Jóɓò 3 - Ɓǎsɔ́ɔ̀ Báɓòɔ̀

Ka-wùɖù ɓɛ́ Jóɓò cɛ̃ ma ɓó Gèɖèpɔ́ɔ̀ dyúa kɛ

¹ Hwɛ̀ ké Jóɓò kaà ma wɔ̃, ké ɔ gboò ma ɔ wóɖó-wèɔ̀.

² Jóɓò ɖá,

³ “Óó Gèɖèpɔ́ɔ̀, wé kɔ̃̀ ɓaɖa ḿ wóɖó ma kà kɛɛ, gboò-wùɖù mɛ nìɛ̀ kɔ̃, ɔ kè máaún-hwùɖù kɔ̃̀ ɓaɖa ɓɛ́ ḿ ɖe ɖú ma ní zùù dyíɛ.

⁴ Gèɖèpɔ́ɔ̀, mɔ̀ nìà ɖé dyɔún wɛ̃ɛ, m̀ mɛ zɛ̃̀ìn wéɔ̀ tíe-kpò mú. M̀ mɛ ɓɔ́ ɖéɛ jè gbo kɔ̃̀ɔ̀, ké ce ɖò mɛ ɓɔ́ fɔ̀nɔ̀ɔ̀ ɓó wéa ɓaɖa.

⁵ Nyuɛ ɓɛ́ gbèè ké dyí dyiìn, ɓɛ́ tíe-kpò kpɛ̃̀ ké kpɔ̃ ɓó wéa ɓaɖa. Ní-kpò kpɛ̃̀ mɛ ɓáìn ɖé dyɔɔ̀ dyíin, ɓɛ́ nyɔ ɖò ké se dyóɖóɔ̀ ce ɖò dyé, ɓɛ́ tíe-kpòɔ̀ ké nyɔǔn díɖí tàɓàìn.

⁶ Ɓá máaún-hwùɖùɔ̀ mɔ̀ùn jè dyíɛɛ, ɔ nììn tíeɔ̀ mɛ mɔ̀ tíe-kpò kpɛ̃̀. Ɔ mɛ ɓɔ́ zɔ̃ɔ̀ nììn wé ɖò jè hwìɛ̀ kpáa, mɔɔ ké ɔ mɛ ɓɔ́ dɛ̀nɛ̀ ɖòɛ̀ wé ɖò jǔɛ.

⁷ Màa ɖò mɛ ɓɔ́ zùù dyí ɖúɛ ɓó máaún-hwùɖùɔ̀ mú. Ɔ mɛ mɔ̀ máaún-hwùɖù kɔ̃̀ mú nyɔ ɖò se múàǔn kpáa ɓɛ́ìn fɔɔ cá kɛ.

⁸ Nyɔ ɓě mɔ̀ ɖɛ-gboò-nyɔ̀ɛɛ mɛ gboò máaún-hwùɖùɔ̀. Wa mɔ̀ nyɔ ɓě mɔ̀ Ɖìváítàùn dyóó-hwùɖù-zà-nyɔ̀ ɓěɛ.

⁹ Mɔ̀ǔn wɔ̃́ ké zɔ̃-wĩín-dɛ̀nɛ̀-dyù ɓěɔ̀ ní fã ɓó máaún-hwùɖùɔ̀ mú. Ɔ mɛ kpéɖé ce, kɛɛ ɔ ní dyéɛ. Mɔ̀ǔn wɔ̃́ ké máaún-hwùɖùɔ̀ ní dyé zɔ̃ɔ̀ ce ɖò.

¹⁰ Po máaún-hwùɖùɔ̀ gboò-wùɖù kɔ̃, sepóɛɖé ɔ se ní wóɖó jèɔ̀ jè gbo nɔ́ɔ́. Ɔ táà dyi ké ḿ wóɖó nɔ̄ fũ̀à-fṹá-tòɖò-kpàà kɔ̃.

¹¹ “Ɖɛ́ kɔ̃̀ jè ḿ se ma ɖé ḿ ɖe xwíníín mɛ́ìn nyɛ́? Ɖɛ́ kɔ̃̀ jè ti ɓɛ́ ḿ wóɖó ma kà ɖé ḿ ɖe xwíníín nyɛ̀nɛ̀ɛ̀ kɛɛ ḿ se ma mɛ́ kɛ́?

¹² Ɖɛ́ kɔ̃̀ jè ḿ ɖe pɛ̃́ìn ma ḿ pɔ̃́ kɔ̃ dyiɛ́? Ɖɛ́ kɔ̃̀ jè ḿ ɖe po ma ḿ nɛɛ̀ wɔ̃ɛ́?

