Jóɓò 33 - Ɓǎsɔ́ɔ̀ Báɓòɔ̀

Ɛ̀ɖíhù kpa wuɖu dyúa

¹ “Ɓó kàǔn wɛ̃ɛ, Jóɓò, tò ɖɛ séín ní muà cɛ̃ìn nyɛɛ ɖùǔ gbo nɔ̀mɔ̀ dyíin.

² Gmɔ̀ nɔ̄, ḿ nìǎ wɔ̃ ɓáàǔn dyiɛń, ké ɖɛ ɓɛ́ ḿ nìà cɛ̃iń dyiɛń nyɛɛ nì ɓó ḿ miɔ mánáín ɓó kàǔn.

³ Ɖɛ séín ḿ nìà cɛ̃iń dyiɛń nyɛɛ sɔ̀ ɖé ḿ hwòɖǒ bũ̌ jɛ́ɛ́ cá, ké ɖɛ ní muà cɛ̃ìn nyɛɛ mɔ̀ jǎà.

⁴ Gèɖèpɔ́ɔ̀ Zùùɔ̀ mɔ̀ nyɔ mɛ ḿ, ké fɛ̀ɛ̀ ɓɛ́ Kpé-séín-ɓéɖé-Gèɖèpɔ́ɔ̀ fɔ̀ìn kà ḿ múɛɛ mɔ̀ nyɔ nyuɛ ké ḿ nìà cĩ́ɛń nyɛ̀.

⁵ “Ɔ jǔ ké m̀ dyi ḿ gɔ̃̌ jǔɛ ɓɛ́ìn ní, nyuɛ náa. Po nì wuɖu ɓěɔ̀ sɔ́ɓɔ́í nɔ̀mɔ̀ dyíin hwɛ̀ ɓɛ́ m̀ kéɛ píé po.

⁶ Gmɔ̀ nɔ̄, à nyɔ sɔ̃́ɛ̀ hwɔìn ní ɖé Gèɖèpɔ́ɔ̀ dyéɖéín. Ɔ ɖú ma mɛ-kpò dyí, ké ɔ mɛ ma à nyɔ sɔ̃́ɛ̀.

⁷ Gmɔ̀ nɔ̄, mɔ̀ǔn ɖá m̀ ké ḿ dyi fɛ̃̀ìn. Ḿ se m̀ dyi nɛ́ǐn mu.

⁸ “Jǎà jɛ́ɛ́, m̀ cɛ̃ ma ɖɛ ɖò, ké ɔ kpá ḿ ɖùǔn. Ḿ wɔ̃́ ma nì wuɖuɔ̀ ní.

⁹ M̀ cɛ̃ɛ kà m̀ hwɛ̀ mú ké mɔ̀ǔn bĩ ɖɛ xwaa. M̀ ɖá m̀ sɛ́ɖɛ́ìn dyí, ké nàmàǔn ɖò se ɖé m̀ mú nì fɔɔ cá.

¹⁰ Gmɔ̀ nɔ̄, m̀ ɖá Gèɖèpɔ́ɔ̀ nì m̀ jeín mɔ́uń, ké ɔ ɖáìn m̀ ɔ mú-nyɛ́-nyɔ̀ ɓěɔ̀ ɖò.

¹¹ M̀ ɖá ɔ po m̀ gbòò ɓo, ké ɔ gmɔìn nì ɓo-bɛ̃̀ séín múin.

¹² “Kɛɛ Jóɓò, ḿ mɛ cɛ̃ m̀ jǎà gbo. M̀ bĩ ɖɛ xwa ɖé ɖɛ nìà kɛ mú. Gèɖèpɔ́ɔ̀ kpé ɓúá dyí ké ɔ zi nyɔǔn-dyù dyí.

¹³ Ɖɛ́ kɔ̃̀ jè m̀ nìà Gèɖèpɔ́ɔ̀ kàǐn kà ɔ ní jǔ nyɔ ɖòɛ̀ ka-wùɖù gɔ̃̌ kɛ́?

¹⁴ Gèɖèpɔ́ɔ̀ wùɖù ɓó ti kè ti xwíníín, kɛɛ nyɔǔn-dyù ní tò ɔ wuɖuɔ̀ ɖùǔ gbo.

¹⁵ Ti ɖíɛ́ ɓě ní Gèɖèpɔ́ɔ̀ wùɖù nyɔǔn-dyù gbo ɓó máaún ɖé dya-dya ɓě kè dyí-tɛ̀mɛ̀ìn-ɖɛ̀ ɓě mú, ti ɓɛ́ wa nì nyíɔún wɛ̃.

¹⁶ Ɔ kaà waà ɖùǔ ɓěɔ̀, ɓɛ́ wa ké ɖɛ ɔ mu wa gbo cɛ̃ìn nyɛɛ wɔ̃́, ké ɔ ná-wùɖù ɓěɔ̀ po wa fã̀àǔn.

¹⁷ Ɔ wùɖù wa gbo, ɓɛ́ wa ké ɖɛ-gbà-nyu-nyu dyi táà, ɔ kè ɓɛ́ wa ké se wa mìɔùn dyí ɓúáìn ɖe.

¹⁸ Ɔ seɛ dyi dyéɛ mu ɓɛ́ gĩɔ ké wa dyɛ̀ìn. Ɔ se waà fɛ̀ɛ̀ dyi táǎ mu ɓɛ́ wa ké mú gbɔɔ̀.

