Jóɓò 32 - Ɓǎsɔ́ɔ̀ Báɓòɔ̀

Ɛ̀ƉÍHÙƐ̀ WUƉU ƁĚƆ̀ ( 32:1–37:24 ) Ɛ̀ɖíhù zà ɖé wuɖu

¹ Púɛɛ, gàa tã ɓěɔ̀ ɓɔ́ ma Jóɓò gbo wùɖùɛ̀, sepóɛɖé Jóɓò nìɛ̀ cɛ̃iń kánáá pū kà ɔ se ɖɛ gbà ɖò nyuɛ.

² Kɛɛ gàa ɖò nì ma ɓó kɔ̃̀ nyɛ́nɛ́ mɔ̀ Ɛ̀ɖíhù kɛɛ kpáìn ma Jóɓò dyoɖoún mìɔ cá, sepóɛɖé Jóɓò ɖá ɔ ɓíɖí ɓɛ̀ɖɛ̀ìn dyí, ké ɔ nì ma Gèɖèpɔ́ɔ̀ kàǐn jè. Ɛ̀ɖíhù mɔ̀ ma Bàwáɖákèò ɓɛ́ ɔ mɔ̀ ma Wáɖáùn gbǒ-xwíníín-nyɔ̀ ɓěɔ̀ ɖòɛɛ dyú-gàà. Bàwáɖákèò mɔ̀ ma Búzè nììn xwéɖé-dùɔ̀ nyɔ ɖò.

³ Ɛ̀ɖíhù kpáìn ma Jóɓòɛ̀ ɓǎto tã ɓěɔ̀ dyoɖoún ɖekè, sepóɛɖé kɛbì wa mɛ kpɔ̃̀ìn ma Jóɓò zaa kà ɔ nyu ɖɛ gbà kɛɛ, wa se ma fɔ̀nɔ̀-hwòɖǒ ké Jóɓò ɖuɛɛ da dyéɛ ɓɛ́ìn.

⁴ Ɛ̀ɖíhù fòìn ma ɓɛ́ Jóɓòɛ̀ ɓǎto tã ɓěɔ̀ ké ma wuɖu jaɖa, sepóɛɖé wa mɔ̀ ma nyɔ vɛ̀nɛ̀ ɓó ɔ gbo.

⁵ Ti ɓɛ́ Ɛ̀ɖíhù dyéɛ ma kà gàa tã ɓěɔ̀ se ma Jóɓò gɔ̃̌ jǔɛ ɓɛ́ìn nyɛɛ, púɛɛ, ɔ kpá ma dyoɖoún.

⁶ Hwɛ̀ ké Ɛ̀ɖíhù mɔ̀à Bàwáɖákèò ɓɛ́ ɔ mɔ̀à Búzèɛ̀ xwéɖé-dùɔ̀ nyɔ ɓěɔ̀ ɖòɛɛ dyú-gààɔ̀ kɛɛ zà ma ɖé wuɖu, ké ɔ ɖá, “Ɓěɛ̀ zɔ̃ po ní zɔ̃ ɖe. Ɔ jèɛɛ, ḿ fɛ̃̀ìn má ní ɓó ɓě dyúa, ɓɛ́ ḿ kéɔ́ má ɖɛ mɔ̀ ní fɔ̀nɔ̀-hwòɖǒɛɛ cɛ̃.

⁷ Ní hwòɖǒ ɖá ɔ nɔ̀mɔ̀ɔ̌ má dyíin ɓɛ́ nyɔ vɛ̀nɛ̀ ɓěɔ̀ kéɔ́ wùɖù. Ní hwòɖǒ ɖá ɔ nɔ̀mɔ̀ɔ̌ má dyíin ɓɛ́ nyɔ ɓě ɓɛ́ wa ɖǎ toɖo-kpàà kɔ̃ hwèɖèìn nyɛɛ kéɔ́ má nyɔǔn fɔ̀nɔ̀-hwòɖǒ tɛ̀mɛ̀ìn.

⁸ Kɛɛ mɛ̀nɛ̌-kèǐn, ɔ se ná nì. Kpé-séín-ɓéɖé-Gèɖèpɔ́ɔ̀ Zùù ɓɛ́ ɔ mɔ̀ fɛ̀ɛ̀ ɓɛ́ ɔ poà ɖé nyɔǔn-dyù múɛɛ mɔ̀ nyɔ-hwòɖǒ-fɔ̀nɔ̀ìn-nyɔ̀.

