Jóɓò 31 - Ɓǎsɔ́ɔ̀ Báɓòɔ̀

Jóɓò jaɖa wuɖu

¹ “Ḿ ɖǎ wuɖu ɖi, kà ḿ se màa-dyù gmɔ̀ ɖò dya gmɔ̀ɔ̌ mu ɓó ɔ mɔ́-kà kɛ.

² Ɖɛ́ mɔ̀ pɛ́ɛ̀-ɖɛ̀ ɓɛ́ kpé-séín-ɓéɖé-Gèɖèpɔ́ɔ̀ nìà ɖé dyɔún wɛ̃ɛ mu nyɔ ɓě nyu ɖɛ nì kà kɛɛ pɛ́ɛ̀ìn nyɛ́? Ɖɛ́ ɔ mu wa nyíìn nyɛ́?

³ Má, ɔ mu fũ̀à-fṹá kè mú-gbɔɔ̀-gbɔɔ̀ hwòɖǒ-kɔ̃in-nyìnììn-nyɔ̀ ɓě mɔ̀ ɖɛ-gbà-nyu-nyɔ̀ ɓěɔ̀ kɔ̃ tòùne?

⁴ Gèɖèpɔ́ɔ̀ dyuò ɖɛ séín ḿ nyuɛɛ dyí, ké ɔ dyuò ní ɓo-bɛ̃̀ séín dyí.

⁵ “Ḿ se fɛ̀ɛ̀ se dyí sɛ́ɖɛ́ìn nyɛɛ cĩ́, ké ḿ se ɓo xwai fṹà ɓó ḿ mǔè ɖò cá jè gbo nà jè.

⁶ Gèɖèpɔ́ɔ̀ mɛ po ḿ pṹá jɛ́ɛ́ɔ̀ kɔ̃, ɓɛ́ ɔ ké jǎà nì ɖé ḿ múɛɛ dyí dyuò.

⁷ Ɔ jǔ ké ní nà-ɓòɔ̀ dyi hwìǐ sɔ̀ìn, mɔɔ ké ní hwòɖǒɔ̀ dyi ní dyéɖéɛ̀-dyéé-ɖɛ̀ gbo gmɔ̀ìn, mɔɔ ké nàmàǔn dyi ní xwaɔ̀ zɛ̀nɛ̌ po ní,

⁸ nìí, nyɔ kà kò ɖò mɔ̀ nyɔ mɛ ɖi ɖɛ ḿ ɓá kɛɛ ɓo, ké wa mɛ zà ní ɓáá-ɖɛ̀ ɓěɔ̀ hwuɖu.

⁹ “Ɔ jǔ ké ḿ mǔè ɖòɛ̀ gmàà dyi ḿ hwìɖǐi nɔ̀mɔ̀, ké ɔ jè dyiɛ nyu ké ḿ dyi ḿ mǔèɔ̀ gbǒ-wɔ̃̀ fò ní,

¹⁰ nìí, níǐn gmààɔ̀ mɛ pĩ gàa kà kò ɖò bìì, ké gàaɔ̀ mɛ pɛ̃́ ɔ gbo.

¹¹ Gmaɖe-po-nàmàǔn mɔ̀ dɛ̃-ɖɛ̀, ké ɔ mɔ̀ ɖɛ kɔ̃̀ jè zaa-wɔ̃-po-nyɔ̀ ɓě ɓéɖé wa ké nyɔ nyuɛ náa kɛɛ gǎ kɔ̃ tò kɛ.

¹² Ɔ muɔ́ má ɖɛ-mú-gbɔɔ̀-nyɛ̀ jǔùn, ɓɛ́ ɔ kéɔ́ má ní kɔ̃̀ɔ̀-ɖɛ̀ séín ɓěɔ̀ mú gbɔɔ̀.

¹³ “Ɔ jǔ ké ní gbo-nì-gàà mɔɔ gbo-nì-màà ɓěɔ̀ ɖò dyi ka ɓá ɖɛ gbà ɖò ɓɛ́ ḿ nyu ɔ bũ̌ɛɛ jè dyí, ké ḿ dyi ɔ ka-wùɖùɔ̀ ɖùǔ dyi zàìn,

¹⁴ ké Gèɖèpɔ́ɔ̀ dyi dyi, ké ɔ dyi ḿ dyi diè ní, ɖɛ́ ní mu ɔ gɔ̃̌ jǔìn nyɛ́?

¹⁵ Má, kà dyúáɖò kà Gèɖèpɔ́ɔ̀ nyuà mɔ́ún mɛɛ ɖé ḿ ɖe xwíníín nyɛɛ, kà dyúáɖòɔ̀ kǎà ɔ mɛ wa mɔ̀ùn ɖé wa ɖe xwíníín ɖekèe?