¹⁹ Ti ɖíɛ́ ɓě ní, Gèɖèpɔ́ɔ̀ zà nyɔ kpeɖe dyììn ɖé wɛ́ mú. Ɔ nyuɛ ké nyɔɔ̀ kpóɖó-dyùàɔ̀ dà séín puà.

²⁰ Ké ɔ nyuɛ ké wɛ́-nyɔ̀ɔ̀ nyɛ́ ɖii-ɖɛ̀ mú, hwɛ̀ ḿ po níiń, ɖii-ɖɛ̀ nɔ̀mɔ̀ dyíin ɖòɛ̀ ɖi-tò ké ɔ nyuɛ.

²¹ Ké ɔ fɔ́ séín pa ɔ bũ̌in, ké nyɔ kɔ̃̀ kpá ɓɛ́ nyɔ ɖò se ma dyéɛ ɓɛ́ìn nyɛɛ mɔ̀ǎ kpá záɖáá.

²² Ké ɔ sèǎ ɖɛ tííwè ɓɛ́ ɔ kéá mɛ́, ɓɛ́ ɔ kéá dɛ̀ nyɔ ɓě ɖǎà mɛ́ɛ muà kɛɛ mu.

²³ “Ti ɖíɛ́ ɓě ní ínjà ɖò mu dyiìn, ɓɛ́ ɔ ké wɛ́-nyɔ̀ɔ̀ gbo kpá. Ɔ mɔ̀ Gèɖèpɔ́ɔ̀ ínjà kúɖúú ɓě ɓɛ́ wa mɔ̀ ɖɛ nyɔǔn-dyù kɔ̃̀ wa ké nyuɛɛ wa hwìɖǐi-dyà-nyɔ̀ ɓěɛɛ ɖò.

²⁴ Ínjàɔ̀ mu wìì dyéìn ɓɛ́ ɔ kéɛ cɛ̃ ɓɛ́ ɔ ké níiń, ‘Ɓě buɛ̀ ɔ. Ɔ mɛ ɓɔ́ dɛ̀ nyɔ ɓě ɖǎà mɛ́ɛ muà kɛɛ muɛ. Ɖɛ ké ɔ gbǎà kɛɛ kɛà kɛ̀.’

²⁵ Ɔ ɖǎ ná nìǐn, ɔ mu dyú-gbɔ́ɔ́-dyɔ̀ɔ̀ dyí ɖúùn ɖe. Kpé mu ɔ dyí kpáùn, ɓɛ́ ɔ ké nì kà ɔ nyu ma kà nìɛ̀ ɖé ɔ nyɔ-gmɔ̀-tìɔ̀ múɛ.

²⁶ Ɔ dyi ɓaà ní, Gèɖèpɔ́ɔ̀ mu ɔ gɔ̃̌ jǔùn, ké ɔ mu Gèɖèpɔ́ɔ̀ ɓièìn ɖé múà mú. Ké Gèɖèpɔ́ɔ̀ mu ɖɛ ɓě dyí sɛ́ɖɛ́ìn ɖe ɓó ɔ bìì.

²⁷ Ɔ muɛ nyɔǔn ɓě gbo cɛ̃ìn, ɓɛ́ ɔ ké níiń, ‘Ḿ ɖǎ nàmàǔn nyu. Ḿ ɖǎ ɖɛ se dyí sɛ́ɖɛ́ìn nyɛɛ nyu. Kɛɛ Gèɖèpɔ́ɔ̀ se gǎ ḿ kɔ̃̀ ḿ kéɔ́ dyéɛɛ ḿ kɔ̃ tò.

²⁸ Gèɖèpɔ́ɔ̀ gmɔ̀ ḿ dyí, ké ḿ se dɛ̀ ɓɛ́ nyɔ ɓě ɖǎà mɛ́ɛ muà kɛɛ mu, ké ḿ nìà ce dyéɛń keɛ̀.’

²⁹ “Kǎà Gèɖèpɔ́ɔ̀ nyu ɖɛ nyuɛ ɓó nyɔǔn-dyù bìì ɓó ti kè ti mú,

³⁰ ɓɛ́ ɔ ké nyɔɔ̀ fɛ̀ɛ̀ póìn sɔ̀ìn ɖé gĩɔ xwaún, nìí ɓɛ́ fɛ̀ɛ̀ nììn ceɔ̀ ké nyɔɔ̀ kɔ̃in fã̀ìn ɖe.

³¹ “Jóɓò, nì gìɖìǐ, ɓɛ́ m̀ ké ḿ ɖùǔ gbo tò, ɓɛ́ ḿ ké wùɖù.

³² Kɛɛ ɔ jǔ ké m̀ dyi ɖɛ ɖò ɓéɖé m̀ ké cɛ̃ ní, kpa nì wuɖu. Ɖɛ nì muà cɛ̃ìn nyɛɛ dyi jǎà jǔ ní, ní muɛ cɛ̃ìn kà ɔ mɔ̀ jǎà kɛ.

³³ Ɔ se ná nìǐn, nìí, m̀ mɛ nì gìɖìǐ, ɓɛ́ m̀ ké ḿ ɖùǔ gbo tò, ɓɛ́ ḿ ké m̀ fɔ̀nɔ̀-hwòɖǒ tɛ̀mɛ̀ìn.”