Jóɓò 34 - Ɓǎsɔ́ɔ̀ Báɓòɔ̀

Ɛ̀ɖíhù kpa wuɖu dyúa ke

¹ Hwɛ̀ ké Ɛ̀ɖíhù ɖú wuɖuí ɖe, ké ɔ ɖá,

² “Ɓě mɔ̀ nyɔ ɓě cɛ̃à kà ɓě fɔ̀nɔ̀à hwòɖǒɛɛ, ɓě wɔ̃́ ní wuɖuɔ̀. Ɓě mɔ̀ nyɔ ɓě fɔ̀nɔ̀à hwòɖǒ ɖé ɖɛ-dyuò-dyuò múɛɛ, ɓě tò ḿ gbo ɖùǔ.

³ Ɖùǔ wɔ̃́ wuɖu ɓě, ké ɔ dyuò wa zaìn gboi dyí, kà dyúáɖò kà wɔ̃ɔ̀ dɔ̃̌à ɖɛ wɔ̃, ké ɔ dyuò ɖɛ ɖéèɛ kè ɖɛ se ɖéèɛɛ zaìn gboi dyíɛ.

⁴ Ɓěà ɖe ɖɛ ɓě ɓɛ́ Jóɓò ɖǎà cɛ̃ɛ múin, ɓɛ́ ɓěà ké ɖɛ sɛ́ɖɛ́ìn dyíɛɛ gã. Ɓěà vɔ̃, ɓɛ́ ɓěà ké ɖɛ nɔ̀mɔ̀ dyíin nyɛɛ dyuò ɖé ɓěà hwìɛ̀.

⁵ Jóɓò ɖǎa cɛ̃ kà ɔ se ɖɛ gbà ɖò nyu, ké Gèɖèpɔ́ɔ̀ ɖǎ ɔ dyí-sɛ́ɖɛ́ìn-ɖɛ̀ ɓùɖùìn nyɛ.

⁶ Jóɓò ɖá kɛbì ɔ mɛ mɔ̀ dyí-sɛ́ɖɛ́ìn-nyɔ̀ɛɛ, ɔ nyɛ́nɛ́ ɖǎ se-tɔ́mɔ́-nyɔ̀ jǔ. Ɔ ɖá kɛbì ɔ mɛ se ɖɛ gbà ɖò nyuɛɛ, sé-kpìì ɓɛ́ Gèɖèpɔ́ɔ̀ poà ɔ múɛɛ jěɔ̀ se kũùn kɔ̃̀.

⁷ “Nyɛ́ nì kà Jóɓò nìà kɛɛ kɛ́? Nyɔ-dyɔ́-ɓaɖa-ɓaɖa dè ɔ hwòɖǒ dyi kà ní pɛ̀ɛ̀ dèà nyɔ hwòɖǒ dyiɛ.

⁸ Jóɓò nì ɖɛ-gbà-nyu-nyɔ̀ ɓěɔ̀ hwìɛ̀, ké ɔ kè hwòɖǒ-kɔ̃in-nyìnììn-nyɔ̀ ɓěɔ̀ naìn mú.

⁹ Sepóɛɖé ɔ ɖá, ‘Ɔ se kpáná ɖò mú nì, ɓɛ́ nyɔ ɖò ké Gèɖèpɔ́ɔ̀ hwòɖǒ dyi dèɛ.’

¹⁰ “Ɔ ná nì jèɛɛ, ɓě mɔ̀ nyɔ ɓě ɓɛ́ ɓě wɔ̃́à ɖɛ múin nyɛɛ, ɓě tò ḿ gbo ɖùǔ. Gèɖèpɔ́ɔ̀ se ɖɛ gbà ɖò nyuɛ ɓɛ́ìn fɔɔ cá. Kpé-séín-ɓéɖé-Gèɖèpɔ́ɔ̀ ní nyu ɖɛ se dyí sɛ́ɖɛ́ìn nyɛ.

¹¹ Gèɖèpɔ́ɔ̀ pɛ́ɛ̀ nyɔǔn-dyù dyììn ɖé waà nyuu-ɖɛ̀ mú. Ɖɛ nyɔ nyuɛɛ kɔ̃̀ pɛ́ɛ̀-ɖɛ̀ ɔ dyé.

¹² Jǎà jɛ́ɛ́, Gèɖèpɔ́ɔ̀ se ɖɛ gbà nyuɛ ɓɛ́ìn. Kpé-séín-ɓéɖé-Gèɖèpɔ́ɔ̀ se dyí-sɛ́ɖɛ́ìn-ɖɛ̀ hwìǐ zàìn ɓɛ́ìn.

