Jóɓò 39 - Ɓǎsɔ́ɔ̀ Báɓòɔ̀

¹ “M̀ dyuò xwáɖá-xwíɖíi-wìɖì ɓěɔ̀ dyú-wóɖóìn-tì dyíì? M̀ gã̀ ɓó dyi ti ɓɛ́ déɖé nyɔ́nɔ́ ɓěɔ̀ nì dyú wóɖóɛ̌n nyɛɛ̀?

² M̀ dyuò ti jĩ̀ kà wa ɓéɖéìn waà dyú ɓěɔ̀ xwíníín hwɛ̀ ɓɛ́ wa dyi wóɖóɛɛ̀, ké m̀ dyuò ti wa wóɖóìn waà dyú ɓěɔ̀ kɛɛ̀?

³ M̀ dyuò ti wa gɛ̀nɛ̌ dyi ké wa wóɖóìn waà dyú ɓěɔ̀ hwɛ̀ ɓɛ́ wa dyi waà bũ̌in-puà-puàɔ̀ xwaún pó kɛɛ̀?

⁴ Waà dyú ɓěɔ̀ ɓúáìn ɖé xwáɖáɔ̀ xwíɖíi. Ti wa ɖǎ dyi kuɛɛ, wa dyi mu ní, wa ní dyi wa ɖe gbo ɖe.

⁵ “Nyɛ́ mɔ̀ nyɔ nyuɛ ɓɛ́ jǎkasì ɓě nìà ɖé xwáɖá xwíɖíiɛɛ dyià buɛ̀, ɓɛ́ wa dyià dyi nà kɛ́? Nyɛ́ mɔ̀ nyɔ buɛ̀ wa dyiɛ́?

⁶ Ḿ nyí wa gbǎùn-fúɖúáɔ̀, ɓɛ́ ɖé ké waà cĩ́-naín jǔ. Ḿ táà wa dyi ɓɛ́ wa ké ɖé pá púúɔ̀ kɔ̃ cĩ́.

⁷ Wa ɓaɖa hwɔ̀ɖɔ̀-nyɔ̀ ɓěɔ̀ dyɔ́ ɓó kuɖu-kuɖu wa nyuɛɛ jè, ké nyɔ ɖò se wa wuɖuí kɔ̃̀, ɓɛ́ ɔ ké wa dúi pánáìn ɓó kũ̀à nyu jè.

⁸ Wa nì dyi ɖiɛń ɖé toɖo ɓěɔ̀ dya. Wa nì vàǎ-dyɔ̀ɔ̀ séín dyi mɔ́uń.

⁹ “Jũ̀ìn ɓěɔ̀ ɓɛ́ìn wɔ̃́ɔ ɓɛ́ wa ké nì kũ̀à nyuù? Wa ɓɛ́ìn wɔ̃́ɔ ɓɛ́ wa ké ɖé nì ɓìɖǐ-gbòɔ̀ mú pɛ̃́ ɓó máaún-hwùɖù dyúáɖò xwínííne?

¹⁰ M̀ ɓɛ́ìn wa ɖò gɛ̀ɛ̀ ɖɔ poɛ ɓɛ́ ɔ ké nì ɓóɖó wae? Ɔ ɓɛ́ìn wɔ̃́ɔ ɓɛ́ ɔ ké nì ɓóɖó-kpò-dyi-wàìn-ɖɛ̀ɔ̀ jiɖi, ɓɛ́ ɔ ké nì ɓóɖóɔ̀ dyi wàìne?

¹¹ M̀ ɓɛ́ìn ɔ hwìɖǐǐ taɓa ɓó ɔ kpé ɓéɖé jèè, mɔɔ m̀ ɓɛ́ìn nì kũ̀à ɓěɔ̀ ɔ xwaún sèɛ̀e?

¹² M̀ ɓɛ́ìn ɔ hwòɖǒ kɔ̃ dèɛ̀ kà ɔ mu ɖe dyiìn, ɓɛ́ ɔ ké nì ɓáá-ɖɛ̀ɔ̀ ɖé mɔɔ́-dyí-síìn-naínɔ̀ kpa kɛɛ̀?

¹³ “Zògǐì ɓěɔ̀ vùɖǔ ní dyɛo, kɛɛ ɔ se waà dyú jè kàmà jè.

¹⁴ Sepóɛɖé zògǐì ɓěɔ̀ dyi gɛ̃ po ní, wa sèɛ̀ ɓóɛ ɓɛ́ ɓóɖóɔ̀ kéɛ zùzù kpɔ̃̀ìn.

¹⁵ Ɔ sɔ̀ wa hwìɖǐi kà nyɔ ɖò mɔɔ xwáɖá-xwíɖíi-nìmìì ɖò ɓɛ́ìn waà gɛ̃ ɓěɔ̀ kɔ̃ síɛ, ɓɛ́ wa ké wɛ̀ kɛ.

¹⁶ Ɔ nì pū kà wa seɔ́ kà gɛ̃ ɓěɔ̀ kɔ̃̀ kɛ. Wa se ɖé kɔ̃̀ kɛbì waà gɛ̃-po-tìɔ̀ mɛ gbɔɔ̀ múɛ.

