Jóɓò 38 - Ɓǎsɔ́ɔ̀ Báɓòɔ̀

Bounɓoɔ̀ jǔ Jóɓò gɔ̃̌

¹ Ti ɓɛ́ Ɛ̀ɖíhù dè ma wuɖu dyiɛɛ, Bounɓoɔ̀ wùɖù ma Jóɓò gbo sɔ̀ìn ɖé dìì vɛ̀nɛ̀ ɖò mú, ké ɔ ɖá,

² “M̀ mɔ̀ nyɛ́, ɓɛ́ m̀ dyià ɖɛ se fɔ̀nɔ̀-hwòɖǒ mú nìɛɛ cɛ̃, ké m̀ dyià ɖɛ ḿ sɔ́ dyí ɓɛ́ ḿ ké nyuɛɛ kɛɛ mú dyéɛ́?

³ Nyànà dyi kóɖó-kóɖó, ɓɛ́ m̀ ké ɖɛ ní muà m̀ dyi dièìn nyɛɛ gɔ̃̌ jǔ.

⁴ Ti ɓɛ́ ḿ ké ma kà ɓóɖó-kpàɔ̀ hìɖì-kpàɔ̀ mɛ kɛɛ, m̀ gã̀ ma ɓó dyiì? Mɔ̀ dyuòà ɖɛ séín dyíɛɛ, zaìn ḿ gbo kɔ̃in.

⁵ Nyɛ́ mɔ̀ nyɔ sɔ́ kà ɓóɖó-kpàɔ̀ ké ɓɛ́ɛ jè dyí kɛ́? Nyɛ́ mɔ̀ nyɔ ɖàɓàìn ma ɓóɖó-kpàɔ̀ kɛ́? Má, m̀ dyuòɛ̀ dyíe?

⁶ Ɖɛ́ ɓóɖó-kpàɔ̀ hìɖì-kpàɔ̀ dè kɔ̃ kɛ́? Nyɛ́ kpɔ̃ ɔ gãún-cùè-ɓò ɓěɔ̀ dyií dyi kɛ́?

⁷ Ínjà ɓěɔ̀ poìn ma gbo, ké wa nì ma ɓeɖeɛń, wa kpá ma múàǔn, ké wa nì ma kuɖu-kuɖu nyuɛń.

⁸ Nyɛ́ mɔ̀ nyɔ gbǎìn dyóóɔ̀ gbǒ dyíin, ti ɓɛ́ ɔ ké ma kà gè sɔ̀ìn ɖé ɓóɖóɔ̀ hwuɖu kà dyú sɔ̀à ɔ ɖe xwíníín nyɛɛ kɛ́?

⁹ Mɔ̄ mɔ̀ nyɔ ɓáìn ma kà dyóóɔ̀ ní-kpò kɔ̃in, ké ḿ bĩɛ̀n ma kà tíe-kpò dyiɛ̀.

¹⁰ Mɔ̄ mɔ̀ nyɔ cɛ̃ ma kà bã̀à dɛ̀ ɓɛ́ dyóóɔ̀ ké sèìn nyɛ, ké ḿ gbǎìn ma kà dyóóɔ̀ gbǒ dyíin nyɛ̀.

¹¹ Ḿ cɛ̃ɛ ma dyóóɔ̀ gbo, ké ḿ ɖá, ‘Dà ɓóɛ̀ m̀ mɛ sèìn, ké mɔ̀ǔn zi ɓó ɖe. Dà ɓóɛ̀ nì dyóó-kpɛ̀ ɓěɔ̀ ganaɔ̀ mɛ sèìn.’

¹² “M̀ wóɖóó ɖé m̀ ɖe xwíníín nyɛɛ, m̀ ɖǎa zɔ̃ wĩín vɛ̀nɛ̀ gbo cɛ̃ ɖò, ɓɛ́ ɔ ké dyi, nìí ɓɛ́ zɔ̃ ké zɔ̃ɔ̀?

¹³ M̀ ɖǎa zɔ̃ wĩín vɛ̀nɛ̀ gbo cɛ̃ ɖò, ɓɛ́ ɔ ké ɓóɖó-kpàɔ̀ gã ɓěɔ̀ dyi kpɔ̃, ɓɛ́ wa kéɛ mú ɓaɖa, nìí ɓɛ́ hwòɖǒ-kɔ̃in-nyìnììn-nyɔ̀ ɓěɔ̀ ké waà vǐè-naín ɓěɔ̀ wãà?

¹⁴ Zɔ̃ dyi zɔ̃ ní, ɔ nyuɛ ké toɖo ɓěɔ̀ kè bɔɔ-kpà ɓěɔ̀ nì wáɖáá, kà ɖɔ ɖòɛ̀ dyéɖé wóɖóà ɖeɛ, ɔ kè kà ɖɛ-sɔ̃-bɛ̃̀-kɔ̃-pòìn-ɖɛ̀ ɖòɛ̀ bɛ̃̌ sèà ɓó mɛ-kpò ɖò dyéɖéín nyɛ.