¹³ Gèɖèpɔ́ɔ̀ zà ɔ wuɖuí-kɔ̃̀-kpèɔ̀ ɖé nyɔ ɖò gboò? Nyɔ ɖò mɔ̀ nyɔ nyu ɔ ɓóɖó-kpà gànáà wuɖuí-kɔ̃̀-nyɔ̀ múù?

¹⁴ Ɔ jǔ ké Gèɖèpɔ́ɔ̀ dyiɔ́ má ɔ fɛ̀ɛ̀ ɓɛ́ ɔ poà ɖé nyɔǔn-dyù múɛɛ ɖé zà ní,

¹⁵ nìí, nyɔ séín nìà ɓóɖó-kpàà kɔ̃ɛɛ muɔ́ má mɛ́ìn, ɓɛ́ wa kéɔ́ má ɓóɖóɛ̀ púu-púu kɔ̃̀ mú ɓɛ́ wa sɔ̀à kɛɛ ɖe mu.

¹⁶ “Jóɓò, ɔ jǔ ké m̀ dyi hwòɖǒ fɔ̀nɔ̀ ní, m̀ mɛ tò ní wuɖuɔ̀ gbo ɖùǔ. Wɔ̃́ ɖɛ ḿ nìà cɛ̃iń nyɛɛ múin.

¹⁷ Nì hwòɖǒ ɖá nyɔ ɓɛ́ ɔ nyɛ́ dyí-sɛ́ɖɛ́ìn-ɖɛ̀ múɛɛ ɓɛ́ìn ɓóɖó-kpàà wuɖuí kɔ̃̀ɔ̀e? M̀ ɓɛ́ìn kpé-séín-ɓéɖé-Gèɖèpɔ́ɔ̀ mɔ̀à dyí-sɛ́ɖɛ́ìn-nyɔ̀ɔ̀ kɛɛ zaa dúún wáɖáae?

¹⁸ Gèɖèpɔ́ɔ̀ mɔ̀ kã́á ɓě kè nyɔ-wuɖuí-kɔ̃̀-nyɔ̀ tɔ̀ɔ̀ ɓě zɔ̃́ín-dúún-wáɖá-nyɔ̀, ti ɓɛ́ wa se kpáná ɖò mú nì ké wa nyu ɖɛ gbà kɛ.

¹⁹ Gèɖèpɔ́ɔ̀ ní zi nyɔ-wuɖuí-kɔ̃̀-nyɔ̀ ɖò gbo ɓó ɔ nyɔ-wuɖuí-kɔ̃̀-nyɔ̀ jǔ jè, ké bã-nyɔ̀ ɓě kè gǎ-dyé-nyɔ̀ ɓě mɔ̀ nyɔ dyúáɖò ɓó ɔ dyúa, sepóɛɖé wa séín mɔ̀ ɔ sɔ̃ɔ̀ mɛɛ-ɖɛ̀.

²⁰ Nyɔ ɖò ɓɛ́ìn mɛ́ɛ wàɖà ɓó máaún hwuɖu hwìɛ̀ǐn. Gèɖèpɔ́ɔ̀ ɓɛ́ìn nyɔ ɖò sɔ̃ kɔ̃ pɛ̃́ìn, ɓɛ́ ɔ ké mú gbɔɔ̀. Ɔ nyuɛ ké kpé-ɓéɖé-nyɔ̀ ɓě mɛ́, ké nyɔ ɖò se ɓó sɔ̃ po fɔɔ cá.

²¹ Sepóɛɖé Gèɖèpɔ́ɔ̀ dè nyɔǔn-dyùɛ̀ nyuu-ɖɛ̀ séín dyéɖé gbo. Ɔ dyuò waà ɓo-bɛ̃̀ séín dyí.

²² Tíe-kpò kpɛ̃̀ ɖò se nì, ɓɛ́ ɖɛ-gbà-nyu-nyɔ̀ ɖò ké ɖé Gèɖèpɔ́ɔ̀ dyí vǐè.

²³ Gèɖèpɔ́ɔ̀ se ɓéɖé ɔ ké nyɔǔn-dyùɛ̀ kpeɖe múin ɖe wɛ̃́ɛ́, hwɛ̀ ɓɛ́ ɔ ké zaa wɔ̃ po.

²⁴ Ɔ se ɓéɖé ɔ ké zaa múin gmɔìn wɛ̃́ɛ́, hwɛ̀ ɓɛ́ ɔ ké kpé-ɓéɖé-nyɔ̀ ɓě kũ̀à kɔ̃ún zà, ɓɛ́ ɔ ké wa nyɔ bɛ̃̌ǐn po.

²⁵ Ɔ dyuò waà nyuu-ɖɛ̀ dyí jèɛɛ, ɔ po wa ɓíɖíi dyi ɓó máaún, ké wa wɛ̀ìn dyi.

