Jóɓò 4 - Ɓǎsɔ́ɔ̀ Báɓòɔ̀

JÓƁÒ KÈ Ɔ ƁǍTO ƁĚƆ̀ ƉƐ-WĨIN-POÌN-POÌN KĨ́ÍN-KĨ́ÍN NÌÌNƆ̀ ( 4:1–14:22 ) Ɖɛ Ɛ̀ɖífà cɛ̃ ma kɛɛ kɛà kɛ̀

¹ Hwɛ̀ ké Ɛ̀ɖífà mɔ̀à Témàùn-nyɔ̀ɔ̀ kɛɛ zà ma ɖé wuɖu, ké ɔ ɖá,

² “Jóɓò, à dyi m̀ gbo wùɖù ní, nì hwòɖǒ mɛ ɓɔ́ ɖé ɖei kpáa. À se kà m̀ dyi dyéɛ ɓɛ́ìn, ɓɛ́ à nyɔ ɖò ké se wùɖù.

³ Gmɔ̀ nɔ̄, ɖé ti sùà ɓě múɛɛ, m̀ ɖǎ nyɔ ɓáún-ɓáún náún po, ké m̀ ɖǎ sɔ̃ ɓě hwɛ̀ kpéíɛɛ kpéí po.

⁴ Nì wĩín-wùɖù ɖǎ nyɔ ɓě ɓɛ́ wa nì ma dyi kpáuń wɛ̃ɛ dyií dyi kpɔ̃. M̀ ɖǎ nyɔ ɓě ɓɛ́ wa ɓo ɖeín hwɛ̀ kpéíɛɛ kpéí po.

⁵ Kɛɛ dyéɛ, ɓó kàǔn wɛ̃ɛ, fũ̀à-fṹá-tìɔ̀ nìǎ m̀ mìɔùn kɔ̃ dyiɛń, ké m̀ se hwòɖǒ kuɛ ɓɛ́ìn. Ɔ ɖǎ m̀ gbo kpá, ké nì hwòɖǒ ɖǎ ɖé ɖei kpá.

⁶ Má, nì Gèɖèpɔ́ɔ̀ dyi-fɛ̃̀ìn-fɛ̃̀ìnɔ̀ mɔ̀ nì hwòɖǒ-kɔ̃-dè-ɖɛ̀e, ké nì cĩ́-cĩ́ se kɛɛ ɖò ɓéɖéɔ̀ mɔ̀ nì hwòɖǒ-po-naíne?

⁷ Poìn hwìɖǐi ɓó kàǔn. Nyɛ́ mɔ̀ nyɔ kɔ̃̀ cĩ́-cĩ́ se kɛɛ ɖò ɓéɖéɛ ɖǎ mú gbɔɔ̀ ɖò kɛ́? Dɛ̌ ɓɛ́ wa ɖǎ dyí-sɛ́ɖɛ́ìn-nyɔ̀ ɖò mú gbɔɔ̀ ɖò kɛ́?

⁸ Ḿ ɖǎa dyé kà nyɔ ɖíɛ́ ɓěɛ̀ ɖɛ-gbà-nyu-nyu mɔ̀ ɓóɖó ké wa cɛ́ɛ̀ xwa kɛ, ké kà hwòɖǒ-kɔ̃in-nyìnììn-nyìnììn mɔ̀ ɓáá-ɖɛ̀-dyùà ké wa ɓáa kɛ. Nyɔ nì ná ɓěɔ̀, ɖɛ wa ɓá kɛɛ kɔ̃̀ ɓo wa kpã́.

⁹ Pìɔ̌ ɓɛ́ Gèɖèpɔ́ɔ̀ fɔ̀ kɛɛ nyuɛ ké ɔ gbɔɔ̀ wa mú. Ɔ kpáìn wa dyoɖoún, ké wa ɖe nyɛ̀nɛ̀ɛ̀.