¹⁶ “Ḿ séè ɖɛ gǎ-dyé-nyɔ̀ ɓě kɔ̃̀ wa kéɔ́ dyéɛɛ wa ɓùɖùìn ɖò, mɔɔ ké ḿ séèɛ̀ nyu ɖò ɓɛ́ jɔ̌ɔ̀-màà ɖòɛ̀ hwòɖǒ ké ɖé ɖei kpá.

¹⁷ Ḿ séè xwíè-dyù ɖò ɖii-ɖɛ̀ ɓùɖùìn ɖò, ti ɓɛ́ mɔ́ nì ɔ nyuɛń nyɛ.

¹⁸ Ḿ ɖǎ xwíè-dyù ɓěɛ̀ ɓǎ-ɖɛ̀ nyu ɖé ní fɛ̀ɛ̀-wè séín mú, ké ḿ ɖǎ jɔ̌ɔ̀-màà ɓě gbo kpá kánáá pū.

¹⁹ Ḿ dyiɛ ma dyé ké gǎ-dyé-nyɔ̀ ɖò dyi ma múin fɔ̀nɔ̀, ké sɔ̃̀ɔ̀ dyi ɔ ɖáɓáuń nìǐn, ḿ po ma ɔ ɖɔún.

²⁰ Ḿ nyí ma ɔ ɓáɖáá-mì-ɖɔ̀ ɓɛ́ wa ɖaɓa sɔ̀ìn ḿ mìɔùn nììn ɓáɖáá ɓěɔ̀ mí múɛ, ɓɛ́ zùzù ké ma ɔ kpɔ̃̀ìn, ké ɔ po ma ḿ zùo.

²¹ Ḿ se ma xwíè-dyù ɖò jeín mɔ́, sepóɛɖé ḿ ɓɛ́ìn ɔ zaa dúún wáɖáa jè.

²² Ḿ se ma ɖɛín-ɖɛ̀ ɓěa ɖò nyu ní, nìí, ní sɔ̃ ɓěɔ̀ mɛ sɔ̀ìn kò-naín. Wa mɛ keè ɓó ní kɔún-kpàɔ̀ dyí, ɓɛ́ wa ké dyi kpá.

²³ Ḿ fɛ̃̀ìn ma Gèɖèpɔ́ɔ̀ nyɔ-gǎ-kɔ̃-tò-tòɔ̀ dyi mìɔ. Ɔ jèɛɛ, ḿ se ma ɖɛ gbà nì ná ɓěa ɖò nyuɛ ɓɛ́ìn.

²⁴ “Ḿ séè góò hwòɖǒ kɔ̃ dè ɖò, mɔɔ ké ḿ séèɛ̀ góò hwɛ̀ zɛ̀nɛ̌ǐn gbo cɛ̃ ɖò, ɓɛ́ ḿ ké níiń, ‘Mɔ̀ ḿ taɓa hwìɖǐǐo.’

²⁵ Ḿ séè múàǔn kpá ɖò ɓó kà ní kɔ́mɔ́ nyu dyai ɓɛ́ɛ kɛɛ jè, mɔɔ ɖɛ jĩ̀ kà nì ɖé ḿ xwaún wɛ̃ɛ jè.

²⁶ Ḿ séè dyóɖóɔ̀ mɔɔ dɛ̀nɛ̀ɔ̀ fã-fãɔ̀ ɖé dyɔɔ̀ dyí dyé, ɓɛ́ ɔ dĩ́ín-dĩ̀ìnɔ̀ kéɛ nyu ɓɛ́ ḿ ké ɔ ɓièɛ̀ mɔ́.

²⁷ Ní hwòɖǒ séè ɖé wa ɓiè jè gbo gmɔ̀ìn ɖò, ɓɛ́ ɔ kéɛ̀ nyu ɓɛ́ ḿ ké wa dya-dè-dè ɖò nyí dyììn ɖé ní sɔ̃ɔ̀ nyá-nyá mú.

²⁸ Ɖɛ ɓě nìà kɛ mɔ̀ nàmàǔn kɔ̃̀ jè zaa-wɔ̃-po-nyɔ̀ ɓě ɓéɖé wa ké nyɔ nyuɛ náa kɛɛ gǎ kɔ̃ tò ɖekèɛ. Ḿ dyiɔ́ náa nyu ní, ḿ nìɔ̌ má Gèɖèpɔ́ɔ̀ nìà ɖé dyɔún wɛ̃ɛ jè mú doɛ̌n.