⁹ Ɔ se hwèɖèìn-hwèɖèìn ké nyɔ ɖò hwòɖǒ-fɔ̀nɔ̀-nyɔ̀ mú nyuɛ. Ɔ se zɔ̃ jĩ̀ kà ɓɛ́ nyɔ ɖò nyu toɖo-kpàà kɔ̃ɛɛ ké ɔ ɖɛ sɛ́ɖɛ́ìn dyíɛɛ dyí-dyuò-nyɔ̀ mú nyuɛ.

¹⁰ Ɔ jèɛɛ, ɓě tò ḿ gbo ɖùǔ, ɓɛ́ ḿ ké ɖɛ mɔ̀ níǐn fɔ̀nɔ̀-hwòɖǒɛɛ ɓě gbo cɛ̃.

¹¹ “Ɓě gmɔ̀ nɔ̄, ti ɓɛ́ ɓě nì ma wùɖùɛ̌n nyɛɛ, ḿ nì gìɖìǐ, ké ḿ tò ɖùǔ. Ḿ kpɔ̃ ma ḿ mìɔùn dyí ti ɓɛ́ ɓě nì ma fɔ̀nɔ̀-hwòɖǒ hwìɖǐi mɔ́ǐn nyɛ.

¹² Ḿ tò ɓě gbo ɖùǔ nɔ̀mɔ̀ dyíin, ké ḿ dyéɛ kà ɓě nyɔ ɖò se Jóɓò zaaɔ̀ dúún wáɖáa ɓɛ́ìn nyɛ. Ɖɛ ɓɛ́ ɓě ɖò ké cɛ̃ cá ɓɛ́ ɔ kéɛ nyɔǔn dyí tɛ̀mɛ̀ìn kà ɖɛ ɓɛ́ Jóɓò cɛ̃à kɛɛ se jǎà kɛɛ ɖò se nì.

¹³ Xwɛ̌ ɓě ɓɛ́ìn cɛ̃ɛ kà ɓě ɓéɖé fɔ̀nɔ̀-hwòɖǒ séín nyɛ́? Ɓě táà dyi ɓɛ́ Gèɖèpɔ́ɔ̀ mɔ̀ nyɔ ké Jóɓò gɔ̃̌ jǔ, sepóɛɖé ɓě seɛ nyuɛ ɓɛ́ìn.

¹⁴ Ɓě mɔ̀ nyɔ Jóɓò wùɖù gbo. Ɔ se ḿ gbo wùɖù. Ní mu ɔ gɔ̃̌ jǔùn, kɛɛ ɔ se kà ɓě mɔ̀ùn jǔà ɔ gɔ̃̌ kɛ.

¹⁵ “Jóɓò, m̀ ɖǎ nì ɓǎto ɓěɔ̀ wɔ̃ kã, ké wa se ɖɛ ɖò ɓéɖé wa ké cɛ̃ ɖe. Wa se gɔ̃̌-jǔ-wùɖù ɖò ɓéɖé ɖe ɓó m̀ bìì.

¹⁶ Ḿ mɛ nì gìɖìǐ ke kánáá pūù, kà ɓɛ́ wa nyànàà ɓó dyi, ké wa seà ɖɛ ɖò ɓéɖé ɓɛ́ wa kéà cɛ̃ ɖeɛɛ̀?

¹⁷ Mɔ́ún muá níǐn gɔ̃̌-jǔ-wùɖù tòùn. Mɔ́ún muá níǐn fɔ̀nɔ̀-hwòɖǒ tòùn.

¹⁸ Ḿ ɓéɖé ɖɛ ɓáún-ɓáún ḿ ké cɛ̃, ké ní zùù nìà ɖé ḿ múɛ nì ḿ kɔ̃ nɛ́iń ɓɛ́ ḿ ké wùɖù.

¹⁹ Gmɔ̀ nɔ̄, ḿ se wùɖù ní, ní mu wɛ̀ìn kà wã́ìn-tɛ̀ɓɛ̀ɛ̌ ɓɛ́ wa poà wã́ìn ɖìè múɛɛ gèà wɔ̃ɛ.

²⁰ Ḿ se ḿ mìɔùn dyí kpɔ̃ɔ ɓɛ́ìn ɖe. Ḿ ɓéɖé ḿ ké wɔ̃ ɓáà ɓɛ́ ḿ ké ɖé wuɖu zà.

²¹ Ḿ se nyɔ ɖò gbo ziɛ́ mu ɖé ɖɛ nìà kɛ mú, ké ḿ se nyɔ ɖò wuɖu fóɖóún mú cáǐn mu.

²² Ḿ se nyɔ ɖò wuɖu fóɖóún mú cáìn dyuò. Ḿ dyiɔ́ náa nyu ní Gèɖèpɔ́ɔ̀ ɓɛ́ ɔ mɛà ḿ wɛ̃ɛ muɔ́ ɓó ḿ hwìǐ zàùn wàɖà.