Jóɓò 30 - Ɓǎsɔ́ɔ̀ Báɓòɔ̀

Jóɓò kpa wuɖu dyúa ke

¹ “Kɛɛ ɓó kàǔn wɛ̃ɛ, gàa ɓě ɓɛ́ wa mɔ̀ dyú-gbɔ́ɔ́ ɓó ḿ gboɛɛ nìǎ ḿ dyɔ́ ɓaɖauń. Wa ɓǎ ɓě se kpé ɓɛ́ìn ɓɛ́ wa ké ní nyúà-ɖɛ̀-dyí-gmɔ̀-gbè ɓěɔ̀ gbo kpá fóɖóún.

² Wa mɔ̀ nyɔ ɓě ɓɛ́ kpé ɖò se dyí nì ɖeɛ. Ɖɛ́ mɔ̀ kpáná ɖò ḿ ɓɛ́ìn ɖé wa mú dyéɛ kɛ́?

³ Wa dyé gǎ, ké mɔ́ nyu wa mìɔ jèɛɛ, wa tà cu-gmɛ̀nɛ̀ɛ̀ ɓě ɓó máaún ɖé gbǎùn-fúɖúá mɔ̀ dà kpái-kpái ɓě kɔ̃.

⁴ Wa zà cu ɓě nì ɖé gbǎùn-fúɖúá ɓěɔ̀ kɔ̃ɛɛ hwuɖu, ké wa nìɛ̀ gmɛ̀nɛ̀ɛ̀ ɓěɔ̀ tàǔn, hwɛ̀ ḿ po níiń, wa nì bóɖóùn-cù kɔ̃̀ gmɛ̀nɛ̀ɛ̀ seà ɖéèɛɛ tàǔn.

⁵ Nyɔ ɓě kúmú wa nyɔǔn hwìɛ̀ dyi, ké wa nì wa hwóó gbo wáɖáuń kà nyɔ wáɖáà dyíɖíí-nyɔ̀ hwóó gboɛ.

⁶ Ké wa ɓéɖé wa kéá ɓí ɓě mú cĩ́ ɖé toɖo beè-beè ɓě dyéɖéín, ɔ kè ɓí ɓě nì ɓóɖóún wɛ̃ kè ɖé sɔ́ɔ́ ɓě múɛɛ mú.

⁷ Wa nì wuɖu poɛń ɖé xwáɖá xwíɖíi, ké wa kpɔ̃ìn kpo ɖé wí-kpɔ̀ɔ̌ ɓě xwíɖíi.

⁸ Wa mɔ̀ zuɖuu-nyɔ̀ ɓě, ké kpáná ɖò se wa mú nì. Wa ɖǎ wa ɓóɖóɔ̀ kɔ̃ dyi kúmú.

⁹ “Kɛɛ ɓó kàǔn wɛ̃ɛ, waà dyú ɓěɔ̀ ɖǎ ḿ wɛ́ɖɛ́ín po. Mɔ̄ mɔ̀ǎ nɔ́ɔ́-dyi-pòìn-ɖɛ̀ ɓó wa bìì.

¹⁰ Ní jè nyàìn wa dyi. Wa se ḿ bũ̌in xwɛ̃́ìn mɔ́. Ɓó kɔ̃in ɖeɛɛ, wa dyi, ké wa po ḿ tɔ̃ɔ dyúa.

¹¹ Gèɖèpɔ́ɔ̀ ɖǎ ḿ xwaún zaìn, ké ḿ se ɖɛ ɖò nyuɛ ɓɛ́ìn ɖe jèɛɛ, wa nyuá ɖɛ wa mɔ́ ḿ bũ̌ nyuɛ dyiɛɛ pū.

¹² Nyɔ kúɖúú ɓěɔ̀ vɔ̃ ḿ gbo. Wa nyuɛ ké ḿ gbǔ. Wa nì hwìè séín dyi mɔ́uń, ɓɛ́ wa ké ḿ ɖáɓá.

¹³ Wa kã ní hwìè séín ɓěɔ̀, ké wa po ní fũ̀à-fṹá-ɖɛ̀ɔ̀ kɔ̃, ké nyɔ ɖò se ɓéɖé ɔ ké wa gbo kpá dyɛ mɔ̀ùn.

¹⁴ Wa dyi ḿ kɔ̃ kà sójà ɓě wáɖáà gmɔ ɖò ɓɛ́ wa dyià to poɛ. Wa dyi, ké wa gbǒìn ḿ kɔ̃.

¹⁵ Fã̀à ɖǎ ḿ wuɖuí kɔ̃̀. Ní dĩ́ín-dĩ̀ìnɔ̀ ɖǎ mu kà pìɔ̌ kpaà ɖɛ kɛ, ké ní kɔ́mɔ́-ɖɛ̀ ɓěɔ̀ pa dyi pū kà ní-kpò ɓɛ́ pìɔ̌ kpaà kɛɛ nìà kɛ.

