyi wàìn ɓó dɛ̀ wa nyànàà dyiɛ.

¹³ Zà wa séín dyóɖóún. Nyuɛ ɓɛ́ wa ké dɛ̀ ɓɛ́ nyɔ ɓě ɖǎà mɛ́ɛ muà kɛɛ mu.

¹⁴ M̀ dyiɛ náa nyuɛ ɓɛ́ìn ní, nìí, ní muɛ dyuòùn, ké ní muɛ wĩín zàùn kà m̀ mìɔùn nììn ɖiaùn-sɔ̃̀ɔ̀ mɔ̀ nyɔ ɓɛ́ìn m̀ to-ɖu-ɖu nyíɛ kɛ.

¹⁵ “Dyé nimii vɛ̀nɛ̀ mɔ̀à Bɛ̀hémɔ̀ ɓɛ́ ḿ mɛà kà dyúáɖò kà ḿ nyuà m̀ mɛɛ kɛ. Ɔ ɖi pìǐ kà ɓìɖǐ ɖià pìǐɛ.

¹⁶ Kɛɛ ɔ ku dyi mìɔ, ké ɔ xwíɖí-kùɔ̀ wáɖáìn tɛ̃̀ìn bũ̌in.

¹⁷ Ɔ vɔ̃ɔ̀ nyànà dyi gãun-gãun kà síɖà-cù nìà kɛ, ké tɛ̃̀ìn ɓě nì ɔ kpóɖó-dyùàɔ̀ múɛɛ deìn dyí, ké wa ku dyi mìɔ.

¹⁸ Ɔ kpá nì ɓí mú ɓěɔ̀ nì kà bàɖàsǐ nìà kɛ. Ké ɔ ɓo ɓěɔ̀ ku dyi kà nɛɛ̀-kpà-pĩ̀à ɓě nìà kɛ.

¹⁹ Ɔ mɔ̀ nimii kpa ɖɛ ɖé nimii séín ɓě ɓɛ́ ḿ mɛà kɛɛ hwìɛ̀. Mɔ̄ mɔ̀ nyɔ mɛà ɔ kɛɛ, mɔ̄ ɖòùn ɓɛ́ìn ɔ toún ɖuɛ.

²⁰ Toɖo ɓě kɔ̃̀ dya ɓɛ́ xwáɖá-xwíɖíi-nìmìì ɓěɔ̀ nyùìn kà péé kɛɛ, ɖéɛ̀ pìǐ ɓě ɓɛ́ ɔ ɖiɛɛ mɛ.

²¹ Ɔ pɛ̃́ ɖé wí-kpɔ̀ɔ̌ ɓěɔ̀ xwíɖíi dyi. Ɔ vǐè ɖé gɛ̃̀ǐn-pìǒ-gbǎ ɓěɔ̀ mú, ɖé bàɖàɔ̀ gbo.

²² Wí-kpɔ̀ɔ̌ ɓěɔ̀ kè wéɖò-cù ɓě nìà ɖé ní-dyù ɓěɔ̀ kpóó-gbìǐ dyiɛɛ mɔ̀ ɔ pɛ̀ɛ̀-nyí-nyɔ̀. Ɖé wa xwíɖíi, ɖéɛ̀ ɔ pèɖèìn.

²³ Kɛbì ní-dyèɖèɔ̀ mɛ ku wɔ̃ɛɛ, ɔ se fã̀à ɖò peɖe. Kɛbì Jɔ́nì-nìɔ̀ mɛ táà ɔ manaa kɛɛ, ɔ nì gìɖìǐ pū.

²⁴ Nyɔ ɖò se ɔ xwɛ̃ɛ́ dyí zàà ɓɛ́ìn. Nyɔ ɖò se ɔ gbǎ mánáín ɓáa ɓɛ́ìn, ɓɛ́ ɔ ké ɔ jiɖi.”