Jóɓò 37 - Ɓǎsɔ́ɔ̀ Báɓòɔ̀

Ɛ̀ɖíhùɛ̀ wuɖu hwɛ̀ìn-gbɔɔ̀

¹ “Dììɔ̀ kè dyɔɔ̀ páná-pánáɔ̀ nyuɛ ké ḿ tɛɖɛ kɔ̃in, ké ní hwòɖǒ-dyùà wã ḿ xwíníín.

² Ɓě séín tò Gèɖèpɔ́ɔ̀ wuɖuɔ̀ gbo ɖùǔ. Ɓě tò zɛ nìà pánáuń sɔ̀ìn ɖé ɔ wɔ̃ún wɛ̃ɛ gbo ɖùǔ.

³ Ɔ tò ɔ wɛ́ɖɛ́-wɛ́ɖɛ́ɔ̀, ké ɔ cɛ̃ ɓóɖóɔ̀ kpó ɖé dyɔɔ̀ dyí. Wɛ́ɖɛ́-wɛ́ɖɛ́ɔ̀ sɔ̀ ɓóɖó-kpàà máná ɖò gbo, ké ɔ nyini ɖò gbo.

⁴ Sɔ̀ìn ɓóɛ gboɛɛ, Gèɖèpɔ́ɔ̀ wùɖù ma ɖé kpé mú. Ɔ wuɖu dĩ́ín-dĩ̀ìnɔ̀ dyììn ɖé zɛ-páná-wùɖù mú. Ɓó ti dyúáɖòɔ̀ múɛɛ, ɔ nyuɛ ké wɛ́ɖɛ́-wɛ́ɖɛ́ nì poɛń.

⁵ Gèɖèpɔ́ɔ̀ wùɖù ké ɖɛ dĩ́ín-dĩ̀ìn ɓě kpá. Wa mɔ̀ ɖɛ ɓě ɓɛ́ à se múin wɔ̃́ɔ ɓɛ́ìn nyɛ.

⁶ Ɔ cɛ̃ɛ sɔ̃̀ɔ̀-kpò ɓěɔ̀ gbo, ké ɔ ɖá, ‘Ɓě wáɖá ɓíɖíi.’ Ké wa wáɖá ɓíɖíi. Ké ɔ cɛ̃ɛ níɔ̀ gbo, ké ɔ ɖá, ‘Ɖaɓa.’ Ké níɔ̀ púè ɓóɖó-kpàà kɔ̃.

⁷ Ɔ nyuɛ ké nyɔ séín po waà kũ̀à ɓɔ́í, ɓɛ́ wa ké dĩ́ín-dĩ̀ìn-ɖɛ̀ ɓě ɔ nyuɛɛ dyé.

⁸ Ké xwáɖá-xwíɖíi-nìmìì ɓěɔ̀ pa waà ɓí ɓěɔ̀ mú, ké wa nì ɖé.

⁹ Dìì vɛ̀nɛ̀ sɔ̀ìn ɖé zɔ̃̌in, ké pìɔ̌ pɛ̀ɛ̀ ɓɛ́ ɔ dyà sɔ̃̀ɔ̀ kɛɛ sɔ̀ìn ɖé xwía.

¹⁰ Pìɔ̌ sɔ̀ ɖé Gèɖèpɔ́ɔ̀ mánáɔ̀ múɛɛ nyuɛ ké sɔ̃̀ɔ̀-kpò ɓě nì. Ɔ nyuɛ ké zii-nì ɓěɔ̀ zɛ̃̀ìn sɔ̃̀ɔ̀-kpò mú.

¹¹ Gèɖèpɔ́ɔ̀ dyíìn ní-kpò ɓěɔ̀ wɛ́ɖɛ́-wɛ́ɖɛ́ múin, ké wa nì poɛń dà séín.

¹² Wa nì mú táɖáǐn kà Gèɖèpɔ́ɔ̀ nyuɛ wa gbo cɛ̃ɛ kɛ. Wa nyu ɖɛ séín Gèɖèpɔ́ɔ̀ cɛ̃ wa gboɛɛ, ɖé ɓóɖó-kpàà dà séín.

¹³ Gèɖèpɔ́ɔ̀ nyuɛ ɓɛ́ ní ké ɓóɖó-kpàà kɔ̃ ɖàɓàìn, ɓɛ́ ɔ ké ɓóɖó-kpàà ní nyí. Ti ɖíɛ́ ɓěǐn, ɔ nyuɛ náa ɓɛ́ ɔ ké nyɔǔn-dyù gǎ kɔ̃ tò, ké ti ɖíɛ́ ɓěǐn ɔ nyuɛ náa ɓɛ́ ɔ ké ɔ ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ wa dyí tɛ̀mɛ̀ìn.