²⁹ “Ḿ séè múàǔn kpá ɖò ɓó ní mú-nyɛ́-nyɔ̀ ɓěɔ̀ ɖɛ gbà dyí dyé jè, mɔɔ ké ní hwòɖǒ séè dyi dè ɖò ɓó fũ̀à-fṹá-ɖɛ̀ ɓě ɓɛ́ wa dyé dyíɛɛ jè.

³⁰ Ḿ séè wa mɛ́ jè gboò ɖò.

³¹ Ḿ ɓíɖí-taún-nyɔ̀ ɓěɔ̀ cɛ̃ɛ, ké wa ɖá, ‘Nyɛ́ séè Jóɓòɛ̀ ɖɛ ɖi ɖò, ɓɛ́ ɔ ké ɖoɓoɛ́?’

³² Zii-nyɔ̀ ɖò séè ní hwɔɖɔɔ̀ píé hwòɖǒǔn pɛ̃́ ɖò. Ḿ kaà ma ní gbǒɔ̀ ɖéè séín dyí.

³³ “Ḿ séè ní ɖɛ gbà ɖò ɖɛ kɔ̃in ɓáìn ɖò, kà nyɔ ɖíɛ́ ɓě nyuà waà nàmàǔn vǐèɛ̀ kà nyɔ vǐè kà ɖɛ ɖò ɖé nyɔ-mú-po-ɖɔ̀ xwíɖíiɛ.

³⁴ Ḿ séè fɛ̃̀ìn ɖò ɓá ɖɛ nyɔǔn ɓě mu ḿ kɔ̃ún cɛ̃ìn nyɛɛ jè dyí. Ḿ séè nyɔǔn ɓě ní dyɔ́ ɓaɖa jè dyi fɛ̃̀ìn ɖò, ɓɛ́ ɔ kéɛ nyu ɓɛ́ ḿ ké ní wɔ̃ kã, mɔɔ ɓɛ́ ḿ ké gbǒǔn kò.

³⁵ “Nyɛ́ ɖá nyɔ ɖò tòɔ̌ má ɖɛ ɓě ɓɛ́ ḿ nìà cɛ̃iń nyɛɛ ɖùǔ gboɛ́? Ḿ dyuòɛ̀ dyí wáɖáá kà wuɖu ɓě ɓɛ́ ḿ cɛ̃à kɛɛ ɖò-ɖò séín mɔ̀ jǎà kɛ. Kpé-séín-ɓéɖé-Gèɖèpɔ́ɔ̀ mɛ jǔ ḿ gɔ̃̌. “Nyɛ́ ɖá ɖɛ séín ɓě ɓɛ́ ní gbo-vɔ̃-nyɔ̀ɔ̀ poà ḿ dúún wɛ̃ɛ céèɔ̌ má céè-ɖɛ̀ ɖò mú, ɓɛ́ ḿ kéɔ́ máa dyé kɛ́?

³⁶ Ɔ dyiɔ́ ná nìǐn, ní muɔ́ máa kɔún dèìn. Ní muɔ́ máa dú dèìn, ɓɛ́ nyɔ séín kéɛ dyé.

³⁷ Ɔ dyiɔ́ ná nìǐn, ní muɔ́ ɖé Gèɖèpɔ́ɔ̀ dyéɖéín gmɔ̀ùn déín, ɓɛ́ ḿ kéɔ́ má ɔ ɖɛ séín ɓě ɓɛ́ ḿ ɖǎ nyuɛɛ ɔ gbo cɛ̃.

³⁸ “Ɔ jǔ ké ḿ dyi ma pá kɔ̃̀ kɔ̃ ɓɛ́ ḿ nyu ní geɖeɛɛ nyɔ ɖò xwa zà dyììn ɖéɛ dyíɖí-dyíɖí mú ní,

³⁹ mɔɔ ké ḿ dyi ɖɛ ɓɛ́ nyɔ ɖò ɓáa ɓo ɖi, ké ḿ seɛ jè pɛ́ɛ̀, ké ḿ dyiɛ nyu ɓɛ́ mɔ́ ké ɓáá-ɖɛ̀ɔ̀ ɓá-nyɔ̀ɔ̀ ɖáɓá ní,

⁴⁰ nìí, hwítì kè báɖè mɛ ɓɔ́ ɓó páɔ̀ kɔ̃ mɛɛ, kɛɛ ɖɛ mɛ mɛ ɓóɛɛ mɔ̀ wí-gbǎ kè pìǐ-kpò.” Dà ɓóɛ̀ Jóɓò nììn wuɖu ɓěɔ̀ jɛ̀ɖɛ̀ìn dúí.