Jóɓò 36 - Ɓǎsɔ́ɔ̀ Báɓòɔ̀

Ɛ̀ɖíhù kpa wuɖu dyúa ke

¹ Ké Ɛ̀ɖíhù kpa ma wuɖu ke, ké ɔ ɖá,

² “Ku hwòɖǒ, ɓɛ́ m̀ ké ḿ ɖùǔ gbo tò ke ɖɛ wè, sepóɛɖé ḿ ɓéɖé ɖɛ ɖò ɓɛ́ ḿ ké cɛ̃ ke ɓó Gèɖèpɔ́ɔ̀ bìì.

³ Ní fɔ̀nɔ̀-hwòɖǒɔ̀ tɔ̀mɔ̀ xwíníín. Ní fɔ̀nɔ̀-hwòɖǒɔ̀ muɛ m̀ dyí tɛ̀mɛ̀ìn kà ɓɛ́ Gèɖèpɔ́ɔ̀ mɔ̀ nyɔ mɛà ḿ wɛ̃ɛ mɔ̀ dyí-sɛ́ɖɛ́ìn-nyɔ̀ kɛ.

⁴ Ḿ nì jǎà cɛ̃iń. Ḿ se se tɔ́mɔ́uń nì. Mɔ̄ nìà ɓó m̀ dyúa kɛɛ, ḿ fɔ̀nɔ̀ hwòɖǒ wáɖáá cá.

⁵ “Gmɔ̀ nɔ̄, Gèɖèpɔ́ɔ̀ ɓéɖé kpé, ké ɔ dyéɖé ní zàìn nyɔ ɖò zùǔn. Ɔ dyuò ɖɛ séín dyí.

⁶ Ɔ ní táà hwòɖǒ-kɔ̃in-nyìnììn-nyɔ̀ ɓěɔ̀ dyi ké wa ní cĩ́ kánáá pū, ké ɔ nyu ɖɛ sɛ́ɖɛ́ìn dyíɛɛ gǎ-dyé-nyɔ̀ ɓěɔ̀ bũ̌.

⁷ Ɔ gmɔ̀ dyí-sɛ́ɖɛ́ìn-nyɔ̀ ɓěɔ̀ dyí kánáá pū. Ɔ nyuɛ ké wa kɔ̃̀ ɓóɖó ɓě wuɖuí kà kã́á nìà kɛ, ké ɔ nyí wa dya-dè-dè kánáá pū.

⁸ Kɛɛ ɔ jǔ ké nyɔǔn ɓě dyi dyɔ̀ɔ̌ mú nì, ké wa dyi gǎ dyéɛń nì ɓó ɖɛ wa nyuɛɛ jè ní,

⁹ nìí, Gèɖèpɔ́ɔ̀ nyuɛ ké wa dyé wa mìɔùn nììn nàmàǔn ɓěɔ̀ kè wa mìɔùn dyí-ɓúáìn-ɓúáìnɔ̀.

¹⁰ Ɔ kaà waà ɖùǔ ɓěɔ̀, ɓɛ́ wa ké ná-wùɖù múin wɔ̃́, nìí ɓɛ́ wa ké waà ɖɛ-gbà-nyu-nyu ɓěɔ̀ kɔ̃ín pòìn.

¹¹ Ɔ jǔ ké wa dyi Gèɖèpɔ́ɔ̀ wuɖuɔ̀ dyi kpɔ̃, ké wa dyi ɔ kũ̀à nyu ní, wa mu ɖé mú-zaìn-zaìn kè gìɖìǐ mú cĩ́ìn ɖé waà fɛ̀ɛ̀-wè séín mú.

¹² Kɛɛ ɔ jǔ ké wa se ɔ wuɖuɔ̀ dyi kpɔ̃ ní, nìí, wa mu mú gbɔɔ̀ùn ɖé se ɖɛ dyuò mú.

¹³ “Nyɔ ɓě ɓɛ́ wa seà Gèɖèpɔ́ɔ̀ hwìɖǐǐ taɓaa kàmà dyoɖo jè. Kɛbì Gèɖèpɔ́ɔ̀ mɛ tò wa gǎ kɔ̃ɛɛ, wa ní pòìn ɔ kpéi, ɓɛ́ ɔ ké wa gbo kpá.

¹⁴ Wa sè gmɔ̀ kɔ̃ ké wa mɛ́. Waà fɛ̀ɛ̀ɔ̀ hwɛ̀ mánáín ɖé dɛ̃-ɖɛ̀ nyu-nyu mú.

¹⁵ Kɛɛ ɔ póìn gǎ-dyé-nyɔ̀ ɓěɔ̀ dyììn ɖé waà gǎ-dyé-dyéɔ̀ mú, ké ɔ nyuɛ ké wa wɔ̃́ wuɖuún dyi dyììn ɖé waà fũ̀à-fṹá-tìɔ̀ mú.

¹⁶ “Gèɖèpɔ́ɔ̀ mu m̀ póìn sɔ̀ìn ɖé nì fũ̀à-fṹá-ɖɛ̀ɔ̀ mú. Ɔ muɛ nyuùn ɓɛ́ m̀ ké gìɖìǐ mú cĩ́, ké ɔ mu ɖii-ɖɛ̀ nɔ̀mɔ̀ kɔ̃in ɓó nì téɓèɖèɔ̀ kɔ̃ dyíìn.