¹⁵ Zɔ̃ dyi zɔ̃ ní, tíe-kpò ɓɛ́ ɔ mɔ̀à hwòɖǒ-kɔ̃in-nyìnììn-nyɔ̀ ɓěɔ̀ nììn zɔ̃-zɔ̃ɛɛ sɔ̀ wa xwa, ké sɔ̃ ɓɛ́ wa kpaɔ́ kà dyií ɓó ɖɛ gbà nyu jèɛɛ jɛ̀ɖɛ̀ ní.

¹⁶ “M̀ ɖǎ dɛ̀ ɓɛ́ dyóóɔ̀ níɔ̀ sɔ̀à ɖé ɓóɖó-hwùɖùɛɛ mu ɖòò, mɔɔ m̀ ɖǎ ɖé dyóóɔ̀ hwuɖu vɛ̃in mu ɖòò?

¹⁷ Nyɔ ɖò ɖǎ m̀ gĩɔ nììn gmɔ-wɔ̃̀ɔ̀ da zàìn ɖòò? Ɔ mɔ̀ tíe-kpò kpɛ̃̀ kɔ̃̀ mú ɓɛ́ nyɔ ɓě ɖǎà mɛ́ɛ muà kɛ.

¹⁸ M̀ dyuò kà ɓóɖó-kpàɔ̀ nyu ɓɛ́ɛ kɛɛ dyíì? M̀ dyi ɖɛ séín ɓěɛ̀ dyí dyuò ní, cɛ̃ɛ ḿ gbo.

¹⁹ “M̀ dyuò dɛ̀ ɓɛ́ ce mɔɔ tíe-kpò sɔ̀ kɛɛ̀?

²⁰ M̀ ɓɛ́ìn wa ɖé dɛ̀ wa sɔ̀à kɛɛ ɖe kpaa ɖeè? M̀ dyuò hwìè mu ɖé wa ɓíɖíɛɛ níì?

²¹ Má, m̀ dyuò wa dyíe? Má, m̀ ɖǎ zɔ̃̌ɔ̀ wóɖó ɓó tia ɓaɖae? Kē! M̀ ɖǎ hwèɖèìn ké nì zɔ̃ se zɛɖɛɛ ɓɛ́ìn ɖe cá wà!

²² “M̀ dyuò dɛ̀ ḿ dèìn sɔ̃̀ɔ̀-kpò-dù kò-kò ɓěɔ̀ dyi hwɛ̀ ɓɛ́ wa dyià ɖé sɔ̀ ɓɛ́ wa dyià wáɖá kɛɛ̀?

²³ Ḿ ɖǎ wa naɓaà ɓó fũ̀à-fṹá-tì ɓě hwɔìn kà to-tì ɓěɛɛ jè.

²⁴ M̀ dyuò dɛ̀ ɓɛ́ dyóɖóɔ̀ sɔ̀à ɓɛ́ ɔ dyià ɓóɖó-kpà gànáɔ̀ ce nyíɛ, mɔɔ dɛ̀ ɓɛ́ káná-pìɔ̌ɔ̀ sɔ̀à kɛɛ níì?

²⁵ “Nyɛ́ mɔ̀ nyɔ zà hwìè ɓɛ́ ní púèà sɔ̀ìn ɖé dyɔún wɛ̃ɛ ké kpaa kɛ́? Nyɛ́ mɔ̀ nyɔ zà wɛ́ɖɛ́-wɛ́ɖɛ́ɔ̀ kè zɛɔ̀ hwìè kɛ́?

²⁶ Nyɛ́ mɔ̀ nyɔ nyuɛ ɓɛ́ ní dyi ɓóɖó dyɛ kɔ̃in ɓɛ́ nyɔǔn-dyù ɖò se kɔ̃ nìɛɛ ɖaɓa kɛ́?

²⁷ Nyɛ́ mɔ̀ nyɔ nyí ɓóɖó dyɛ kɔ̃inɔ̀ ní, ɓɛ́ ɔ dyiɛ nyu ɓɛ́ ɓóɖóɔ̀ dyi te, ɓɛ́ pìǐ dyi ɓó mɛ kɛ́?

²⁸ Ní ɓɛ́ ɔ ɖaɓaà kɛɛ ɓéɖé ɓǎe? Nyɛ́ mɔ̀ nyɔ wóɖóìn dunu ɓuɖuà kɛɛ́?

²⁹ Sɔ̃̀ɔ̀-kpò mɔɔ dunu ɓɛ́ ɔ sɔ̀à ɖé dyɔún ké ɔ ɓuɖuà kɛɛ ɓéɖé xwíníín-zà-ɖè ɖòe?

³⁰ Nyɛ́ mɔ̀ nyɔ nyuɛ ɓɛ́ ní ɓěɔ̀ dyi sɔ̃̀ɔ̀-kpò mú zɛ̃̀ìn nyɛ́? Nyɛ́ mɔ̀ nyɔ nyuɛ ɓɛ́ dyóóɔ̀ kɔ̃in dyi sɔ̃̀ɔ̀-kpò mú zɛ̃̀ìn nyɛ́?