¹⁰ Hwòɖǒ-kɔ̃in-nyìnììn-nyɔ̀ ɓěɔ̀ po dyoɖo, ké wa kuɖu kà ganìǎ nyuà kɛ. Kɛɛ Gèɖèpɔ́ɔ̀ mɔ̀ wa ɓɔ́í-po-nyɔ̀ kè wa nyɛ́nɛ́-wĩín-dyi-jaɖa-nyɔ̀.

¹¹ Wa nì kà ganìǎ ɓéɖé gana ɓě seà kpɔ̃ɔ-ɖɛ̀ dyé, ké mɔ́ ɖáɓá wa, ké waà dyú ɓěɔ̀ ɖǎà dyi gbɛ̀ìn nyɛ.

¹² “Bɔ̃̌ ɖò kpá ma ḿ ɖùǔn. Ɔ nì pū kà nyɔ ɖò pàìn ḿ sáná ɖùǔn wɛ̃.

¹³ Hwɛ̀ ɓɛ́ ḿ kéà wuɖuɔ̀ wɔ̃́ɛɛ, ḿ nì ma nyíɔ vɛ̀nɛ̀ ɖò mú, ké ḿ dya ma fã̀à-ɖɛ̀ ɖò.

¹⁴ Fã̀à nyu ma ḿ mìɔ, ké ḿ ɖú ma tɛɖɛ kpàǐ, ké ní kpá séín ɓěɔ̀ ɖú ma dyi túò kpàǐ.

¹⁵ Púɛɛ, pìɔ̌ ɖò ɓaɖa ma ḿ, ké sɔ̃̀ɔ̀-gɛ̃̀ wáɖá ma ḿ mú.

¹⁶ Ḿ dyéɛ ké ɖɛ ɖò nyànà ma ɓó ḿ dyúa dyi. Ḿ gmɔ̀ ma ɖɛɔ̀ dya gãa, kɛɛ mɔ́ún dyéɛ ma bũ̌in. Ɖɛ séín nì ma gìɖǐ-gìɖǐ. Púɛɛ, ḿ wɔ̃́ ma wuɖuɔ̀, ké wuɖuɔ̀ ɖá,

¹⁷ ‘Nyɔ ɖò sɛ́ɖɛ́ìn dyí ɓó Gèɖèpɔ́ɔ̀ dyúae? Nyɔ ɖò hwɛ̀ mú ɓó nyɔ mɛà ɔ kɛɛ dyúae?

¹⁸ Gmɔ̀ nɔ̄, Gèɖèpɔ́ɔ̀ se ɔ gbo-nì-nyɔ̀ ɓě nìà ɖé dyɔún wɛ̃ɛ hwòɖǒ kɔ̃ dè dyɛ mɔ̀ùn. Ɔ dyé ɔ ínjà ɓěɔ̀ kɛɛ mú.

¹⁹ Kà ɔ nìà náa, nìí, xwɛ̌ Gèɖèpɔ́ɔ̀ ɓɛ́ìn nyɔǔn-dyù hwòɖǒ kɔ̃ dèɛ̀ kɛ́? Sepóɛɖé waà kpóɖó-dyùàɔ̀ mɔ̀ ɓóɖó-kpò. Wa se dyi wàǐn kàmà kà ɓéɖé-dyùà ɓě nìà kɛ.

²⁰ Nyɔǔn-dyù ɓɛ́ìn cĩ́ɛń nìɛ̀ ɓó gànà-kṹún, ké ɔ ɓɛ́ìn mɛ́ɛ hwɛ̀ dyóɖó ké zi. Ɔ ɓɛ́ìn mɛ́ɛ ɓɛ́ nyɔ ɖò ké seɛ dyéɖé gbo dè, ɓɛ́ ɔ jè ké dyi zi.

²¹ Ɔ mɛ́, ké wa ɖú ɔ kɔ̃̀ɔ̀-ɖɛ̀ séín dyí. Ɔ mɛ́, ké ɔ se fɔ̀nɔ̀-hwòɖǒ sɔ̀ ɖé Gèɖèpɔ́ɔ̀ gboɛɛ ɓéɖé.’