¹⁷ Mɔ̄ Gèɖèpɔ́ɔ̀ mɔ̀ nyɔ nyuɛ ké wa se hwòɖǒ kɔ̃in cɛ̃̀. Ḿ se wa fɔ̀nɔ̀-hwòɖǒ nyí.

¹⁸ Kɛɛ wa ɖǎ ti dyé ɓɛ́ wa ké gbǔ ní, wa ɓaɖa sǒ ɓěɔ̀ kè waà kɔ̃ún-kò-nyɔ̀ ɓěɔ̀ dyɔ́ pū.

¹⁹ “Jóɓò, mɔ̀ mɔ̀ sǒ ɓěɔ̀ kpé-nyí-nyɔ̀ɔ̀? Mɔ̀ mɔ̀ nyɔ nyí wa gana-mì soɖoà wa bùnù ɖeín dyiɛɛ̀?

²⁰ Mɔ̀ nyuɛ ké wa nyu jĩ̌ kà kpã̌ùn kúɖúú ɓěɛ̀ jĩ̌ dyià kɛ, ké waà fɛ̀ɛ̀-zà-wùɖùɔ̀ tàɓàìn nyɔǔn-dyù díɖí mìɔ kɛɛ̀?

²¹ Wa nì waà zùǎ ɓěɔ̀ ɓóɖóɔ̀ mú ɓúɖúɛ̌n wàɖà-wàɖà ɖé bɔɔ-kpà ɓěɔ̀ kɔ̃, ké wa ɖú mú-nyɛ́-nyɔ̀ ɓěɔ̀ kè waà to-vɔ̃̀ìn-ɖɛ̀ ɓěɔ̀ wɔ̃ mu kpàǐ ɖé gana mú.

²² Wa se ɖɛ wa ɖáìn fɛ̃̀ìn-fɛ̃̀ìn nyɛɛ jè dyuò. Ɔ hwɔìn dyɔ́-ɖɛ̀ pū ɖé wa gbo. Wa se fɛ̃̀ìn ɓó dɛ̀ toɔ̀ kùìn wɔ̃ mìɔ kɛɛ mu jè.

²³ Sé-kpìì ɓěɔ̀ jĩ̌ nì dyiɛń ɖé sé-ɓɔ̀ɔ̌ nìà sǒ ɓěɔ̀ kɔ̃ún-kò-nyɔ̀ ɓěɔ̀ kɔ̃ún wɛ̃ɛ mú. Ɖí mɛ́nɛ́-mɛ́nɛ́ kèɛ̀ vɛ̀nɛ̀-vɛ̀nɛ̀ ɓěɔ̀ nì wànà-wànà nyuɛń ɖé dyóɖóɔ̀ mú.

²⁴ Wa dyi ɖɔ-kpa wuɖu wɔ̃́ ní, waà hwòɖǒ ɖú pá-pá nyu kpàǐ ɓó toɔ̀ gbo mu jè. Ɔ jèɛɛ, wa ɖú peɖeɛ dyí, ké wa mu toɔ̀ wɔ̃.

²⁵ Wa dyi ɖɔ-kpa wuɖu wɔ̃́ ní, wa zà fɛ̀ɛ̀. Toɔ̀ nì ɖé nya vɛ̃in, ké wa wɔ̃́ɔ nyɔ́. Ké wa wɔ̃́ sójà-nàìn-nyɔ̀ ɓěɔ̀ mú-páná-wùɖùɔ̀ ní.

²⁶ “Mɔ̀ mɔ̀ nyɔ tɛ̀mɛ̀ìn géé ɓěɔ̀ kà wa ké wãa nyuɛɛ̀? Mɔ̀ mɔ̀ nyɔ nyuɛ ké wa pɛ́ɛ̀ kà waà pìɔ̌-kpà ɓěɔ̀ kɔ̃in, ké wa mùìn kà ɖé ɓóɖóɔ̀ zɔ̃̌in nyɛɛ̀?

²⁷ Mɔ̀ mɔ̀ nyɔ cɛ̃ɛ ke ɓěɔ̀ gbo hwɛ̀ ké wa dèà waà téɖé ɓěɔ̀ ɖéé ɖé dyií kɛɛ̀?

²⁸ Ɖéé ɖé sɔ́ɔ́-tòɖò vɛ̀nɛ̀ ɓěɔ̀ dú-hwìɛ̀ mɔ̀ waà cĩ́-naín, ké sɔ́ɔ́-kpò vɛ̀nɛ̀ ɓěɔ̀ mɔ̀ waà dyí-zĩ̀ìn-ɖɛ̀.

²⁹ Ɖéɛ̀ wa nì, ké wa nì ɖɛ wa ké kpɔ̃ɛɛ dyi mɔ́uń. Waà dyéɖé ɓěɔ̀ dyé ɖɛ wa kéà kpɔ̃ɛɛ ɖé nya vɛ̃in.

³⁰ Dɛ̀ ɓɛ́ xwɛ́ ɓě wáɖá dyiɛɛ, ɓóɛ̀ ke ɓěɔ̀ poìn dyí, ké waà dyú ɓěɔ̀ ná xwɛ́ ɓěɔ̀ nyɔmɔɔ múin.”