³¹ “M̀ ɓɛ́ìn dɛ̀nɛ̀ mɛ́nɛ́ɛ́ ɓě kɔ̃̀ nyɛ́nɛ́ mɔ̀à Dyùǐ-kúɖúú kɛɛ dyɔ̀ɔ̌ sã̀ìne, mɔɔ m̀ ɓɛ́ìn ɖúú ɓɛ́ ɔ sã̀ìn dɛ̀nɛ̀ mɛ́nɛ́ɛ́ ɓě mɔ̀à Kéɖémá-hwùɖù kɛ dyiɛ buɛ̀e?

³² M̀ ɓɛ́ìn dɛ̀nɛ̀ mɛ́nɛ́ɛ́ ɓěɔ̀ nyuɛ ɓɛ́ wa ké píé wóɖó ɖé wa nììn píé-wóɖó-tìɔ̀ xwínííne? M̀ ɓɛ́ìn dɛ̀nɛ̀ mɛ́nɛ́ɛ́ ɓě kɔ̃̀ nyɛ́nɛ́ mɔ̀à Kìɖìǒ vɛ̀nɛ̀ kè Kìɖìǒ mɛ́nɛ́ɛ́ kɛɛ hwìè wa ké kpa kɛɛ da zàìne?

³³ M̀ dyuò gma ɓě ɓɛ́ mɔ̄ Gèɖèpɔ́ɔ̀ po ɓá dyɔɔ̀ dyí jè dyíɛɛ níì? M̀ ɓɛ́ìn nyuɛ ɓɛ́ gma dyúáɖò ɓěa ké ɓóɖó-kpàɔ̀ wuɖuí kɔ̃̀ ɖekèè?

³⁴ “M̀ ɓɛ́ìn ɖé dyɔɔ̀ dyí wuɖu poɛ, ɓɛ́ m̀ kéɛ nyu ɓɛ́ ní-kpà vɛ̀nɛ̀ ɖò ké m̀ ɖàɓàìne?

³⁵ M̀ ɓɛ́ìn wɛ́ɖɛ́-wɛ́ɖɛ́ gbo cɛ̃ɛ ɓɛ́ ɔ ké po, nìí, ɔ ɖǎ po ní, ɔ ké m̀ gbo ɖe dyi, ɓɛ́ ɔ ké níiń, ‘Mɔ̄ kɛ̀oò?’

³⁶ Nyɛ́ mɔ̀ nyɔ nyí ní-kpò ɓě nìà ɖé dyɔɔ̀ dyíɛɛ kpé kà wa ké ɖaɓaa nyuɛ kɛ́? Nyɛ́ mɔ̀ nyɔ tɛ̀mɛ̀ìn dunuɔ̀ kà ɔ ké ɓuɖuɛ nyuɛɛ kɛ́?

³⁷ Nyɛ́ ɓéɖé fɔ̀nɔ̀-hwòɖǒ kà ɔ ké ní-kpò ɓě nìà ɖé dyɔɔ̀ dyíɛɛ zɛɖɛɛ nyuɛɛ kɛ́? Nyɛ́ ɓɛ́ìn ní nìà ɖé wa múɛ ɖé zàà ɓɛ́ ɔ ké ɖaɓa,

³⁸ ɓɛ́ ɔ kéɛ nyu ɓɛ́ ɓóɖóɔ̀ púu-púuɔ̀ ké kpoún kpá kɛ́?”

Gèɖèpɔ́ɔ̀ nì wuɖu kpauń ke

³⁹ Ké Bounɓoɔ̀ wùɖù ma Jóɓò gbo ɖe, ké ɔ ɖá, “M̀ ɓɛ́ìn ganìǎ ɓěɔ̀ bìì xwáɖá paa, nìí ɓɛ́ m̀ kéɛ nyu ɓɛ́ ganìǎ-dyù ɓěɔ̀ mɔ́-hwòɖò ké ɓɔ́í kpáà?

⁴⁰ M̀ ɓɛ́ìn náa nyuɛ ɓó ti kɔ̃̀ ɓaɖa ɓɛ́ ganìǎ ɓěɔ̀ vǐè ɖé waà ɓí ɓěɔ̀ mú, mɔɔ ti ɓɛ́ wa nì ɖɛ wa ké kpɔ̃ɛɛ jè dyi gmɔǐn nyɛɛ̀?

⁴¹ Nyɛ́ mɔ̀ hwĩ́ín-hwã ɓěɔ̀ ɖii-ɖɛ̀ nyí-nyɔ̀, ti ɓɛ́ mɔ́ nì wa nyuɛń ké wa nì dyi téɛń nyɛɛ kɛ́? Má, waà dyú ɓěɔ̀ pòìn mɔ̄ mɔ̀à Gèɖèpɔ́ɔ̀ kɛɛ kpéi, ɓɛ́ ḿ ké wa ɖii-ɖɛ̀ nyíe?