¹⁶ “Ɓó kàǔn wɛ̃ɛ, ḿ nìǎ mɛ́iń muɛń. Gǎ-dyé-dyé ɖǎ ḿ wĩin kpɔ̃.

¹⁷ Ɓó máaún ní, ní kpá ɓěɔ̀ púɖú jùù, ké ní kpóɖó-dyùàɔ̀ puà-puàɔ̀ se ɓɔ́í kpáa ɓɛ́ìn.

¹⁸ Gèɖèpɔ́ɔ̀ kpɔ̃̀ìn ḿ bùnù, ké ní mú-po-ɖɔ̀ɔ̀ sã ní bùnùɔ̀.

¹⁹ Gèɖèpɔ́ɔ̀ ɖǎ ḿ ɓíɖíi dyi po ɓó bàɖàɔ̀ mú, ké ḿ mɔ̀ǎ sĩ̀ɔ̌.

²⁰ “Gèɖèpɔ́ɔ̀, ḿ nì m̀ ɖáuń, kɛɛ mɔ̀ǔn wɔ̃́ ní ɖá-wùɖùɔ̀. Ḿ nì m̀ ɓaàǔn, kɛɛ mɔ̀ǔn tò ḿ ɖùǔ gbo fóɖóún.

²¹ M̀ ɖǎ hwòɖǒ kɔ̃in nyìnììn ɓó ḿ gbo. M̀ nì ḿ gǎ dyéɛ̌n ɖé nì kpé séín mú.

²² M̀ bǎ ɓó ḿ ɓíɖíi, ké m̀ nyuɛ ké pìɔ̌ kpa ḿ. M̀ nì ḿ dyi vũàǔn ɖé dìì ku wɔ̃ mú.

²³ Ǹdye, ḿ dyuòɛ̀ dyí kà nì mu ḿ gĩɔ kpaùn wɛ̃. Ɔ mɔ̀ pá ɓɛ́ m̀ ɖǎ dyi dè, ɓɛ́ nyɔ séín ɓě nì cĩ́ɛń nyɛɛ ɓéɖé wa ké ɖé mu kɛ.

²⁴ Ḿ séè nyɔ mɔ̀ nyɔ ɓɛ́ ɔ nì ma gǎ-ɖɛ̀ ɖò dyí dyéɛń, ké ɔ pòìn ma ḿ kpéiɛɛ ɔ bũ̌in-puà-ɖɛ̀ ɖò bũ̌ nyu ɖò.

²⁵ Má, ní vĩ̌ ɓó nyɔ ɓě ɓɛ́ wa nì ma fũ̀à-fṹá múɛɛ bììe? Má, ní kpá wìǐn ɓó gǎ-dyé-nyɔ̀ ɓě bììe?

²⁶ Kɛɛ ḿ dyi ɖɛín-ɖɛ̀ mɔ́ ní, ɖɛ gbà mɔ̀ ɖɛ ní dyé dyí. Ḿ dyi ce fòìn ní, nìí, tíe-kpò mɔ̀ ɖɛ dyi ḿ gbo.

²⁷ Pòìn-hwìɖǐi ɖǎ ḿ xwaún zaìn, sepóɛɖé ní fũ̀à-fṹá-ɖɛ̀ɔ̀ nì kɔ̃ kpáuń ɓó wé kè wé xwíníín.

²⁸ Ní dyɔɔ̀-kùɔ̀ kpè ní, kɛɛ ɔ se dyóɖóɔ̀ kéɛ náa nyuɛ. Ḿ nyànà ɖé vòò-nyɔ̀ ɓěɔ̀ hwìɛ̀ dyi, ké ḿ páná mú, ɓɛ́ nyɔ ɖò ké ḿ gbo kpá.

²⁹ Ní wìì-kpě-po-wùɖùɔ̀ kè gṹú kè kùnǔù ɓɛ́ wa nì ɖé dà kpái-kpáiɛɛ kpé-po-wùɖù hwɔìn ní.

³⁰ Ní dyɔɔ̀-kùɔ̀ ɖǎ kpè, ké ní kuɔ̀ nì ḿ bũ̌in sɔ̀ǔn. Ké ní dyɔɔ̀ sùmù gbó-gbó.

³¹ Ní gbǎɖíɔ̀ wuɖu ɖéé-ɖééɔ̀ ɖǎ wìì-wùɖù mú zɛ̃̀ìn, ké ní péé-pooɔ̀ wuɖuɔ̀ ɖǎ kpé-po-wùɖù mú zɛ̃̀ìn.