¹⁴ “Jóɓò, nì gìɖìǐ ɖɛ wè, ɓɛ́ m̀ ké ḿ ɖùǔ gbo tò. Poìn dĩ́ín-dĩ̀ìn-ɖɛ̀ ɓě ɓɛ́ Gèɖèpɔ́ɔ̀ nyuɛɛ jè hwìɖǐi.

¹⁵ M̀ dyuò kà Gèɖèpɔ́ɔ̀ nyu wuɖu tòɛ̀, ɓɛ́ wɛ́ɖɛ́-wɛ́ɖɛ́ dyià po sɔ̀ìn ɖé ní-kpò ɓěɔ̀ múɛe?

¹⁶ M̀ dyuò kà ní-kpò ɓě ɓɛ́ wa mɔ̀à Gèɖèpɔ́ɔ̀ nyuu-ɖɛ̀ kpa ɖɛ ɓěɔ̀ kɛɛ nyuà ɖé dyɔɔ̀ dyí dyi beèɛ̀ kɛe?

¹⁷ Má, ɖɛ m̀ dyuò dyí nyɛ̀nɛ̀ɛ̀ kɛɛ mɔ̀ kà ɓɛ́ pìɔ̌ sùmù sɔ̀ìn ɖé zɔ̃̌in nyɛɛ dyi m̀ ɓaɖa ní, zu wóɖó m̀ ní kɛe?

¹⁸ M̀ ɓɛ́ìn Gèɖèpɔ́ɔ̀ gbo kpáa ɓɛ́ ɓě ké dyɔɔ̀ kɔ̃in pɛ́ɛ̀, ɓɛ́ ɓě kéɛ nyu ɓɛ́ ɔ ké nì kà bàɖàsǐ nìà kɛ, ɓɛ́ ɔ ké fãà?

¹⁹ Tɛ̀mɛ̀ìn à ɖɛ à ké Gèɖèpɔ́ɔ̀ gbo cɛ̃ kɛ, sepóɛɖé à fɔ̀nɔ̀-hwòɖǒ ɓěɔ̀ kpè kɔ̃in, ké à se ɖɛ à ké ɔ gbo cɛ̃ kɛɛ dyí dyuò.

²⁰ Ɔ se ní hwòɖǒ kpɔ̃ɔ-ɖɛ̀ ɓɛ́ ḿ ké Gèɖèpɔ́ɔ̀ gbo wùɖùɛ̀ mɔ́ wɛ̃́ɛ́. Ɖɛ́ kɔ̃̀ jè ḿ kéà náa nyu ɓɛ́ ɔ kéà ḿ mú gbɔɔ̀ pídyiɛ́?

²¹ “Ti ɓɛ́ pìɔ̌ ɖǎ dyi, ké dyɔɔ̀ dyíin ɖǎ dyi cɛ̃̀, ké ɖé ɖǎ wáɖáá nìɛɛ, nìí, ce nìà ɖéɛɛ fã ní mìɔ, ké nyɔ ɖò seɛ dya gmɔ̀ɔ̀ ɓɛ́ìn.

²² Ɔ kpá ná ti ɓɛ́ Gèɖèpɔ́ɔ̀ sɔ̀ìn ɖé xwía, ké ɔ nì dyiɛń nyɛ. Ɔ fã kà góò hwɛ̀ zɛ̀nɛ̌ǐn nìà kɛ, ké ɔ gã̌-gã̌ɔ̀ tàɓàìn nyɔ séín dyéɛ kɛɛ díɖí.

²³ Gèɖèpɔ́ɔ̀ ɓéɖé kpé mìɔ, ké à se ɔ bũ̌in xwɛ̃́ìn ɓɛ́ìn. Ɔ mɔ̀ dyí-sɛ́ɖɛ́ìn-nyɔ̀ kè jǎà-nyɔ̀ jèɛɛ, ɔ ní vɔ̃ nyɔǔn-dyù gbo.

²⁴ Nyɔǔn-dyù fɛ̃̀ìn ɔ dyi. Ɔ se nyɔ ɓě ɓɛ́ wa ɖá wa fɔ̀nɔ̀ hwòɖǒ ɖé wa mìɔùn múɛɛ kpéín dyé.”