¹³ Ḿ dyi ma mɛ́ ní, nìí, ɓó kàǔn wɛ̃ɛ, ní muɔ́ má dyi pɛ̃́ìn gìɖìǐ, ɓɛ́ ḿ kéɔ́ má fɔ̀.

¹⁴ Ḿ kè kã́á ɓě kè gɔ̌mànà-nyɔ̀ ɓě muɔ́ má dà dyúáɖò nììn. Wa mɔ̀ nyɔ ɓě ɓɛ́ wa po zɔ̃̌ɔ̀ kà gbǒ kpa ɖɛ ɓě ɓó wa mìɔùn bìì, ɓɛ́ gbǒ ɓěɔ̀ dyiá kà fóɖóún kpá ɓó kàǔn wɛ̃.

¹⁵ Ní muɔ́ má ɖé ɓóɖó-wuɖuí-kɔ̃̀-nyɔ̀ ɓě ɖǎ mɛ́ɛ gbo nììn. Wa mɔ̀ nyɔ ɓě ɓɛ́ wa dyíìn ma waà gbǒ ɓěɔ̀ góò kè séɓàɖà múin nyɛ.

¹⁶ Ɖɛ́ kɔ̃̀ jè ḿ se ma nì kà dyú seà ku, ɓɛ́ ɔ dyià wóɖó, ɓɛ́ ɔ se dyóɖóɛ̀ ce ɖò dyéɛɛ nìà kɛɛ́?

¹⁷ Ɖé gĩɔ, ɖéɛ̀ hwòɖǒ-kɔ̃in-nyìnììn-nyɔ̀ ɓěɔ̀ ní nyùìn nyɔ ɖò fũ̀à-fṹá ɖe, ké ɖéɛ̀ nyɔ ɓě ɓɛ́ wa sa kɛɛ ɓéɖé fɔ̀-fɔ̀.

¹⁸ Ɖéɛ̀ nyɔ ɓě ɓɛ́ wa mɔ̀ ma gǐìɛɛ hwòɖǒ dè dyi. Wa ní wɔ̃́ ɖé waà dyi-pĩ́à-nyɔ̀ ɓěɔ̀ mú-páná-wùɖù ɖe.

¹⁹ Nyɔ kpa ɖɛ ɓě kè nyɔ se ɖɛ kpa ɓě wa séín nì ɖé, ké gǐì ɓě ɖǎ waà kɔ̃̀-nyɔ̀ ɓě xwaún buɛ̀.

²⁰ “Ɖɛ́ kɔ̃̀ jè nyɔ ɓě kɔ̃̀ hwòɖǒ-dyùà nì fũ̀à-fṹá múɛɛ dyéà ce kɛ́? Ɖɛ́ kɔ̃̀ jè nyɔ ɓě ɓɛ́ wìì dyíìn wa múin nyɛɛ nìà cĩ́ɛń keɛ́?

²¹ Wa nì gĩɔ kpéɖéɛń, kɛɛ ɔ ní dyi wa gbo. Waà hwòɖǒ mɔ́ɔ xwéé ké ɔ zi kɔ́mɔ́-ɖɛ̀ kpa ɖɛ dyí.

²² Nyɔ nì ná ɓěɔ̀ dyi xwɛ́-ɓìɔ̀ dyɛ̀ìn ní, waà hwòɖǒ dè dyi mìɔ.

²³ Ɖɛ́ kɔ̃̀ jè Gèɖèpɔ́ɔ̀ nyuɛ ɓɛ́ nyɔ ɓɛ́ ɔ gbǎìn gbǒ dyíin, ké ɔ se ɔ mìɔùn nììn sèìn-naín dyuòɛɛ dyià cĩ́ kɛ́?

²⁴ Wìì mɔ̀ ní ɖii-ɖɛ̀, ké mícɛ̃̀ mɔ̀ ní ké ḿ náa.

²⁵ Ɖɛ kɔ̃̀ jè ní hwòɖǒ gbǎìn ma dyiíɛɛ ɖǎà ḿ gbo kpáà. Ɖɛ kɔ̃̀ fã̀à ḿ peɖe ma kɛɛ, ḿ ɖǎà dyí dyéɛ̀.

²⁶ Ḿ se fɛ̀ɛ̀ nɔ̀mɔ̀ dyíin ɖò mú cĩ́, mɔɔ ké ḿ se gìɖìǐ kè fɔ̀-fɔ̀ ɖò ɓéɖé. Kɛɛ fũ̀à-fṹá-ɖɛ̀ dyi ḿ kɔ̃.”