¹⁷ Kɛɛ ɓó kàǔn wɛ̃ɛ, zaa-dúún-wáɖá-wáɖá ɓɛ́ ɔ dyi hwòɖǒ-kɔ̃in-nyìnììn-nyɔ̀ ɓěɔ̀ kɔ̃ɛɛ nìǎ m̀ kɔ̃ dyiɛń, ɓó ɖɛ gbà ɓɛ́ m̀ nyuɛɛ jè, ké m̀ se ɔ xwaún póɛ mu.

¹⁸ M̀ mɛ ma mú, kɔ́mɔ́-ɖɛ̀ ní kɔ̃̀ ɖà m̀ cá, mɔɔ nyɔ-gbo-pa-wìɖì ní kɔ̃̀ ɖà m̀ hwìǐ zàìn.

¹⁹ Nì kɔ́mɔ́-ɖɛ̀ ɓěɔ̀, kɛbì ɔ mɛ mɔ̀ góòɛɛ, wa ɖò se m̀ gbo kpáa ɓɛ́ìn, ké nì kpé séínɔ̀ se m̀ gbo kpáa ɓɛ́ìn ɖekè.

²⁰ Máaún-hwùɖùɔ̀ tó mɛ ɓɔ́ m̀ nyuɛ. Ɔ mɔ̀ ti kɔ̃̀ ɓaɖa mɔ̀à ɓóɖó-dù ɓěɛ̀ mú-gbɔɔ̀-tìɛ.

²¹ M̀ mɛ ma mú, mɔ̀ǔn kɔ̃̀ ɖà ɖɛ-gbà-nyu-nyu gbo gmɔ̀ìn. Ɖɛ kɔ̃̀ jè gǎ nìà kɛ dyià m̀ kɔ̃ɛɛ mɔ̀ ɔ kéɛ nyu ɓɛ́ mɔ̀ǔn kɔ̃̀ ɖà ɖɛ gbà gbo mu.

²² “Gmɔ̀ nɔ̄, Gèɖèpɔ́ɔ̀ kpé ɓúá dyí mìɔ. Ɔ mɔ̀ nyɔ-ɖɛ-tɛ̀mɛ̀ìn-nyɔ̀ vɛ̀nɛ̀ ɓó nyɔ-ɖɛ-tɛ̀mɛ̀ìn-nyɔ̀ séín kɔ̃in.

²³ Nyɛ́ ɖǎ Gèɖèpɔ́ɔ̀ hwìè da zàìn ɖò kɛ́? Ké nyɛ́ ɖǎa ɔ gbo cɛ̃ ɖò, ɓɛ́ ɔ ké níiń, ‘M̀ nyu ɖɛ gbào’ kɛ́?

²⁴ Nyɔǔn-dyù ɖúó ɔ ɓàìn dyí ɓó ɖɛ ɓě ɓɛ́ ɔ nyuɛɛ jèɛ. Mɔ̀ùn ɓéɖé ɓɛ́ m̀ ké ɔ ɓàìn ɖekè.

²⁵ Nyɔǔn séín dyé ɖɛ ɓě ɓɛ́ Gèɖèpɔ́ɔ̀ nyuɛ, kɛɛ wa nì ɖé dà vɛ̃in ké wa dyéɛ.

²⁶ Gèɖèpɔ́ɔ̀ kpé ɓúá dyí mìɔ, ké à se ɔ jè múin wɔ̃́ɔ ɓɛ́ìn. Ɔ zɔ̃ se zɛɖɛɛ ɓɛ́ìn.

²⁷ “Gèɖèpɔ́ɔ̀ mɔ̀ nyɔ zà ní nɔ̄ ɓíɖíi, ké ɔ kpaa ɖé dyɔɔ̀ dyí. Hwɛ̀ ké ɔ nyuɛ ɖaɓaa-nì mú, ké ɔ ɖaɓa ɖe.

²⁸ Ɔ nyuɛ ké ní-kpò ɓěɔ̀ ɓáà wɔ̃, ké wa púè ní nyɔǔn séín kɔ̃.

²⁹ Nyɔ ɖò seɛ dyuò kà ɔ nyu ní-kpò ɓěɔ̀ dyi gbɛ̀ìn ɖé dyɔɔ̀ dyíɛ, ɔ kè kà dyɔɔ̀ nyu pánáa sɔ̀ìn ɖé dɛ̀ Gèɖèpɔ́ɔ̀ cĩ́à kɛ.

³⁰ Gmɔ̀ nɔ̄, ɔ nyuɛ ké wɛ́ɖɛ́-wɛ́ɖɛ́ po, ké ce fɔ̀nɔ̀ ɔ ɖei ɖé dyɔɔ̀ dyí. Kɛɛ tíe kpɔ̃ ɖé dyóóɔ̀ hwuɖu dyi kánáá pū.

³¹ Kǎà ɔ nyu nyɔ ɓěɔ̀ wuɖuí kɔ̃̀ɔ̀, Ké ɔ nyí wa ɖii-ɖɛ̀ ɓáún-ɓáún.

³² Ɔ sá wɛ́ɖɛ́-wɛ́ɖɛ́ɔ̀, hwɛ̀ ké ɔ poɛ dɛ̀ ɔ mɔ́ ɓɛ́ zɛɔ̀ ké sí kɛ.

³³ Zɛɔ̀ páná-wùɖùɔ̀ po nyɔǔn-dyù náún kà dìì nì dyiɛń nyɛ, ké nyúà-ɖɛ̀ ɓěɔ̀ dyuòɛ̀ dyí ɖekè.