Jóɓò 35 - Ɓǎsɔ́ɔ̀ Báɓòɔ̀

Ɛ̀ɖíhù kpa wuɖu dyúa ke.

¹ Ké Ɛ̀ɖíhù kpa ma wuɖu dyúa ke, ké ɔ ɖá,

² “Jóɓò, ɔ se dyí sɛ́ɖɛ́ìn ɓɛ́ m̀ kéɛ cɛ̃, kà m̀ sɛ́ɖɛ́ìn dyí ɖé Gèɖèpɔ́ɔ̀ dyéɖéín nyɛ.

³ Ɔ se dyíin nɔ̀mɔ̀ ɓɛ́ m̀ ké Gèɖèpɔ́ɔ̀ dyi diè, ɓɛ́ m̀ ké níiń, ‘Ɖɛ́ mɔ̀ kpáná ɖò ɔ mu ḿ dyí nyuùn, ɔ jǔ ké ḿ se nàmàǔn ɖò nyu ní kɛ́?’

⁴ Ní mu m̀ gɔ̃̌ jǔùn, ké ní mu nì ɓǎto ɓě nìà dà m̀ gboɛɛ gɔ̃̌ jǔùn ɖekè.

⁵ “Gmɔ̀ ɖé dyɔɔ̀ dyí, ɓɛ́ m̀ ké ní-kpò ɓě nìà ɖé m̀ kɔ̃in nyɛɛ jè hwìɖǐi poìn.

⁶ M̀ dyi nàmàǔn nyu ní, nì hwòɖǒ ɖá m̀ puà Gèɖèpɔ́ɔ̀ bũ̌ine? Kɛbì nì nàmàǔn ɓěɔ̀ mɛ zi dyí vòɛ̌n mìɔ kɛɛ, ɖɛ́ ɔ nyu Gèɖèpɔ́ɔ̀ bũ̌ kɛ́?

⁷ M̀ dyi dyí-sɛ́ɖɛ́ìn-nyɔ̀ jǔ ní, ɖɛ́ nì dyí-sɛ́ɖɛ́ìn-sɛ́ɖɛ́ìnɔ̀ nyu Gèɖèpɔ́ɔ̀ dyíɛ́? Ɖɛ́ mɔ̀ kpáná ɖò nì dyí-sɛ́ɖɛ́ìn-sɛ́ɖɛ́ìnɔ̀ po Gèɖèpɔ́ɔ̀ xwaún wɛ̃́?

⁸ Nì hwòɖǒ-kɔ̃in-nyìnììn-nyìnììnɔ̀ ɓɛ́ìn m̀ mǔè nyɔǔn-dyù bũ̌in puàà, kɛɛ nì dyí-sɛ́ɖɛ́ìn-ɖɛ̀ nyu-nyuɔ̀ ɓɛ́ìn ɔ gbo kpáa.

⁹ “Kpé-ɓéɖé-nyɔ̀ ɓě dyi nyɔǔn ɓě dyi pĩ́à fũ̀à-fṹá-kà ní, nyɔ ɓěɔ̀ kpò ní. Wa páná mú, ké wa ɖá nyɔǔn ɓě ɓɛ́ wa ké wa kpé-ɓéɖé-nyɔ̀ ɓěɔ̀ xwaún póìn.

¹⁰ Kɛɛ wa ní gmɔ̀ìn ɖé Gèɖèpɔ́ɔ̀ ɓɛ́ ɔ mɛà wa kɛɛ gbo. Ɔ mɔ̀ nyɔ ɓɛ́ìnɔ̌ má wa hwòɖǒ-po-naín nyíɛ ɖé waà fũ̀à-fṹá-tìɔ̀ mú.

¹¹ Wa ní gmɔ̀ìn ɖé Gèɖèpɔ́ɔ̀ mɔ̀ nyɔ tɛ̀mɛ̀ìn kà à ɖɛ, ɓɛ́ ɔ dyiɛ nyu ɓɛ́ à dyià hwòɖǒ fɔ̀nɔ̀ ké à dyià nimii ɓěɔ̀ kè naà ɓěɔ̀ dyí ziɛɛ gbo.

¹² Nyɔ ɓě ɓɛ́ wa pĩ́àà dyiɛɛ ɖá ní, kɛɛ Gèɖèpɔ́ɔ̀ se wa gɔ̃̌ jǔ, sepóɛɖé wa ɓúáìn wa mìɔùn dyí, ké wa nyìnììn hwòɖǒ kɔ̃in.

¹³ Kpé-séín-ɓéɖé-Gèɖèpɔ́ɔ̀ se waà kpé-po-wùɖù fóɖóúnɔ̀ wɔ̃́ɔ mu. Ɔ se wa dya gmɔ̀ɔ̌ mu dyɛ mɔ̀ùn.

¹⁴ “Kà ɔ nìà náa, Jóɓò, ɔ se mɔ̀ùn dya gmɔ̀ɔ̌ mu, sepóɛɖé m̀ cɛ̃ɛ kà mɔ̀ǔn dyé ɔ, ké nì zɔ̃́ínɔ̀ nì ɓó ɔ dyúa, ké m̀ nì ɔ fòèɛ̌n nyɛ.

¹⁵ Ɓó kɔ̃in ɖeɛɛ, nì hwòɖǒ ɖá Gèɖèpɔ́ɔ̀ ní tò nyɔǔn ɓě gǎ kɔ̃ ɓó ɖɛ gbà wa nyuɛɛ jèe? Nì hwòɖǒ ɖá ɔ dyéɖé se nàmàǔn ɓɛ́ nyɔǔn-dyù nyuɛɛ gbo nìe?

¹⁶ Jóɓò, m̀ ɓáà wɔ̃, ɓɛ́ wuɖu fóɖóún ké ɖé sɔ̀ jè pū. Nì wùɖù wuɖu kúɖúú ɓɛ́ wa se fɔ̀nɔ̀-hwòɖǒ mú nìɛɛ pū.”