²⁶ Ɔ tò wa gǎ kɔ̃ ɓó nyɔ séín dyéɖé waí, ɓó wa hwòɖǒ kɔ̃in nyìnììn jè.

²⁷ Ɔ nyuɛ náa, sepóɛɖé, wa se ɔ kíɖíí síɛń nì ɖe, ké wa nì ɔ gma séín ɓěɔ̀ ɖùǔn dyi zàǔn.

²⁸ Wa pĩ́à gǎ-dyé-nyɔ̀ ɓě dyi mìɔ jèɛɛ, gǎ-dyé-nyɔ̀ ɓěɔ̀ kpé-po-wùɖùɔ̀ dyɛ̀ìn Gèɖèpɔ́ɔ̀. Wa dyi gbo-kpá-kpá zɔ̀ ní, nìí, ɔ wɔ̃́ waà ɖá-wùɖùɔ̀ ní.

²⁹ “Gèɖèpɔ́ɔ̀ dyi níiń, ‘Ḿ se ɖɛ ɖò nyuɛ́ muo’ ní, nyɔ ɖò se ɔ zaa kpɔ̃̀ìn ɓɛ́ìn. Ɔ dyi nyɔǔn-dyù dyúa xwáɖáún pòìn ní, nyɔ ɖò se ɖɛ ɖò nyuɛ ɓɛ́ìn. Kɛɛ wɛ̃́ɛ́ kɛɛ, ɔ kɔ̃̀ nyɔǔn-dyù kè ɓóɖó-dù ɓě wuɖuí.

³⁰ Ɔ se nyɔ ɓě ɓɛ́ wa nyɛ́ ɔ múɛɛ gãá mu, ɓɛ́ wa ké nyɔ ɓě wuɖuí kɔ̃̀, wa ní kɔ̃̀ ɖà xwáɖá-gbǎ-mú jǔ ɓó nyɔ ɓěɔ̀ hwìǐ zàìn jè.

³¹ “Jóɓò, m̀ ɖǎ nì nàmàǔn ɓěɔ̀ mú wɔ̃́ìn ɖé Gèɖèpɔ́ɔ̀ gbo, ké m̀ ɖǎ wuɖu ɖi kà m̀ se ɖò nyuɛ́ mu ɖeɛe?

³² M̀ ɖǎ Gèɖèpɔ́ɔ̀ dyi diè, ɓɛ́ ɔ ké nì nàmàǔn ɓěɔ̀ m̀ da zàìn, ké m̀ ɖǎ wɔ̃́ ɓɛ́ m̀ ké ɖɛ-gbà-nyu-nyu dyi táàe?

³³ Kà ɓɛ́ m̀ seà ɖɛ ɓɛ́ Gèɖèpɔ́ɔ̀ nì m̀ bũ̌ nyuɛń nyɛɛ mú ɖɛ̀ɓɛ̀ɛ, nì hwòɖǒ ɖá ɔ mɛ nyu ɖɛ m̀ mɔ́ kɛe? Mɔ̀ mɔ̀ nyɔ ɓéɖé m̀ ké ɖɛ gã, ké ɔ se mɔ̄. Xwɛ̌ nì hwòɖǒ ɖá kɛ́? Cɛ̃ɛ à gbo.

³⁴ “Hwòɖǒ-fɔ̀nɔ̀-nyɔ̀ ɓě ɓɛ́ wa cɛ̃̀ hwòɖǒ kɔ̃in, ké wa nì ní wuɖuɔ̀ wɔ̃́uń wɛ̃ɛ, ɓɛ́ìn cɛ̃ɛ,

³⁵ kà ɖɛ Jóɓò nìà wùɖùɛ̌n nyɛɛ, ɔ seɛ dyí dyuòɛ, ké kà fɔ̀nɔ̀-hwòɖǒ ɖò se ɖɛ ɓě ɓɛ́ ɔ nìà cɛ̃iń nyɛɛ mú nìɛ.

³⁶ Nyɛ́ ɖá wa poɔ́ má Jóɓòɛ̀ zɔ̃́ín wɔ̃ nɛ̀ɛ̀-nɛ́ɛ́-kà ɓó ɖɛ ɓě ɓɛ́ ɔ wùɖùà kɛɛ jèɛ́? Ɔ wùɖù kà ɖɛ-gbà-nyu-nyɔ̀ wùɖùà kɛ.

³⁷ Ɔ nyu Gèɖèpɔ́ɔ̀ nàmàǔn bũ̌, hwɛ̀ ké ɔ po kɛ́ɛ́ ɖe. Ɔ ɓaɖa Gèɖèpɔ́ɔ̀ dyɔ́ ɓó à dyéɖé waí, ké ɔ nì wuɖu kúɖúú Gèɖèpɔ́ɔ̀ kɔ̃ún cɛ̃iń.”